ភរិយាបណ្ឌិត កែម ឡី លើកឡើងថា ភាពអយុត្តិធម៌នៅកម្ពុជា បានក្លាយទៅជាភាពអណាធិបតេយ្យសម្រាប់ប្រព័ន្ធគ្រប់គ្រងរដ្ឋរបស់លោក ហ៊ុន សែន អស់ទៅហើយ។
ភរិយាបណ្ឌិត កែម ឡី អ្នកស្រី ប៊ូ រចនា បានសរសេរនៅលើគណនីហ្វេសប៊ុក (Facebook) របស់អ្នកស្រីនៅថ្ងៃនេះដោយលើកឡើងពីទស្សនៈពីរដែលមានលក្ខណៈផ្ទុយគ្នា ប៉ុន្តែទស្សនៈទាំងពីរនេះបែរជាបង្ហាញពីស្ថានភាពអណាធិបតេយ្យដែលកើតមានព្រោងព្រាតនៅកម្ពុជា ក្រោមការដឹកនាំរបស់លោក ហ៊ុន សែន នាពេលបច្ចុប្បន្ននេះបានយ៉ាងច្បាស់ទៅវិញ។
អ្នកស្រីលើកឡើងថា មានទស្សនៈមួយអះអាងថា ហេតុអ្វីក៏បណ្ឌិត កែម ឡី ចេះគ្រប់មុខ និយាយត្រូវៗ និងចំៗម្ល៉េះអំពីភាពអយុត្តិធម៌ដែលបានកើតឡើងក្នុងសង្គមកម្ពុជា បើទោះបីជារឿងអាស្រូវទាំងនោះ រដ្ឋាភិបាលឬមន្ត្រីថ្នាក់ក្រោមមួយចំនួនបានឃុបឃិតគ្នាប្រឹងលាក់មិនឱ្យលេចធ្លាយទៅខាងក្រៅក៏ដោយ ហេតុអ្វីនៅតែបណ្ឌិត កែម ឡី អាចដឹងបានទៀតនោះ។
អ្នកស្រីបញ្ជាក់ថា ទស្សនៈមួយនេះត្រូវបានបដិសេធចោលទាំងស្រុង ខណៈពួកអ្នកជំទាស់អះអាងថា តាមពិត បណ្ឌិត កែម ឡី មិនដឹងរឿងអយុត្តិធម៌ច្រើនទេ ហើយគាត់ក៏មិនចេះអ្វីច្រើនដែរ ប៉ុន្តែដោយសាររដ្ឋាភិបាលកម្ពុជា បង្កើតបញ្ហាច្រើនពេក ដូច្នេះបណ្ឌិត កែម ឡី និយាយត្រង់ណាក៏ត្រូវដែរ។
អ្នកស្រីអះអាងថា នៅកម្ពុជា រឿងអយុត្តិធម៌មួយមិនទាន់ដោះស្រាយបានផង តែមន្ត្រីខិលខូចទាំងនោះបែរជានាំគ្នាបង្កើតរឿងអយុត្តិធម៌រាប់រយជំពូកបន្ថែមទៀត។ ដូច្នេះមិនចាំបាច់តែបណ្ឌិត កែម ឡី និយាយទេ សូម្បីតែកូនក្មេងក៏អាចនិយាយត្រូវដែរ ព្រោះបញ្ហាអយុត្តិធម៌សង្គមនៅកម្ពុជា បច្ចុប្បន្ននេះមានច្រើនហួសហេតុ និងតែងកើតឡើងគ្រប់ទីកន្លែង ដែលពួកគេអាចមើលឃើញ និងយល់បានដោយងាយ។
ការអះអាងនេះ ធ្វើដើម្បីរិះគន់រដ្ឋាភិបាលកម្ពុជាបច្ចុប្បន្នក្រោមការគ្រប់គ្រងរបស់គណបក្សប្រជាជនកម្ពុជា ដែលដឹកនាំដោយលោក ហ៊ុន សែន ដែលតែងបន្សល់នូវសោកនាដកម្មដល់ជនរងគ្រោះដែលមិនអាចទទួលបាននូវយុត្តិធម៌ស្ទើរគ្រប់ករណីនាពេលកន្លងមក។
កាលពីអំឡុងឆ្នាំ២០២០ អង្គការគម្រោងយុត្តិធម៌ពិភពលោក (World Justice Project) បានផ្តល់ពិន្ទុឱ្យកម្ពុជា ជាប់លេខរៀងទី១២៧ ក្នុងចំណោមប្រទេសចំនួន ១២៨ នៅជុំវិញពិភពលោក ដោយបង្ហាញថា ប្រព័ន្ធយុត្តិធម៌នៅកម្ពុជា អាក្រក់បំផុតនៅក្នុងលោក ប៉ុន្តែពិន្ទុរបស់កម្ពុជាល្អជាងតែប្រទេសវេណេហ្ស៊ុយអេឡា មួយប៉ុណ្ណោះ។
របាយការណ៍ដដែលនេះបានរកឃើញថា ការជ្រៀតជ្រែករបស់អ្នកមានអំណាចក្នុងជួររដ្ឋាភិបាលកម្ពុជា ដែលបង្កើតឱ្យមានអំពើពុករលួយ រឹតត្បិតសិទ្ធិមូលដ្ឋាន អសន្តិសុខក្នុងប្រទេស ការអនុវត្តច្បាប់មិនត្រឹមត្រូវ ទើបធ្វើឱ្យនីតិរដ្ឋនៅកម្ពុជាទទួលបានពិន្ទុអាក្រក់បំផុតទាំងនៅក្នុងតំបន់ និងនៅក្នុងពិភពលោកបែបនេះ។
ជុំវិញបញ្ហានេះ ក្រុមអ្នកសង្កេតការណ៍ រិះគន់ថា ឃាតកម្មធំៗកន្លងមកលើជនរងគ្រោះ រដ្ឋាភិបាលកម្ពុជាមិនដែលវែករកមុខឃាតកពិតយកទៅផ្ដន្ទាទោស ដើម្បីផ្តល់យុត្តិធម៌ដល់សាច់ញាតិរបស់ជនរងគ្រោះនោះទេ ក្នុងនោះមានដូចជា អតីតប្រធានសហជីពសេរីកម្មករកម្ពុជា លោក ជា វិជ្ជា ដែលត្រូវឃាតកបាញ់សម្លាប់នៅឆ្នាំ២០០៤ ក្នុងទីក្រុងភ្នំពេញ ព្រះភិក្ខុ សំ ប៊ុនធឿន ដែលត្រូវខ្មាន់កាំភ្លើងបាញ់សម្លាប់ក្នុងឆ្នាំ២០០៣។
ប្រធានអង្គការការពារធនធានធម្មជាតិ លោក ឈុត វុទ្ធី ដែលត្រូវជនមិនស្គាល់មុខបាញ់សម្លាប់នៅខេត្តកោះកុង ក្នុងឆ្នាំ២០១២ និងបណ្ឌិត កែម ឡី ដែលត្រូវឃាតកបាញ់សម្លាប់នៅឆ្នាំ២០១៦ កណ្តាលទីក្រុងភ្នំពេញទាំងកណ្តាលថ្ងៃជាដើម។
យ៉ាងណាក៏ដោយ ប្រមុខរដ្ឋាភិបាលកម្ពុជា ធ្លាប់បានអះអាងកាលពីខែសីហា ឆ្នាំ២០២០ ថា លោកនឹងមិនអនុញ្ញាតឱ្យនរណាបំផ្លាញសន្តិភាពរបស់កម្ពុជាបានឡើយ ទោះត្រូវលះបង់ក្នុងតម្លៃណាក៏ដោយ ព្រោះសន្តិភាពដែលកម្ពុជាកំពុងមានសព្វថ្ងៃនេះ គឺលោករកបានមកដោយលំបាក។
ទោះជាយ៉ាងណាក៏ដោយ ក្រុមអ្នកឃ្លាំមើលសិទ្ធិមនុស្ស ប្រតិកម្មថា ក្រុមលោក ហ៊ុន សែន តែងតែអួតអាងពីសន្តិភាពដែលរដ្ឋាភិបាលរបស់លោកដឹកនាំសព្វថ្ងៃនេះ ប៉ុន្តែការពិត គឺជាការគាបសង្កត់ និងបង្ខិតបង្ខំឱ្យពលរដ្ឋខ្មែរសូត្រពាក្យ «អរគុណសន្តិភាព» ក្រោមចុងកាណុងកាំភ្លើងនៃរដ្ឋាភិបាលឯកបក្សរបស់លោកតែប៉ុណ្ណោះ៕