អ្នកជាប់ឃុំខ្មែរសញ្ជាតិជាតិអាមេរិកម្នាក់បានស្លាប់អំឡុងពេលបញ្ជូនមកព្យាបាលកូវីដ-១៩ នៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី១០ ខែមិថុនា ខណៈជំងឺកូវីដ-១៩ កំពុងឆ្លងចូលពន្ធនាគារនៅតាមបណ្ដាលរាជធានី-ខេត្ត។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានប្រាប់សារព័ត៌មាន VOD នៅថ្ងៃសុក្រ ទី១១ មិថុនា ថា អ្នកជាប់ឃុំដែលស្លាប់នោះមានអាយុ ៧២ឆ្នាំជាជនជាតិខ្មែរសញ្ជាតិអាមេរិក។
លោកបញ្ជាក់ថា អ្នកជាប់ឃុំដែលមានវ័យ ៧២ឆ្នាំរូបនេះបានឆ្លងជំងឺកូវីដ-១៩ ស្របពេលដែលគាត់កំពុងមានជំងឺប្រចាំកាយ ទើបបណ្ដាលឱ្យស្លាប់។ អ្នកជាប់ឃុំដែលស្លាប់ ត្រូវបានតុលាការកាត់ទោសឱ្យជាប់ពន្ធនាគារមួយជីវិតនៅខែមិថុនា ឆ្នាំ២០០១ រួមជាមួយមនុស្ស ២៩នាក់ផ្សេងទៀតដែលទទួលទោសចន្លោះពី ៣ឆ្នាំដល់មួយជីវិត។
ជំងឺកូវីដ-១៩ បានឆ្លងលើមន្ត្រីពន្ធនាគារ និងអ្នកជាប់ឃុំចាប់តាំងពីដើមខែឧសភា ឆ្នាំ២០២១ ក្នុងនោះពន្ធនាគារព្រៃសរាជធានីភ្នំពេញ ពន្ធនាគារខេត្តព្រះសីហនុ ខេត្តកណ្ដាល កំពង់ស្ពឺ ស្វាយរៀង បន្ទាយមានជ័យ ប៉ៃលិន និងខេត្តសៀមរាប។
ក្រោយពីមានការផ្ទុះជំងឺកូវីដ-១៩ ចូលពន្ធនាគារ នៅថ្ងៃទី៩ ខែមិថុនា ឆ្នាំ២០២១ ក្រសួងមហាផ្ទៃបានចេញវិធានការទប់ស្កាត់ការឆ្លងរាលដាលជំងឺកូវីដ-១៩ ដោយប្រាប់ទៅអភិបាលរាជធានី-ខេត្តឱ្យយកចិត្តទុកដាក់សម្របសម្រួលជាមួយមន្ទីរសុខាភិបាល និងស្ថាប័នពាក់ព័ន្ធផ្សេងទៀតផ្តល់ការគាំទ្រដល់អគ្គនាយកដ្ឋានពន្ធនាគារ និងមណ្ឌលអប់រំកែប្រែដែលរកឃើញវិជ្ជមានជំងឺកូវីដ-១៩។
ក្រៅពីឱ្យយកចិត្តទុកដាក់ហើយ ក៏ត្រូវធ្វើការចាត់ចែងព្យាបាលអ្នកជំងឺ រួមទាំងពង្រឹងការអនុវត្តវិធានការសុខាភិបាលនៅតាមមណ្ឌលអប់រំកែប្រែ និងពន្ធនាគារ ដើម្បីទប់ស្កាត់ការឆ្លងរាលដាលបន្ថែមទៀត។
ដោយឡែកចំពោះមណ្ឌលអប់រំកែប្រែ និងពន្ធនាគារខេត្តដែលមិនទាន់ឆ្លងជំងឺកូវីដ-១៩ ត្រូវពង្រឹងការអនុវត្តវិធានការសុខាភិបាល ការធ្វើអនាម័យជាប្រចាំនៅតាមទីកន្លែងបំពេញការងារ និងតាមបន្ទប់ឃុំឃាំងនានា ដោយពាក់ម៉ាស់ លាងសម្អាតដៃដោយសាប៊ូ ទឹកអាល់កុល ឬជែល ការវាស់កម្ដៅលើមន្ត្រីអនុរក្សពន្ធនាគារ និងអ្នកជាប់ឃុំ រួមទាំងពិនិត្យសុខភាពមុនអនុញ្ញាតឱ្យចេញចូលពន្ធនាគារជាដើម។
បើតាមអគ្គនាយកដ្ឋានពន្ធនាគារនៃក្រសួងមហាផ្ទៃ ឱ្យដឹងថា អ្នកជាប់ឃុំក្នុងពន្ធនាគារចំនួន១៨ នៅទូទាំងប្រទេសមានប្រមាណ ៤ម៉ឺននាក់។
កន្លងមក ក្រុមអង្គការសិទ្ធិមនុស្សជាតិ និងអន្តរជាតិ បង្ហាញក្ដីបារម្ភចំពោះភាពចង្អៀតណែននៅក្នុងពន្ធនាគារ ដែលជាហានិភ័យឆ្លងជំងឺកូវីដ-១៩ នៅក្នុងពន្ធនាគារ និងបានស្នើសុំឱ្យមានការដោះលែងអ្នកទោសស្រាលៗ និងជនជាប់ឃុំបណ្ដោះអាសន្នរង់ចាំសវនាការកាត់ទោស ឱ្យនៅក្រៅឃុំជាបណ្ដោះអាសន្ន ដើម្បីកាត់បន្ថយភាពចង្អៀតណែននៅក្នុងពន្ធនាគារ៕