កាលពីឆ្នាំ២០១៧ លោកនាយករដ្ឋមន្ត្រី ហ៊ុន សែន បានបើកយុទ្ធនាការបង្ក្រាបបទល្មើសគ្រឿងញៀននៅទូទាំងប្រទេស និងបានប្រកាសក្ដែងៗដោយប្ដេជ្ញាចាត់វិធានការផ្លូវច្បាប់ទៅលើឧក្រិដ្ឋជនគ្រឿងញៀន ប៉ុន្តែចាប់តាំងពីការបើកយុទ្ធការបង្ក្រាបមកដល់បច្ចុប្បន្ននេះ ការប្រើប្រាស់ និងជួញដូរគ្រឿងញៀននៅក្នុងប្រទេសកម្ពុជាកាន់តែខ្លាំងជាងមុនឡើង។
បើតាមវែបសាយអគ្គស្នងការដ្ឋាននគរបាលជាតិ ចុះផ្សាយអំពីលទ្ធផលនៃការបង្ក្រាបបទល្មើសគ្រឿងញៀនរាល់ថ្ងៃ បង្ហាញថា សមត្ថកិច្ចឃាត់បានខ្លួនអ្នកប្រើប្រាស់ និងលក់ដូរគ្រឿងញៀនចន្លោះពី ៥ ទៅជាង ១០នាក់ក្នុងមួយថ្ងៃនៅទូទាំងប្រទេស ដែលភាគច្រើនសុទ្ធសឹងតែជាយុវជន។ ទីតាំងដែលងាយអូសទាញយុវជនទៅលេង និងឈានទៅប្រើប្រាស់គ្រឿងញៀននោះ គឺនៅក្នុងក្លឹបកម្សាន្ត។
ការកើនឡើងអ្នកប្រើប្រាស់ និងចែកចាយគ្រឿងញៀននេះ រដ្ឋមន្ត្រីក្រសួងមហាផ្ទៃ លោក ស ខេង បង្ហាញការព្រួយបារម្ភចំពោះការចរាចរគ្រឿងញៀន ដោយថា បើមិនស្រុះគ្នាធ្វើទេ ថ្ងៃណាមួយគ្រឿងញៀននឹងត្រួតត្រាកម្ពុជា។
ជាងនេះទៀត លោកថាពុំមានមន្ត្រីធំៗ និងឧកញ៉ាណាម្នាក់ជាប់គុកដោយសារគ្រឿងញៀនបានយូរនោះទេ បើទោះបីជាពួកគេមានឈ្មោះជាប់គុកក៏ដោយ ប៉ុន្តែពួកគេមិនបានដេកនៅក្នុងគុកឡើយ ដោយភាគច្រើនឈ្មោះពួកគេត្រូវបានដាក់ឱ្យដេកនៅក្នុងមន្ទីរពេទ្យបន្ទប់ VIP តែឯង។
លោក គឹម សុខ ចាត់ទុកវិធានការរបស់រដ្ឋាភិបាលដែលដាក់ចេញ គ្រាន់តែដើម្បីលួងលោមប្រជាពលរដ្ឋមួយគ្រាៗនៅពេលប្រជាពលរដ្ឋធ្វើប្រតិកម្មខ្លាំងអំពីការរីករាលដាលគ្រឿងញៀន ប៉ុន្តែទោះជាយ៉ាងណា រដ្ឋាភិបាលបច្ចុប្បន្នមិនចាប់មេឈ្មួញគ្រឿងញៀននៅកម្ពុជាទេ ដោយសារមេឈ្មួញគ្រឿងញៀន និងមេរដ្ឋាភិបាល គឺជាបក្ខពួកតែមួយ ទើបមិនអាចទប់ស្កាត់បាន។
លោកបន្តថា ក្នុងស្ថានភាពបច្ចុប្បន្ន អ្វីដែលលោកបារម្ភនោះ គឺជំនួញគ្រឿងញៀន មិនត្រឹមតែជាការប្រមូលលុយរបស់ពួកមន្ត្រី និងឧកញ៉ាធំៗនៃលោក ហ៊ុន សែន ទេ ប៉ុន្តែវាអាចក្លាយទៅជាផ្នែកមួយនៃមធ្យោបាយរកលុយចិញ្ចឹមរដ្ឋាភិបាលលោក ហ៊ុន សែន ផងដែរ ហើយបើដូច្នេះមែន លោកថាកម្ពុជានឹងផុងក្នុងវិបត្តិនៃជំងឺសង្គមធ្ងន់ធ្ងរ ដែលពិបាករកផ្លូវងើបរីកចម្រើនរួច ហើយយុទ្ធសាស្ត្រលេបកម្ពុជាដោយប្រទេសជិតខាងកាន់តែមានឥទ្ធិពលធំ។
អ្នកវិភាគនយោបាយ លោកបណ្ឌិត ឡៅ ម៉ុងហៃ លើកឡើងថា មូលហេតុដែលបណ្ដាលឱ្យរដ្ឋាភិបាលមិនអាចទប់ស្កាត់បទល្មើសគ្រឿងញៀនបាន ដោយសារបញ្ហាធំមួយចំនួនៗ គឺមានបញ្ហាតូចៗជាច្រើន។
លោកបន្តថា កាលណាបញ្ហាដែលកើតឡើងនៅក្នុងសង្គម ហើយមិនត្រូវបានត្រូវដោះស្រាយ ជាកត្តាដែលជំរុញឱ្យក្មេងៗត្រូវបានគេទាក់ទាញឱ្យទៅសេពគ្រឿងញៀន ដោយសារការចង់សប្បាយ ស្របពេលដែលប្រព័ន្ធអប់រំនៅទន់ខ្សោយ និងខ្វះការយកចិត្តទុកដាក់ពីរដ្ឋាភិបាល និងអាណាព្យាបាលជាដើម។
ចំណែកប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន លោក យ៉ង សាំងកុមារ លើកឡើងថា បច្ចុប្បន្នការប្រើប្រាស់គ្រឿងញៀននៅកម្ពុជាកំពុងមានការកើនឡើងខ្លាំង ទាំងនៅទីក្រុង និងជនបទ រួមទាំងនៅតំបន់ដាច់ស្រយាល ហើយអ្នកដែលប្រើប្រាស់ភាគច្រើនគឺជាយុវជន។
លោកបន្តថា រដ្ឋាភិបាលត្រូវធ្វើការសិក្សាស្រាវជ្រាវឱ្យច្បាស់លាស់ពីមូលហេតុដែលបណ្ដាលអ្នកប្រើប្រាស់គ្រឿងញៀនកើនឡើង ខណៈអាជ្ញាធរមូលដ្ឋានមិនសូវយកចិត្តទុកដាក់ និងមិនបានចាត់ទុកការងារទប់ស្កាត់បទល្មើសគ្រឿងញៀនជាអាទិភាព ស្របពេលដែលប្រជាពលរដ្ឋនៅមានការភ័យខ្លាចក្នុងការជំរុញឱ្យអាជ្ញាធរទទួលខុសត្រូវទប់ស្កាត់ការប្រើប្រាស់ និងចែកចាយ។
លោក យ៉ង សាំងកុមារ បន្តថា ដើម្បីឱ្យយុវជននៅតាមជនបទ តំបន់ដាច់ស្រយាលជៀសផុសពីការប្រើប្រាស់គ្រឿងញៀន លុះត្រាតែរដ្ឋាភិបាលរៀបចំទីតាំងបណ្ណាល័យសិក្សានៅតាមមូលដ្ឋានសម្រាប់យុវជនជួបជុំគ្នាស្រាវជ្រាវ និងចែករំលែកចំណេះដឹង រួមទាំងរៀបចំកន្លែងកម្សាន្ត និងក្លឹបហាត់ប្រាណជាដើម។
ក្រៅពីរៀបចំទីតាំងទាំងអស់នេះ លោកថារដ្ឋាភិបាលត្រូវធ្វើការតាមដានពីការអនុវត្តការងាររបស់អាជ្ញាធរពាក់ព័ន្ធនឹងការទប់ស្កាត់បទល្មើសគ្រឿងញៀនទាំងថ្នាក់ជាតិ និងថ្នាក់ក្រោមជាតិ ប៉ុន្តែប្រសិនរដ្ឋាភិបាលមិនអាចទប់ស្កាត់ និងដោះស្រាយបញ្ហាទាំងអស់នោះបានទេ គ្រឿងញៀននឹងបង្កហានិភ័យខ្លាំងដល់ប្រទេសជាតិ ជាពិសេសយុវជនជំនាន់ក្រោយ។
បើតាមរបាយការណ៍នគរបាលបង្ហាញថា នៅឆ្នាំ២០២០ កម្លាំងនគរបាលបង្ក្រាបបទល្មើសគ្រឿងញៀននៅទូទាំងប្រទេសបានចំនួន ១០១៩៣ករណី និងចាប់ខ្លួនមនុស្សបានជាង ២ម៉ឺននាក់ ដែលការចាប់ខ្លួននេះបានកើនឡើង ២០% បើប្រៀបធៀបទៅនឹងឆ្នាំ២០១៩ ខណៈការរឹបអូសគ្រឿងញៀនក៏បានកើនឡើង ១៧% ដែរ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បញ្ជាក់ថា បញ្ហាគ្រឿងញៀនអាចដោះស្រាយបាន លុះត្រាតែមានរដ្ឋាភិបាលមួយដែលជាតំណាងឆន្ទៈរបស់ប្រជាពលរដ្ឋពិតប្រាកដ៕