សារព័ត៌មានតៃវ៉ាន់ Taiwan News បានធ្វើសេចក្ដីរាយការណ៍ដោយស្រង់ប្រភពរបស់ក្រសួងការពារជាតិតៃវ៉ាន់ មកថា កាលពីថ្ងៃព្រហស្បតិ៍ ទី១៧ មិថុនា ប្រទេសចិនបានបង្ហោះយន្តហោះចម្បាំងរបស់ខ្លួនចំនួន ៧គ្រឿងឱ្យហោះហើរចូលដែនអាកាសតៃវ៉ាន់ ដែលនេះជាលើកទី៦ នៃការរំលោភដែនអាកាសតៃវ៉ាន់ នៅក្នុងខែមិថុនា នេះ។
យោងតាមក្រសួងការពារជាតិតៃវ៉ាន់ កងទ័ពជើងអាកាសរំដោះប្រជាជនចិន បានបង្ហោះយន្តហោះចម្បាំងចូលខាងក្នុងដែនអាកាសតៃវ៉ាន់ នៅថ្ងៃទី១៧ ខែមិថុនា ដែលមានចំនួន ៧គ្រឿងនេះ គឺជាលើកទី២ បន្ទាប់ពីចិនបានបង្ហោះយន្តហោះចម្បាំងចំនួន ២៨គ្រឿងកាលពីថ្ងៃទី១៥ មិថុនា។ ដោយឆ្លើយតបនឹងភាពគឃ្លើនរបស់ចិន តៃវ៉ាន់បានបញ្ចេញសញ្ញាព្រមាន និងពង្រាយប្រព័ន្ធកាំជ្រួចតាមឃ្លាំមើលយន្តហោះចិនទាំងនោះ។
ក្រសួងការពារជាតិតៃវ៉ាន់ និយាយថា យន្តហោះចម្បាំងចិន ២៨គ្រឿងបានហោះចូលក្នុងដែនអាកាសរបស់ខ្លួនកាលពីថ្ងៃទី១៥ ខែមិថុនា គឺជាយុទ្ធនាការបំភ័យតៃវ៉ាន់ខ្លាំងណាស់ ហើយជាថ្មីទៀតកាលពីថ្ងៃទី១៧ ខែមិថុនា ចិនបានធ្វើដូចនេះម្ដងទៀត។
ប្រភពដដែលនេះបញ្ជាក់ថា ក្បួនយន្តហោះចម្បាំង និងយន្តហោះទម្លាក់គ្រាប់បែកជាច្រើនគ្រឿងរបស់ចិន បានហោះចូលភាគនិរតីនៃតំបន់ការពារដែនអាកាសរបស់តៃវ៉ាន់។ តែជាមួយគ្នានេះ កងទ័ពអាកាសតៃវ៉ាន់បានបញ្ជូនយន្តហោះជាច្រើនគ្រឿង និងបានបើកប្រព័ន្ធការពារផ្លូវអាកាសជាការឆ្លើយតប។
ប្រទេសចិន តែងតែធ្វើសមយុទ្ធយន្តហោះចម្បាំង និងនាវាចម្បាំងជិតកោះតៃវ៉ាន់ នៅប៉ុន្មានឆ្នាំចុងក្រោយនេះ ដែលជាផ្នែកមួយនៃយុទ្ធនាការដាក់សម្ពាធលើកោះតៃវ៉ាន់។
យ៉ាងណា ក្រសួងការបរទេសចិន បាននិយាយថា ការបើកប្រតិបត្តិការចុងក្រោយនេះ ដើម្បីឆ្លើយតបនឹងសេចក្ដីថ្លែងការណ៍មួយរបស់ក្រុមប្រទេស G-7 ដែលបានអំពាវនាវឱ្យមានដំណោះស្រាយដោយសន្តិវិធីចំពោះភាពតានតឹងក្នុងច្រកសមុទ្រតៃវ៉ាន់។
ក្រសួងការបរទេសចិន បានចោទថា មេដឹកនាំនៃក្រុមប្រទេស G-7 បានជ្រៀតជ្រែកកិច្ចការផ្ទៃក្នុងរបស់ប្រទេសចិន។
ទីក្រុងប៉េកាំង បានចាត់ទុកកោះតៃវ៉ាន់ ជាផ្នែកមួយនៃទឹកដីរបស់ខ្លួន ទោះបីជាដែនកោះមួយនេះគ្រប់គ្រងដោយខ្លួនឯងតាំងពីចប់សង្គ្រាមស៊ីវិលក្នុងប្រទេសចិន ក្នុងឆ្នាំ១៩៤៩ ក៏ដោយ។
មហាយក្សចិន បានប្ដេជ្ញាថានឹងដាក់តៃវ៉ាន់នៅក្រោមការគ្រប់គ្រងរបស់ខ្លួនតាមគ្រប់មធ្យោបាយចាំបាច់ទាំងអស់ រួមទាំងការប្រើប្រាស់កម្លាំងយោធា។
តើនៅពេលណា ចិននឹងសម្រេចលុកលុយកោះតៃវ៉ាន់?
រយៈពេល ៧២ឆ្នាំហើយ ដែលតៃវ៉ាន់ឈរជើងយ៉ាងរឹងមាំលើដែនកោះរបស់ខ្លួន ដោយមានប្រជាជនជិត ២៤លាននាក់។ ចាប់តាំងពីចាញ់សង្គ្រាមនឹងពួកឧទ្ទាមកុម្មុយនិស្ត នៅឆ្នាំ១៩៤៩ ដែនកោះមួយនេះមិនដែលស្គាល់សង្គ្រាមម្ដងណាឡើយជាមួយនឹងអ្នកឈ្នះសង្គ្រាមនឹងខ្លួនគេនេះ គឺបក្សកុម្មុយនិស្តចិន។
ប៉ុន្តែចុងក្រោយនេះ ចិនបង្កើនការភ័យខ្លាចសម្បើមណាស់ដាក់តៃវ៉ាន់ គឺសឹងតែបើកទ្វារសង្គ្រាមទៅហើយ ដើម្បីលេបត្របាក់តៃវ៉ាន់ តែមហាយក្សចិននៅតែស្ទាក់ស្ទើរ។
នាយកសេនាធិការចម្រុះកងទ័ពអាមេរិក ឧត្តមសេនីយ៍ Mark Milley បានបញ្ជាក់នៅក្នុងកិច្ចប្រជុំសភានៅថ្ងៃទី១៧ ខែមិថុនា ថា ចិននឹងមិនទាន់ចង់លុកលុយតៃវ៉ាន់ទេនៅពេលនេះ ព្រោះចិន ត្រូវបង្កើនសមត្ថភាពកងទ័ព និងសព្វាវុធរបស់ខ្លួនថែមទៀត។
កាលពីថ្ងៃទី១៥ ខែមិថុនា យន្តហោះចម្បាំងចិន ២៨គ្រឿង បានទន្ទ្រានដែនកំណត់ការពារអាកាសតៃវ៉ាន់ ដែលធ្វើឱ្យសមាជិកសភាអាមេរិកមួយចំនួនថ្កោលទោសចិន ហើយក៏ស្នើឱ្យរដ្ឋការលោក បៃដិន ត្រៀមគ្រប់យ៉ាងដើម្បីឃ្លាំមើលស្ថានការណ៍នេះ។
តែបែបណា សម្រាប់ឧត្តមសេនីយ៍ Mark Milley នៅតែគិតថាចិន នៅប្រើពេលច្រើនថែមទៀតក្នុងការលើកទ័ពលុកលុយតៃវ៉ាន់។ លោកបានពន្យល់ទៅកាន់សមាជិកសភាអាមេរិកថា បើតាមការវិភាគរបស់លោកទាក់ទងសមត្ថភាពចិន គឺចិនត្រូវចំណាយពេលអភិវឌ្ឍសមត្ថភាពជាក់ស្ដែងថែមទៀត។ លោកក៏ទទួលស្គាល់ថា តៃវ៉ាន់នៅតែស្ថិតនៅក្នុងចំណុចស្នូលដ៏សំខាន់នៃប្រយោជន៍ចិន តែការប្រើកម្លាំងយោធាយកកោះតៃវ៉ាន់នៅពេលខ្លីនេះ គឺទំនងមិនអាចទៅរួចទេ។ សហរដ្ឋអាមេរិក គឺជាបង្អែកដ៏សំខាន់បំផុតការពារតៃវ៉ាន់ ហើយជាប្រភពនៃការផ្គត់ផ្គង់សព្វាវុធដ៏ធំទៅឱ្យតៃវ៉ាន់។
ក្នុងសប្ដាហ៍នេះ តំណាងរាស្ត្រអាមេរិកបានស្នើច្បាប់ដើម្បីជំរុញការគាំទ្ររបស់អាមេរិកចំពោះកោះតៃវ៉ាន់។ យោងតាមច្បាប់ដែលត្រូវបានគេហៅថា ច្បាប់ការពារជាតិតៃវ៉ាន់ បានបញ្ជាក់នូវពាក្យថា រាល់ការប៉ុនប៉ងដោយប្រទេសចិនប្រឆាំងនឹងកោះតៃវ៉ាន់ នឹងបង្កើតបានជាសក្ដានុពលមួយជំរុញឱ្យភាពតានតឹងដល់កងកម្លាំងសហរដ្ឋអាមេរិក។
ចំណុចនេះ ទំនងសំដៅទៅលើព្រឹត្តិការណ៍ដែលអាចកើតមាននូវការឈ្លានពាន និងដណ្តើមកាន់កាប់កោះតៃវ៉ាន់ពីសំណាក់ប្រទេសចិន។
តើអ្វីជាការឆ្លើយតបរបស់អាមេរិក?
ចំពោះរឿងនេះ ព្រឹទ្ធសភាអាមេរិកចង់ឱ្យរដ្ឋការលោក បៃដិន ឆ្លើយតបប្រកបដោយប្រសិទ្ធភាពទប់ទល់នឹងចិន។ ច្បាប់នេះបានចែងថា ករណីតៃវ៉ាន់ គឺគួរតែជាគោលនយោបាយរបស់រដ្ឋាភិបាលសហរដ្ឋអាមេរិកក្នុងការរក្សានូវសមត្ថភាពយោធារបស់ខ្លួន ដោយចាប់ផ្តើមប្រតិបត្តិការរួមគ្នាប្រឆាំងនឹងកងកម្លាំងចិន ដើម្បីរារាំងការវាយប្រហារដែលអាចកើតមានលើកោះតៃវ៉ាន់។ កន្លងមក និងពេលនេះ សហរដ្ឋអាមេរិកនៅតែជ្រោមជ្រែងជួយតៃវ៉ាន់ទប់ទល់នឹងអំណាចចិន ដោយការជួយហ្វឹកហាត់កងទ័ពផង និងផ្ដល់អាវុធទៅឱ្យតៃវ៉ាន់ផង គឺក្រោមគម្រោងទិញអាវុធអាមេរិកពីដែនកោះមួយនេះ៕