សហព័ន្ធខ្មែរអូស្ត្រាលីសាជីវកម្មក្នុងរដ្ឋវ៉ិកតូរីយ៉ា ប្រកាសធ្វើបុណ្យគម្រប់ខួប ៥ឆ្នាំនៃមរណភាពបណ្ឌិត កែម ឡី នៅថ្ងៃទី១០ ខែកក្កដា ឆ្នាំ២០២១ ខាងមុខនេះ។
ប្រធានសហព័ន្ធខ្មែរអូស្ត្រាលីសាជីវកម្មក្នុងរដ្ឋវ៉ិកតូរីយ៉ា លោក ហុង លីម នៅថ្ងៃទី៣០ ខែមិថុនា នេះបានប្រកាសធ្វើបុណ្យគម្រប់ខួប ៥ឆ្នាំនៃមរណភាពបណ្ឌិត កែម ឡី នៅថ្ងៃទី១០ ខែកក្កដា ឆ្នាំ២០២១ ខាងមុខនេះ ដោយអញ្ជើញពលរដ្ឋ និងជនរួមជាតិខ្មែរទាំងអស់ឲ្យមកចូលរួមពិធីបុណ្យនេះឲ្យបានច្រើនកុះករ។
ពិធីបុណ្យគម្រប់ខួប ៥ឆ្នាំនៃមរណភាពបណ្ឌិត កែម ឡី នឹងប្រព្រឹត្តទៅនៅថ្ងៃសៅរ៍ ទី១០ ខែកក្កដា ឆ្នាំ២០២១ ចាប់ពីវេលាម៉ោង ៩ព្រឹករហូតដល់ម៉ោង ២:៣០នាទីរសៀល ស្ថិតក្នុងវត្តពុទ្ធរង្ស៊ី ម៉ែលប៊ន ក្នុងទីក្រុងម៉ែលប៊ន រដ្ឋវ៉ិកតូរីយ៉ា ប្រទេសអូស្ត្រាលី។
កម្មវិធីបុណ្យដែលសារព័ត៌មាន The Cambodia Daily ទទួលបាន គឺនឹងប្រព្រឹត្តទៅតាមប្រពៃណីសាសនា មានពិធីរាប់បាត្រព្រះភិក្ខុសង្ឃ និងវេរភត្តាហារប្រគេនព្រះសង្ឃ និងដារបង្សុកូល។
កម្មវិធីបុណ្យនេះក៏មានការធ្វើពិធីសម្ដែងនូវការគោរពដល់វិញ្ញាណក្ខន្ធបណ្ឌិត កែម ឡី ការថ្លែងសន្ទរកថារបស់អ្នកចូលរួម និងភរិយាបណ្ឌិត កែម ឡី ហើយក៏មានកម្មវិធីធម្មទានទេសនាផងដែរ។
កម្មវិធីបុណ្យខាងលើក៏ជាការអញ្ជើញប្រជាពលរដ្ឋខ្មែរដែលតែងគាំទ្រស្រឡាញ់រាប់អានបណ្ឌិត កែម ឡី និងចងចាំនូវវីរភាពនៃការតស៊ូដ៏អង់អាចក្លាហានរបស់លោក ក្នុងបុព្វហេតុនៃការបង្ហាញការពិត សេរីភាពនៃការបញ្ចេញមតិ ការគោរពសិទ្ធិមនុស្ស និងលទ្ធិប្រជាធិបតេយ្យ។
សហព័ន្ធខ្មែរអូស្ត្រាលីសាជីវកម្មក្នុងរដ្ឋវ៉ិកតូរីយ៉ា អំពាវនាវឲ្យមានការចូលរួមឧបត្ថម្ភគាំទ្រកម្មវិធីបុណ្យនេះតាមសទ្ធាជ្រះថ្លារៀងៗខ្លួន។ ចំណែកឯព័ត៌មានលម្អិត សូមទាក់ទងអ្នកដឹកនាំកម្មវិធី គឺអ្នកស្រី ប៊ូ រចនា លោក ហុង លីម លោក តាក ម៉េងហ៊ាង និងលោក ជា យូហ៊ន។
កាលពីថ្ងៃទី១០ ខែកក្កដា ឆ្នាំ២០១៦ អ្នកវិភាគនយោបាយ និងសង្គម បណ្ឌិត កែម ឡី ត្រូវខ្មាន់កាំភ្លើងបាញ់សម្លាប់នៅក្នុងហាងស្តារម៉ាត ក្នុងបរិវេណស្ថានីយចាក់សាំងកាល់តិច (Star Mart Caltex) ក្បែរស្តុបបូកគោ កណ្តាលទីក្រុងភ្នំពេញ និងនៅជិតផ្ទះក្មួយប្រុសរបស់លោក ហ៊ុន សែន គឺលោក ហ៊ុន តូ។ បណ្ឌិត កែម ឡី បានស្លាប់ក្នុងថ្លុកឈាមក្នុងវ័យ ៥០ឆ្នាំ បន្សល់ទុកនូវភរិយាអាយុ ៣៤ឆ្នាំ គឺអ្នកស្រី ប៊ូ រចនា ដែលមានផ្ទៃពោះ ៥ខែ និងមានកូនប្រុស ៤នាក់ទៀត។
ពេលនៅមានជីវិត បណ្ឌិត កែម ឡី តែងរំឭកថា នៅពេលដែលលោកវិភាគម្ដងៗ លោកមិនដែលគិតថាខ្លួនលោកមានជីវិតទេ ព្រោះថាការនិយាយរបស់លោកកំពុងស្ថិតនៅក្នុងប្រទេសមួយដែលមានខ្លាច្រើន មានពស់វែកច្រើន និងមានឆ្លាមច្រើន។
ជាងនេះទៀត បណ្ឌិត កែម ឡី ធ្លាប់បានលើកឡើងថា លោកបានរៀបចំ Visa ឬលិខិតឆ្លងដែន ៣ រួចហើយគឺ៖
- ទី១ បើសិនជាគេមិនសប្បាយចិត្តនឹងលោក គេនឹងបញ្ជូនលោកឲ្យទៅមន្ទីរពេទ្យ
- ទី២ គេអាចនឹងបញ្ជូនលោកឲ្យទៅគុកព្រៃស
- ទី៣ គេនឹងបញ្ជូនលោកទៅវត្តព្រះពុទ្ធ ដើម្បីបញ្ចប់រឿងតែម្តង
បញ្ហានេះ លោកធ្លាប់បានបញ្ជាក់ថា បើសិនខ្លាច Visa ទាំងបីនេះ ប្រហែលពិបាកនឹងវិភាគផ្ដល់ផលប្រយោជន៍ទៅដល់សង្គមខ្លាំងណាស់។
ឃាតកម្មលើបណ្ឌិត កែម ឡី បានកើតឡើង ២ថ្ងៃក្រោយបន្ទាប់ពីបណ្ឌិត កែម ឡី បកស្រាយរបាយការណ៍ស៊ើបអង្កេតស៊ីជម្រៅមួយរបស់អង្គការឃ្លាំមើលពិភពលោក ក្លូបបល វីតនេស (Global Withness) ហើយបានលាតត្រដាងអំពីផែនការលក់ជាតិ និងការគ្រប់គ្រងជំនួញក្នុងប្រទេសកម្ពុជា ស្ទើរតែទាំងអស់ដែលមានទំហំទឹកប្រាក់រាប់រយលានដុល្លារសហរដ្ឋអាមេរិករបស់បក្ខពួក និងក្រុមគ្រួសារត្រកូល ហ៊ុន៕