រដ្ឋាភិបាលប្រទេសអូស្ត្រាលី ប្ដេជ្ញាការពារ និងលើកកម្ពស់សិទ្ធិមនុស្សអន្តរជាតិជុំវិញការនិរទេសសកម្មជននយោបាយបក្សប្រឆាំងពីប្រទេសថៃ ចំនួន ៦នាក់ទៅអនុវត្តទោសនៅកម្ពុជាកាលពីពេលកន្លងទៅ។
រដ្ឋមន្ត្រីក្រសួងការបរទេសអូស្ត្រាលី អ្នកស្រី ផែននី វ៉ង (Penny Wong) បានឆ្លើយតបទៅកាន់អតីតតំណាងរាស្ត្រអូស្ត្រាលីដើមកំណើតខ្មែរ លោក ហុង លីម កាលពីថ្ងៃទី១៧ ខែមករា ឆ្នាំ២០២៥ ដែលទើបនឹងត្រូវបានផ្សព្វផ្សាយនៅថ្ងៃទី២៤ មករា នេះថា អូស្ត្រាលីតែងតែលើកឡើងពីកង្វល់សិទ្ធិមនុស្សជាមួយរដ្ឋាភិបាលថៃ និងកម្ពុជា រួមទាំងអង្គការសង្គមស៊ីវិល និងក្រុមប្រឹក្សាសិទ្ធិមនុស្សនៃឧត្ដមស្នងការអង្គការសហប្រជាជាតិផងដែរ។
រដ្ឋមន្ត្រីក្រសួងការបរទេសអូស្ត្រាលីរូបនេះលើកឡើងថា រដ្ឋាភិបាលអូស្ត្រាលីតែងលើកទឹកចិត្តប្រទេសទាំងអស់ រួមទាំងកម្ពុជា និងប្រទេសថៃ ផង ឱ្យគោរពតាមកាតព្វកិច្ចក្រោមច្បាប់អន្តរជាតិ ដើម្បីធ្វើការឱ្យបានជិតស្និទ្ធជាមួយទីភ្នាក់ងារអង្គការសហប្រជាជាតិ ដូចជាឧត្ដមស្នងការទទួលបន្ទុកជនភៀសខ្លួនរបស់អង្គការសហប្រជាជាតិ ជាដើម។
អ្នកស្រី ផែននី វ៉ង បញ្ជាក់ថា រដ្ឋាភិបាលអូស្ត្រាលីតែងស្វាគមន៍ចំពោះសកម្មភាពរបស់ជនភៀសខ្លួនកម្ពុជា និងកង្វល់នានាជុំវិញការជ្រៀតជ្រែកពីបរទេសក្នុងការភៀសខ្លួនរបស់ពលរដ្ឋខ្មែរលើទឹកដីថៃ សព្វថ្ងៃនេះ ហើយអូស្ត្រាលី ក៏បានប្ដេជ្ញាការពារ និងលើកកម្ពស់សិទ្ធិមនុស្សអន្តរជាតិស្របតាមផលប្រយោជន៍ និងតម្លៃរបស់ប្រទេសទាំងអស់ផងដែរ។
ប្រធានសហព័ន្ធខ្មែរអូស្ត្រាលីសាជីវកម្ម និងជាអតីតតំណាងរាស្ត្រអូស្ត្រាលីដើមកំណើតខ្មែរប្រចាំរដ្ឋវិចតូរីយ៉ា លោក ហុង លីម បានសរសេរលិខិតមួយទៅកាន់រដ្ឋមន្ត្រីក្រសួងការបរទេសអូស្ត្រាលី អ្នកស្រី ផែននី វ៉ង (Penny Wong) កាលពីដើមខែធ្នូ ឆ្នាំ២០២៤ ដោយបង្ហាញពីការព្រួយបារម្ភទាក់ទងនឹងការនិរទេសសកម្មជននយោបាយបក្សប្រឆាំងពីប្រទេសថៃ ទៅប្រទេសកម្ពុជា ដែលក្រោមហេតុផលនយោបាយ។
លោក ហុង លីម លើកឡើងថា ការចាប់បញ្ជូនខ្លួនសកម្មជននយោបាយទាំងនេះជាឧទាហរណ៍មួយដែលបង្ហាញថា រដ្ឋាភិបាលកម្ពុជាបានគ្រប់គ្រង និងប្រើអំពើហិង្សាហួសព្រំដែន។
លោកបន្តថា សកម្មជនខ្មែរដែលនៅសល់ក្នុងប្រទេសថៃ ពេលនេះ កំពុងព្រួយបារម្ភពីសុវត្ថិភាព និងការរស់នៅដោយការភ័យខ្លាច ហើយការភ័យខ្លាចនេះក៏បានពង្រីកដល់សហគមន៍ខ្មែរក្នុងប្រទេសអូស្ត្រាលី ផងដែរ។
អតីតតំណាងរាស្ត្រអូស្ត្រាលីរូបនេះអះអាងថា រដ្ឋាភិបាលកម្ពុជាកំពុងសាកល្បងបង្កើនការវាយប្រហារ និងអំពើហិង្សាលើអ្នកប្រឆាំងនៅក្រៅប្រទេស ក្នុងនោះ អាជ្ញាធរកម្ពុជាបានបែងចែកប្រទេសអូស្ត្រាលី ជា ៧តំបន់ ដែលតំបន់នីមួយៗត្រូវបានគ្រប់គ្រងពីរបបក្រុងភ្នំពេញដោយផ្ទាល់។
ប្រភពដដែលរៀបរាប់ថា ពួកគេបានប្រើបណ្ដាញដែលពង្រាយនៅក្នុងប្រទេសអូស្ត្រាលី តាមឃ្លាំមើល និងផ្តល់របាយការណ៍ដល់របបក្រុងភ្នំពេញ ដែលធ្លាប់បានគំរាមកំហែងដោយផ្ទាល់លើពលរដ្ឋខ្មែរ-អូស្ត្រាលី រួមទាំងរូបលោកផ្ទាល់ផងដែរ។
កាលពីថ្ងៃទី២៥ ខែវិច្ឆិកា ឆ្នាំ២០២៤ អាជ្ញាធរថៃ បានចាប់បញ្ជូនជនភៀសខ្លួននយោបាយខ្មែរចំនួន ៦នាក់ឱ្យយកទៅដាក់គុកនៅកម្ពុជា រួមមានលោក ប៉ែន ច័ន្ទសង្គ្រាម អ្នកស្រី ហុង អាន លោក មាន ចាន់ថុន ព្រមទាំងពលរដ្ឋខ្មែរក្រោម អ្នកស្រី ស៊ឹង គន្ធា អ្នកស្រី យ៉ិន ចន្ធូ និងកញ្ញា វ៉ន ច័ន្ទរចនា។ អ្នកទាំង ៦នាក់នេះ ត្រូវបានតុលាការក្រុងភ្នំពេញចោទប្រកាន់ពីបទ «រួមគំនិតក្បត់» ពាក់ព័ន្ធសកម្មភាពប្រឆាំងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) កាលពីអំឡុងខែសីហា ឆ្នាំ២០២៤ កន្លងទៅ៕
© 2025, ឌឹ ខេមបូឌា ដេលី. All rights reserved.