ពលរដ្ឋឃុំបិតត្រាំង ស្រុកព្រៃនប់ ខេត្តព្រះសីហនុ សម្ដែងការព្រួយបារម្ភដោយសារមួយរយៈកន្លងមកនេះមានក្រុមចោរប្លន់ប្រដាប់អាវុធចេញប្លន់ទ្រព្យសម្បត្តិ ដុតផ្ទះ ព្រមទាំងគំរាមសម្លាប់ពលរដ្ឋថែមទៀតផង។
ប្រភពដដែលអះអាងថា នៅមូលដ្ឋានរបស់ពួកគាត់កំពុងរស់នៅ គឺមានក្រុមចោរប្លន់ប្រដាប់អាវុធមួយក្រុមមានគ្នារាប់សិបនាក់ប្រដាប់ដោយអាវុធវែង កាំបិត ចំពាមកៅស៊ូ និងកាំភ្លើងកែច្នៃជាដើម បានដើរធ្វើសកម្មភាពប្លន់យកទ្រព្យសម្បត្តិ គំរាមសម្លាប់ និងប្រើហិង្សាលើពលរដ្ឋស្លូតត្រង់ជាបន្តបន្ទាប់ ប៉ុន្តែសមត្ថកិច្ចពាក់ព័ន្ធនៃរដ្ឋបាលខេត្តព្រះសីហនុ មិនបានធ្វើការចុះស៊ើបអង្កេត ឬតាមចាប់ជនសង្ស័យយកមកផ្ដន្ទាទោសនោះទេ។
ពលរដ្ឋបញ្ជាក់ថា កាលពីថ្ងៃទី៨ ខែសីហា ឆ្នាំ២០២១ មានក្រុមចោរប្លន់ប្រដាប់អាវុធមួយក្រុមមានគ្នាច្រើននាក់ បានចូលប្លន់ទ្រព្យសម្បត្តិ គំរាមបាញ់សម្លាប់ និងបានវាយដំទាត់ធាក់ពួកគាត់ឲ្យរងរបួសយ៉ាងដំណំ រួចក៏គេចខ្លួនបាត់ដោយសុវត្ថិភាព។
ប្រភពដដែលបន្តថា ក្រុមចោរប្លន់ទាំងនោះប្រដាប់ដោយកាំភ្លើងអាកាចំនួន ២ដើម ចំពាមកៅស៊ូ កាំបិត និងកាំភ្លើងស្នប់ ឬកាំភ្លើងកែច្នៃគ្រប់ដៃ បានសម្រុកចូលធ្វើសកម្មភាពប្លន់ពលរដ្ឋនៅម្តុំជិតភ្នំត្រងោល ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ។
តំណាងប្រជាពលរដ្ឋរងគ្រោះដោយអំពើប្លន់ បានឲ្យអ្នកសារព័ត៌មានដឹងថា ក្រុមចោរប្លន់ទាំងនោះក្រៅពីបានប្រមូលយកទ្រព្យសម្បត្តិ លុយកាក់ ទូរស័ព្ទដៃរបស់អ្នកភូមិអស់ជាច្រើនគ្រឿងហើយ ជនដៃដល់ទាំងអស់នោះបានដុតម៉ូតូ រថយន្ត និងដុតបំផ្លាញផ្ទះរបស់ពលរដ្ឋអស់ជាច្រើនខ្នងថែមទៀត។
ក្រុមអ្នកស្រុកស្នើដល់អាជ្ញាធរ និងសមត្ថកិច្ចខេត្តព្រះសីហនុ បញ្ចេញកម្លាំងជំនាញចុះស៊ើបអង្កេតលើករណីក្រុមប្លន់ប្រដាប់អាវុធដែលបង្កការភ័យខ្លាចដល់ពលរដ្ឋនេះផង។
លោក មៀច ចាន់ មេឃុំបិតត្រាំង បានប្រាប់អ្នកសារព័ត៌មានក្នុងស្រុកថា ក្តីបារម្ភរបស់ពលរដ្ឋក្នុងមូលដ្ឋានលើករណីមានក្រុមចោរប្លន់ប្រដាប់អាវុធខាងលើនេះ រូបលោកបានរាយការណ៍ទៅកម្លាំងសមត្ថកិច្ចជំនាញឲ្យចុះស្រាវជ្រាវរួចហើយ។ ករណីនេះ លោកសង្ស័យថាអាចជារឿងឈ្លោះដណ្ដើមដីគ្នារវាងភាគីម្ខាងទៀតដែលមានខ្នងបង្អែកជាមន្ត្រីមានបុណ្យស័ក្តិខ្ពស់ ស្ថិតក្នុងស្ថាប័នប្រដាប់អាវុធជាអ្នកកាងការពារ។
ចំណែកលោក តាន់ ពិសិដ្ឋ នាយប៉ុស្តិ៍នគរបាលឃុំបិតត្រាំង បានឲ្យសារព័ត៌មានក្នុងស្រុកដឹងថា ករណីអំពើប្លន់ខាងលើនេះនៅមិនទាន់កំណត់មុខសញ្ញាបានទេ ព្រោះពេលសមត្ថកិច្ចបានចុះទៅដល់ផ្ទះរបស់ពលរដ្ឋរងគ្រោះ គឺមិនឃើញភាគីម្ខាងទៀតនៅកន្លែងកើតហេតុឡើយ។
ចំពោះករណីនេះ ក្រុមប្រជាពលរដ្ឋរងគ្រោះបានចោទសមត្ថកិច្ចមូលដ្ឋានថាហាក់មិនសូវយកចិត្តទុកដាក់លើការងារថែរក្សាសន្តិសុខជូនពលរដ្ឋនោះទេ។
ទោះជាបែបនេះក្តី សារព័ត៌មាន The Cambodia Daily នៅមិនទាន់អាចទាក់ទងលោក ជួន ណារិន្ទ ស្នងការនគរបាលខេត្តព្រះសីហនុ និងលោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ដើម្បីបំភ្លឺជុំវិញករណីប្រជាពលរដ្ឋឃុំបិតត្រាំង លើកឡើងថាមានក្រុមចោរប្លន់ប្រដាប់អាវុធមានគ្នាច្រើននាក់បានប្លន់ទ្រព្យសម្បត្តិពួកគាត់ និងបានវាយសំពងធ្វើបាប ហើយដុតផ្ទះពួកគាត់បំផ្លាញចោលនៅឡើយទេនៅរសៀលថ្ងៃទី១០ ខែសីហា៕