27 C
Phnom Penh

ក្រុម​ចលនា​ក្រៅ​ស្រុក​ភាគី​លោក សម រង្ស៊ី កំពុង​បែកបាក់​សាមគ្គី​ធ្ងន់ធ្ងរ​ដោយសារ​ពួកគេ​មិន​គាំទ្រ​គណបក្ស​បេះដូង​ជាតិ

ដោយ ឌឹ ខេមបូឌា ដេលី

បទវិភាគ

សមាជិក​គណបក្ស​សង្គ្រោះ​ជាតិ​ក្រៅ​ប្រទេស​នៅ​ប៉ែក​អឺរ៉ុប (CNRP-O) កំពុង​បែកបាក់​សាមគ្គី​យ៉ាង​ធ្ងន់ធ្ងរ ដោយសារ​តែ​ខ្វែង​គំនិត​គ្នា​ចំពោះ​ការ​មិន​គាំទ្រ​គណបក្ស​ថ្មី គឺ​គណបក្ស​បេះដូង​ជាតិ ដែល​មាន​ការ​ចោទ​ថា គណបក្ស​ថ្មី​នេះ​កាង​ពីក្រោយ​ដោយ​អនុប្រធាន​គណបក្ស​សង្គ្រោះ​ជាតិ លោក អេង ឆៃអ៊ាង។

ប្រធាន​សាខា​គណបក្ស​សង្គ្រោះ​ជាតិ​ប្រចាំ​សហរដ្ឋ​អាមេរិក (CNRP-A) និង​ជា​អនុប្រធាន CNRP-O (CNRP-Oversea) ប្រចាំ​នៅ​ប៉ែក​អឺរ៉ុប លោក ឡោ ឡៃសូ បាន​ចេញ​លិខិត​ជូនដំណឹង​ដល់​ប្រធាន​សាខា​ប្រចាំ​សហរដ្ឋ​អាមេរិក​ទាំងអស់​កាលពី​ថ្ងៃ​ទី​១១ ខែ​សីហា ថា អគ្គលេខាធិការ CNRP-O លោក ជា គឹមលី កំពុង​ធ្វើ​សកម្មភាព​បំបែកបំបាក់​កម្លាំង CNRP-O ឲ្យ​ទៅ​គាំទ្រ​បក្ស​ថ្មី​ដែល​ទើប​បង្កើត គឺ​គណបក្ស​បេះដូង​ជាតិ។

លោក​បន្ត​ថា តួនាទី​របស់​ក្រុម​ទីប្រឹក្សា CNRP-O គឺ​ការពារ និង​ពង្រឹង​គណបក្ស​សង្គ្រោះ​ជាតិ​តាម​ស្មារតី​សន្និសីទ​កាលពី​ថ្ងៃ​ទី​២ ធ្នូ ក្នុង​ទីក្រុង​អាត្លង់តា សហរដ្ឋ​អាមេរិក ប៉ុន្តែ​ស្មារតី​នេះ​នឹង​បាត់បង់​ទៅវិញ​នៅ​ពេល​មាន​គេ​បង្ខំ​ឲ្យ​សមាជិក​គណបក្ស​សង្គ្រោះ​ជាតិ គាំទ្រ​បក្ស​តូចៗ​ដែល​ផ្ទុយពី​ចរន្ត​ជាតិ​ដែល​តែង​ប្ដេជ្ញា​ចិត្ត​ថា នឹង​រុញ​គណបក្ស​សង្គ្រោះ​ជាតិ​ឲ្យ​មាន​វត្តមាន​ក្នុង​ការបោះឆ្នោត​ឆ្នាំ​២០២២ ខាងមុខ។

លោក ឡោ ឡៃសូ អះអាង​ថា ក្រុម​ទីប្រឹក្សា CNRP-O មិន​ចាប់អារម្មណ៍​លើ​គណបក្ស​ថ្មី​ទាំងអស់​ដែល​បាន​កើត​ចេញពី​គណបក្ស​សង្គ្រោះ​ជាតិ​នោះ​ទេ បើ​ទោះបីជា​បក្ស​ទាំងនោះ​បាន​បង្កើត​ឡើង​ដោយ​អនុប្រធាន​គណបក្ស​សង្គ្រោះ​ជាតិ ដូចជា​គណបក្ស​បេះដូង​ជាតិ​ក៏ដោយ ក៏​អគ្គលេខាធិការ​គណបក្ស​សង្គ្រោះ​ជាតិ លោក ជា គឹមលី មិន​អាច​ចោទ​ក្រុម​ទីប្រឹក្សា CNRP-O ថា​ប្រឆាំង​នឹង​គោលការណ៍​គណបក្ស​សង្គ្រោះ​ជាតិ​បាន​ដែរ។

សមាជិក​បក្ស​ប្រឆាំង​នៅ​ក្រៅ​ស្រុក​ដដែល​នេះ បញ្ជាក់​ថា ក្រុម​ទីប្រឹក្សា CNRP-O មាន​ការ​សោកស្តាយ​យ៉ាង​ខ្លាំង ដោយសារ​លោក ជា គឹមលី បែរជា​ឆ្លៀត​ឱកាស​បង្ខំ​ឲ្យ​ព្យួរ​តួនាទី​ក្រុម​ទីប្រឹក្សា CNRP-O ទៅវិញ។

លោក​បន្ត​ថា បើ​ទោះបីជា​ការ​បង្ខំ​នេះ​មិន​បាន​សម្រេច​ក៏ដោយ ក៏​ជា​ការ​បង្ហាញ​នូវ​ទង្វើ​បំបែកបំបាក់​ក្នុង​ចលនា​ក្រៅ​ស្រុក​យ៉ាង​ធ្ងន់ធ្ងរ​ដែរ។

លិខិត​របស់​ប្រធាន​សាខា CNRP-A និង​ជា​អនុប្រធាន CNRP-O ប្រចាំ​ប៉ែក​អឺរ៉ុប លោក ឡោ ឡៃសូ ចុះ​ថ្ងៃ​ទី​១១ ខែ​សីហា ឆ្នាំ​២០២១ ដែល​ត្រូវ​បាន​ផ្សព្វផ្សាយ​ជា​សាធារណៈ​នៅ​ថ្ងៃ​ទី​១៣ ខែ​សីហា ឆ្នាំ​២០២១ គឺ​ធ្វើឡើង​ដើម្បី​បដិសេធ​មិន​គាំទ្រ​គណបក្ស​ថ្មីៗ​ទាំងអស់ ទោះ​បក្ស​ទាំងនោះ​ត្រូវ​បាន​បង្កើត​ឡើង​ដោយ​អនុប្រធាន​គណបក្ស​សង្គ្រោះ​ជាតិ លោក អេង ឆៃអ៊ាង ក៏ដោយ។

នៅ​ថ្ងៃ​ទី​១៣ ខែ​សីហា ឆ្នាំ​២០២១ អនុប្រធាន CNRP-A ដែល​ទើប​លាលែង​ពី​តំណែង លោក យ៉ង់ ប្រេឌី ណុយ បាន​សរសេរ​លើ​គណនី Facebook របស់​លោក​ដោយ​ភ្ជាប់​ជាមួយ​លិខិត​របស់​លោក ឡោ ឡៃសូ ថា ពួក​អាមាត្យ​ចង់​យក​ស្ថាប័ន CNRP-A និង CNRP-O ទៅ​លក់​ឲ្យ​គណបក្ស​បេះដូង​ជាតិ​របស់​អនុប្រធាន​គណបក្ស​សង្គ្រោះ​ជាតិ លោក អេង ឆៃអ៊ាង តែ​សំណាង​ល្អ ក្រុមប្រឹក្សាភិបាល CNRP-O ប្រឆាំង​ដាច់អហង្ការ​នូវ​ទង្វើ​ក្បត់​បក្ស​នេះ បើ​មិន​ដូច្នោះ​ទេ ស្មារតី​គណបក្ស​សង្គ្រោះ​ជាតិ​នឹង​ត្រូវ​ខ្ទេចខ្ទី​មិនខាន។

មួយ​រយៈពេល​ចុងក្រោយ​នេះ ចលនា​ក្រៅ​ស្រុក CNRP-O ភាគី​លោក សម រង្ស៊ី ហាក់​មាន​វិបត្តិ​ផ្ទៃក្នុង​ជាប់ៗ​គ្នា ក្រោយ​មន្ត្រី​កំពូលៗ​គណបក្ស​សង្គ្រោះ​ជាតិ​ព្យាយាម​បង្ខំ​ឲ្យ​សមាជិក​បក្ស​ប្រឆាំង​ទាំងនោះ​បោះបង់​ចោល​ស្មារតី​គណបក្ស​សង្គ្រោះ​ជាតិ ហើយ​នាំគ្នា​ទៅ​ចូលរួម​ក្នុង​គណបក្ស​ដែល​ពួកគេ​ទើប​នឹង​បង្កើត​ថ្មី គឺ​គណបក្ស​បេះដូង​ជាតិ ដើម្បី​ចូលរួម​ការបោះឆ្នោត​ក្រុមប្រឹក្សា​ឃុំ-សង្កាត់​ឆ្នាំ​២០២២ ខាងមុខ។

ដោយសារតែ​បញ្ហា​នេះ កាលពី​ថ្ងៃ​ទី​១ ខែ​សីហា ឆ្នាំ​២០២១ អនុប្រធាន​គណបក្ស​សង្គ្រោះ​ជាតិ CNRP-A លោក យ៉ង់ ប្រេឌី ណុយ បាន​លាលែង​ពី​តំណែង​របស់​ខ្លួន​ដោយ​ប្រកាស​ជំហរ​បន្ត​ស្មារតី​សង្គ្រោះ​ជាតិ​តទៅ​ទៀត ខណៈ​អ្នកស្រី Nalen Smith ហេរញ្ញិក​របស់ CNRP-A ប្រចាំ​រដ្ឋធានី​វ៉ាស៊ីនតុន កាលពី​ថ្ងៃ​ទី​៣១ ខែ​កក្កដា ឆ្នាំ​២០២១ ក៏​បាន​ដាក់​លិខិត​លាលែង​ពី​មុខតំណែង​ចំនួន​៤ របស់​អ្នកស្រី​ផង​ដែរ​នោះ។

ជុំវិញ​ការ​បង្កើត​បក្ស​ថ្មី​របស់​មន្ត្រី​កំពូល​បក្ស​ប្រឆាំង​នេះ ត្រូវ​គេ​រិះគន់​ថា ការប្រកាស​របស់​អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី ដែល​ធ្លាប់​និយាយ​ថា មន្ត្រី​បក្ស​ប្រឆាំង​ដែល​បាន​សុំ​សិទ្ធិ​ធ្វើ​នយោបាយ​ឡើងវិញ គឺជា​ការ​ចាញ់បោក និង​លក់​ខ្លួន​ឲ្យ​លោក ហ៊ុន សែន នោះ គឺ​គ្រាន់តែ​ជា​ការ​អះអាង​ដែល​មិន​យក​ជាការ​បាន​តែប៉ុណ្ណោះ។ ក្រុម​អ្នក​រិះគន់​ខ្លះ​និយាយ​ថា ការ​បង្កើត​គណបក្ស​បេះដូង​ជាតិ នេះ គ្មាន​អ្នកណា​ផ្សេង​ក្រៅពី​មន្ត្រី​កំពូល​ប្រឆាំង​ទាំងនោះ​ទេ ជាពិសេស​គឺ​លោក សម រង្ស៊ី ខ្លួន​លោក​តែម្តង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស