ការដកកងទ័ពសហរដ្ឋអាមេរិកចេញពីប្រទេសអាហ្វហ្គានីស្ថាន ដែលនាំឱ្យប្រទេសឥស្លាមមួយនេះធ្លាក់ក្រោមការគ្រប់គ្រងរបស់ក្រុមតាលីបង់ ត្រូវបានប្រព័ន្ធផ្សព្វផ្សាយប្រទេសចិន លើកមកធ្វើការវិភាគ និងវាយបន្ថោកអាមេរិក ដោយចំអកដាក់កោះតៃវ៉ាន់ថាកុំទុកចិត្តអាមេរិកខ្លាំងពេក ប្រយ័ត្នដូចរដ្ឋាភិបាលអាហ្វហ្គានីស្ថាន ដែលចាញ់សង្គ្រាមពួកតាលីបង់។
កាសែតរបស់បក្សកុម្មុយនីស្តចិន Global Times បានចំអកតៃវ៉ាន់ថា ដល់ពេលទាល់ច្រក គឺអាមេរិករត់ចោលសម្ពន្ធមិត្ត គឺមើលអាហ្វហ្គានីស្ថានទៅ។
ក្រោយពីរដ្ឋាភិបាលក្រុងកាប៊ុល ដែលអាមេរិកគាំទ្រ ត្រូវបានកងទ័ពតាលីបង់វាយដួលរលំកាលពីថ្ងៃទី១៥ សីហា ធ្វើឱ្យសហរដ្ឋអាមេរិករងការរិះគន់ជាខ្លាំងដែលនាំឱ្យលោកប្រធានាធិបតី ចូ បៃដិន ប្រតិកម្មជាហូរហែទៅនឹងមជ្ឈដ្ឋានទាំងនោះ ដោយការបង្ហាញពីការប្ដេជ្ញាចិត្តរបស់អាមេរិកជាថ្មីម្ដងទៀតចំពោះសម្ពន្ធមិត្តឯទៀត ជាពិសេសតៃវ៉ាន់ដែលកំពុងប្រឈមមុខនឹងការគំរាមកាន់តែខ្លាំងពីសំណាក់ប្រទេសចិន។
ប្រធានាធិបតីអាមេរិក លោក ចូ បៃដិន បានផ្ដល់បទសម្ភាសន៍ខ្លីមួយជាមួយបណ្ដាញផ្សាយព័ត៌មាន ABC កាលពីថ្ងៃទី១៩ ខែសីហា ថា ការប្ដេជ្ញាចិត្តរបស់អាមេរិកលើសម្ពន្ធមិត្តដូចជាកោះតៃវ៉ាន់ កូរ៉េខាងត្បូង ជប៉ុន គឺមិនដូចករណីអាហ្វហ្គានីស្ថាន ឡើយ។
ក្នុងសេចក្ដីថ្លែងការណ៍កាលពីថ្ងៃទី១៧ ខែសីហា លោកប្រធានាធិបតីអាមេរិក បៃដិន បានប្រាប់ពិភពលោកថា បេសកកម្មរបស់អាមេរិកនៅអាហ្វហ្គានីស្ថាន ពិតជាទទួលបានជោគជ័យ គឺអាមេរិកសម្រេចបានទាំងការបោសសម្អាតមេភេរវកម្មអាល់កៃដា ផង និងធ្វើឱ្យប្រជាជនអាហ្វហ្គានីស្ថានបានស្គាល់ពិភពខាងក្រៅយ៉ាងតិច ២០ឆ្នាំដែរ។ តែបែបណា លោកសម្ដែងការងឿងឆ្ងល់ថា ហេតុអ្វីបានជាពួកតាលីបង់ដើរចូលរដ្ឋធានីកាប៊ុល ដោយពុំមានការវាយការពារទីតាំងដោយកងទ័ពអាហ្វហ្គានីស្ថាន។
សេចក្ដីថ្លែងការណ៍របស់លោក បៃដិន បានហៅព្រឹត្តិការណ៍នោះថានឹកស្មានមិនដល់ការដែលពួកតាលីបង់បានវាយចូលកាន់កាប់ក្រុងកាប៊ុលបានយ៉ាងងាយ និងយ៉ាងឆាប់រហ័សដោយមិនបាច់ចំណាយពេលយូរដោយមិនបាច់ប្រយុទ្ធ និងគ្មានការបង្ហូរឈាមឡើយ។
លោក ចូ បៃដិន បានហៅការដួលរលំរដ្ឋាភិបាលក្រុងកាប៊ុល ដែលអាមេរិកគាំទ្រ គឺជាបញ្ហាផ្ទៃក្នុងរបស់ប្រធានាធិបតី អាស្រាហ្វ ហ្កានី ដែលរត់ចោលសមរភូមិមុនការមកដល់របស់កងទ័ពតាលីបង់។
ការបង្ហាញជំហររបស់សហរដ្ឋអាមេរិកជាថ្មីចំពោះសម្ពន្ធមិត្តរបស់ខ្លួន បន្ទាប់ពីប្រព័ន្ធផ្សព្វផ្សាយជាច្រើនបានបកស្រាយថាការដកទ័ពនេះ គឺជាការផ្លាស់ប្ដូរជំហររបស់ទីក្រុងវ៉ាស៊ីនតោន ក្នុងការការពារសម្ពន្ធមិត្តរបស់ខ្លួនក្នុងពេលមានបញ្ហាកើតឡើង។
សារព័ត៌មាន Taiwan News ដែលបានស្រង់ខ្លឹមសារក្នុងកិច្ចសម្ភាសន៍ជាមួយទូរទស្សន៍ ABC លោកប្រធានាធិបតី ចូ បៃដិន អះអាងថា ករណីអាហ្វហ្គានីស្ថាន មិនដូចស្ថានភាពតៃវ៉ាន់ កូរ៉េខាងត្បូង ជប៉ុន និងសម្ពន្ធមិត្តណាតូ ឡើយ។ លោកបកស្រាយទៀតថា ប្រទេស និងតំបន់ទាំងនេះមានកិច្ចព្រមព្រៀងជាមួយអាមេរិកដោយផ្អែកលើគោលការណ៍រដ្ឋាភិបាលតែមួយ គឺជួយការពារគ្នាទៅវិញទៅមក។
លោក បៃដិន បានបញ្ជាក់ដូចនេះថា អាមេរិកមានការប្ដេជ្ញាចិត្ត ហើយរក្សាការប្ដេជ្ញាចិត្តនេះជានិច្ច។ សហរដ្ឋអាមេរិកមានការប្ដេជ្ញាចិត្ត គឺដូចមាត្រា៥ នៃលក្ខន្តិកៈយោធាណាតូ ដែលចែងថា ប្រសិនមានការឈ្លានពានលើសម្ពន្ធមិត្តណាតូ គឺនឹងមានការឆ្លើយតប។
លោក បៃដិន ពន្យល់ថា បើមាត្រានេះគឺចែងពីការជួយគ្នាទៅវិញទៅមករបស់សមាជិកណាតូ ឬដៃគូពាក់ព័ន្ធ ដូចជាជប៉ុន កូរ៉េខាងត្បូង និងតៃវ៉ាន់ ដែរ។
ក្រោយព្រឹត្តិការណ៍នៅអាហ្វហ្គានីស្ថាន ទីក្រុងវ៉ាស៊ីនតោនប្រញាប់ប្រកាសរក្សាជំហររបស់ខ្លួនទៅកាន់សម្ពន្ធមិត្តជុំវិញពិភពលោកទាំងអស់។ ចំពោះការការពារតៃវ៉ាន់ គឺប្រាកដណាស់ លោក បៃដិន ពិតជានិយាយយោងទៅចិន ហើយពិតណាស់ជាការលើកទឹកចិត្តតៃវ៉ាន់ដែលកំពុងរងការលើកទ័ពលុកលុយពីប្រទេសចិន។
ដោយឆ្លើយតបនឹងការប្ដេជ្ញារបស់លោក បៃដិន រដ្ឋការរបស់ប្រធានាធិបតីតៃវ៉ាន់ អ្នកស្រី Tsai Ing-wen បានសម្ដែងការដឹងគុណដោយសង្ឃឹមថា សហរដ្ឋអាមេរិកនិងសម្ពន្ធមិត្តពិតជាមិនបោះបង់តៃវ៉ាន់នោះទេ។
អ្នកនាំពាក្យ Xavier Chang បានប្រាប់សារព័ត៌មាន Taiwan News ថា ដែនកោះតៃវ៉ាន់ សម្ដែងការគាំទ្រចំពោះការប្រកាសរបស់លោក បៃដិន។ អ្នកនាំពាក្យរូបនេះថា យោងតាមកិច្ចព្រមព្រៀងអាមេរិក និងតៃវ៉ាន់ បានបង្ហាញថា ការប្ដេជ្ញាចិត្តរបស់អាមេរិក គឺរឹងដូចថ្ម។
តាមរយៈនេះ តៃវ៉ាន់សន្យាបន្តថែមទៀតនូវការពង្រីក និងពង្រឹងទំនាក់ទំនងសហប្រតិបត្តិការជាមួយសហរដ្ឋអាមេរិក និងសម្ពន្ធមិត្តលើគ្រប់វិស័យ។ ចំណែកតៃវ៉ាន់ ត្រូវបន្តពង្រឹងកាន់តែរឹងមាំនូវតម្លៃសេរីភាព និងប្រជាធិបតេយ្យសម្រាប់ដែនកោះតៃវ៉ាន់ សំដៅធ្វើឱ្យច្រកសមុទ្រតៃវ៉ាន់មានស្ថិរភាព និងសន្តិភាពយូរអង្វែង។
សម្រាប់អ្នកស្រី សាយ អឹងវិន (Tsai Ing-wen) យល់ថា ការវិលត្រឡប់មកវិញនៃរបបតាលីបង់នៃប្រទេសអាហ្វហ្គានីស្ថាន បន្ទាប់ពីការដកកងទ័ពអាមេរិកចេញ គឺជាការរុញឱ្យកោះតៃវ៉ាន់ត្រូវបង្កើនភាពរឹងមាំ និងសាមគ្គីភាពសន្តិសុខផ្ទៃក្នុង និងកម្លាំងកងទ័ពដើម្បីធានាបាននូវការការពារខ្លួន។
តាមអ្នកស្រីប្រធានាធិបតី ការផ្លាស់ប្ដូរជំហររបស់សហរដ្ឋអាមេរិកនៅអាហ្វហ្គានីស្ថាន បាននាំឱ្យមានការពិភាក្សាជាច្រើននៅកោះតៃវ៉ាន់។ តែអ្នកស្រីថា ជម្រើសតែមួយគត់របស់កោះតៃវ៉ាន់ គឺត្រូវធ្វើឱ្យតៃវ៉ាន់កាន់តែរឹងមាំ បង្កើនការសាមគ្គីភាព និងភាពម៉ឺងម៉ាត់ជាងមុនក្នុងការប្ដេជ្ញាការពារខ្លួនទប់ទល់ការបង្កហេតុណាមួយ។
តៃវ៉ាន់ដែលជាដែនកោះមួយមានប្រជាជនជាង ២៣លាននាក់ គឺជាអាជ្ញាធរមួយដែលពុំមានអាសនៈនៅអង្គការសហប្រជាជាតិនោះទេ ប៉ុន្តែដែនកោះនេះយ៉ាងតិចណាស់មានជិត ២០ប្រទេសដែលមានទំនាក់ទំនងការទូតជាមួយ។
ប្រទេសចិន តែងតែប្រឆាំងដាច់ខាតប្រទេសណាមួយមានទំនាក់ទំនងការទូតជាមួយតៃវ៉ាន់ ខណៈប្រទេសមហាអំណាចនេះចាត់ទុកតៃវ៉ាន់ជាខេត្តមួយរបស់ចិន ដោយគំរាមលើកទ័ពចូលលុកលុយ បើតៃវ៉ាន់ត្រូវបានប្រកាសជារដ្ឋឯករាជ្យ៕