នៅទីបំផុត ប្រធានាធិបតីសហរដ្ឋអាមេរិក សម្រេចចិត្តជាឯកតោភាគីដោយសន្យាថានឹងលើកទ័ពធ្វើអន្តរាគមន៍ជួយដែនកោះតៃវ៉ាន់ បើចិនលើកទ័ពចូលឈ្លានពានដែនកោះមួយនេះ។
ឆ្លើយនឹងសំណួររបស់អ្នកសារព័ត៌មាន ថាតើសហរដ្ឋអាមេរិកនឹងការពារតៃវ៉ាន់ឬទេ បើចិនវាយប្រហារ? ប្រធានាធិបតីអាមេរិក លោក ចូ បៃដិន បានឆ្លើយថា អាមេរិកមានការប្ដេជ្ញាចិត្តច្បាស់ហើយ គឺមិនងាករេឡើយ។ សំណួររបស់អ្នកសារព័ត៌មានសួរទៅប្រធានាធិបតីអាមេរិក គឺស្របពេលកងទ័ពចិន បង្កើនសកម្មភាពរបស់ខ្លួននៅជុំវិញកោះតៃវ៉ាន់ កាន់តែធ្ងន់ធ្ងរឡើងៗ។
បើតាមបណ្ដាញព័ត៌មានអាមេរិក Fox News ផ្សាយនៅថ្ងៃទី២២ តុលា លោក បៃដិន មានប្រសាសន៍ថា កុំបារម្ភថាសហរដ្ឋអាមេរិកទុកចោលតៃវ៉ាន់ គឺពុំមាននោះទេ។ លោកបញ្ជាក់ថា សហរដ្ឋអាមេរិកមានសន្ធិសញ្ញា មានច្បាប់ដែលចែងពីការផ្ដល់ការការពារដល់ដែនកោះមួយនេះ គឺមានដូចជាការផ្គត់ផ្គង់សព្វាវុធ និងអន្តរាគមន៍ផ្សេងៗទៀត។
អ្នកសារព័ត៌មានបានសួរទៀតថា ប្រទេសចិនមានអំណាចខ្លាំងឡើងៗ តើប្រធានាធិបតីយល់ដូចម្ដេច? លោក បៃដិន សម្ដែងសុទិដ្ឋិនិយមថា ពិភពលោកទាំងមូលបានដឹងហើយថា សហរដ្ឋអាមេរិកជាប្រទេសដែលមានអំណាចយោធាខ្លាំងជាងគេនៅលើពិភពលោក។ តែទោះជាបែបនេះក្ដី មេដឹកនាំអាមេរិករូបនេះក៏បានបញ្ជាក់ថា លោកគ្មានគំនិតសោះឡើយក្នុងការចាប់ផ្ដើមសង្គ្រាមត្រជាក់ជាមួយចិន។ លោកពោលថា ខ្ញុំមិនចង់ធ្វើសង្គ្រាមត្រជាក់ជាមួយចិននោះទេ គ្រាន់តែខ្ញុំចង់ឱ្យចិនយល់ថា សហរដ្ឋអាមេរិកនឹងមិនត្រឡប់ក្រោយ ហើយក៏នឹងមិនផ្លាស់ប្ដូរជំហរដែរ។
ច្បាប់ស្ដីពីទំនាក់ទំនងតៃវ៉ាន់ ដែលសហរដ្ឋអាមេរិកជាភាគី ត្រូវបានគេដឹងថាវាមិនបានធានាថាសហរដ្ឋអាមេរិកនឹងប្រើយោធា បើសិនជាចិនវាយប្រហារតៃវ៉ាន់ ដែលត្រូវបានអះអាងជាច្រើនទសវត្សថាជាដែនដីរបស់ចិន ប៉ុន្តែច្បាប់នោះបានបញ្ជាក់ថា សហរដ្ឋអាមេរិកនឹងធ្វើឱ្យតៃវ៉ាន់មានសមត្ថភាពការពារជាតិខ្លួនគេគ្រប់គ្រាន់។
ប៉ុន្តែកាលពីចុងខែកញ្ញា កន្លងទៅនេះ សមាជិកសភាអាមេរិកបានអនុម័តលើគម្រោងច្បាប់ថ្មីបន្ថែមទៀត ដោយបើកសិទ្ធិឱ្យរដ្ឋការសហរដ្ឋអាមេរិក ធ្វើសមយុទ្ធយោធាជាមួយកោះតៃវ៉ាន់ ទោះជានៅលើទឹកដីអាមេរិក ឬកោះតៃវ៉ាន់ក៏ដោយ។ មិនតែប៉ុណ្ណោះ ច្បាប់ថ្មីនេះបញ្ជាក់ថា អាមេរិកត្រូវជួយពង្រឹងសន្តិសុខនៅតំបន់ឥណ្ឌូប៉ាស៊ីហ្វិក។
ប្រធានាធិបតី បៃដិន បានឱ្យដឹងថា គោលនយោបាយសហរដ្ឋអាមេរិកចំពោះតៃវ៉ាន់ ដែលប្រទេសខ្លះយល់មិនច្បាស់ គឺប្រហែលជាយល់មិនច្បាស់លាស់អំពីយុទ្ធសាស្ត្ររបស់សហរដ្ឋអាមេរិកចំពោះកោះតៃវ៉ាន់ ដែលសូម្បីចិនខ្លួនគេផ្ទាល់ក៏ទំនងមិនច្បាស់ដែរ។ លោកពន្យល់ថា សហរដ្ឋអាមេរិកនឹងមានការឆ្លើយតប ឬធ្វើអន្តរាគមន៍ បើកោះតៃវ៉ាន់រងការឈ្លានពាន។
សកម្មភាពថ្មីៗពីសំណាក់កងទ័ពចិន មកលើតៃវ៉ាន់ បានបង្ហាញថាតៃវ៉ាន់កំពុងតែចង់ផងដែរក្នុងការសាកល្បងរដ្ឋការរបស់លោក ចូ បៃដិន ជាពិសេសគឺការដែលអាមេរិកដកទ័ពចេញពីអាហ្វហ្គានីស្ថាន ថាតើគោលនយោបាយអាមេរិកឆ្ពោះមកកាន់ឥណ្ឌូប៉ាស៊ីហ្វិក មានសារសំខាន់បែបណា និងមានភាពប្រាកដប្រជាដែរឬទេ។
ចិនបានបញ្ជូនយន្តហោះចម្បាំងយ៉ាងតិច ១៥៥គ្រឿងចូលក្នុងតំបន់ការពារដែនអាកាសរបស់កោះតៃវ៉ាន់ ក្នុងរយៈពេលជិត ២០ថ្ងៃជាប់ៗគ្នានេះ ហើយតៃវ៉ាន់ដែលចិនអះអាងថាជារបស់ខ្លួននោះ បានព្រមានប្រឆាំងនឹងយន្តហោះរបស់ក្រុងប៉េកាំង ក្រោយមួយថ្ងៃដែលចិនបញ្ជូនយន្តហោះចម្បាំង ៥៦គ្រឿងហោះចូលឈ្លានពានដែនអាកាសតៃវ៉ាន់។
កាលពីថ្ងៃទី៤ តុលា អ្នកនាំពាក្យសេតវិមាន អ្នកស្រី Jen Psaki មានប្រសាសន៍ថា សហរដ្ឋអាមេរិកសូមអំពាវនាវឱ្យរដ្ឋាភិបាលក្រុងប៉េកាំង បញ្ឈប់ការគាបសង្កត់ផ្នែកយោធា ការទូត សេដ្ឋកិច្ច និងដាក់ការបង្ខិតបង្ខំលើកោះតៃវ៉ាន់ ហើយថាក្រុងវ៉ាស៊ីនតោនចាប់អារម្មណ៍ចំពោះសន្តិភាព និងស្ថិរភាពនៅច្រកសមុទ្រតៃវ៉ាន់ទាំងមូល។
អ្នកស្រី Psaki បានបន្ថែមថា រដ្ឋការលោក បៃដិន និយាយច្បាស់លាស់ជាសម្ងាត់ និងជាសាធារណៈអំពីការព្រួយបារម្ភរបស់អាមេរិក និងបានជម្រាបថា លោកប្រធានាធិបតី ចូ បៃដិន (Joe Biden) មិនបាននិយាយជាមួយសមភាគីចិនរបស់គាត់ទេនាពេលថ្មីៗនេះ ប៉ុន្តែមន្ត្រីជាន់ខ្ពស់នៅរដ្ឋធានីវ៉ាស៊ីនតោន បានទាក់ទងជាមួយមន្ត្រីរដ្ឋាភិបាលក្រុងប៉េកាំងហើយថាត្រូវបញ្ឈប់ការឈ្លានពាន និងបង្កហេតុលើកោះតៃវ៉ាន់។
ប៉ុន្តែអ្នកនាំពាក្យក្រសួងការបរទេសចិនដីគោក អ្នកស្រី Hua Chunying មានប្រសាសន៍ថា កោះតៃវ៉ាន់ជាកម្មសិទ្ធិរបស់ចិន ហើយសហរដ្ឋអាមេរិកមិនមានមុខនាទីនិយាយដោយគ្មានការទទួលខុសត្រូវនោះទេ ហើយថាអាមេរិកបានរំលោភធ្ងន់ធ្ងរលើគោលការណ៍ចិនតែមួយ និងរំលោភលើសេចក្តីថ្លែងការណ៍រួមចិន-អាមេរិក ដែលមានកន្លងមកចំពោះកោះតៃវ៉ាន់។
គេពុំដឹងថា ចិនលើកទ័ពចូលកាន់កាប់កោះតៃវ៉ាន់នៅពេលណានោះទេ ប៉ុន្តែរដ្ឋមន្ត្រីការពារជាតិតៃវ៉ាន់ Chiu Kuo-cheng បានប្រាប់សមាជិកសភាថា ភាពតានតឹងផ្នែកយោធារវាងតៃវ៉ាន់ និងចិន ស្ថិតក្នុងកម្រិតដ៏អាក្រក់បំផុតក្នុងរយៈពេល ៤០ឆ្នាំមកនេះ។ លោក Chiu បន្ថែមថា ចិននឹងអាចបង្កើនការឈ្លានពានទ្រង់ទ្រាយធំប្រហែលនៅឆ្នាំ២០២៥។
អ្នកស្រី Tsai Ing-wen ដែលជាប្រធានាធិបតីកោះតៃវ៉ាន់ ជាស្ត្រីខ្លាំងហ៊ានព្រមានចិន។ អ្នកស្រីតែងតែប្រាប់ទៅចិនវិញថា ប្រជាជនតៃវ៉ាន់ជិត ២៤លាននាក់រស់នៅក្រោមការដឹកនាំនៃរបបប្រជាធិបតេយ្យ គឺមិនចង់រស់នៅក្នុងរបបកុម្មុយនីស្តនោះទេ ហើយកងទ័ពក៏មិនចង់ទៅនៅក្រោមដំបូលក្រុងប៉េកាំងសព្វថ្ងៃនេះដែរ។ អ្នកស្រីប្រាប់ចិនថា តៃវ៉ាន់ជារដ្ឋអធិបតេយ្យដែលមានរចនាសម្ព័ន្ធជាតិរឹងមាំទៅហើយ។
ក្នុងរយៈពេលចុងក្រោយនេះ ចិនបានបង្កើនសកម្មភាពយោធាគាបសង្កត់តៃវ៉ាន់កាន់តែធ្ងន់ធ្ងរឡើងៗ។ ក្រសួងការពារជាតិតៃវ៉ាន់ បានចេញសារព្រមានកុំឱ្យកងទ័ពចិន មកកៀកនឹងដែនកោះតៃវ៉ាន់ គឺប្រយ័ត្នការប៉ះទង្គិចគ្នាណាមួយជាយថាហេតុ៕