រដ្ឋមន្ត្រីការបរទេសចិន លោក វ៉ាង យី បានហៅលោក Lai Ching-te ឬហៅឈ្មោះមួយទៀតថា William Lai ប្រធានាធិបតីកោះតៃវ៉ាន់ ដែលបានស្បថចូលកាន់តំណែងកាលពីថ្ងៃទី២០ ឧសភា នេះថា ជាមនុស្សបង្ករឿងមិនចេះខ្មាសអៀន បង្កើនវោហារវាយប្រហារលើប្រទេសចិន។
យោងតាមសារព័ត៌មាន The Straits Times នៃប្រទេសសិង្ហបុរី សេចក្ដីថ្លែងការណ៍នៃក្រសួងការបរទេសចិន បានហៅលោក Lai Ching-te ថាជាជនបំបែកខ្លួនដោយទាត់ចោល បើមេដឹកនាំកោះតៃវ៉ាន់រូបនេះ សុំចរចាជាមួយចិន។
នៅថ្ងៃទី២១ ឧសភា នេះ បណ្ដាញផ្សាយព័ត៌មានរដ្ឋចិនជាច្រើន បានចេញផ្សាយបទអត្ថាធិប្បាយវាយប្រហារលើប្រធានាធិបតីថ្មីកោះតៃវ៉ាន់ ដោយព្រមានថា ចិនកាន់តែអត់ធ្មត់ហើយចំពោះលោក Lai Ching-te ដែលថាមេដឹកនាំរូបនេះកំពុងរុញឱ្យចិន លើកទ័ពចូលកាន់កាប់កោះតៃវ៉ាន់។
ចិន ចាត់ទុកកោះតៃវ៉ាន់ ជាដែនដីរបស់ចិន ដែលមិនអាចប្រកាសជារដ្ឋឯករាជ្យបានឡើយ។
លោក វ៉ាង យី បានថ្លែងនៅឯកិច្ចប្រជុំថ្នាក់រដ្ឋមន្ត្រីការបរទេសនៃប្រទេសអង្គការសហប្រតិបត្តិការ Shanghai នៅប្រទេស Kazakhstan លោកបាននិយាយថា ដែនកោះតៃវ៉ាន់កំពុងធ្វើសកម្មភាពទៅរកការប្រកាសឯករាជ្យដែលនឹងនាំទៅរកការបំផ្លាញស្ថិរភាពច្រកសមុទ្រតៃវ៉ាន់។
លោកថា ភាពគឃ្លើនរបស់លោក Lai Ching-te ជាការបង្ហាញថា បុរសនេះក្បត់ជាតិ និងក្បត់ប្រវត្តិសាស្ត្រខ្លួនឯងទៅហើយ។ ចំពោះរឿងបង្រួបបង្រួមជាតិដែលនឹងនាំកោះតៃវ៉ាន់ ទៅនៅជាមួយក្រុងប៉េកាំង គឺជាកាតព្វកិច្ចត្រូវតែធ្វើឱ្យបាន។
ចិន តែងតែធ្វើសកម្មភាពកងទ័ពគំរាមកោះតៃវ៉ាន់ ដោយបញ្ចេញនាវាចម្បាំង និងយន្តហោះចម្បាំងហោះចូលដែនអាកាសតៃវ៉ាន់។ ថ្ងៃខ្លះ កងទ័ពចិន បាញ់គ្រាប់មីស៊ីលចេញពីនាវាចម្បាំងធ្លាក់ក្បែរកោះតៃវ៉ាន់ និងហោះរំលងដែនកោះនេះទៀតផង។ នៅថ្ងៃដែលលោក Lai Ching-te ស្បថចូលកាន់តំណែងជាប្រធានាធិបតីថ្មីកាលពីថ្ងៃទី២០ ឧសភា ចិនក៏បញ្ចេញយន្តហោះចម្បាំងជាច្រើនគ្រឿងហោះចូលលំហអាកាសតៃវ៉ាន់ផងដែរ។
ក្រុមម៉ាស៊ីនឃោសនាក្រុងប៉េកាំង ថ្លែងថា ទោះបីជាតៃវ៉ាន់ រៀបចំពិធីដោះដូរប្រធានាធិបតីតៃវ៉ាន់ និងអនុប្រធានាធិបតីយ៉ាងណាក្តី ក៏ដែនកោះនេះមិនអាចសម្រេចបាននូវគោលដៅទៅរករដ្ឋអធិបតេយ្យបានឡើយ។ វានៅតែជាដែនដីមួយរបស់ចិន គឺមិនអាចបំបែកប្រវត្តិសាស្ត្រជាតិសាសន៍ចិនបានឡើយ។ ចិនគំរាមជាថ្មីថា រាល់សកម្មភាពឈានទៅរកប្រកាសឯករាជ្យនៅតៃវ៉ាន់ គឺត្រូវជួបរឿងបរាជ័យ។
នៅក្នុងសុន្ទរកថាស្បថចូលកាន់តំណែង លោក Lai Ching-te បាននិយាយនៅចំពោះមុខឥស្សរជនបរទេស និងប្រព័ន្ធផ្សព្វផ្សាយអន្តរជាតិនានាថា នៅក្នុងដំណើរឆ្ពោះទៅមុខ រដ្ឋបាលរបស់លោកនឹងបន្តប្រើប្រាស់ភាពក្លៀវក្លានៃប្រជាធិបតេយ្យតៃវ៉ាន់ ជាកម្លាំងដើម្បីលើកកម្ពស់ការអភិវឌ្ឍជាតិ និងពង្រឹងកិច្ចសហប្រតិបត្តិការអន្តរជាតិ។
ចំពោះប្រទេសចិន វិញ លោកបានអំពាវនាវឱ្យរដ្ឋាភិបាលចិន បញ្ឈប់ការគំរាមកំហែងផ្នែកនយោបាយ និងយោធាទៅលើតៃវ៉ាន់ និងធ្វើការជាមួយនឹងតៃវ៉ាន់ ដើម្បីរក្សាសន្តិភាព និងស្ថិរភាពនៅច្រកសមុទ្រតៃវ៉ាន់។
លោក Lai Ching-te បានស្បថចូលកាន់តំណែងជាប្រធានាធិបតីថ្មីរបស់តៃវ៉ាន់ ដោយបានធ្វើឱ្យគណបក្សប្រជាធិបតេយ្យចម្រើនជឿនលឿន ដែលគាំទ្រឯករាជភាពរបស់តៃវ៉ាន់ កាន់អំណាចនៅអាណត្តិទី៣ ជាបន្តទៀត។ គណបក្សនេះតែងតែលើកឡើងជាប់ជានិច្ចនូវភាពខ្លាំងក្លានៃដែនកោះក្នុងការការពារលទ្ធិប្រជាធិបតេយ្យក្នុងរយៈពេល ៨ឆ្នាំចុងក្រោយនេះ និង ៤ឆ្នាំទៅមុខទៀត។
ជាមួយគ្នានេះ លោក Lai Ching-te បានបញ្ជាក់ជាថ្មីអំពីឆន្ទៈរដ្ឋាភិបាលរបស់លោកក្នុងការធ្វើកិច្ចសហប្រតិបត្តិការជាមួយចិន តែលោកនៅតែលើកឡើងអំពីភាពចាំបាច់សម្រាប់តៃវ៉ាន់ ក្នុងការពង្រឹងសមត្ថភាពការពារខ្លួននៅក្នុងការប្រឈមនឹងសម្ពាធយោធាកើនឡើងពីសំណាក់ប្រទេសចិន។
ទោះជាយ៉ាងណាក៏ដោយ លោក Lai Ching-te សន្យាមិនបង្កហេតុ ហើយរក្សាស្ថានភាពនៅទ្រឹងដដែល ដោយមិនប្រកាសឯករាជ្យតៃវ៉ាន់ ភ្លាមៗ តែព្យាយាមបន្តរក្សាដែនអធិបតេយ្យរបស់ដែនកោះនេះ។ លោកបានបង្ហាញក្ដីសង្ឃឹមពីការបើកផ្លូវចរចាជាមួយចិន និងទាមទារឲ្យចិន ចែករំលែកការទទួលខុសត្រូវលើឆាកអន្តរជាតិ ដើម្បីរក្សាសន្តិភាព និងស្ថិរភាពរបស់តៃវ៉ាន់។
លោក Lai Ching-te ឬ William Lai ជាអតីតវេជ្ជបណ្ឌិត និងអតីតចៅហ្វាយក្រុងតៃប៉ិ។
ក្នុងពិធីស្បថឡើងកាន់តំណែងប្រធានាធិបតីថ្មីនៃកោះតៃវ៉ាន់ នេះ អាជ្ញាធរកោះតៃវ៉ាន់ បានអញ្ជើញប្រតិភូបរទេសចំនួន ៥១ប្រទេសមកចូលរួម ក្នុងនោះមានសម្ពន្ធមិត្ត ១២ប្រទេស៕