ទោះបីសង្គ្រាមដែលចិនលើកទ័ពវាយកាន់កាប់ដែនកោះតៃវ៉ាន់ នឹងមិនអាចមើលឃើញថានឹងកើតឡើងនៅពេលណា តែរលកទៅរកសង្គ្រាមកាន់តែធ្ងន់ធ្ងរឡើងៗរហូតដល់ប្រធានាធិបតីសហរដ្ឋអាមេរិក កាលពីពេលថ្មីៗនេះបានសន្យាថា នឹងជួយតៃវ៉ាន់ បើចិនលើកទ័ពលុកលុយដែនកោះមួយនេះ។
មេដឹកនាំសហរដ្ឋអាមេរិកបញ្ជូនសារដូចនេះទៅទីក្រុងប៉េកាំង គឺបន្ទាប់ពីកងទ័ពចិន បានបញ្ជូនយន្តហោះចម្បាំងយ៉ាងតិច ១៥៣គ្រឿងឱ្យហោះចូលដែនកោះតៃវ៉ាន់យ៉ាងងងឹតមេឃកាលពីជាង ១០ថ្ងៃមុននេះ។ ដោយមើលឃើញថាសហរដ្ឋអាមេរិកប្ដេជ្ញាចិត្តជួយតៃវ៉ាន់ដូចនេះ អូស្ត្រាលីដែលជាសម្ពន្ធមិត្តរបស់អាមេរិក និងជាសមាជិកនៃក្រុមចតុភាគី អាមេរិក អូស្ត្រាលី ជប៉ុន និងឥណ្ឌា ក៏បានប្រកាសថា អូស្ត្រាលីនឹងជួយអាមេរិកក្នុងសង្គ្រាមដែលចិនលើកទ័ពលុកលុយដែនកោះតៃវ៉ាន់។
នៅក្នុងបទសម្ភាសន៍ជាមួយសារព័ត៌មាន Sky News រដ្ឋមន្ត្រីការពារជាតិអូស្ត្រាលី លោក Peter Dutton បានបញ្ជាក់ថា ជំហររបស់អូស្ត្រាលីនឹងឈរជាមួយអាមេរិកក្នុងព្រឹត្តិការណ៍ដែលចិនបើកការវាយប្រហារទៅលើកោះតៃវ៉ាន់។
នៅពេលដែលអ្នកកាសែតបានសួរលោកថា តើអូស្ត្រាលីនឹងធ្វើសង្គ្រាមជាមួយចិននាពេលអនាគតឬទេ? លោក Peter Dutton ថាចិនត្រូវបានមើលឃើញយ៉ាងច្បាស់អំពីចេតនារបស់ខ្លួនទៅលើកោះតៃវ៉ាន់។ លោកបន្តថា គ្មាននរណាចង់ឃើញជម្លោះនោះទេ ប៉ុន្តែសំណួរនេះគឺត្រូវសួរចិន ទើបដឹងថាចិនមានមហិច្ឆតាដូចម្ដេច។
លោកបញ្ជាក់ថា ប្រសិនបើចិនប៉ុនប៉ងវាយប្រហារទៅលើតៃវ៉ាន់ គឺអូស្ត្រាលីនឹងសម្លឹងមើលការឆ្លើយតបរបស់អាមេរិក និងជាមួយសម្ពន្ធមិត្ត គឺការពារដែនដីមួយនេះដែលមានអាយុជាង ៧០ឆ្នាំមកហើយនោះ។
ការបញ្ចេញមតិរបស់លោករដ្ឋមន្ត្រីការពារជាតិអូស្ត្រាលី ធ្វើឡើងជាមួយនឹងសេចក្ដីថ្លែងការណ៍របស់នាយករដ្ឋមន្ត្រីប្រទេសរបស់លោកកាលពីខែឧសភា ដែលថាក្នុងព្រឹត្តិការណ៍មួយបើចិនវាយប្រហារតៃវ៉ាន់ គឺអូស្ត្រាលីនឹងជួយអាមេរិក ហើយសម្ពន្ធមិត្តដទៃទៀតក៏នឹងជួយអាមេរិកដែរ។
លោករដ្ឋមន្ត្រីថា អូស្ត្រាលីប្រាកដចិត្តរឿងនេះហើយ។ ដូច្នេះអូស្ត្រាលីទោះជាប្រទេសដែលមានប្រជាជនត្រឹម ២៥លាននាក់ ពិតណាស់ត្រូវធ្វើឱ្យប្រាកដថាជាមិត្តភ័ក្ដិល្អបំផុតក្នុងពិភពលោកជាមួយនឹងសហរដ្ឋអាមេរិកផង និងសម្ពន្ធមិត្តរបស់អូស្ត្រាលីផង។
កាលពីពេលថ្មីៗនេះ រដ្ឋមន្ត្រីការពារជាតិអង់គ្លេស ក៏បានអំពាវនាវឲ្យចិន ស្វែងរកមធ្យោបាយសន្តិភាពដោះស្រាយជម្លោះរបស់ខ្លួនជាមួយកោះតៃវ៉ាន់ ដោយព្រមានថា ការលុកលុយរបស់ចិនចូលក្នុងតំបន់កំណត់ការពារដែនអាកាសតៃវ៉ាន់ គឺជារឿងគ្រោះថ្នាក់ និងអាចបង្កភ្លើងជម្លោះ។
រដ្ឋមន្ត្រីការពារជាតិរបស់ប្រទេសអង់គ្លេស លោក Ben Wallace ព្រមានចិនថា អ្នកកំពុងស្ថិតក្នុងគ្រោះថ្នាក់ពីការបង្កអស្ថិរភាពក្នុងតំបន់ ហើយអ្នកកំពុងតែស្ថិតក្នុងគ្រោះថ្នាក់ក្នុងការបង្កឲ្យមានភ្លើងជម្លោះបន្ថែមនៅក្នុងតំបន់។
កាលពីពេលថ្មីៗនេះ ប្រធានាធិបតីសហរដ្ឋអាមេរិក លោក ចូ បៃដិន បានបញ្ជាក់យ៉ាងច្បាស់ថា សហរដ្ឋអាមេរិកនឹងគិតគូរពីការការពារកោះតៃវ៉ាន់ និងប្ដេជ្ញាចិត្តដើម្បីការពារដែនកោះដែលចិនអះអាងថាជាទឹកដីរបស់ខ្លួនមួយនេះ។
ទាក់ទិននឹងករណីនេះ លោក ចូ បៃដិន ថ្លែងថា ពិភពលោកពិតជាបានដឹងហើយអំពីកម្លាំងយោធារបស់អាមេរិក។ បើតាមលោក បៃដិន គឺលោកគ្រាន់តែចង់ឱ្យចិនយល់ថា អាមេរិកនឹងមិនដើរថយក្រោយនោះទេ ហើយក៏នឹងមិនផ្លាស់ប្ដូរជំហររបស់អាមេរិកអំពីកោះតៃវ៉ាន់នោះដែរ។
ភ្ជាប់នឹងព្រឹត្តិការណ៍ចុងក្រោយនេះ គេក៏បានឃើញកាសែតរបស់រដ្ឋចិន Global Times បានធ្វើអត្ថាធិប្បាយមួយដោយមិននិយាយអំពីអាមេរិក និងអង់គ្លេសទេ តែនិយាយអំពីប្រទេសក្នុងតំបន់អាស៊ីប៉ាស៊ីហ្វិក គឺប្រទេសអូស្ត្រាលី ដែលចង់សាកល្បងយោធាជាមួយចិន។
ដោយផ្ដើមសរសេរជាដំបូងថា ស្ថានភាពច្រកសមុទ្រតៃវ៉ាន់ដ៏តានតឹងក្នុងពេលបច្ចុប្បន្នដោយសារតែសហរដ្ឋអាមេរិកជាអ្នកដើរហួសបន្ទាត់ក្រហមរបស់ចិន ហើយញុះញង់ឱ្យកម្លាំងផ្ដាច់ខ្លួនមានលើដែនកោះមួយនេះប្រឈមនឹងចិនដីគោក ដោយរុញឲ្យអូស្ត្រាលីមកចូលពាក់ព័ន្ធនឹងកោះតៃវ៉ាន់ ហើយក្រុងកង់បេរ៉ា ចង់យកពលរដ្ឋខ្លួនឯង ២៥លាននាក់ទៅប្រថុយនឹងជម្លោះយោធាជាមួយចិន គឺទៅមិនរួចទេ។
Global Times ថានេះជាឥរិយាបថដែលគ្មានចេះគិតរបស់អ្នកនយោបាយអូស្ត្រាលី និយាយឱ្យរួចតែពីមាត់ ហើយមានចេតនាចង់បង្កជម្លោះជាមួយយោធាចិន។
កាសែតចិនមួយនេះបន្តវាយប្រហារដោយប្រាប់ឱ្យអូស្ត្រាលីត្រៀមខ្លួនដើម្បីសង្គ្រាម ប៉ុន្តែកាសែតនេះដាស់តឿនថា អូស្ត្រាលីគ្មានតួនាទីអ្វីត្រូវលេងល្បែងនេះទេ។
Global Times ចំអកថា អូស្ត្រាលីគ្មានសមត្ថភាពយោធាគ្រប់គ្រាន់ដើម្បីយកឈ្នះនឹងចិនបានឡើយ គឺកុំថាឡើយយោធា សូម្បីតែសេដ្ឋកិច្ច ក៏អូស្ត្រាលីដើរមិនទាន់ចិនដែរ។
កាសែតរបស់បក្សកុម្មុយនីស្តចិន បានចាត់ទុកអូស្ត្រាលីជាប្រទេសមើលឃើញខ្លួនឯងធំ តែគ្មានអំណាចទេ ហើយជាប្រទេសដែលគ្មានអាវុធនុយក្លេអ៊ែរក្នុងដៃថែមទៀត៕