31 C
Phnom Penh

ក្រសួង​យុត្តិធម៌​ជំរុញ​ឱ្យ​តុលាការ​ដោះស្រាយ​ភាព​ចង្អៀត​ណែន​ក្នុង​ពន្ធនាគារ ខណៈ​ក្រុម​អ្នក​រិះគន់​ថា​ជា​យុទ្ធសាស្ត្រ​នយោបាយ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​នៃ​ក្រសួង​យុត្តិធម៌ ជំរុញ​ឱ្យ ​តុលាការ​ប្រើប្រាស់​វិធានការ​អនុគ្រោះ​មួយ​ចំនួន ជាពិសេស​ការ​ព្យួរ​ទោស​ដើម្បី​ពន្លឿន​ចំណាត់ការ​នីតិវិធី​នៅ​ក្នុង​សំណុំរឿង និង​ដើម្បី​រួម​ចំណែក​ដោះស្រាយ​ភាព​ចង្អៀត​ណែន​ក្នុង​ពន្ធនាគារ ខណៈ​ក្រុម​អ្នក​តស៊ូ​មតិ​រិះគន់​ថា គឺជា​យុទ្ធសាស្ត្រ​របស់​មេដឹកនាំ​កុម្មុយនីស្ត ដើម្បី​រក​ផល​ចំណេញ​សម្រាប់​នយោបាយ​ពួកគេ​ប៉ុណ្ណោះ។

រដ្ឋមន្ត្រី​ក្រសួង​យុត្តិធម៌ លោក កើត រិទ្ធ បាន​ចេញ​សេចក្តី​ណែនាំ​ទៅកាន់​តុលាការ​គ្រប់​ខេត្ត-ក្រុង​ដែល​ត្រូវ​បាន​ផ្សព្វផ្សាយ​នៅ​ថ្ងៃ​ទី​៥ វិច្ឆិកា ថា ក្រសួង​យុត្តិធម៌​បាន​ចេញ​គោលការណ៍​ណែនាំ​ជំរុញ និង​លើក​ទឹកចិត្ត​ឱ្យ​មាន​ការ​ដោះលែង​នៅ​ក្រៅ​ឃុំ និង​ការ​ប្រើប្រាស់​វិធានការ​អនុគ្រោះ​មួយ​ចំនួន ជាពិសេស​ការ​ព្យួរ​ទោស​ក្នុង​ការ​កាត់ក្តី​សម្រាប់​ជន​ជាប់ចោទ​នៅ​តាម​បណ្តា​ខេត្ត-ក្រុង​ទាំងអស់។

រដ្ឋមន្ត្រី​រូប​នេះ​អះអាង​ថា ការ​ចេញ​គោលការណ៍​ណែនាំ​បែប​នេះ គឺ​ក្នុង​គោលបំណង​ដើម្បី​ចូលរួម​ចំណែក​ដោះស្រាយ​ភាព​ចង្អៀត​ណែន​នៅ​តាម​ពន្ធនាគារ បន្ទាប់ពី​ក្រសួង​យុត្តិធម៌​បាន​បញ្ចប់​យុទ្ធនាការ​ដោះស្រាយ​ការ​កក​ស្ទះ​សំណុំរឿង​ព្រហ្មទណ្ឌ​នៅ​តាម​សាលាដំបូង​ជាបន្តបន្ទាប់​មក​នេះ។ ជាង​នេះ​ទៅ​ទៀត ក្រសួង​ក៏​បាន​ជំរុញ​ឱ្យ​មាន​យន្តការ​ដោះលែង​អ្នកទោស​ដោយ​មាន​លក្ខខណ្ឌ និង​លើកលែង​ទោស​អ្នក​ទាំងនោះ​ក្នុង​ឱកាស​នៃ​ពិធី​បុណ្យ​ជាតិ​នានា​ផង​ដែរ។

រដ្ឋមន្ត្រី​ក្រសួង​យុត្តិធម៌ លោក កើត រិទ្ធ

សេចក្តី​ណែនាំ​របស់​ក្រសួង​យុត្តិធម៌​នេះ ធ្វើឡើង​ដើម្បី​ពន្លឿន​ចំណាត់ការ​នីតិវិធី​នៅ​ក្នុង​សំណុំរឿង និង​ដើម្បី​រួម​ចំណែក​ដោះស្រាយ​ភាព​ចង្អៀត​ណែន​ក្នុង​ពន្ធនាគារ​នានា​នៅ​តាម​បណ្តា​រាជធានី-ខេត្ត​របស់​កម្ពុជា។

សេចក្តី​ណែនាំ​របស់​ក្រសួង​យុត្តិធម៌ ចុះ​ថ្ងៃ​ទី​២៥ ខែ​តុលា ឆ្នាំ​២០២១ ត្រូវ​បាន​ផ្សព្វផ្សាយ​នៅ​ថ្ងៃ​ទី​៥ វិច្ឆិកា ដើម្បី​ណែនាំ​ដល់​សាលាដំបូង​រាជធានី-ខេត្ត​ទាំងអស់ ឱ្យ​ពន្លឿន​ចំណាត់ការ​នីតិវិធី​នៅ​ក្នុង​សំណុំរឿង និង​ដើម្បី​រួម​ចំណែក​ដោះស្រាយ​ភាព​ចង្អៀត​ណែន​ក្នុង​ពន្ធនាគារ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលន​ពលរដ្ឋ​ដើម្បី​ប្រជាធិបតេយ្យ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៥ វិច្ឆិកា ថា យុទ្ធសាស្ត្រ​របស់​រដ្ឋាភិបាល​លោក ហ៊ុន សែន អាច​បន្ធូរ​ការ​រឹតត្បិត​សេរីភាព​ពលរដ្ឋ​បន្តិច​មែន ប៉ុន្តែ​វា​គ្រាន់តែ​ជា​ល្បែង​នយោបាយ​បង្កប់​នូវ​ល្បិច​បញ្ឆោត​ភ្នែក​ប្រជាពលរដ្ឋ និង​សហគមន៍​អន្តរជាតិ​ប៉ុណ្ណោះ មិនមែន​ជា​នយោបាយ​ផ្លូវច្បាប់​ក្នុង​គោលដៅ​ស្ដារ​ប្រជាធិបតេយ្យ​នៅ​កម្ពុជា​នោះ​ទេ។

លោក​អះអាង​ថា ជាទូទៅ​ការ​ធ្វើ​បែប​នេះ គ្រាន់តែ​ជា​ផែនការ​នយោបាយ​របស់​ពួក​មេដឹកនាំ​កុម្មុយនីស្ត​ដែល​តែង​ចាប់​ខ្លួន​អ្នក​រិះគន់ ហើយ​លែង​វិញ​ដដែលៗ ដើម្បី​គំរាមកំហែង​បំបាក់​ស្មារតី​សកម្មជន​ប្រជាធិបតេយ្យ និង​ប្រជាពលរដ្ឋ​តាម​ទំនើង​ចិត្ត​របស់​អ្នក​មាន​អំណាច ដែល​តែង​នាំគ្នា​រំលោភ​ជាតិ​ខ្លួនឯង​តែប៉ុណ្ណោះ។

អ្នកវិភាគ​រូប​នេះ​លើកឡើង​ថា បើ​ទោះបីជា​គេ​អាច​មើល​ឃើញ​រូបភាព​ធូរស្រាល​តិចតួច​នៃ​ជ្រុង​ណា​មួយ​ក៏ដោយ ក៏​នោះ​គ្រាន់តែ​ជា​ផែនការ​សម្រាប់​ឃោសនា​នយោបាយ​ចិត្តសាស្ត្រ​របស់​មេដឹកនាំ​ផ្ដាច់ការ​របស់​កម្ពុជា​ប៉ុណ្ណោះ ចំណែក​ផែនការ​ពិតប្រាកដ​របស់​អតីត​មេដឹកនាំ​ខ្មែរ​ក្រហម លោក ហ៊ុន សែន គឺ​ការ​រឹត​បន្តឹង​តាម​គ្រប់​ឧបាយកល ដើម្បី​សម្រេច​គោលដៅ​បន្ត​អំណាច​ត្រកូល «ហ៊ុន» តទៅ​មុខ​ទៀត។

លោក គឹម សុខ

លោក គឹម សុខ អះអាង​ថា ដើម្បី​ត​ទល់​នឹង​នយោបាយ​ផ្ដាច់ការ​បែប​បុរស​ខ្លាំង​នៅ​កម្ពុជា​សព្វថ្ងៃ​នេះ មាន​តែ​វិធី​មួយ​គត់ គឺ​ពួក​មេដឹកនាំ​នយោបាយ​ដែល​ស្រឡាញ់​ប្រជាធិបតេយ្យ​ទាំងអស់ ចេញ​ធ្វើ​សកម្មភាព​តវ៉ា​ស្រុះ​គ្នា​ជា​ចំហ នោះ​ទើប​អាច​ទប់ទល់​នឹង​ផែនការ​នយោបាយ​របស់​ពួក​កុម្មុយនីស្ត​បាន​ជោគជ័យ ក្នុង​ការ​លើក​តម្កើង​ប្រជាធិបតេយ្យ​នៅ​កម្ពុជា​ទៅ​ថ្ងៃ​មុខ។ បើ​មិន​ដូច្នេះ​ទេ ពួកគេ​នៅ​តែ​ប្រើ​ល្បិច​កល​នយោបាយ​ដើម្បី​បន្លំ​ភ្នែក​ពលរដ្ឋ​ខ្មែរ​ជា​រៀង​រហូត។

ជុំវិញ​បញ្ហា​នេះ អង្គការ​សម្ព័ន្ធ​ខ្មែរ​ជំរឿន និង​ការពារ​សិទ្ធិមនុស្ស ហៅ​កាត់​ថា លីកាដូ ធ្លាប់​បាន​ស្នើ​នា​ពេល​កន្លងមក ដោយ​ទទូច​ដល់​ក្រសួង​ស្ថាប័ន​ពាក់ព័ន្ធ​ដោះស្រាយ​បញ្ហា​ចង្អៀត​ណែន​ក្នុង​ពន្ធនាគារ​តាមរយៈ​ការ​ពន្លឿន​នីតិវិធី​ដោះលែង​អ្នក​ជាប់​ឃុំ​ដោយ​មាន​លក្ខខណ្ឌ​ឱ្យ​បាន​ឆាប់ ប៉ុន្តែ​គណៈកម្មាធិការ​សិទ្ធិមនុស្ស​កម្ពុជា​បាន​ចាត់ទុក​ការ​អំពាវនាវ​របស់​អង្គការ​សង្គម​ស៊ីវិល​ដែល​មិន​ផ្អែក​លើ​មូលដ្ឋាន​ច្បាប់ នឹង​ធ្វើ​ឱ្យ​មាន​ផល​ប៉ះពាល់​ដល់​សន្តិសុខ និង​សណ្ដាប់ធ្នាប់​សង្គម។

អង្គការ​លើកលែង​ទោស​អន្តរជាតិ (Amnesty International) និង​អង្គការ​ឃ្លាំមើល​សិទ្ធិមនុស្ស​អន្តរជាតិ (Human Rights Watch) បាន​ចេញ​សេចក្តី​ថ្លែងការណ៍​រួម​គ្នា​កាលពី​ចុង​ខែ​ឧសភា ឆ្នាំ​២០២១ កន្លង​ទៅ អំពាវនាវ​ដល់​រដ្ឋាភិបាល​កម្ពុជា​ចាត់​វិធានការ​ជាបន្ទាន់ ដើម្បី​ការពារ​សិទ្ធិ​សុខុមាលភាព​របស់​អ្នក​ជាប់ឃុំ​ដែល​ចង្អៀត​ណែន​ក្នុង​ពន្ធនាគារ។

យ៉ាងណាក៏ដោយ កាសែត​ក្នុង​ស្រុក ភ្នំពេញ​ប៉ុស្តិ៍ បាន​ស្រង់​សម្ដី​អ្នក​នាំពាក្យ​អគ្គនាយកដ្ឋាន​ពន្ធនាគារ លោក នុត សវនា កាលពី​ពេល​ថ្មីៗ​នេះ​ថា បច្ចុប្បន្ន​នេះ​មាន​ជន​ជាប់ឃុំ​នៅ​តាម​ពន្ធនាគារ និង​មណ្ឌល​អប់រំ​កែប្រែ​ទូទាំង​ប្រទេស​ប្រមាណ​ជាង ៣​ម៉ឺន ៧​ពាន់​នាក់ ក្នុង​នោះ​ពន្ធនាគារ​នៅ​រាជធានី​ភ្នំពេញ​មាន​ជន​ជាប់ឃុំ​ច្រើន​ជាងគេ និង​មាន​សំណុំរឿង​មួយ​ចំនួន​នៅ​មិនទាន់​មាន​សាលក្រម​ស្ថាពរ​នៅឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស