សកម្មជនបរិស្ថាន និងសមាជិកខ្មែរថាវរៈ កញ្ញា អេង ម៉ាឡៃ ហៅ សូ មេត្តា ត្រូវបានដោះលែងពីពន្ធនាគារព្រៃស ឱ្យមានសេរីភាពឡើងវិញហើយនៅថ្ងៃទី៨ ខែវិច្ឆិកា ប៉ុន្តែកុមារា កាក់ សុវណ្ណច្ឆ័យ នឹងត្រូវដោះលែងនៅថ្ងៃទី១០ វិញ។ ក្រុមមន្ត្រីសិទ្ធិមនុស្សចោទថា ការធ្វើបែបនេះ គឺរំលោភលើឆន្ទានុសិទ្ធិរបស់តុលាការទាំងស្រុង។
កញ្ញា អេង ម៉ាឡៃ បានរិះគន់ភ្លាមៗនៅមុខពន្ធនាគារថា ការកាត់ក្តីលើសំណុំរឿងរបស់កញ្ញា គឺជារឿងអយុត្តិធម៌យ៉ាងធ្ងន់ធ្ងរ ប៉ុន្តែទោះជាយ៉ាងណាក៏ដោយ កញ្ញាប្ដេជ្ញាថានៅតែបន្តសកម្មភាពបរិស្ថានបន្តទៀតលុះដល់ថ្ងៃបាត់បង់ជីវិត ព្រោះថាការជួយសង្គមជាតិ គឺជាកាតព្វកិច្ចរបស់យុវជនខ្មែរទាំងអស់គ្នា ដូច្នេះគ្មានហេតុផលណាមួយធ្វើឱ្យកញ្ញាបញ្ឈប់សកម្មភាពរបស់កញ្ញាបានឡើយ។
សកម្មជនបរិស្ថានរូបនេះរៀបរាប់ថា ក្នុងអំឡុងពេលនៅក្នុងពន្ធនាគារ កញ្ញាបានមើលឃើញរឿងរ៉ាវអយុត្តិធម៌ និងការប្រព្រឹត្តអំពើពុករលួយក្នុងពន្ធនាគាររាប់មិនអស់ ដែលរឹតតែធ្វើឱ្យកញ្ញាមានការតស៊ូបន្តកិច្ចការដើម្បីសង្គមជាតិថែមទៀត បើទោះបីជាក្នុងពេលជាប់ឃុំ បានធ្វើឱ្យកញ្ញារងការលំបាក និងចុះខ្សោយសុខភាពធ្ងន់ធ្ងរក៏ដោយ ក៏នាងមិនរាថយជាដាច់ខាត ដើម្បីឱ្យសង្គមខ្មែរមានយុត្តិធម៌ឡើងវិញ។
ការអះអាងនេះ ធ្វើឡើងបន្ទាប់ពីកញ្ញា អេង ម៉ាឡៃ ត្រូវបានដោះលែងឱ្យមានសេរីភាពឡើងវិញនៅថ្ងៃចន្ទ ដើមសប្តាហ៍នេះ ខណៈកុមារា កាក់ សុវណ្ណច្ឆ័យ ត្រូវមន្ត្រីពន្ធនាគារពន្យារពេលនៃការដោះលែងទៅថ្ងៃក្រោយ។
នៅថ្ងៃទី៨ ខែវិច្ឆិកា ឆ្នាំ២០២១ អ្នកស្រី ព្រុំ ចាន់ថា បានទៅដល់មុខពន្ធនាគារព្រៃស ដើម្បីទៅទទួលកុមារា កាក់ សុវណ្ណច្ឆ័យ ដែលតុលាការបានប្រកាសថានឹងត្រូវដោះលែងនៅថ្ងៃទី៨ ខែវិច្ឆិកា ឆ្នាំ២០២១ រួមជាមួយក្រុមអ្នកការពារសិទ្ធិមនុស្សជាច្រើននាក់ផ្សេងទៀត ប៉ុន្តែមន្ត្រីពន្ធនាគារបានអះអាងថា នឹងត្រូវប្តូរទៅថ្ងៃទី១០ ខែវិច្ឆិកា ជំនួសវិញ។
ម្តាយបង្កើតរបស់ក្មេងប្រុសរូបនេះ បានប្រតិកម្មធ្ងន់ៗលើបណ្ដាញសង្គមតាមរយៈខ្សែវីដេអូដែលផ្សាយចេញពីមុខមន្ទីរឃុំឃាំងព្រៃស ថា អ្នកស្រីនឹងមិនបញ្ឈប់ការតវ៉ាជាដាច់ខាត ប្រសិនបើមន្ត្រីទាំងនោះនៅតែនិយាយដោះសាមិនព្រមដោះលែងកូនគាត់ឱ្យមានសេរីភាពឡើងវិញទេនោះ។
មន្ត្រីជាន់ខ្ពស់របស់សមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៨ វិច្ឆិកា នេះថា ក្រុមអង្គការសង្គមស៊ីវិលកំពុងយកចិត្តទុកដាក់លើករណីនេះយ៉ាងខ្លាំង ព្រោះមិនដឹងមូលហេតុពិតប្រាកដ ថាតើហេតុអ្វីអាជ្ញាធរមិនដោះលែងកុមារា កាក់ សុវណ្ណច្ឆ័យ តាមសាលដីកាដូចដែលតុលាការបានប្រកាសដោះលែងកាលពីពេលថ្មីៗនេះ។
កុមារា កាក់ សុវណ្ណច្ឆ័យ ដែលមានជំងឺអូទីហ្សឹម ត្រូវសមត្ថកិច្ចចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១ កន្លងទៅ ដោយចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទប្រមាថចំពោះអ្នករាជការសាធារណៈ» ខណៈកញ្ញា អេង ម៉ាឡៃ ឬកញ្ញា សូ មេត្តា ត្រូវសមត្ថកិច្ចចាប់ខ្លួនកាលពីថ្ងៃទី៧ ខែកញ្ញា ឆ្នាំ២០២០ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ផងដែរ៕