36 C
Phnom Penh

លោក ហ៊ុន សែន រំឭក​ព្រះរាជ​បេសកកម្ម​ដើម្បី​ជាតិ​មាតុភូមិ​របស់​សម្តេច​ព្រះ​នរោត្តម សីហនុ ក្នុង​ទិវា​ឯករាជ្យ​ជាតិ ៩ វិច្ឆិកា

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន អះអាង​ថា ទិវា​ឯករាជ្យ​ជាតិ ៩ វិច្ឆិកា បាន​រំឭក​ឲ្យ​ឃើញ​ពី​ព្រះរាជ​បេសកកម្ម​ដើម្បី​ជាតិ​មាតុភូមិ​របស់​ព្រះករុណា​ព្រះបាទ​សម្តេច ព្រះ​នរោត្តម សីហនុ ខណៈ​ក្រុម​អ្នក​ឃ្លាំមើល​អះអាង​ថា ថ្ងៃ​វិសេសវិសាល​នេះ កម្ពុជា​គួរតែ​បោស​សម្អាត​នយោបាយ​ពុករលួយ​កុំ​ឱ្យ​មាន​នៅ​កម្ពុជា​បន្ត​ទៀត។

លោក ហ៊ុន សែន បាន​សរសេរ​លើ​ទំព័រ Facebook របស់​លោក​នៅ​ថ្ងៃ​ទី​៩ វិច្ឆិកា នេះ​ថា សម្តេច​ព្រះ​នរោត្តម សីហនុ បាន​ធ្វើការ​តស៊ូ​យ៉ាង​ខ្លាំងក្លា​ដើម្បី​ទាមទារ​ឯករាជ្យ​ដ៏​ពិតប្រាកដ​សម្រាប់​ជាតិ​ខ្មែរ ដែល​ធ្វើ​ឱ្យ​កម្ពុជា​មាន​ឯករាជ្យ​ពេញលេញ​បរិបូរណ៍​រហូត​ដល់​សព្វថ្ងៃ​នេះ។

នៅ​ថ្ងៃ​ទី​៩ ខែ​វិច្ឆិកា ឆ្នាំ​២០២១ នេះ គឺជា​ថ្ងៃ​ប្រារព្ធ​ខួប​អនុស្សាវរីយ៍​លើក​ទី​៦៨ នៃ​ទិវា​ឯករាជ្យ​ជាតិ ៩ វិច្ឆិកា ដែល​កម្ពុជា​ទទួល​បាន​ឯករាជ្យ​ពី​អាណានិគមនិយម​បារាំង កាលពី​ថ្ងៃ​ទី​៩ ខែ​វិច្ឆិកា ឆ្នាំ​១៩៥៣ និង​ជា​ថ្ងៃ​ខួប ៦៨​ឆ្នាំ​នៃ​ការ​បង្កើត​កងយោធពល​ខេមរភូមិន្ទ​ដែល​ជា​កងទ័ព​ជាតិ​របស់​កម្ពុជា​ផង​ដែរ។

ជុំវិញ​ព្រឹត្តិការណ៍​ជាតិ​ដ៏​សំខាន់​នេះ បណ្ឌិត បញ្ញវន្ត អ្នកវិភាគ គណបក្ស​នយោបាយ អង្គការ​សង្គម​ស៊ីវិល និង​អ្នក​ឃ្លាំមើល​សង្គម ជាដើម បាន​នាំគ្នា​បញ្ចេញ​មតិ​យោបល់​ក្នុង​ថ្ងៃ​ប្រារព្ធ​ខួប​អនុស្សាវរីយ៍​លើក​ទី​៦៨ នៃ​ទិវា​ឯករាជ្យ​ជាតិ ៩ វិច្ឆិកា នេះ​លើ​បណ្ដាញ​សង្គម​ព្រោងព្រាត។

ប្រធាន​គណបក្ស​សង្គ្រោះ​ជាតិ ដែល​កំពុង​រង​ការ​រឹតត្បិត​សេរីភាព លោក កឹម សុខា បាន​សរសេរ​លើ​ទំព័រ Facebook របស់​លោក ដើម្បី​ចូលរួម​អបអរ​សាទរ​ទិវា​ឯករាជ្យ​ជាតិ​លើក​ទី​៦៨​ឆ្នាំ នៅ​ថ្ងៃ​ទី​៩ ខែ​វិច្ឆិកា ឆ្នាំ​២០២១ នេះ​ថា ឯកភាព​ជាតិ​នាំមក​នូវ​ឯករាជ្យ​ជាតិ។

ចំណែក​អ្នកវិភាគ​នយោបាយ​និង​សង្គម បណ្ឌិត ឡៅ ម៉ុងហៃ អះអាង​នៅ​ថ្ងៃ​ទី​៩ វិច្ឆិកា នេះ​ផង​ដែរ​ថា ថ្ងៃ​នេះ​ជា​ថ្ងៃ​វិសេសវិសាល​ណាស់​ដែល​គួរតែ​ធ្វើ​ឲ្យ​អ្នក​នយោបាយ​មាន​ចិត្ត​គំនិត​វិសេសវិសាល សម្រាប់​ពង្រឹង​ឯករាជ្យ​ជាតិ​ឲ្យ​បាន​រឹងមាំ​ថែមទៀត គឺ​នាំគ្នា​រក្សា​ភាព​ស្មោះត្រង់​ចំពោះ​កិច្ចព្រមព្រៀង​សន្តិភាព​ទីក្រុង​ប៉ារីស ជាពិសេស​គោរព​អនុវត្ត​ឱ្យ​ត្រឹមត្រូវ និង​សុំ​ឲ្យ​ប្រទេស​ហត្ថលេខី​គោរព​អនុវត្ត​កិច្ចព្រមព្រៀង​ទាក់ទិន​ទៅ​នឹង​អធិបតេយ្យភាព ឯករាជ្យ​ជាតិ និង​បូរណភាព​ទឹកដី​របស់​កម្ពុជា។

បណ្ឌិត ឡៅ ម៉ុងហៃ អះអាង​ថា ដើម្បី​រំឭក​ខួប​ទិវា​ឯករាជ្យ​ជាតិ​ដែល​ជា​ការ​ខិតខំ​ប្រឹងប្រែង​របស់​អតីត​ព្រះមហាក្សត្រ​ខ្មែរ អ្នក​នយោបាយ និង​មន្ត្រី​រដ្ឋាភិបាល​ទាំងអស់ គួរតែ​នាំគ្នា​បោស​សម្អាត​វប្បធម៌​ពុករលួយ និង​បោស​សម្អាត​នយោបាយ​ពុករលួយ​ឱ្យ​អស់​ចេញ​ពី​សង្គម​ខ្មែរ ដើម្បី​កម្ពុជា​ទទួល​បាន​នូវ​ភាព​រុងរឿង​ថ្កុំថ្កើង​ទៅ​ថ្ងៃ​មុខ។

ជុំវិញ​ថ្ងៃ​ទិវា​ឯករាជ្យ​ជាតិ​នេះ គណបក្ស​ខ្មែរ​ស្រឡាញ់​ជាតិ បាន​ចេញ​សេចក្តី​ថ្លែងការណ៍​នៅ​ថ្ងៃ​ទី​៩ វិច្ឆិកា នេះ​ថា ការ​រំឭក​ដល់​ថ្ងៃ​ដែល​កម្ពុជា​ទទួល​បាន​ឯករាជ្យ​ជាតិ ៩ វិច្ឆិកា ១៩៥៣ និង​ថ្ងៃ​ចុះ​កិច្ចព្រមព្រៀង​សន្តិភាព​ទីក្រុង​ប៉ារីស បាន​បញ្ចប់​ជម្លោះ​រវាង​ខ្មែរ​និង​ខ្មែរ ២៣ តុលា ១៩៩១ បាន​រំលេច​ឱ្យ​ឃើញ​នូវ​បុព្វហេតុ​របស់​ពលរដ្ឋ​កម្ពុជា​ដែល​ចង់​បាន​នូវ​អធិបតេយ្យ​ជាតិ ឯករាជភាព បូរណភាព​ទឹកដី និង​បញ្ឈប់​ការ​ឈ្លានពាន​របស់​បរទេស​មក​លើ​ទឹកដី​របស់​ខ្លួន​ជា​បន្ត​ទៀត។

ដោយឡែក​គណបក្ស​ប្រជាធិបតេយ្យ​មូលដ្ឋាន បាន​ចេញ​សេចក្តី​ថ្លែងការណ៍​នៅ​ថ្ងៃ​ដដែល​នេះ​ផង​ដែរ​ថា ឯកភាព​ជាតិ និង​សេរីភាព​នយោបាយ គឺជា​មូលដ្ឋាន​គ្រឹះ​នៃ​ឯករាជ្យ​ជាតិ។ ប្រភព​ដដែល​បន្ថែម​ថា ក្រោយ​ឯករាជ្យ​ជាតិ​ឆ្នាំ​១៩៥៣ មក​ដល់​បច្ចុប្បន្ន បទពិសោធន៍​ប្រវត្តិសាស្ត្រ​បាន​បង្ហាញ​ឱ្យ​ឃើញ​ថា ភាព​ស្ថិតស្ថេរ​រឹងមាំ​នៃ​ឯករាជ្យ និង​អធិបតេយ្យ​ជាតិ គឺ​អាស្រ័យ​លើ​ឯកភាព​ជាតិ និង​សាមគ្គី​ជាតិ​ទាំងស្រុង។

គណបក្ស​ក្រៅ​រដ្ឋាភិបាល​មួយ​នេះ​អះអាង​ថា មាន​តែ​ការ​កសាង​ឱ្យ​មាន​ឯកភាព​ជាតិ​តាម​គោលការណ៍​ប្រជាធិបតេយ្យ​សេរី​ពហុ​បក្ស​ប៉ុណ្ណោះ ទើប​នាំមក​នូវ​ឯករាជ្យ​ជាតិ និង​សន្តិភាព​យូរ​អង្វែង​ជូន​ពលរដ្ឋ​កម្ពុជា។

ជុំវិញ​ខួប ៦៨​ឆ្នាំ​នៃ​ទិវា​ឯករាជ្យ​ជាតិ​របស់​ប្រទេស​កម្ពុជា​នេះ រដ្ឋមន្ត្រី​ការបរទេស​អាមេរិក លោក អេនថូនី ប្ល៊ីនខេន (Antony Blinken) បាន​អះអាង​កាលពី​ថ្ងៃ​ទី​៩ ខែ​វិច្ឆិកា ឆ្នាំ​២០២១ នេះ​ថា ក្នុង​នាម​សហរដ្ឋ​អាមេរិក លោក​សូម​ផ្ញើ​ក្តី​នឹក​រឭក​ដល់​ពលរដ្ឋ​ខ្មែរ​ក្នុង​ឱកាស​រំឭក​ខួប​លើក​ទី​៦៨ នៃ​ទិវា​ឯករាជ្យ​ជាតិ ៩ វិច្ឆិកា នេះ។ លោក​បន្ថែម​ថា សហរដ្ឋ​អាមេរិក​នឹង​នៅតែ​បន្ត​រក្សា​ជំហរ​ជាមួយ​ពលរដ្ឋ​ខ្មែរ ដើម្បី​ឱ្យ​កម្ពុជា​ទទួល​បាន​នូវ​អនាគត​មួយ​ប្រកប​ដោយ​វិបុលភាព លទ្ធិប្រជាធិបតេយ្យ និង​ឯករាជ្យ​ជាតិ​ពិតប្រាកដ។

រដ្ឋមន្ត្រី​ការបរទេស​អាមេរិក​រូប​នេះ​បញ្ជាក់​ថា សហរដ្ឋ​អាមេរិក​រំពឹង​ថា​នឹង​ធ្វើការ​ជាមួយ​កម្ពុជា​នៅ​ពេល​ដែល​កម្ពុជា​ធ្វើជា​ប្រធាន​អាស៊ាន នៅ​ឆ្នាំ​២០២២ ខាងមុខ​នេះ ដើម្បី​ថែរក្សា​សន្តិភាព និង​សន្តិសុខ តាមរយៈ​ភាព​ជា​អ្នក​ដឹកនាំ​រឹងមាំ​ជុំវិញ​ការ​អភិវឌ្ឍ​ប្រកប​ដោយ​ចីរភាព​នៅ​ក្នុង​តំបន់​ឥណ្ឌូ-ប៉ាស៊ីហ្វិក (Indo-Pacific)៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស