ពលករខ្មែរដែលកំពុងធ្វើចត្តាឡីស័កនៅមណ្ឌលកូបធំ សង្កាត់និមិត្ត បានពុលទឹកក្រូចលាយជាមួយអាល់កុល និងទឹកតែស្លាប់ចំនួន ៧នាក់ និងកំពុងសង្គ្រោះបន្ទាន់ជិត ២០នាក់ផ្សេងទៀតក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
របាយការណ៍ដដែលបញ្ជាក់ថា ករណីបណ្តាលឲ្យពលករទាំងនោះស្លាប់ និងខ្លះទៀតកំពុងសង្គ្រោះបន្ទាន់ គឺដោយសារតែជនរងគ្រោះទាំងនោះបានយកអាល់កុលដែលមន្ត្រីសុខាភិបាលទុកសម្រាប់ផ្តល់ជូនពួកគាត់បាញ់ធ្វើអនាម័យ ឬលាងសម្អាតដៃ យកទៅលាយជាមួយតែ «អូអ៊ិឈិ និងទឹកក្រូច» រួចនាំគ្នាផឹក ហើយក៏បានពុលស្លាប់នៅនឹងកន្លែង និងខ្លះទៀតបានស្លាប់ពេលបញ្ជូនទៅដល់មន្ទីរពេទ្យ។
សមត្ថកិច្ចបន្តថា តាមការសាកសួរពីពលករដទៃទៀតនិយាយថា ពលករដែលរងគ្រោះខាងលើ គឺពួកគាត់ធ្លាប់បានយកអាល់កុលទៅលាយជាមួយទឹកតែ «អូអ៊ិឈិ និងទឹកក្រូច» ដើម្បីទទួលទាន ឬចែកគ្នាផឹកដូចគ្នានេះជាប្រចាំនៅក្នុងអំឡុងពេលពួកគាត់ធ្វើការនៅប្រទេសថៃ។
ទាក់ទិនករណីនេះ លោក រឿន សុធី អនុប្រធានមន្ទីរសុខាភិបាល និងជាអ្នកនាំពាក្យមន្ទីរសុខាភិបាលខេត្តបន្ទាយមានជ័យ បានឲ្យដឹងនៅព្រឹកថ្ងៃទី១២ ខែវិច្ឆិកា នេះថា ជនរងគ្រោះដែលបានពុលមានចំនួន ២៥នាក់។ ចំពោះហេតុការណ៍ខាងលើនេះ គឺបានកើតឡើងកាលពីរសៀលថ្ងៃទី១១ ខែវិច្ឆិកា ឆ្នាំ២០២១ មកម្ល៉េះ។
លោកបន្តថា ចំពោះអ្នកដែលមានរោគសញ្ញាធ្ងន់ធ្ងរ ត្រូវបានយកទៅសង្គ្រោះបន្ទាន់នៅមន្ទីរពេទ្យខេត្តសៀមរាប។ ក្រោយពីមានករណីពុល ក្រុមការងារមន្ទីរសុខាភិបាលខេត្តបានយកសំណាកដែលពុលទៅវិភាគនៅថ្នាក់ជាតិ កាលពីព្រឹកថ្ងៃទី១២ វិច្ឆិកា ចំពោះលទ្ធផលយ៉ាងណា នឹងជូនដំណឹងតាមក្រោយបន្តទៀត៕