កូនស្រីពៅរបស់ប្រធានគណបក្សសង្គ្រោះជាតិ លោក កឹម សុខា ត្អូញត្អែរថា ចាប់តាំងពីលោក កឹម សុខា ត្រូវបានអាជ្ញាធរកម្ពុជាចាប់ខ្លួនមក មនុស្សជំនិតបំផុតរបស់អតីតមេដឹកនាំបក្សប្រឆាំង លោក សម រង្ស៊ី បានចាប់ផ្តើមបើកយុទ្ធនាការលាបពណ៌ដោយឥតឈប់ឈរប្រឆាំងនឹងឪពុកខ្លួន ព្រមទាំងក្រុមគ្រួសាររបស់កញ្ញាផងដែរនៅលើបណ្ដាញសង្គម។
កូនស្រីពៅរបស់ប្រធានគណបក្សសង្គ្រោះជាតិ លោក កឹម សុខា គឺកញ្ញា កឹម សម្មាធីតា បានសរសេរនៅលើបណ្ដាញសង្គមធ្វីតធ័រ (Twitter) របស់កញ្ញានៅថ្ងៃទី៣០ វិច្ឆិកា នេះថា គ្រួសាររបស់កញ្ញាត្រូវបានគេចងភ្ជាប់ទៅនឹងការលាបពណ៌ពីក្រុមរបស់លោក សម រង្ស៊ី អស់ជាច្រើនឆ្នាំមកហើយ ដោយចាប់ផ្តើមពីការចោទប្រកាន់ថា ក្រុមគ្រួសាររបស់លោក កឹម សុខា ជាជនជាតិវៀតណាម ជាដើម។
កញ្ញា កឹម សម្មាធីតា បន្តថា ពួកគេបានប្រព្រឹត្តទង្វើអសីលធម៌គ្រប់បែបយ៉ាង ក្នុងនោះក៏បានប្រើពាក្យប្រមាថមាក់ងាយអាសអាភាសកេរ្តិ៍ភេទមកលើបងស្រីរបស់កញ្ញា គឺកញ្ញា កឹម មនោវិទ្យា យ៉ាងធ្ងន់ធ្ងរផងដែរ បន្ទាប់ពីអាជ្ញាធរបានចាប់ខ្លួនលោក កឹម សុខា កាលពីពេលកន្លងទៅនោះ ប៉ុន្តែក្នុងនាមជាសាច់ញាតិ ជាកូនៗ និងមន្ត្រីបក្សប្រឆាំងដែលគាំទ្រជំហរលោក កឹម សុខា មិនដែលត្រូវបានអនុញ្ញាតឱ្យការពារខ្លួននៅពេលមានការវាយប្រហារ ឬការលាបពណ៌នោះទេ ដូច្នេះនេះឬជាការឯកភាពគ្នារវាង សម រង្ស៊ី និង កឹម សុខា ជាមនុស្សតែមួយនោះ។
កូនស្រីពៅប្រធានបក្សប្រឆាំងរូបនេះលើកឡើងថា ប្រសិនបើបុព្វហេតុរបស់អ្នកនយោបាយទាំងនោះព្រោះតែចង់ឈ្នះ ហើយព្យាយាមរំលោភបំពានលើសម្ពន្ធមិត្តរបស់ខ្លួន និងប្រើឥទ្ធិពលដែលខ្លួនមាន ដើម្បីបំបិទមាត់ជនរងគ្រោះដែលចង់ប្រើសិទ្ធិការពារខ្លួន នោះអ្នកនយោបាយទាំងនោះមិនមែនតស៊ូដើម្បីលទ្ធិប្រជាធិបតេយ្យនោះទេ គឺពួកគេកំពុងតែប្រើអំណាចផ្ដាច់ការដែលពួនសម្ងំក្នុងចិត្តខ្លួនឯងតែប៉ុណ្ណោះ។
កញ្ញា កឹម សម្មាធីតា រិះគន់ថា ចំពោះអ្នកកាសែតដែលគ្មានក្រមសីលធម៌វិជ្ជាជីវៈចុះផ្សាយថា លោក កឹម សុខា មិនឱ្យលោក សម រង្ស៊ី យកឈ្មោះគាត់ប្រើ គឺជារឿងមិនត្រឹមត្រូវនោះ វាជាការចុះផ្សាយមិនពិត និងជាការភូតភរសាធារណមតិប៉ុណ្ណោះ ព្រោះថាក្នុងនាមលោក កឹម សុខា ជាប្រធានគណបក្សសង្គ្រោះជាតិ ហាមមិនឱ្យមន្ត្រីគណបក្សភ្លើងទៀន ដូចជាលោក សម រង្ស៊ី ជាដើម យកឈ្មោះរបស់លោកទៅប្រើក្នុងចលនានយោបាយបក្សភ្លើងទៀន គឺជារឿងត្រឹមត្រូវ ត្បិតបក្សភ្លើងទៀន មិនមែនជាគណបក្សរបស់លោក កឹម សុខា នោះទេ ប៉ុន្តែជាគណបក្សរបស់លោក សម រង្ស៊ី តែម្នាក់ប៉ុណ្ណោះ។
ការអះអាងនេះ ធ្វើឡើងក្រោយពេលមន្ត្រីបក្សប្រឆាំងភាគីលោក សម រង្ស៊ី បានវាយប្រហារលើប្រធានគណបក្សសង្គ្រោះជាតិ លោក កឹម សុខា និងក្រុមគ្រួសាររបស់លោក ចាប់តាំងពីប្រធានបក្សប្រឆាំងរូបនេះត្រូវអាជ្ញាធរក្រុងភ្នំពេញចាប់ឃុំខ្លួនកាលពីឆ្នាំ២០១៧ រហូតមក។
ចំណែកកូនស្រីច្បងរបស់លោក កឹម សុខា គឺកញ្ញា កឹម មនោវិទ្យា នៅថ្ងៃទី៣០ វិច្ឆិកា នេះដែរ ក៏បានសរសេរលើបណ្ដាញសង្គមធ្វីតធ័រ (Twitter) របស់កញ្ញាផងដែរថា ឪពុករបស់កញ្ញា គឺលោក កឹម សុខា មានសិទ្ធិពេញលេញក្នុងការបញ្ឈប់ដៃគូបោកប្រាស់ និងកេងចំណេញមហិច្ឆតានយោបាយផ្ទាល់ខ្លួន ដើម្បីយកឈ្មោះលោក កឹម សុខា ទៅបោកប្រាស់សាធារណជន។ កញ្ញាបន្តថា ភាពជាដៃគូ ត្រូវបានបញ្ចប់រួចបាត់ទៅហើយនៅពេលដែលលោក សម រង្ស៊ី បានអំពាវនាវឱ្យមន្ត្រីគណបក្សសង្គ្រោះជាតិ និងពលរដ្ឋខ្មែរបោះបង់ចោលលោក កឹម សុខា និងដឹកនាំយុទ្ធនាការដោយគ្មានការឯកភាពពីប្រធានបក្សរបស់ខ្លួនរហូតមកនោះ។
កាលពីថ្ងៃទី២៨ ខែវិច្ឆិកា ឆ្នាំ២០២១ ប្រធានគណបក្សសង្គ្រោះជាតិ លោក កឹម សុខា បានសរសេរលើទំព័រ Facebook របស់លោកថា សកម្មភាពនយោបាយរបស់អតីតមេដឹកនាំប្រឆាំង លោក សម រង្ស៊ី មិនដែលចាត់ទុកស្មារតី សម រង្ស៊ី និង កឹម សុខា ជាមនុស្សតែមួយនោះទេ ព្រោះសកម្មភាពទាំងនោះមិនមានការគាំទ្រពីរូបលោក ហើយក៏មិនបានគាំទ្រនូវជំហររបស់លោកក្នុងនាមជាប្រធានគណបក្សសង្គ្រោះជាតិនោះដែរ។
ការអះអាងបែបនេះ ធ្វើឡើងបន្ទាប់ពីអតីតមេដឹកនាំបក្សប្រឆាំង លោក សម រង្ស៊ី បានប្រកាសគាំទ្រគណបក្សភ្លើងទៀន ដែលជាគណបក្សចាស់របស់លោកវិញ ដើម្បីចូលការបោះឆ្នោតឆ្នាំ២០២២ ខាងមុខនេះ ប៉ុន្តែលោក សម រង្ស៊ី នៅតែប្រកាសប្រាប់អ្នកគាំទ្ររបស់ខ្លួនថា សម រង្ស៊ី និង កឹម សុខា គឺជាមនុស្សតែមួយដដែល ខណៈការផ្ដួចផ្ដើមឱ្យមានបក្សភ្លើងទៀនឡើងវិញនេះ គឺជាគំនិតរបស់លោក សម រង្ស៊ី តែម្នាក់ប៉ុណ្ណោះ។
ក្រុមអ្នកឃ្លាំមើលសង្គមមើលឃើញថា អតីតមេដឹកនាំបក្សប្រឆាំង លោក សម រង្ស៊ី ជាអ្នកនយោបាយមិនដែលរក្សាភាពស្មោះត្រង់ជាមួយដៃគូនយោបាយរបស់ខ្លួននោះឡើយ។ ជាក់ស្តែង សម្តេចក្រុមព្រះ នរោត្តម រណឫទ្ធិ ក៏ត្រូវលោក សម រង្ស៊ី ប្រើល្បិចកលសហការជាមួយលោក ហ៊ុន សែន កម្ចាត់ទ្រង់ចេញពីឆាកនយោបាយរហូតដល់ព្រះអង្គសោយទិវង្គត។ ដោយឡែកប្រធានគណបក្សសង្គ្រោះជាតិ លោក កឹម សុខា ក៏អាចត្រឹមតែជាយានជំនិះនយោបាយជាប់គុកដោយសារភាពស្មោះត្រង់ជំនួសលោក សម រង្ស៊ី ប៉ុណ្ណោះ។
ក្រុមអ្នកឃ្លាំមើលនិយាយថា ស្មារតី សម រង្ស៊ី និង កឹម សុខា ជាមនុស្សតែមួយ បានដើរដល់ផ្លូវបំបែកហើយ បន្ទាប់ពីអតីតមេដឹកនាំបក្សប្រឆាំង លោក សម រង្ស៊ី ចេញមុខគាំទ្រគណបក្សភ្លើងទៀន ដែលជាគណបក្សចាស់របស់ខ្លួន ដើម្បីបន្តជីវិតនយោបាយរបស់លោកកាលពីពេលថ្មីៗនេះ៕