ក្រុមអ្នកតស៊ូមតិនៅឯនាយសមុទ្រ បានប្រៀបធៀបថា លោក ហ៊ុន សែន ប្រៀបដូចជាចោរម្នាក់ ហើយតាំងខ្លួនជាអាជ្ញាកណ្ដាលទៅជួយដោះស្រាយបញ្ហាឲ្យចោរដូចគ្នាម្នាក់ទៀតនៅប្រទេសភូមា។ ដូច្នេះ តើជនរងគ្រោះដោយសារអំពើលួចប្លន់របស់ចោរម្នាក់នោះ នឹងអាចឱ្យជនរងគ្រោះ គឺពលរដ្ឋភូមា ទទួលបាននូវយុត្តិធម៌ពិតប្រាកដដូចម្តេច។
អនុប្រធានប្រតិបត្តិនៃចលនាពលរដ្ឋដើម្បីប្រជាធិបតេយ្យ (PMD) លោក អ៊ាប សេង បានសរសេរលើគណនី Facebook របស់ខ្លួននៅថ្ងៃទី១៤ ធ្នូ ដោយប្រតិកម្មទៅនឹងការលើកឡើងរបស់អ្នកស្រាវជ្រាវការអភិវឌ្ឍសង្គម បណ្ឌិត សេង សារី។
កាលពីថ្ងៃទី១១ ខែធ្នូ កន្លងទៅ បណ្ឌិត សេង សារី បានរិះគន់នូវមតិប្រឆាំងមួយចំនួនដែលថា ភាគីកម្ពុជាក្នុងនាមជាប្រធានអាស៊ាន មិនគួរទៅជួបចរចាជាមួយភាគីរដ្ឋាភិបាលយោធាភូមា ហើយសង្ឃឹមថាវិបត្តិនយោបាយនៅភូមា នឹងត្រូវបញ្ចប់ គឺជាការយល់ឃើញមិនត្រឹមត្រូវ និងជាគំនិតដែលប្រាសចាកពីភាពជាក់ស្តែងទាំងស្រុង។
លោក អ៊ាប សេង សរសេរថា មេរដ្ឋប្រហារអចិន្ត្រៃយ៍របស់កម្ពុជា គឺលោក ហ៊ុន សែន មិនអាចដោះស្រាយវិបត្តិនយោបាយនៅភូមា បានទេ លុះត្រាតែមានសហគមន៍អន្តរជាតិចេញមុខធ្វើជាអាជ្ញាកណ្ដាលក្នុងការដោះស្រាយលើវិបត្តិនេះដោយផ្ទាល់ ព្រោះលោក ហ៊ុន សែន មិនស័ក្ដិសមជាអាជ្ញាកណ្ដាលក្នុងការដោះស្រាយវិបត្តិរដ្ឋប្រហារបង្ហូរឈាមនៅប្រទេសភូមា នេះឡើយ។
អនុប្រធានប្រតិបត្តិនៃចលនាពលរដ្ឋដើម្បីប្រជាធិបតេយ្យរូបនេះ លើកឡើងថា លោក ហ៊ុន សែន នឹងលើកឡើងពីស្នៀតមួយចំនួនដែលគាត់ធ្លាប់ធ្វើរដ្ឋប្រហាររំលោភអំណាចយ៉ាងជោគជ័យនៅកម្ពុជាកន្លងមក ដែលអាចជាក្បួនយុទ្ធសាស្ត្រដ៏សំខាន់ដែលគាត់អាចនឹងយកមកធ្វើជាមេរៀនបង្រៀនមេរដ្ឋប្រហារបង្ហូរឈាមនៅភូមា លោក មីន អ៊ុងឡាំង ឲ្យអនុវត្តតាម ដើម្បីក្តោបក្តាប់អំណាចនៅភូមាបន្តទៀត។
ប្រភពដដែលលើកឡើងថា មេដឹកនាំរដ្ឋាភិបាលក្រុងភ្នំពេញទំនងជានឹងណែនាំឱ្យមេរដ្ឋប្រហារយោធាភូមា លោក មីន អ៊ុងឡាំង ប្រើល្បិចកលដែលខ្លួនធ្លាប់អនុវត្ត ដូចជារំលាយគណបក្សដែលមានសក្ដានុពលប្រជែងនឹងខ្លួនដូចដែលគាត់ធ្លាប់រំលាយគណបក្សសង្គ្រោះជាតិ បន្ថយសិទ្ធិសេរីភាពមេដឹកនាំដែលមានឥទ្ធិពលជាងខ្លួន ដូចជាការចាប់មេដឹកនាំបក្សប្រឆាំង លោក កឹម សុខា ដាក់គុក និងរឹតត្បិតសេរីភាពរបស់មេបក្សប្រឆាំងនៅកម្ពុជាដូចសព្វថ្ងៃនេះ ជាដើម។
លោក អ៊ាប សេង បន្ថែមថា មេរដ្ឋប្រហារអចិន្ត្រៃយ៍កម្ពុជា និងណែនាំមេរដ្ឋប្រហារយោធាភូមា ឱ្យបំបែកបំបាក់កម្លាំងអ្នកស្រឡាញ់ប្រជាធិបតេយ្យបង្កើតការបោះឆ្នោតជាតិបន្លំភ្នែកអន្តរជាតិមួយ ដែលធ្វើឡើងក្រោមការរៀបចំរបស់មេរដ្ឋប្រហារយោធាភូមា ដោយគ្មានវត្តមានបក្សសម្ព័ន្ធជាតិដើម្បីប្រជាធិបតេយ្យរបស់អ្នកស្រី អ៊ុងសាន ស៊ូជី និងបង្កើតបក្សតូចៗឲ្យចូលរួមការបោះឆ្នោតលម្អសួនផ្ដាច់ការដូចដែលលោក ហ៊ុន សែន ធ្វើនៅកម្ពុជាសព្វថ្ងៃនេះ ជាដើម។
បុរសខ្លាំងនៅកម្ពុជា លោក ហ៊ុន សែន កាលពីថ្ងៃទី៩ ខែធ្នូ ឆ្នាំ២០២១ អះអាងថា លោកនឹងព្យាយាមធ្វើការជាមួយមេដឹកនាំនៅប្រទេសភូមា លោក មីន អ៊ុងឡាំង (Min Aung Hlaing) ហើយទាមទារឱ្យមេយោធាផ្ដាច់ការរូបនេះចូលរួមក្នុងកិច្ចប្រជុំកំពូលអាស៊ាន ឱ្យបាននៅពេលដែលលោកធ្វើជាប្រធានដឹកនាំអាស៊ាន នៅឆ្នាំ២០២២ ខាងមុខ។
កាលពីថ្ងៃទី១៣ ខែធ្នូ ឆ្នាំ២០២១ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានរបស់ខ្លួនក្រោយកិច្ចប្រជុំក្រុមប្រទេស G7 ថា កម្ពុជាឈរលើគោលការណ៍រួបរួមសម្រាប់កិច្ចសហប្រតិបត្តិការ មិនមែនរួបរួមសម្រាប់ការប្រឈមមុខដាក់គ្នានោះទេ។
ប្រភពដដែលបញ្ជាក់ថា ស្របពេលជំរុញឱ្យប្រទេសក្នុងតំបន់ត្រូវតែធ្វើការជាមួយគ្នា ដូច្នេះគ្រប់រដ្ឋទាំងអស់ត្រូវតែពួតដៃគ្នាដោះស្រាយបញ្ហាប្រឈមផ្នែកសន្តិសុខរួមគ្នាផងដែរ ដែលអាចរស់នៅជាមួយគ្នា និងប្រកួតប្រជែងដើម្បីភាពល្អប្រសើរទាំងអស់គ្នាទៅថ្ងៃអនាគត។
ទោះជាបែបនេះក្តី ក្រុមអ្នកឃ្លាំមើលសង្គមលើកឡើងថា ប្រសិនបើតុលាការព្រហ្មទណ្ឌអន្តរជាតិ (ICC) ព្រមទទួលយកបណ្តឹងរបស់គម្រោងគណនេយ្យភាពមីយ៉ាន់ម៉ា ដែលបានចោទប្រកាន់មេដឹកនាំរបបសឹកភូមា លោក មីន អ៊ុងឡាំង ពីបទឧក្រិដ្ឋកម្មប្រឆាំងមនុស្សជាតិកាលពីថ្ងៃសុក្រសប្តាហ៍មុន ពេលនោះរបបសឹកយោធាភូមា នឹងដើរដល់ផ្លូវទាល់ច្រកផ្នែកការទូត និងកិច្ចសហប្រតិបត្តិការអន្តរជាតិយ៉ាងធ្ងន់ធ្ងរ៕