អតីតគណបក្សសង្គ្រោះជាតិនៅក្រៅប្រទេសមួយរូបលើកឡើងថា ប្រសិនបើសមាជិកបក្សប្រឆាំងតាមដានឲ្យបានល្អិតល្អន់អំពីស្ថានការណ៍នយោបាយនៅកម្ពុជា ចាប់តាំងពីគណបក្សសង្គ្រោះជាតិត្រូវបានរំលាយមកនោះ ពួកគេនឹងអាចដឹងយ៉ាងច្បាស់ថា លោក ហ៊ុន សែន កំពុងសហការជាមួយជនបង្កប់ក្នុងគណបក្សសង្គ្រោះជាតិ ផ្តល់សញ្ញាឲ្យគ្នាទៅវិញទៅមក។
អតីតអគ្គលេខាធិការគណបក្សសង្គ្រោះជាតិក្រៅប្រទេស CNRP-O លោក ប៉ុន សៅរី បានសរសេរលើគណនី Facebook របស់លោកនៅថ្ងៃទី២៤ ធ្នូ នេះ ទំនងអាចជាការចោទប្រកាន់អនុប្រធានគណបក្សសង្គ្រោះជាតិ លោក អេង ឆៃអ៊ាង ថាលោក ហ៊ុន សែន បានប្រើប្រាស់ជាជនបង្កប់ក្នុងបក្សប្រឆាំង ដើម្បីបន្លំភ្នែកពលរដ្ឋខ្មែរ និងអ្នកគាំទ្រគណបក្សសង្គ្រោះជាតិ ដោយការលួចបញ្ចេញព័ត៌មានផ្ទៃក្នុងរបស់បក្សប្រឆាំងទៅឱ្យមេបក្សកាន់អំណាចរហូតមក។
អតីតមន្ត្រីជាន់ខ្ពស់គណបក្សសង្គ្រោះជាតិប្រចាំទ្វីបអឺរ៉ុបរូបនេះអះអាងថា គោលដៅចុងក្រោយរបស់លោក ហ៊ុន សែន គឺការផ្តាច់ផ្លូវនយោបាយរបស់លោក សម រង្ស៊ី និងលោក កឹម សុខា ព្រមទាំងអ្នកប្រជាធិបតេយ្យដែលមានសក្ដានុពលទាំងអស់ជំនាន់ក្រោយៗទៀត ដើម្បីរក្សាជំហរនយោបាយផ្ទេរអំណាចរបស់ខ្លួន។
លោក ប៉ុន សៅរី បញ្ជាក់ថា លទ្ធផលកិច្ចការចុងក្រោយរបស់ជនបង្កប់ និងលោក ហ៊ុន សែន សង្ឃឹមថានឹងទទួលបាននូវជ័យជម្នះក្រោមការឈឺចាប់របស់លោក សម រង្ស៊ី និងលោក កឹម សុខា ព្រមទាំងអ្នកប្រជាធិបតេយ្យពិតប្រាកដផ្សេងទៀតផងដែរ ប៉ុន្តែពួកគេនៅភ្លេចគិតថា ពលរដ្ឋខ្មែរទៅវិញទេដែលមានសិទ្ធិសម្រេចលើវាសនានយោបាយរបស់ជនបង្កប់ និងមេដឹកនាំបក្សកាន់អំណាចនោះ។
ការអះអាងនេះ ធ្វើឡើងនៅក្នុងចេតនាសំដៅរិះគន់មន្ត្រីជាន់ខ្ពស់បក្សប្រឆាំងដែលគេចោទថាបានបង្កប់ខ្លួនក្នុងគណបក្សសង្គ្រោះជាតិ ដើម្បីសហការជាមួយមេដឹកនាំបក្សកាន់អំណាច ក្នុងបំណងរំលាយកម្លាំងក្រុមប្រឆាំងដែលកំពុងតស៊ូដើម្បីលទ្ធិប្រជាធិបតេយ្យសព្វថ្ងៃនេះ។
កាលពីអំឡុងឆ្នាំ២០១៩ ក្នុងពេលដែលមន្ត្រីបក្សប្រឆាំងភាគីលោក សម រង្ស៊ី នាំគ្នាចាកចេញពីកម្ពុជាទៅក្រៅប្រទេស បន្ទាប់ពីតុលាការកំពូលក្រុងភ្នំពេញប្រកាសរំលាយគណបក្សសង្គ្រោះជាតិកាលពីឆ្នាំ២០១៧ មក។
លោក អេង ឆៃអ៊ាង ត្រូវបានមន្ត្រីបក្សប្រឆាំងមួយចំនួនសង្ស័យផងដែរថា ជាសេណារីយ៉ូបង្កប់របស់លោក ហ៊ុន សែន ដើម្បីបំបែកបំបាក់កម្លាំងគាំទ្រគណបក្សសង្គ្រោះជាតិកន្លងមក។ ការសង្ស័យនេះ គឺដោយសារតែយុទ្ធសាស្ត្រនយោបាយរបស់ក្រុមប្រឆាំងដើម្បីយកឈ្នះបក្សកាន់អំណាច ដែលលោក សម រង្ស៊ី យកទៅអនុវត្តតាមការណែនាំរបស់លោក អេង ឆៃអ៊ាង កន្លងមក ត្រូវបរាជ័យជាបន្តបន្ទាប់ ប៉ុន្តែបញ្ហានេះនៅមិនទាន់មានភស្តុតាងជាក់ស្តែងណាមួយត្រូវបានលាតត្រដាងនៅឡើយទេ។
ទោះជាមានការចោទប្រកាន់បែបនេះក្តី សារព័ត៌មាន The Cambodia Daily នៅមិនទាន់អាចសុំសេចក្តីប្រតិកម្មពីលោក អេង ឆៃអ៊ាង បាននៅឡើយទេ គិតមកត្រឹមម៉ោងផ្សាយនេះ។
អតីតប្រធានចលនាយុវជនសង្គ្រោះជាតិប្រចាំប្រទេសកូរ៉េខាងត្បូង លោក យឹម ស៊ីណន ធ្លាប់បានរិះគន់អនុប្រធានបក្សប្រឆាំង លោក អេង ឆៃអ៊ាង កាលពីពាក់កណ្តាលខែធ្នូ ឆ្នាំ២០២១ នេះថា ការបែកបាក់កម្លាំងនយោបាយនៅប្រទេសកូរ៉េខាងត្បូង ជាស្នាដៃរបស់លោក អេង ឆៃអ៊ាង ទាំងស្រុង។
ប្រភពដដែលលើកឡើងថា កាលពីឆ្នាំ២០១៨ មុនការបោះឆ្នោតជាតិមកដល់ ផ្ទៃក្នុងគណបក្សសង្គ្រោះជាតិបានលើកពីយុទ្ធសាស្ត្រនយោបាយបើកផ្លូវឈាម ដែលមានគោលដៅធ្វើយុទ្ធនាការរាំងខ្ទប់ដំណើរការបោះឆ្នោតដែលរៀបចំឡើងដោយបក្សកាន់អំណាចនៅពេលនោះឱ្យបរាជ័យតែម្តង ដោយការស្រែកទាមទាររកគណបក្សសង្គ្រោះជាតិនៅតាមមណ្ឌលបោះឆ្នោតទូទាំងប្រទេសព្រមៗគ្នា ប៉ុន្តែយុទ្ធសាស្ត្រនេះត្រូវលោក អេង ឆៃអ៊ាង បដិសេធ និងប្រកាសយុទ្ធនាការ «ដេកផ្ទះឈ្នះឯង» រហូតបណ្តាលឱ្យបក្សកាន់អំណាចឈ្នះឆ្នោតដោយរលូតនៅពេលនោះ៕