33 C
Phnom Penh

លោក ហ៊ុន ម៉ាណែត បបួល​លោក សម រង្ស៊ី ភ្នាល់​ដាក់​តំណែង​បេក្ខភាព​នាយករដ្ឋមន្ត្រី​អនាគត​របស់​ខ្លួន

ដោយ ឌឹ ខេមបូឌា ដេលី

បទវិភាគ

បេក្ខភាព​នាយករដ្ឋមន្ត្រី​អនាគត លោក ហ៊ុន ម៉ាណែត ដែល​ត្រូវ​ជា​កូនប្រុស​មេដឹកនាំ​ខ្មែរ​ដែល​វៀតណាម​លើក​បន្តុប លោក ហ៊ុន សែន បាន​បបួល​អតីត​មេ​បក្ស​ប្រឆាំង លោក សម រង្ស៊ី ភ្នាល់​ដាក់​តំណែង​ជា​បេក្ខភាព​នាយករដ្ឋមន្ត្រី​អនាគត​របស់​ខ្លួន និង​ការ​ចាកចេញ​ពី​ឆាក​នយោបាយ​របស់​លោក សម រង្ស៊ី ប្រសិនបើ​ភាគី​ណា​មួយ​ចាញ់​ល្បែង​ភ្នាល់​នេះ។

មេដឹកនាំ​កម្ពុជា​ដែល​ឧស្សាហ៍​គំរាម​សម្លាប់​គូប្រជែង​នយោបាយ​របស់​ខ្លួន លោក ហ៊ុន សែន បាន​យក​សំណេរ​កូនប្រុស​ខ្លួនឯង គឺ​លោក ហ៊ុន ម៉ាណែត មក​បង្ហោះ​លើ​ទំព័រ Facebook របស់​ខ្លួន​នៅ​ថ្ងៃ​ទី​២៨ ខែ​ធ្នូ ឆ្នាំ​២០២១ នេះ​ថា ប្រសិនបើ​អតីត​មេដឹកនាំ​ប្រឆាំង លោក សម រង្ស៊ី អាច​ស្នើ​ឲ្យ​សាលា​ទាំង​បី​ដែល​លោក ហ៊ុន ម៉ាណែត បាន​សិក្សា​ចេញ​លិខិត​បញ្ជាក់​ថា សញ្ញាបត្រ​ដែល​កូនប្រុស​ច្បង​របស់​លោក ហ៊ុន សែន ទទួល​បាន​នោះ​គ្រាន់​តែ​ជា​សញ្ញាបត្រ​យោគយល់​ដូច​ការ​ចោទប្រកាន់​របស់​លោក សម រង្ស៊ី មែន​នោះ លោក ហ៊ុន ម៉ាណែត នឹង​លាឈប់​ពី​បេក្ខភាព​នាយករដ្ឋមន្ត្រី​អនាគត​របស់​ខ្លួន​ភ្លាមៗ។

ប្រភព​ដដែល​អះអាង​ថា ផ្ទុយទៅវិញ បើ​លោក សម រង្ស៊ី មិន​អាច​ឲ្យ​សាលា​ដែល​លោក ហ៊ុន ម៉ាណែត បាន​សិក្សា គឺ​សាលា​បណ្ឌិតសភា​យោធា​អាមេរិក (West Point) សាកលវិទ្យាល័យ​ញីវយ៉ក (New York University) និង​សាកលវិទ្យាល័យ​ប្រ៊ីសស្តុល (Bristol University) បញ្ជាក់​ជា​ផ្លូវការ​ថា សញ្ញាបត្រ​ដែល​សាលា​ទាំងនោះ​បាន​ផ្តល់​ឲ្យ​លោក ហ៊ុន ម៉ាណែត ជា​សញ្ញាបត្រ​យោគយល់​ទេ​នោះ លោក សម រង្ស៊ី ក៏​គួរ​លាឈប់​ពី​ឆាក​នយោបាយ​ចាប់ពី​ពេលនេះ​តទៅ​ដែរ។

កូនប្រុស​ច្បង​លោក ហ៊ុន សែន ចោទ​សួរ​ថា តើ​លោក សម រង្ស៊ី ហ៊ាន​ភ្នាល់​ដែរ​ឬ​ទេ? លោក ហ៊ុន ម៉ាណែត បញ្ជាក់​ថា អ្នក​នយោបាយ​ចាស់​វស្សា​ដូច​លោក សម រង្ស៊ី ប្រាកដ​ជា​មាន​ភាព​ក្លាហាន​ក្នុង​ការ​ការពារ​នូវ​អំណះអំណាង​របស់​ខ្លួន​ដែល​បាន​លើកឡើង​ជា​សាធារណៈ​ម្តង​ហើយ​ម្តង​ទៀត ដើម្បី​វាយប្រហារ​រូបលោក​ទាក់ទិន​នឹង​សញ្ញាបត្រ​ដែល​លោក​ទទួល​បាន​ពី​សាលា​នៅ​បរទេស​ទាំងនោះ។

នេះ​ជា​លើក​ទី​មួយ​ហើយ​ដែល​លោក ហ៊ុន ម៉ាណែត បញ្ចេញ​ប្រតិកម្ម និង​ឌឺដង​ឱ្យ​លោក សម រង្ស៊ី ក្រោយ​ពេល​ដែល​លោក​ទទួល​បាន​ការ​គាំទ្រ​ពី​ផ្ទៃក្នុង​បក្ស​ជា​បេក្ខជន​តែ​ម្នាក់​គត់​សម្រាប់​តំណែង​នាយករដ្ឋមន្ត្រី​បន្ត​វេន​ទៅ​ថ្ងៃ​អនាគត។

កាលពី​ថ្ងៃ​ទី​២៦ ខែ​ធ្នូ ឆ្នាំ​២០២១ អតីត​មេដឹកនាំ​បក្ស​ប្រឆាំង លោក សម រង្ស៊ី បាន​អះអាង​ថា សញ្ញាបត្រ​ដែល​មេដឹកនាំ​បក្ស​កាន់​អំណាច លោក ហ៊ុន សែន យក​មក​អួតអាង​នោះ គឺ​ច្រើន​តែ​ជា​សញ្ញាបត្រ​ក្លែងក្លាយ និង​សញ្ញាបត្រ​យោគយល់​តែប៉ុណ្ណោះ ព្រោះ​ដោយសារ​លោក ហ៊ុន សែន មិន​ដឹង​ថា​សញ្ញាបត្រ​ណា​មួយ​ពិត និង​ណា​មួយ​ជា​សញ្ញាបត្រ​ក្លែងក្លាយ​នោះ​ទេ។

ការ​រិះគន់​របស់​លោក សម រង្ស៊ី ធ្វើឡើង​បន្ទាប់ពី​បុរស​ខ្លាំង​ដែល​គំរាម​កាន់​អំណាច​បន្ត​ត្រកូល លោក ហ៊ុន សែន បាន​លើក​សរសើរ​កូនប្រុស​ខ្លួនឯង​កាលពី​ពេល​ថ្មីៗ​នេះ​ថា លោក ហ៊ុន ម៉ាណែត មាន​ចំណេះដឹង​ទាំង​ផ្នែក​សេដ្ឋកិច្ច នយោបាយ ផ្នែក​យោធា និង​ប្រឡង​ជាប់​បរិញ្ញាបត្រ​ជាន់ខ្ពស់​នៅ​សាកលវិទ្យាល័យ​ញីវយ៉ក ផង​ដែរ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ លោក គឹម សុខ បាន​សរសេរ​នៅ​លើ​គណនី Facebook របស់​លោក​នៅ​ថ្ងៃ​ទី​២៨ ខែ​ធ្នូ នេះ​ថា អ្នក​នយោបាយ​ខ្មែរ​ខ្លះ​គឺ​ប្រៀប​ដូចជា​ជន​សង្គម​ងងឹត​ដូច្នោះ​ដែរ ព្រោះ​ថា​ពួកគេ​ចូលចិត្ត​លេង​ល្បែង​ភ្នាល់​គ្នា​យក​ឈ្នះ​ចាញ់​ជា​លក្ខណៈ​បុគ្គល ដោយ​បន្សល់​ទុក​នូវ​គំនរ​ឧបសគ្គ​ឲ្យ​ប្រទេស​ជាតិ និង​ពលរដ្ឋ​រាប់​មិន​អស់។

លោក គឹម សុខ លើកឡើង​ថា ដើម្បី​បង្ហាញ​ពី​សមត្ថភាព​ពិតប្រាកដ​ដែល​ពួកគេ​បាន​ទទួល​ការ​បណ្តុះបណ្តាល​ពី​ក្រៅ​ប្រទេស អ្នក​នយោបាយ​ទាំងនោះ​គួរតែ​បញ្ចេញ​សមត្ថភាព​របស់​ខ្លួន​ដោះស្រាយ​បញ្ហា​ជូន​ជាតិ​មាតុភូមិ​ដែល​កំពុង​ជាប់​គាំង​បង្ក​ការ​លំបាក​ដល់​ពលរដ្ឋ​សព្វថ្ងៃ​នេះ ប្រសើរ​ជាជាង​គ្រាន់តែ​អួត​សញ្ញាបត្រ​គ្នា​ធ្វើជា​ល្បែង​ភ្នាល់ ដែល​គ្មាន​ប្រយោជន៍​សម្រាប់​ជាតិ​សូម្បីតែ​បន្តិច។

ការ​លេង​ល្បែង​នយោបាយ​សន្យា​ភ្នាល់​គ្នា​របស់​លោក ហ៊ុន ម៉ាណែត ត្រូវ​គេ​រិះគន់​ថា យក​គំរូ​តាម​ឪពុក​របស់​លោក គឺ​លោក ហ៊ុន សែន ព្រោះ​ថា​មេដឹកនាំ​បក្ស​កាន់​អំណាច​សព្វថ្ងៃ​នេះ​ក៏​ចូលចិត្ត​លេង​ល្បែង​ភ្នាល់​បែប​នេះ​ដែរ ប៉ុន្តែ​ក៏​ជា​អ្នក​លេង​ល្បែង​ភ្នាល់​មួយ​រូប​ដែល​មិន​គោរព​សន្យា​ដែរ។

ជាក់ស្តែង កាលពី​ឆ្នាំ​២០១៥ លោក ហ៊ុន សែន ធ្លាប់​បាន​ភ្នាល់​ថា លោក​នឹង​មិន​ចុះហត្ថលេខា​លើ​លិខិត​លើកលែង​ទោស​ឲ្យ​លោក សម រង្ស៊ី វិល​ចូល​ស្រុក​វិញ​ជា​ដាច់ខាត ហើយ​ប្រសិនបើ​លោក​ចុះហត្ថលេខា​លើ​លិខិត​លើកលែង​ទោស​ឲ្យ​លោក សម រង្ស៊ី មែន​នោះ លោក​នឹង​កាត់​ដៃស្តាំ​របស់​លោក​គ្រវែង​ចោល តែ​នៅ​ទីបំផុត លោក ហ៊ុន សែន បាន​ចុះហត្ថលេខា​លើកលែង​ទោស​ឲ្យ​លោក សម រង្ស៊ី មែន ហើយ​ដៃស្តាំ​របស់​លោក​ក៏​មិន​ដែល​កាត់​គ្រវែង​ចោល​ដែរ។ នៅ​មាន​ករណី​ផ្សេង​ទៀត ដូចជា​ការ​ភ្នាល់​កាត់​ក្បាល​របស់​លោក​ចោល បើ​ការពារ​ព្រៃឈើ​មិន​បាន ដែល​រហូត​មក​ទល់​ពេលនេះ ក្បាល​របស់​លោក​នៅ​មិន​ទាន់​ត្រូវ​បាន​កាត់​នៅឡើយ​ទេ ខណៈ​ការ​បំផ្លាញ​ព្រៃឈើ​កើត​មាន​សឹង​ពាសពេញ​ផ្ទៃ​ប្រទេស ហើយ​លោក ហ៊ុន សែន នៅតែ​បរាជ័យ​បង្ក្រាប​មិន​បាន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស