33 C
Phnom Penh

ក្រុម​តស៊ូ​មតិ៖ លោក ហ៊ុន ម៉ាណែត ជា​បេក្ខភាព​នាយករដ្ឋមន្ត្រី​គ្មាន​សមត្ថភាព​ម្នាក់​ប៉ុណ្ណោះ

ដោយ ឌឹ ខេមបូឌា ដេលី

បទវិភាគ

បញ្ញវន្ត​ខ្មែរ​នៅ​ក្រៅ​ស្រុក លើកឡើង​ថា ប្រសិនបើ​កូនប្រុស​ច្បង​លោក ហ៊ុន សែន ត្រឹមតែ​ជា​កូនប្រុស​ម្នាក់​ជាប់​ជា​បេក្ខភាព​នាយករដ្ឋមន្ត្រី​ក្រោម​ការ​រៀបចំ​ពី​ឪពុក​របស់​ខ្លួន​ដែល​មិន​មាន​សមត្ថភាព​ដោះស្រាយ​បញ្ហា​ប្រទេស​បាន​ទេ នោះ​ពលរដ្ឋ​នឹង​មើល​ឃើញ​ថា លោក ហ៊ុន ម៉ាណែត មិន​មែន​ជា​បេក្ខភាព​នាយករដ្ឋមន្ត្រី​អនាគត​របស់​ពលរដ្ឋ​ខ្មែរ​នោះ​ទេ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ លោក គឹម សុខ បាន​សរសេរ​លើ​គណនី Facebook របស់​លោក​នៅ​ថ្ងៃ​ទី​៣០ ខែ​ធ្នូ នេះ​ថា បេក្ខជន​នាយករដ្ឋមន្ត្រី​អនាគត លោក ហ៊ុន ម៉ាណែត គួរ​បង្ហាញ​សមត្ថភាព​ដោះស្រាយ​បញ្ហា​ជូន​ពលរដ្ឋ ដូចជា​ជម្លោះ​រវាង​កម្មករ​និយោជិត​ជាមួយ​ក្រុមហ៊ុន ណាហ្គា​វើលដ៍ (Naga World) ដែល​កំពុង​ជាប់​គាំង​ដោះស្រាយ​មិន​ចេញ​នៅ​ពេលនេះ ដើម្បី​បង្ហាញ​ពី​សមត្ថភាព​របស់​ខ្លួន​មុន​នឹង​ក្លាយ​ជា​នាយករដ្ឋមន្ត្រី​ពិតប្រាកដ​នៅ​ថ្ងៃ​អនាគត។

លោក គឹម សុខ អះអាង​ថា ដើម្បី​ឡើង​កាន់​តំណែង​នាយករដ្ឋមន្ត្រី​ទៅ​ថ្ងៃ​អនាគត​ឱ្យ​ស័ក្ដិសម ដែល​ឪពុក​របស់​ខ្លួន​ខំ​ជួយ​លើក​ស្ទួយ​ដោយ​ការ​គំរាមកំហែង​អ្នក​ដទៃ លោក ហ៊ុន ម៉ាណែត គួរតែ​ចេញ​មុខ​បង្ហាញ​ស្នាដៃ​ដោះស្រាយ​វិបត្តិ​របស់​ពលរដ្ឋ​ជាច្រើន​ទៀត​ដែល​កំពុង​កើតមាន​យ៉ាង​អនាធិបតេយ្យ ក្រោម​ការ​ដឹកនាំ​របស់​ឪពុក​លោក​សព្វថ្ងៃ​នេះ ដូចជា​ទំនាស់​ដីធ្លី​ដែល​កំពុង​ផ្ទុះ​ឡើង​ស្ទើរ​ពេញ​ផ្ទៃ​ប្រទេស និង​បង្ហាញ​អំពី​ការ​ធ្វើ​កំណែ​ទម្រង់​ស្ដារ​សិទ្ធិមនុស្ស និង​លទ្ធិប្រជាធិបតេយ្យ​ដែល​រដ្ឋាភិបាល​របស់​ឪពុក​លោក​កំពុង​ជាន់​ពន្លិច​បច្ចុប្បន្ន​នេះ​ផង​ដែរ។

អ្នកវិភាគ​រូប​នេះ​បញ្ជាក់​ថា ប្រសិនបើ​លោក ហ៊ុន ម៉ាណែត មិន​មាន​សមត្ថភាព​ដោះស្រាយ​បញ្ហា​ជូន​ពលរដ្ឋ​បាន​ទេ តំណែង​ដែល​ឪពុក​របស់​លោក​ខំ​លើក​ស្ទួយ​នេះ គ្រាន់តែ​ដើម្បី​បំបាក់​មុខ​ឪពុក​ខ្លួនឯង និង​បង្ហាញ​ពី​ការ​អសមត្ថភាព​របស់​ខ្លួន​ប៉ុណ្ណោះ។ ដូច្នេះ តំណែង​ជា​បេក្ខភាព​នាយករដ្ឋមន្ត្រី​អនាគត​នេះ មិន​បាន​ផ្តល់​ក្តី​សង្ឃឹម​អ្វី​ដល់​ពលរដ្ឋ​ក្នុង​ការ​កសាង​ជាតិ​នោះ​ទេ ហើយ​បេក្ខភាព​នេះ​គ្រាន់តែ​ជា​តំណែង​រក្សា​អំណាច​ត្រកូល ហ៊ុន បន្ត​ពី​ឪពុក​ខ្លួន​ប៉ុណ្ណោះ។

កាលពី​ដើម​ខែ​ធ្នូ ឆ្នាំ​២០២១ កន្លងទៅ លោក ហ៊ុន ម៉ាណែត ត្រូវ​បាន​ឪពុក​របស់​ខ្លួន គឺ​លោក ហ៊ុន សែន ប្រកាស​គាំទ្រ​ជា​បេក្ខភាព​ជា​នាយករដ្ឋមន្ត្រី​អនាគត​របស់​កម្ពុជា ខណៈ​គណបក្ស​កាន់​អំណាច​បាន​បោះឆ្នោត​គាំទ្រ​បេក្ខភាព​នេះ​កាលពី​ថ្ងៃ​ទី​២៤ ខែ​ធ្នូ ឆ្នាំ​២០២១ កន្លងទៅ​ផង​ដែរ។ ប៉ុន្តែ​ការ​ជាប់​ជា​បេក្ខភាព​នាយករដ្ឋមន្ត្រី​បន្ត​ពី​ឪពុក​ខ្លួនឯង​នេះ ត្រូវ​គេ​រិះគន់​ថា ធ្វើឡើង​ក្រោម​ការ​គំរាមកំហែង និង​ទិញ​ទឹកចិត្ត​សមាជិក​បក្ស​ប្រជាជន​កម្ពុជា​របស់​ខ្លួន គឺ​មិន​មែន​ព្រោះតែ​លោក ហ៊ុន ម៉ាណែត មាន​សមត្ថភាព​ដឹកនាំ​ប្រទេស​នោះ​ឡើយ។

ក្រុម​អ្នក​សង្កេតការណ៍​សម្ដែង​ការ​សោកស្តាយ​ដែល​កម្ពុជា​នឹង​ទទួល​បាន​នាយករដ្ឋមន្ត្រី​គ្មាន​សមត្ថភាព និង​គ្មាន​ការ​គាំទ្រ​ពី​ពលរដ្ឋ។ ផ្ទុយទៅវិញ ជា​អនាគត​នាយករដ្ឋមន្ត្រី​ដែល​ឡើង​កាន់​តំណែង​ដោយសារ​ឪពុក​ជា​អ្នក​រៀបចំ​ឲ្យ ហើយ​គ្មាន​សមត្ថភាព​ដឹកនាំ​ប្រទេស​ទៅ​រក​ការ​រីកចម្រើន ប៉ុន្តែ​ចេះ​តែ​លេង​ល្បែង​ភ្នាល់​ជាមួយ​អ្នក​នយោបាយ​ដែល​កំពុង​អស់​ផ្លូវ​ចូល​ស្រុក​ប៉ុណ្ណោះ។

ប្រភព​ដដែល​អះអាង​ថា សមាជិក​បក្ស​កាន់​អំណាច​ដែល​គាំទ្រ​បេក្ខភាព​លោក ហ៊ុន ម៉ាណែត ជា​នាយករដ្ឋមន្ត្រី​អនាគត​នោះ មិន​មែន​ដោយសារ​មើល​ឃើញ​ពី​គុណសម្បត្តិ ឬ​សមត្ថភាព​ដឹកនាំ​ប្រទេស​របស់​លោក ហ៊ុន ម៉ាណែត នោះ​ទេ គឺ​ដោយសារ​លោក ហ៊ុន សែន ទិញ​ទឹកចិត្ត​ពួកគេ​ប៉ុណ្ណោះ និង​ក្រោម​ការ​សន្យា​ថា​ផ្តល់​តំណែង​ខ្ពស់ៗ​ក្នុង​ជួរ​រដ្ឋាភិបាល​ដល់​កូន​មន្ត្រី​សំខាន់ៗ​មួយ​ចំនួន ដូចជា​លោក ស ខេង លោក សាយ ឈុំ លោក ទៀ បាញ់ និង​អ្នកស្រី ម៉ែន សំអន ជាដើម។

ជុំវិញ​បញ្ហា​នេះ កាលពី​ដើម​ខែ​ធ្នូ ឆ្នាំ​២០២១ មេដឹកនាំ​បក្ស​កាន់​អំណាច​ដែល​វៀតណាម​លើក​បន្តុប លោក ហ៊ុន សែន គំរាម​ថា អ្នក​ដែល​ចង់​ដណ្តើម​តំណែង​ធ្វើជា​បេក្ខភាព​នាយករដ្ឋមន្ត្រី​ពី​កូនប្រុស​របស់​លោក ត្រូវតែ​ធ្វើ​ឃាត​លោក​ជា​មុន​សិន ប៉ុន្តែ​បុរស​ខ្លាំង​នៅ​កម្ពុជា​រូប​នេះ​ព្រមាន​ថា អ្នក​ដែល​ប៉ុនប៉ង​ធ្វើ​ឃាត​លោក ពួកគេ​ក៏​មិន​មាន​ជីវិត​រស់នៅ​ដែរ ហើយ​សង្គ្រាម​ច្បាស់​ជា​នឹង​ផ្ទុះ​ឡើង​ជា​មិន​ខាន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស