រដ្ឋកុម្មុយនីស្តផ្ដាច់ការកូរ៉េខាងជើង ត្រូវបានរាយការណ៍មកថាបានបន្តបាញ់សាកល្បងមីស៊ីលបាលីស្ទីកជាថ្មីម្ដងទៀត ដែលជាការគំរាមពិភពលោកដែលកំពុងធ្វើដំណើរចូលឆ្នាំថ្មីឆ្នាំ២០២២ ទើបបានប្រាំថ្ងៃមកនេះ។
ក្រុមអ្នកជំនាញកូរ៉េខាងត្បូង និងជប៉ុន បានអះអាងថា ប្រទេសកូរ៉េខាងជើងទំនងជាបានធ្វើតេស្ដសាកល្បងគ្រាប់មីស៊ីលបាលីស្ទីកបំពាក់ក្បាលគ្រាប់នុយក្លេអ៊ែរ នៅព្រឹកថ្ងៃពុធ ទី៥ មករា នេះ ដែលអាចជាការស្វាគមន៍ឆ្នាំថ្មីឆ្នាំ២០២២ របស់រដ្ឋផ្ដាច់ការមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី០៥ ខែមករា។
មន្ត្រីយោធាកូរ៉េខាងត្បូង និងកងកម្លាំងស្វ័យការពារជប៉ុន ដែលតែងតែតាមដាននូវសកម្មភាពកូរ៉េខាងជើងនោះ បានអះអាងថា ការធ្វើតេស្ដលើកនេះទំនងជាមីស៊ីលបាលីស្ទីកមួយ ដោយត្រូវបានបាញ់ចេញពីតំបន់ឆ្នេរភាគខាងកើតនៃប្រទេសកូរ៉េខាងជើង ហើយធ្លាក់ចូលទៅក្នុងសមុទ្រកាលពីវេលាម៉ោងជាង ៨ព្រឹកនៅថ្ងៃពុធនេះម៉ោងនៅប្រទេសកូរ៉េខាងត្បូង។
មន្ត្រីយោធាកូរ៉េខាងត្បូងបានបង្ហើបទៀតថា ខ្លួនគេកំពុងសហការយ៉ាងជិតស្និទ្ធជាមួយនឹងក្រុមជំនាញរបស់សហរដ្ឋអាមេរិក ដើម្បីកំណត់ឱ្យបានច្បាស់អំពីប្រភេទនៃអាវុធដែលកូរ៉េខាងជើងបានធ្វើតេស្ដជាលើកដំបូងសម្រាប់ឆ្នាំ២០២២ នេះ។ ដោយឡែកប្រទេសជប៉ុនវិញ ក៏ដូចគ្នាផងដែរ ដោយកំពុងកំណត់អំពីចំនួនគ្រាប់មីស៊ីលដែលកូរ៉េខាងជើងទើបបានបាញ់ជាថ្មីម្ដងទៀតនេះ ថាតើមានចំនួនប៉ុន្មានគ្រាប់។
ជុំវិញការធ្វើតេស្ដគ្រាប់មីស៊ីលជាថ្មីរបស់កូរ៉េខាងជើង នាយករដ្ឋមន្ត្រីជប៉ុន លោក Fumio Kishida បានថ្លែងថា គឺជារឿងដែលគួរឲ្យសោកស្តាយដែលប្រទេសកូរ៉េខាងជើង នៅតែបន្តបាញ់ធ្វើតេស្ដមីស៊ីលបន្ថែមទៀត។ លោក Fumio Kishida បានលើកឡើងទៀតថា ការបាញ់តេស្ដអាវុធជាថ្មីដោយកូរ៉េខាងជើង កាលពីព្រឹកថ្ងៃពុធនេះ ទំនងជាគ្រាប់មីស៊ីលបាលីស្ទីក ដែលលោកថាក្រុមជំនាញយោធាជប៉ុន កំពុងវិភាគទៅលើទិន្នន័យទាំងឡាយដែលខ្លួនទើបទទួលបានអំពីការបាញ់សាកល្បងនេះ ក្នុងនោះរួមមានទាំងចំនួនគ្រាប់មីស៊ីលដែលត្រូវបានបាញ់ចេញផងដែរ។ បន្ថែមពីនេះទៀត ឆ្មាំការពារដែនសមុទ្រជប៉ុន ក៏បានប្រកាសអំពីការប្រទះឃើញអាវុធសង្ស័យជាគ្រាប់មីស៊ីលបាលីស្ទីក ត្រូវបានបាញ់ចេញពីកូរ៉េខាងជើងផងដែរ។ បន្ទាប់ពីការប្រទះឃើញនេះ ពួកគេបានចេញសេចក្តីណែនាំភ្លាមៗប្រាប់ទៅក្រុមនាវាថា មិនត្រូវធ្វើដំណើរទៅជិតវត្ថុគួរឲ្យសង្ស័យណាមួយនោះទេ។
កាលពីឆ្នាំ២០២១ ប្រទេសកូរ៉េខាងជើងបានអះអាងថា ខ្លួនបានធ្វើតេស្ដសាកល្បងដោយជោគជ័យនូវគ្រាប់មីស៊ីលបាលីស្ទីកដែលបាញ់ចេញពីនាវាមុជទឹក មីស៊ីលគ្រូសរយៈចម្ងាយឆ្ងាយ មីស៊ីលបាញ់ចេញពីខ្សែរថភ្លើង និងប្រភេទគ្រាប់មីស៊ីលអាចរត់ក្នុងល្បឿនលឿនជាងល្បឿនសំឡេងដែលអាចបំពាក់ក្បាលគ្រាប់នុយក្លេអ៊ែរ។
ការបាញ់តេស្ដមីស៊ីលនៅដើមឆ្នាំ២០២២ នេះ គឺបានកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីមេដឹកនាំកំពូលកូរ៉េខាងជើង លោក គីម ជុងអ៊ុន បានប្រកាសថា ប្រទេសរបស់លោកនឹងនៅតែបន្តកសាងសមត្ថភាពយោធាទៅមុខទៀត បើទោះបីជាបច្ចុប្បន្ននេះ ប្រទេសកូរ៉េខាងជើងត្រូវបានអន្តរជាតិមើលឃើញថា កំពុងបន្តរងវិបត្តិសេដ្ឋកិច្ច និងទណ្ឌកម្មយ៉ាងធ្ងន់ធ្ងរក្តី។
លោក គីម ជុងអ៊ុន ឡើងកាន់អំណាចតពីឪពុករបស់លោក គឺនៅឆ្នាំ២០១១។ រយៈពេល ១០ឆ្នាំមកនេះ លោក គីម ជុងអ៊ុន បានបញ្ជាឱ្យមានការបាញ់សាកល្បងអាវុធនុយក្លេអ៊ែរចំនួន ៤លើក និងបានសាកល្បងជាច្រើនលើកនូវគ្រាប់កាំជ្រួចរំលងទ្វីប ឬគេហៅថាមីស៊ីលបាលីស្ទីក ដែលអាចបាញ់ដល់ទឹកដីសហរដ្ឋអាមេរិក។
លោក គីម ជុងអ៊ុន ចាប់យកការផលិតនុយក្លេអ៊ែរ និងគ្រាប់កាំជ្រួចផ្លោងដើម្បីផ្គើន និងគំរាមសហគមន៍អន្តរជាតិ។ លោកមិនដែលបារម្ភខ្លាចអាមេរិកឡើយ គឺមានតែបង្ករឿងគំរាមផ្ទុះជម្លោះប្រដាប់អាវុធនៅលើឧបទ្វីបកូរ៉េ និងគំរាមបាញ់កាំជ្រួចបំពាក់ដោយក្បាលគ្រាប់នុយក្លេអ៊ែរវាយប្រហារទៅលើទឹកដីអាមេរិកទៀតផង។
ជារដ្ឋដែលចាប់យកការរត់ប្រណាំងសព្វាវុធជាធំ តាមព័ត៌មានរបស់ Global Fire ប្រទេសនេះអាចមានក្បាលគ្រាប់នុយក្លេអ៊ែរពី ២០គ្រាប់ឡើងទៅ។ ការផលិតអាវុធនុយក្លេអ៊ែរ និងកាំជ្រួចអន្តរទ្វីបដែលប្រើធនធានជាតិដ៏ខ្សត់ខ្សោយ គឺប្រព្រឹត្តទៅជាមួយនឹងភាពទុរភិក្សកើតមានសឹងទូទាំងប្រទេស។ ប្រទេសផ្ដាច់ការសន្តតិវង្សមួយនេះកំពុងធ្លាក់ក្នុងទណ្ឌកម្មយ៉ាងធ្ងន់ពីសំណាក់សហគមន៍អន្តរជាតិដែលដឹកនាំដោយអាមេរិក។
ប្រទេសដែលកូនឡើងកាន់អំណាចពីឪពុករយៈពេល ១០ឆ្នាំមកនេះ បានត្រឹមតែធ្វើឱ្យប្រជាជនធ្លាក់ក្នុងភាពទុរភិក្សអត់ឃ្លាន ព្រោះតែអំណាចផ្ដាច់ការ និងមហិច្ឆតាដឹកនាំប្រទេសរត់ប្រណាំងសព្វាវុធជាមួយនឹងប្រទេសសេដ្ឋកិច្ចជឿនលឿន។ រយៈពេល ១០ឆ្នាំនៅក្រោមអំណាចរបស់ត្រកូលសន្តតិវង្សនៃរដ្ឋផ្ដាច់ការកូរ៉េខាងជើង ប្រជាជនរស់ដោយការភ័យខ្លាច ទុក្ខព្រួយ ឈឺចាប់ ភាពទុរភិក្សអត់បាយ ស្រែកឃ្លាន គ្មានសេរីភាព ព្រាត់ប្រាសគ្រួសារ គឺកាន់តែធ្ងន់ទៅៗ។
កាលពីថ្ងៃទី១៧ ខែធ្នូ ឆ្នាំ២០២១ គឺជាខួបគម្រប់ ១០ឆ្នាំនៃការឡើងកាន់អំណាចរបស់កម្មាភិបាល គីម ជុងអ៊ុន ដែលយុវជនរូបនេះឡើងកាន់អំណាចកំពូលរបស់រដ្ឋកាលពីថ្ងៃទី១៧ ខែធ្នូ ឆ្នាំ២០១១ នៅពេលខ្លួនមានវ័យ ២៧ឆ្នាំប៉ុណ្ណោះ។
នៅឆ្នាំនេះ ចៅរបស់មគ្គុទ្ទេសក៍ គីម អ៊ីលស៊ុង មានអាយុ ៣៨ឆ្នាំ។ បុរសនេះឡើងកាន់អំណាចតាមបណ្ដាំរបស់ឪពុក គឺលោក គីម ជុងអ៊ីល។
នៅថ្ងៃបិទបញ្ចប់ពិធីបុណ្យកាន់ទុក្ខសពលោក គីម ជុងអ៊ីល កូរ៉េខាងជើងប្រកាសទទួលស្គាល់ជាផ្លូវការលោក គីម ជុងអ៊ុន ជាអគ្គមគ្គុទ្ទេសក៍មេដឹកនាំកូរ៉េខាងជើងបន្តពីឪពុកដែលបានស្លាប់ដោយសារគាំងបេះដូង កាលពីថ្ងៃទី១៧ ខែធ្នូ ឆ្នាំ២០១១ ខណៈលោកកំពុងជិះលើរថភ្លើងធ្វើដំណើរទៅពិនិត្យមើលស្ថានភាពរស់នៅរបស់កសិករនៅជនបទ៕