30.7 C
Phnom Penh

ស្រីលង្កា​សុំ​ចិន​ទុក​ពេល​បន្ថែម​ដើម្បី​សង​បំណុល ខណៈ​កំពង់ផែ​សមុទ្រ​មួយ​ត្រូវ​បាន​ចិន​រឹបអូស

ដោយ ឌឹ ខេមបូឌា ដេលី

បទវិភាគ

ប្រទេស​ក្រីក្រ​ភាគច្រើន​សុទ្ធតែ​ជា​កូនបំណុល​នៃ​ប្រទេស​ចិន គឺ​គ្រាន់តែ​តិច ឬ​ច្រើន​តែប៉ុណ្ណោះ។ ប្រទេស​ស្រីលង្កា ស្ថិតនៅ​អាស៊ី​ខាងត្បូង បាន​ក្លាយ​ជា​កូនបំណុល​ចិន​ដ៏​ធ្ងន់ធ្ងរ។

ប្រទេស​ក្រីក្រ​មួយ​នេះ​បាន​ខ្ចីបុល​ចិន នូវ​ទឹកប្រាក់​សរុប ៣​ម៉ឺន ៥​ពាន់​លាន​ដុល្លារ។ បណ្ដាញ​ផ្សាយ​ព័ត៌មាន​បរទេស​ជាច្រើន​បាន​ចុះផ្សាយ​ថា កំពង់ផែ​សមុទ្រ និង​ឆ្នេរ​លំហែ​កាយ​របស់​ប្រទេស​នេះ​បាន​ធ្លាក់​ក្នុង​ភាគហ៊ុន​ស្វយ័ត​របស់​ចិន​ទាំងស្រុង​ក្នុង​កិច្ចសន្យា ៩៩​ឆ្នាំ។

ដោយសារ​តែ​ការ​ដោះ​បំណុល​ចិន​មិន​ដូច​ការ​សន្យា គឺ​ចិន​តែងតែ​មក​ទារ​យក​ប្រាក់កម្ចី​របស់​ខ្លួន​វិញ។ ករណី​នេះ នាំ​ឱ្យ​អ្នក​នយោបាយ​ប្រទេស​នេះ​បែកបាក់​គ្នា គឺ​ក្រុម​ប្រឆាំង​ចោទ​ថា​មកពី​រដ្ឋាភិបាល​របស់​អតីត​ប្រធានាធិបតី Mahinda Rajapaksa ដែល​ស្និទ្ធ​នឹង​ចិន បណ្ដោយ​ឱ្យ​គម្រោង​វិនិយោគ​របស់​ចិន ក្លាយ​ជា​ប្រភព​នៃ​ការ​កិបកេង​ប្រាក់កម្ចី និង​ការ​ប្រព្រឹត្ត​អំពើពុករលួយ​របស់​មន្ត្រី​រដ្ឋាភិបាល Mahinda។

ជា​ថ្មី​ម្ដង​ទៀត ប្រធានាធិបតី​ប្រទេស​ស្រីលង្កា បាន​ស្នើសុំ​ទៅ​ប្រទេស​ចិន ដែល​ជា​ម្ចាស់បំណុល​របស់​ខ្លួន ឱ្យ​ពិនិត្យ​មើល​ឡើងវិញ​នូវ​រយៈពេល​សង​បំណុល ដើម្បី​រួម​ចំណែក​ជួយ​សម្រាល​បន្ទុក​រដ្ឋាភិបាល​ស្រីលង្កា ដែល​កំពុង​ជួប​វិបត្តិ​ហិរញ្ញវត្ថុ​ធ្ងន់ធ្ងរ​ដោយសារ​ជំងឺ​កូវីដ-១៩។

ជា​ប្រទេស​ដែល​ទទួល​បាន​កម្ចី​ទ្វេភាគី​ច្រើន​បំផុត​ពី​ប្រទេស​ចិន ស្រីលង្កា​បាន​ទទួល​អត្ថប្រយោជន៍​ច្រើន​ណាស់​ពី​កម្ចី​រាប់​ពាន់​លាន​ដុល្លារ​ពី​ទីក្រុង​ប៉េកាំង ប៉ុន្តែ​ប្រទេស​ក្រីក្រ​មួយ​នេះ​កំពុង​ផុង​ខ្លួន​ប្រឈមមុខ​នឹង​ការ​ធ្លាក់​ចុះ​ទៅ​ក្នុង​វិបត្តិ​ហិរញ្ញវត្ថុ​កាន់តែ​អាក្រក់​ទៅៗ។

រយៈពេល​តែ ១០​ឆ្នាំ​ប៉ុណ្ណោះ ប្រទេស​ចិន​បាន​ផ្ដល់​កម្ចី​ដល់​ប្រទេស​ស្រីលង្កា ដល់​ទៅ ៥​ពាន់​លាន​ដុល្លារ​សម្រាប់​គម្រោង​ផ្លូវ​ល្បឿន​លឿន កំពង់ផែ ព្រលាន​យន្តហោះ និង​រោងចក្រ​ថាមពល​ដើរ​ដោយ​ធ្យូងថ្ម ជាដើម ប៉ុន្តែ​កម្ចី​ដែល​យក​ទៅ​ប្រើប្រាស់​គម្រោង​ទាំងអស់​នេះ ត្រូវ​បាន​គេ​រិះគន់​ថា មិន​បាន​ផ្ដល់​ផលប្រយោជន៍​ដូច​អ្វី​ដែល​បាន​រំពឹង​ទុក​នោះ​ទេ ព្រោះ​តែ​ការ​កិបកេង និង​ការ​ប្រព្រឹត្ត​អំពើពុករលួយ។

បើ​តាម​គម្រោង​នៃ​ការ​បង្វិល​ទាំង​ការប្រាក់ និង​ប្រាក់កម្ចី គឺ​ប្រទេស​ស្រីលង្កា ត្រូវ​សង​បំណុល​នៅ​ក្នុង​ឆ្នាំ​២០២២ នេះ ដែល​នឹង​ចាប់ផ្ដើម​សង​ប្រមាណ ៥០០​លាន​ដុល្លារ តែ​ចំនួន ៥០០​លាន​ដុល្លារ​នេះ រដ្ឋាភិបាល​ស្រីលង្កា សន្សំ​ប្រាក់​សង​ចិន​មិន​បាន​ឡើយ។

ក្នុង​ដំណើរ​ទស្សនកិច្ច​នៅ​ប្រទេស​ស្រីលង្កា លោក Wang Yi រដ្ឋមន្ត្រី​ការបរទេស​ចិន បាន​ជួប​ជាមួយ​នាយករដ្ឋមន្ត្រី​ស្រីលង្កា លោក Mahinda Rajapaksa និង​ប្រធានាធិបតី​លោក Gotabaya Rajapaksa កាលពី​ថ្ងៃ​អាទិត្យ ទី​៩ ខែ​មករា ឆ្នាំ​២០២២ នៅ​ក្នុង​ទីក្រុង​កូឡុំបូស។ បើ​តាម​សារព័ត៌មាន The Guardian ក្រោយ​ពី​ជំនួប ការិយាល័យ​របស់​លោក​ប្រធានាធិបតី Gotabaya បាន​ឲ្យ​ដឹង​ថា ស្រីលង្កា បាន​ស្នើ​ចិន​ឲ្យ​ពិនិត្យ​មើល​ឡើងវិញ​នូវ​រយៈពេល​នៃ​ការ​សង​បំណុល​ចិន​ដែល​ស្រីលង្កា​បាន​ជំពាក់​យ៉ាង​សម្បើម។

សេដ្ឋកិច្ច​នៃ​ប្រទេស​ស្រីលង្កា គឺ​ភាគច្រើន​បាន​មកពី​វិស័យ​ទេសចរណ៍ តែ​ជាង ២​ឆ្នាំ​ចុងក្រោយ​នេះ ស្រីលង្កា បាន​រងគ្រោះ​ធ្ងន់ធ្ងរ​ដោយសារ​ជំងឺ​កូវីដ-១៩ ដែល​ប្រភព​ដើម​ចេញពី​ប្រទេស​ចិន​ជា​ម្ចាស់​បំណុល​របស់​ស្រីលង្កា។ វិបត្តិ​សេដ្ឋកិច្ច​បាន​ធ្វើ​ឱ្យ​ស្រីលង្កា បាត់បង់​ចំណូល ហើយ​ជួប​វិបត្តិ​ខ្វះ​ថវិកា​ជាតិ​ដែល​បម្រុង​ទុក​ដោះ​បំណុល​ចិន។ គិត​ត្រឹម​ដំណាច់​ខែ​វិច្ឆិកា ឆ្នាំ​២០២១ ប្រាក់​បម្រុង​របស់​ស្រីលង្កា នៅ​សល់​តែ ១៥០០​លាន​ដុល្លារ​ប៉ុណ្ណោះ។

យ៉ាងណា រដ្ឋមន្ត្រី​ការបរទេស​ចិន មិន​បាន​ឆ្លើយ​ចំពោះ​សំណើ​របស់​មេដឹកនាំ​ស្រីលង្កា ហើយ​ស្ថានទូត​ចិន​ប្រចាំ​ស្រីលង្កា ក៏​មិន​បាន​ធ្វើ​អត្ថាធិប្បាយ​អ្វី​លើ​សំណើ​របស់​ប្រទេស​ស្រីលង្កា នេះ​ដែរ។

ការិយាល័យ​ប្រធានាធិបតី​ស្រីលង្កា បាន​ប្រកាស​ថា បើ​ក្រុង​ប៉េកាំង ជួយ​សម្រាល​រឿង​នេះ អាច​នឹង​ជួយ​ស្រីលង្កា ធូរស្បើយ​ជា​ខ្លាំង។

គិត​ត្រឹម​ខែ​មេសា ឆ្នាំ​២០២១ ស្រីលង្កា​ជំពាក់​ចិន​ដល់​ទៅ ៣​ម៉ឺន ៥​ពាន់​លាន​ដុល្លារ តែ​ទឹកប្រាក់​បំណុល​នេះ​អាច​នឹង​មាន​ច្រើន​ជាង​នេះ​ទៅ​ទៀត បើ​ត្រូវ​បូក​បន្ថែម​នូវ​ប្រាក់ខ្ចី​ដែល​ចិន​បាន​ផ្តល់​ឱ្យ​ធនាគារ​កណ្តាល និង​រោងចក្រ​សហគ្រាស​គ្រប់គ្រង​ដោយ​រដ្ឋាភិបាល​ស្រីលង្កា។

ស្រីលង្កា បាន​ខ្ចីបុល​ពី​ចិន យ៉ាង​ច្រើន​នៅ​ក្នុង​រយៈពេល​ជាង ១០​ឆ្នាំ​មកនេះ​សម្រាប់​គម្រោង​កសាង​ហេដ្ឋារចនាសម្ព័ន្ធ​ជាច្រើន​របស់​ប្រទេស គឺ​មាន​ទាំង​ផ្លូវថ្នល់ ស្ពាន សំណង់​អគារ​រដ្ឋ​រហូត​ដល់​សំណង់​កំពង់ផែ​សមុទ្រ​ចំនួន​២។ តែ​សំណង់​ដែល​ធ្លាក់​ក្នុង​វិបត្តិ ហើយ​រហូត​រក​ប្រាក់​បន្ត​សាងសង់​សឹង​មិន​បាន គឺ​កំពង់ផែ Hambantota និង​កំពង់ផែ Colombo។ សំណង់​ទាំង​ពីរ​នេះ​ក្រោម​ប្រាក់​កម្ចី​ពី​ចិន​ច្រើន​ពាន់​លាន​ដុល្លារ។

វិបត្តិ​បណ្ដាល​មកពី​ការ​បាត់​ថវិកា​ដើម្បី​សាងសង់ ដែល​អ្នកជំនាញ​រក​ឃើញ​មកពី​ការ​កិបកេង​ពី​សំណាក់​មន្ត្រី​របស់​ស្រីលង្កា ផង និង​ការ​កិបកេង​របស់​ក្រុមហ៊ុន​ម៉ៅការ​សំណង់​របស់​ចិន​ផង។ ទីបំផុត រដ្ឋាភិបាល​ស្រីលង្កា បង្ខំ​ចិត្ត​ប្រគល់​ទៅ​ឱ្យ​ក្រុមហ៊ុន​ចិន​ជា​អ្នក​បន្ត​ស្ថាបនា​ឱ្យ​ហើយ។

ប្រាក់កម្ចី​ចំនួន ១៤០០​លាន​ដុល្លារ​លើ​តម្លៃ​សំណង់​កំពង់ផែ​មួយ គឺ​កំពង់ផែ Hambantota ដែល​រដ្ឋាភិបាល​ស្រីលង្កា មិន​អាច​បង្វិល​ប្រាក់​សង​ចិន​បាន​តាម​កំណត់ គឺ​ក្រុមហ៊ុន​របស់​ចិន បាន​សម្រេច​ប្ដឹង​រដ្ឋាភិបាល​ចិន​ដោយ​រឹបអូស​កំពង់ផែ Hambantota ក្នុង​កិច្ចសន្យា​ជួល​ក្នុង​រយៈពេល ៩៩​ឆ្នាំ គឺ​តាំងពី​ឆ្នាំ​២០១៧។

ចំណែក​ឯ​កំពង់ផែ Colombo ត្រូវ​បាន​រាយការណ៍​មក​ថា ឥណ្ឌា និង​ជប៉ុន សម្រេច​ជួយ​សម្រាល​ទុក្ខ​ឱ្យ​ស្រីលង្កា គឺ​ប្រទេស​ទាំង​ពីរ​បាន​ឱ្យ​ស្រីលង្កា ខ្ចីប្រាក់​ដើម្បី​សង​ចិន ឱ្យ​ទាន់​ការ​កំណត់។ ប្រាក់កម្ចី​របស់​ឥណ្ឌា និង​ជប៉ុន ឱ្យ​ទៅ​ស្រីលង្កា ខ្ចី​នេះ​ពុំ​មាន​ការប្រាក់​នោះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស