ក្រសួងបរិស្ថាន អង្គការជាតិ និងអន្តរជាតិ ប្ដេជ្ញាអភិរក្សជីវចម្រុះ និងលើកកម្ពស់ជីវភាពសហគមន៍នៅក្នុងតំបន់ការពារទេសភាពបឹងព្រែកល្ពៅ ស្ថិតនៅក្នុងស្រុកបូរីជលសារ និងស្រុកកោះអណ្ដែត ខេត្តតាកែវ ឱ្យកាន់តែប្រសើរឡើង។
ក្រសួងបរិស្ថានបានសរសេរលើទំព័រ Facebook ដោយស្រង់សម្ដីរបស់អ្នកនាំពាក្យក្រសួងបរិស្ថាន លោក នេត្រ ភក្ត្រា ថាការអនុវត្តសកម្មភាពសំខាន់ៗចំនួន ៤ ដើម្បីធ្វើការការពារទេសភាពបឹងព្រែកល្ពៅ នោះ មានដូចជា ការអភិរក្សជីវចម្រុះ ការលើកកម្ពស់ជីវភាពសហគមន៍ និងអប់រំផ្សព្វផ្សាយ រួមទាំងការសិក្សាស្រាវជ្រាវផងដែរ។
លោក នេត្រ ភក្ត្រា បន្ថែមថា ការអភិរក្សជីវចម្រុះដោយធ្វើការសាងសង់ទីស្នាក់ការរងមួយកន្លែងសម្រាប់ពង្រឹងការល្បាតនៅក្នុងតំបន់សាងសង់អាងទឹកទំហំ ១៦ហិកតារ ដើម្បីរក្សាទឹកទុកជាអចិន្ត្រៃយ៍សម្រាប់ទ្រទ្រង់ដល់ពពួកសត្វស្លាបទឹក ជាពិសេសសត្វក្រៀល រួមទាំងការដាំព្រៃលិចទឹកទំហំ ៥ហិកតារ និងដាំមើមផ្លុងទំហំ ២៥ហិកតារ ដែលជាចំណីរបស់សត្វក្រៀល និងបានគ្រប់គ្រងរុក្ខជាតិប្រភេទរាតត្បាត ដូចជាប្រខ្លបយក្ស (Mimosa pigra) វល្លិ៍រាតត្បាត និងកំប្លោក ជាដើម។
ប្រភពដដែលបញ្ជាក់ទៀតថា សកម្មភាពលើកកម្ពស់ជីវភាពសហគមន៍ គឺបង្កើតឱ្យមានធនាគារក្របី ដោយប្រវាស់ក្របីជាមួយប្រជាសហគមន៍មូលដ្ឋាននៅក្នុងតំបន់ការពារទេសភាពបឹងព្រែកល្ពៅ ខណៈការអប់រំផ្សព្វផ្សាយនោះ បញ្ចូលដោយកម្មវិធីអប់រំបរិស្ថាន និងសត្វក្រៀលនៅតាមសាលារៀនគោលដៅចំនួន ៣កន្លែង ក្នុងនោះមានសាលាបឋមសិក្សាសង្គមមានជ័យ សាលាបឋមសិក្សាក្ដុលជ្រុំ និងសាលាបឋមសិក្សាបន្ទាយធ្លាយ។
ការអប់រំបរិស្ថាន និងសត្វក្រៀលនៅតាមសាលានេះ ដើម្បីលើកកម្ពស់ការយល់ដឹងរបស់សិស្សានុសិស្សអំពីសារសំខាន់ជីវចម្រុះ ជាពិសេសសត្វក្រៀលនៅក្នុងតំបន់ការពារទេសភាពបឹងព្រែកល្ពៅ និងកម្មវិធីអប់រំផ្សព្វផ្សាយផ្សេងៗទៀត។
បើតាមលោក នេត្រ ភក្ត្រា ថាក្នុងឆ្នាំ២០២០ តំបន់ការពារទេសភាពបឹងព្រែកល្ពៅ មានការកើនឡើងនូវប្រភេទជីវចម្រុះមួយចំនួន ជាពិសេសសត្វចង្កៀលខ្យងដែលកើនឡើងរហូតដល់រាប់ពាន់ក្បាល និងមានសម្បុកពងកូនយ៉ាងតិចចំនួនជាង ២ពាន់ (២១៨៦) ខណៈកាលពីឆ្នាំ២០០៣ មានចំនួនជាង ១០០ក្បាលប៉ុណ្ណោះ។
ប្រភពបញ្ជាក់ទៀតថា វត្តមានប្រភេទសត្វស្លាបជិតផុតពូជដូចជាសត្វចាបព្រៃវែង និងត្រដក់ធំ ករណីនេះរដ្ឋាភិបាលនឹងបន្តក្នុងការការពារ និងអភិរក្សជីវចម្រុះនៅតំបន់នេះជាមួយនឹងអង្គការដៃគូពាក់ព័ន្ធក្នុងការរៀបចំផែនការគ្រប់គ្រង ការបោះបង្គោលព្រំប្រទល់ ការចុះបញ្ជីដីរដ្ឋ រៀបចំហេដ្ឋារចនាសម្ព័ន្ធ និងការរៀបចំឱ្យមានសកម្មភាពទេសចរណ៍ធម្មជាតិ ជាដើម។
តំណាងឱ្យអង្គការជីវិតធម្មជាតិនៅកម្ពុជា អង្គការជីវិតសត្វស្លាបអន្តរជាតិ និងអង្គការ The Wildfowl & Wetlands Trust លោក ប៊ូ វរសក្ស បានស្នើទៅក្រសួងបរិស្ថាន និងអាជ្ញាធរថ្នាក់ក្រោមជាតិ បន្តពង្រឹងការអនុវត្តច្បាប់ និងពន្លឿននីតិវិធីក្នុងការបែងចែកតំបន់គ្រប់គ្រងនៅក្នុងតំបន់ការពារទេសភាពបឹងព្រែកល្ពៅ។ អង្គការនេះនឹងបន្តគាំទ្រការងារអភិរក្សតំបន់ដីសើមដ៏មានសក្ដានុពលនេះឱ្យកាន់តែមានប្រសិទ្ធភាពបន្ថែមទៀត។
បើតាមក្រសួងបរិស្ថាន ឱ្យដឹងថា តំបន់ការពារទេសភាពបឹងព្រែកល្ពៅ គឺជាតំបន់ដីសើមដ៏មានសក្ដានុពលមួយនៅក្នុងប្រទេសកម្ពុជា។ តំបន់មួយនេះមានផ្ទៃដីទំហំ ៨៣០៥ហិកតារ សម្បូរទៅដោយជីវចម្រុះជាច្រើនប្រភេទ ក្នុងមានសត្វស្លាបចំនួន ១៣២ប្រភេទ និងមច្ឆជាតិចំនួន ១៣៨ប្រភេទ រួមទាំងរុក្ខជាតិទឹក ៣០ប្រភេទផងដែរ៕