គណៈកម្មាធិការសិទ្ធិមនុស្សកម្ពុជា ថ្កោលទោសប្រទេសថៃ ដាច់អហង្ការ ចំពោះការបន្តឈ្លានពានដោយកងកម្លាំងយោធាមកលើប្រទេសកម្ពុជា ព្រោះទង្វើនេះគឺជាអំពើអមនុស្សធម៌ ព្រៃផ្សៃ គ្មានច្បាប់ទម្លាប់ និងជាឧក្រិដ្ឋកម្ម ដែលបំផ្លាញសន្តិភាព និងជាការរំលោភសិទ្ធិមនុស្សយ៉ាងធ្ងន់ធ្ងរ។
គណៈកម្មាធិការសិទ្ធិមនុស្សកម្ពុជា បានចេញសេចក្តីថ្លែងការណ៍នៅថ្ងៃទី៨ ធ្នូ នេះ ដោយថ្កោលទោសដាច់អហង្ការចំពោះអំពើអមនុស្សធម៌ ព្រៃផ្សៃ គ្មានច្បាប់ទម្លាប់ និងជាឧក្រិដ្ឋកម្ម ដែលកងកម្លាំងយោធាថៃ បានប្រព្រឹត្តមកលើបូរណភាពដែនដី និងប្រជាពលរដ្ឋស្លូតត្រង់របស់កម្ពុជា នៅតាមបណ្តោយព្រំដែនកម្ពុជា-ថៃ ក្នុងថ្ងៃទី៧ និងទី៨ ខែធ្នូ ឆ្នាំ២០២៥ នេះ។
ការអះអាងនេះ ធ្វើឡើងបន្ទាប់ពីភាគីខ្មែរចោទប្រកាន់ថា កងកម្លាំងយោធាថៃ បានបើកការវាយប្រហារលើកម្ពុជាសាជាថ្មីចាប់តាំងពីម្សិលមិញមក (ថ្ងៃទី៧ ធ្នូ) ដែលធ្វើឱ្យពលរដ្ឋខ្មែរនៅតំបន់ព្រំដែនត្រូវរត់ភៀសសឹកចេញពីលំនៅឋានជាបន្តបន្ទាប់។
ចំណែកឯពលរដ្ឋថៃ ក្នុងខេត្ត៥ រួមមានស្រះកែវ សុរិន្ទ បុរីរម្យ ស៊ីសាកេត និងឧប៊ុន ក៏ត្រូវជម្លៀសចេញពីលំនៅឋានរាប់ពាន់គ្រួសារដែរ។
នៅថ្ងៃទី៨ ធ្នូ នេះ កាសែតថៃ ខៅស៊ុត ស្រង់សម្ដីអ្នកនាំពាក្យកងទ័ពថៃ លោក វិនថៃ សុវ៉ារី (Winthai Suvaree) ថា ការប្រើប្រាស់អាវុធតបតនៅតែអនុវត្តតាមផែនការកំណត់ក្នុងតំបន់ជាក់លាក់ ក្រោមវិធានការវាយលុកទៅលើគោលដៅបោះតាំងអាវុធដែលវាយប្រហារមកលើទឹកដីថៃ។
លោកអះអាងថា ភាគីខ្មែរបានបើកការវាយប្រហារលើថៃ នៅតំបន់ចុងអានម៉ា ប្រាសាទខាន់ណា ប្រាសាទតាក្របី និងប្រាសាទតាមាន់ធំ ក្នុងខេត្តសុរិន្ទ និងតំបន់ហួយតាម៉ារៀ នៅខេត្តស៊ីសាកេត ខណៈកងទ័ពថៃ បានសងសឹកដោយផ្ដោតជាសំខាន់លើគោលដៅយោធា និងទីតាំងអាវុធ។
រីឯរដ្ឋមន្ត្រីក្រសួងព័ត៌មានកម្ពុជា លោក នេត្រ ភក្ដ្រា បានឱ្យដឹងនៅថ្ងៃទី៨ ធ្នូ នេះថា តួលេខបឋមពីខេត្តឧត្ដរមានជ័យ និងព្រះវិហារ មានពលរដ្ឋស្លូតត្រង់ខ្មែរស្លាប់ ៤នាក់ និងរបួស ៩នាក់ ខណៈពលរដ្ឋខ្មែរជាច្រើនម៉ឺននាក់ទៀតកំពុងភៀសខ្លួន ក្រោយការវាយប្រហារពីកងទ័ពថៃ នាពេលនេះ។
ជុំវិញបញ្ហានេះ នាយករដ្ឋមន្ត្រីកម្ពុជា លោក ហ៊ុន ម៉ាណែត ប្រកាសថា ភារកិច្ចចម្បង និងចំពោះមុខរបស់រាជរដ្ឋាភិបាល គឺការពារប្រជាជន និងការពារបូរណភាពទឹកដីក្នុងដែនអធិបតេយ្យប្រទេសកម្ពុជា ហើយអំពាវនាវឱ្យគ្រប់ក្រសួងស្ថាប័ន អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋខ្មែរទាំងអស់ រួមសាមគ្គីគ្នាដើម្បីបុព្វហេតុជាតិ មាតុភូមិក្នុងដំណាក់កាលដ៏លំបាកនេះ៕
© 2025, ឌឹ ខេមបូឌា ដេលី. All rights reserved.