32 C
Phnom Penh

UN ទាមទារ​ឱ្យ​កម្ពុជា​បើក​ការ​ស៊ើប​អង្កេត​ករណី​បាញ់​សម្លាប់​លោក ជា វិជ្ជា និង​សកម្មជន​ដទៃ​ទៀត​ឡើង​វិញ

ដោយ ឌឹ ខេមបូឌា ដេលី

បទវិភាគ

អ្នកជំនាញ​សិទ្ធិមនុស្ស​របស់​អង្គការ​សហប្រជាជាតិ (UN) អំពាវនាវ​ឲ្យ​រដ្ឋាភិបាល​កម្ពុជា​បើក​ការ​ស៊ើបអង្កេត​លើ​ការ​បាញ់​សម្លាប់​លោក ជា វិជ្ជា និង​សកម្មជន​ផ្សេង​ទៀត​ឡើងវិញ ដើម្បី​បញ្ចប់​វប្បធម៌​និទ្ទណ្ឌភាព ដោយ​ផ្តល់​យុត្តិធម៌​ដល់​ក្រុម​គ្រួសារ និង​ជនរងគ្រោះ​ដែល​បាន​ស្លាប់​យ៉ាង​អាថ៌កំបាំង​ផង​ដែរ។

គេហទំព័រ​របស់​ការិយាល័យ​ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ ប្រចាំ​នៅ​កម្ពុជា បាន​ផ្សព្វផ្សាយ​ជា​សាធារណៈ​នៅ​ថ្ងៃ​ទី​២៤ ខែ​មករា នេះ​ថា រយៈពេល ១៨​ឆ្នាំ​ហើយ​ដែល​សមត្ថកិច្ច​នៅតែ​រក​ឃាតក​សម្លាប់​សកម្មជន​សិទ្ធិមនុស្ស និង​ជា​ប្រធាន​សហជីព លោក ជា វិជ្ជា មិន​ទាន់​ឃើញ ក្រៅពី​បុរស​ពីរ​នាក់​ដែល​ត្រូវ​បាន​ចាប់​ខ្លួន និង​ដាក់​ពន្ធនាគារ​កាលពី​ឆ្នាំ​២០០៥ ប៉ុន្តែ​ត្រូវ​បាន​ដោះលែង​ឱ្យ​រួច​ទោស​វិញ​នៅ ៥​ឆ្នាំ​ក្រោយ។

ភ្នាក់ងារ​របស់​អង្គការ​សហប្រជាជាតិ​មួយ​នេះ​អះអាង​ថា រហូត​មក​ទល់​បច្ចុប្បន្ន​នេះ ការ​ស្លាប់​របស់​លោក ជា វិជ្ជា មិន​ទាន់​បាន​ទទួល​ដំណោះស្រាយ និង​យុត្តិធម៌​នៅឡើយ​ទេ។

អគ្គលេខាធិការ​អង្គការ​សហប្រជាជាតិ លោក Antonio Guterres បាន​អំពាវនាវ​ជា​ថ្មី​ទៀត​ដល់​អាជ្ញាធរ​កម្ពុជា ឱ្យ​ស៊ើបអង្កេត​ឱ្យ​បាន​ហ្មត់ចត់ និង​មិន​លម្អៀង​លើ​ករណី​នៃ​ការ​សម្លាប់ រួម​ទាំង​ការ​បាត់​ខ្លួន​ទាំងឡាយ ដើម្បី​បញ្ចប់​វប្បធម៌​និទ្ទណ្ឌភាព​នៅ​កម្ពុជា និង​ផ្តល់​យុត្តិធម៌​ដល់​គ្រួសារ ក៏ដូចជា​លោក ជា វិជ្ជា និង​អ្នក​ការពារ​សិទ្ធិមនុស្ស​ផ្សេង​ទៀត​ដែល​បាន​ស្លាប់​យ៉ាង​អាថ៌កំបាំង។

ក្នុង​គេហទំព័រ​របស់​ការិយាល័យ​ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ​ប្រចាំ​កម្ពុជា បាន​លើកឡើង​ថា កាលពី​ឆ្នាំ​មុន​នេះ អគ្គលេខាធិការ​អង្គការ​សហប្រជាជាតិ លោក Antonio Guterres បាន​អំពាវនាវ​ជា​ថ្មី​ម្តង​ទៀត​ដល់​អាជ្ញាធរ​កម្ពុជា ឱ្យ​ស៊ើប​អង្កេត​ឱ្យ​បាន​ហ្មត់ចត់ និង​មិន​លម្អៀង​លើ​ករណី​នៃ​ការ​សម្លាប់ និង​ការ​បាត់​ខ្លួន​ទាំងឡាយ​នៅ​ក្នុង​របាយការណ៍​ប្រចាំ​ឆ្នាំ​របស់​លោក​ស្ដីពី​តួនាទី និង​សមិទ្ធផល​របស់​ការិយាល័យ​ឧត្ដមស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស ក្នុង​ការ​ជួយ​រដ្ឋាភិបាល និង​ប្រជាជន​កម្ពុជា​ដើម្បី​លើក​កម្ពស់ និង​ការពារ​សិទ្ធិមនុស្ស។

ជាមួយ​គ្នា​នេះ​ដែរ នៅ​ថ្ងៃ​ខួប ១៨​ឆ្នាំ​នៃ​ការ​បាញ់​សម្លាប់​មេដឹកនាំ​សហជីព កាលពី​ថ្ងៃ​ទី​២២ ខែ​មករា កន្លងមក​នេះ ក្រុម​សហជីព សាច់ញាតិ និង​អ្នក​នយោបាយ បាន​លើកឡើង​នៅ​មុខ​រូបសំណាក​របស់​លោក ជា វិជ្ជា ថា រដ្ឋាភិបាល និង​អាជ្ញាធរ​កម្ពុជា មិន​មាន​ឆន្ទៈ​ក្នុង​ការ​ចាប់​ខ្លួន​ឃាតក​ដែល​បាន​បាញ់​សម្លាប់​លោក ជា វិជ្ជា មក​ដាក់​ទោស​ឡើយ ទើប​បាន​ទុក​ឱ្យ​ជន​ដៃដល់ និង​អ្នក​នៅ​ពី​ក្រោយ​ខ្នង​នៃ​ការ​បាញ់​សម្លាប់​មេដឹកនាំ​សហជីព​រូប​នេះ​មាន​សេរីភាព ១៨​ឆ្នាំ​នោះ។

រូបសំណាក​របស់​លោក ជា វិជ្ជា។

ករណី​នេះ ក្រុម​សហជីព សាច់ញាតិ និង​អ្នក​នយោបាយ បាន​ទាមទារ​ឱ្យ​រដ្ឋាភិបាល​កម្ពុជា​ចាប់​ខ្លួន​ជនល្មើស​ដែល​បាន​បាញ់​សម្លាប់​លោក ជា វិជ្ជា នៅ​កណ្ដាល​រាជធានី​ភ្នំពេញ​ដាក់​ទោស​តាម​ច្បាប់ ដើម្បី​បញ្ចប់​វប្បធម៌​និទ្ទណ្ឌភាព​នៅ​កម្ពុជា និង​បញ្ឈប់​ការ​បាញ់​សម្លាប់ ការ​ចាប់ចង ចាប់​ដាក់​ពន្ធនាគារ​បន្ត​ទៀត ដោយ​ថា​ទង្វើ​ទាំងអស់​នេះ​មិន​មែន​ជា​ដំណោះស្រាយ​សម្រាប់​ពលរដ្ឋ និង​កម្មករ​នៅ​កម្ពុជា​ទេ។

លោក ជា វិជ្ជា ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា ត្រូវ​បាន​ឃាតក​បាញ់​សម្លាប់​កាល​ពី​ព្រឹក​ថ្ងៃ​ទី​២២ ខែ​មករា ឆ្នាំ​២០០៤ នៅ​តូប​លក់​កាសែត​ក្រោយ​វត្ត​លង្កា រាជធានី​ភ្នំពេញ។ រយៈពេល ១៨​ឆ្នាំ​មក​នេះ អាជ្ញាធរ​នៅ​មិន​ទាន់​បាន​នាំ​ខ្លួន​ឃាតក​ពិតប្រាកដ និង​អ្នកបញ្ជា​នៅ​ពី​ក្រោយ​ខ្នង​យក​មក​ផ្ដន្ទាទោស​នោះ​ទេ ក្រៅតែ​ពី​ឃាតក​សិប្បនិម្មិត​ពីរ​រូប គឺ​លោក ប៊ន សំណាង និង សុខ សំអឿន។

ចំណែក​ក្រុមប្រឹក្សា​ឃ្លាំមើល​កម្ពុជា ក៏​បាន​ចេញ​សេចក្តី​ថ្លែងការណ៍​មួយ​កាលពី​ថ្ងៃ​ទី​២១ ខែ​មករា ឆ្នាំ​២០២២ ដោយ​បាន​ចោទ​ជា​សំណួរ​ថា តើ​ពន្លឺ​យុត្តិធម៌​នៅ​ឯណា​សម្រាប់​លោក ជា វិជ្ជា រយៈពេល ១៨​ឆ្នាំ​មក​នេះ។ ក្រុម​នេះ​ទាមទារ​ឱ្យ​រដ្ឋាភិបាល​កម្ពុជា រក​យុត្តិធម៌​ជូន​ក្រុម​គ្រួសារ​លោក ជា វិជ្ជា ដើម្បី​បញ្ចប់​វប្បធម៌​និទ្ទណ្ឌភាព​នៅ​កម្ពុជា និង​ផ្ដល់​យុត្តិធម៌​ដល់​គ្រួសារ រួម​ទាំង​ជនរងគ្រោះ​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស