28 C
Phnom Penh

អង្គការ​អន្តរជាតិ៖ ព្រៃឈើ​ជាង​៦​ពាន់​ហិកតារ​នៅ​កម្ពុជា​ត្រូវ​បាន​បំផ្លាញ​ដោយ​ក្រុម​មន្ត្រី​ពុករលួយ

ដោយ ឌឹ ខេមបូឌា ដេលី

បទវិភាគ

អង្គការ​លើកលែង​ទោស​អន្តរជាតិ បង្ហាញ​របាយការណ៍​ថ្មី​មួយ​ថា នៅ​ក្នុង​ឆ្នាំ​២០២១ នេះ ព្រៃឈើ​ជាង ៦​ពាន់​ហិកតារ​ក្នុង​ដែន​ជម្រក​សត្វព្រៃ​ចំនួន​ពីរ​នៅ​កម្ពុជា ត្រូវ​បាន​បំផ្លាញ​ដោយសារ​ដៃ​របស់​ក្រុម​មន្ត្រី​ពុករលួយ។

អង្គការ​លើកលែង​ទោស​អន្តរជាតិ (Amnesty International) បាន​ចេញ​របាយការណ៍​មួយ​នៅ​ថ្ងៃ​ទី​២៨ ខែ​មករា ឆ្នាំ​២០២២ ដែល​មាន​ចំណងជើង​ថា «ការ​កាប់​ឈើ​ខុសច្បាប់​ធ្វើ​ឱ្យ​ប៉ះពាល់​ដល់​សិទ្ធិ និង​វប្បធម៌​របស់​ជនជាតិ​ដើម​ភាគតិច»

របាយការណ៍​នោះ​បាន​លើកឡើង​ថា នៅ​ក្នុង​ឆ្នាំ​២០២១ ព្រៃឈើ​ចំនួន ៦២៧១​ហិកតារ​ត្រូវ​បាន​កាប់​បំផ្លាញ​នៅ​ក្នុង​ដែន​ជម្រក​សត្វព្រៃ​ចំនួន​ពីរ ក្នុង​នោះ​មាន​ដែន​ជម្រក​សត្វ​ព្រៃឡង់ និង​ដែន​ជម្រក​សត្វ​ព្រៃព្រះរការ ដោយ​ការ​កាប់​ឈើ​ដោយ​ខុសច្បាប់​យ៉ាង​ច្រើន​សន្ធឹកសន្ធាប់​កំពុង​ប៉ះពាល់​ធ្ងន់ធ្ងរ​ដល់​សិទ្ធិ និង​វប្បធម៌​របស់​ជនជាតិ​ដើម​ភាគតិច។

អង្គការ​លើកលែង​ទោស​អន្តរជាតិ​នេះ​បញ្ជាក់​ថា ព្រៃឈើ​ដែន​ជម្រក​សត្វព្រៃ​ចំនួន​ពីរ​ដែល​ត្រូវ​បាន​កាប់​បំផ្លាញ​អស់​ជាង ៦​ពាន់​ហិកតារ ធ្វើឡើង​តាមរយៈ​ការ​ទទួល​សំណូក និង​ការ​ប្រព្រឹត្ត​អំពើពុករលួយ​ជា​ប្រព័ន្ធ​របស់​អាជ្ញាធរ​ពាក់ព័ន្ធ។ លើស​ពី​នេះ អង្គការ Amnesty International បាន​ចោទប្រកាន់​ទៅលើ​អាជ្ញាធរ​ពាក់ព័ន្ធ ជាពិសេស​មន្ត្រី​ក្រសួង​បរិស្ថាន ថា​មិន​បាន​អើពើ និង​មិន​ខ្វល់​ចំពោះ​ការ​រាយការណ៍​របស់​ប្រជាពលរដ្ឋ​ពាក់ព័ន្ធ​បទល្មើស ខណៈ​សកម្មភាព​ចុះ​ទៅ​ស៊ើប​អង្កេត​ខ្លះ​របស់​មន្ត្រី​ក្រសួង​បរិស្ថាន ធ្វើឡើង​ដើម្បី​ទទួល​លុយ​ក្រោម​តុ​ពី​ជនល្មើស​តែប៉ុណ្ណោះ។

បណ្ដាញ​ការពារ​ព្រៃឡង់ ស្រុក​សណ្ដាន់ ខេត្ត​កំពង់ធំ ពិនិត្យ​មើល​ដើមឈើ​ដែល​ត្រូវ​ជនល្មើស​លួច​កាប់។ រូបថត​ឯកសារ​ថ្ងៃ​ទី​១៨ ខែ​សីហា ឆ្នាំ​២០១៧

ប្រធាន​ផ្នែក​កិច្ចការ​វិបត្តិ និង​បរិស្ថាន​នៃ​អង្គការ Amnesty International លោក Richard Pearshouse បាន​លើកឡើង​ក្នុង​របាយការណ៍​ថា អាជ្ញាធរ​កម្ពុជា​ត្រូវ​បញ្ឈប់​ជាបន្ទាន់​នូវ​សកម្មភាព​បើក​ដៃ និង​ឃុបឃិត​ជាមួយ​ជន​ទុច្ចរិត​ដើម្បី​កាប់​បំផ្លាញ​ព្រៃឈើ​ទៀត។ លោក​ថា ការ​ទទួល​សំណូក និង​ការ​ប្រព្រឹត្ត​អំពើពុករលួយ​របស់​អាជ្ញាធរ​ពាក់ព័ន្ធ ក្នុង​នោះ​មាន​មន្ត្រី​ប៉ូលិស មន្ត្រី​នៃ​ក្រសួង​បរិស្ថាន កំពុង​ធ្វើ​ឱ្យ​ព្រៃឈើ​របស់​កម្ពុជា​ដែល​នៅ​សេសសល់​ដ៏​តិចតួច​បំផុត​ត្រូវ​រលាយ​ហិនហោច​អស់។

របាយការណ៍​អង្គការ Amnesty International ដែល​បាន​ចេញ​នៅ​ថ្ងៃ​ទី​២៨ ខែ​មករា នេះ បន្ទាប់ពី​ធ្វើ​បទសម្ភាសន៍​ជាមួយ​សកម្មជន​ការពារ​ព្រៃ​ក្នុង​សហគមន៍​នៅ​ក្នុង​តំបន់​ចំនួន ២០​រូប។ សកម្មជន​ទាំងនោះ​បាន​បញ្ជាក់​ក្នុង​បទសម្ភាសន៍​ថា សកម្មភាព​កាប់​បំផ្លាញ​ព្រៃឈើ​យ៉ាង​អនាធិបតេយ្យ​នេះ មិន​ត្រឹមតែ​បំផ្លាញ​ដល់​ជីវចម្រុះ និង​ធ្វើ​ឱ្យ​មាន​ការ​ប្រែប្រួល​អាកាសធាតុ​នោះ​ទេ ប៉ុន្តែ​វា​កំពុង​បំផ្លាញ​វប្បធម៌ និង​សិទ្ធិ​របស់​ជនជាតិ​ដើម​ភាគតិច​កួយ​ថែមទៀត។

ប្រភព​ដដែល​បញ្ជាក់​ថា បទល្មើស​ព្រៃឈើ​បាន​កើន​ឡើង​ស្រប​ពេល​ដែល​រដ្ឋាភិបាល​បាន​បិទ​ខ្ទប់​សហគមន៍ សកម្មជន​ការពារ​ព្រៃឈើ និង​អង្គការ​សង្គម​ស៊ីវិល​ចូល​ល្បាត​ក្នុង​តំបន់​ការពារ​ក្នុង​អំឡុង​ឆ្នាំ​២០១៩។

យ៉ាងណាក៏ដោយ កន្លងមក លោក ហ៊ុន សែន ដែល​ត្រូវ​បាន​គេ​ដាក់​រហស្សនាម​ជា​បុរស​ខ្លាំង​ដើរ​បញ្ច្រាស​ទិស​នោះ ធ្លាប់​ប្រកាស​កាត់​ក​ខ្លួនឯង បើ​សិន​ទប់ស្កាត់​បទល្មើស​ព្រៃឈើ​មិន​បាន។ ក្រោយ​ពី​មាន​ការ​ប្រកាស​កាត់​ក លោក ហ៊ុន សែន បាន​បង្កើត​គណៈកម្មការ​ជាតិ​មួយ​ដើម្បី​ទប់ស្កាត់ និង​បង្ក្រាប​បទល្មើស​ធនធាន​ធម្មជាតិ​ដែល​ដឹកនាំ​ដោយ​លោក សៅ សុខា អគ្គមេបញ្ជាការ​កងរាជ​អាវុធហត្ថ​លើ​ផ្ទៃ​ប្រទេស​ជា​ប្រធាន។ ក្រោយ​ពី​បង្កើត​គណៈកម្មការ​ជាតិ​នោះ​មក ក៏​មាន​ការ​បង្ក្រាប​បទល្មើស​ព្រៃឈើ​ខ្លះ​ដែរ ហើយ​ក៏​មាន​ឧកញ៉ា​ពីរ​នាក់​ត្រូវ​បាន​ចាប់​ខ្លួន ក្នុង​នោះ​ឧកញ៉ា គង់ គ្រឹង និង​ឧកញ៉ា ស៊ឹង សំអុល ហៅ​ខ្នា តែប៉ុណ្ណោះ ប៉ុន្តែ​ឧកញ៉ា​ផ្សេង​ទៀត​ដែល​ល្បី​កាប់​បំផ្លាញ និង​រកស៊ី​ឈើ​នៅ​កម្ពុជា​មួយ​ចំនួន​ទៀត មិន​ត្រូវ​បាន​តុលាការ​កោះហៅ និង​ចាប់​ខ្លួន​ឡើយ។

លោក​នាយករដ្ឋមន្ត្រី ហ៊ុន សែន ថ្លែង​សុន្ទរកថា​អំឡុង​ពិធី​ប្រគល់​សញ្ញាបត្រ​ដល់​ក្រុម​និស្សិត​នៅ​វិទ្យាស្ថាន​ជាតិ​អប់រំ​ក្នុង​រាជធានី​ភ្នំពេញ​នា​ពេល​កន្លងទៅ។ រូបថត​ឯកសារ

ទោះបីជា​លោក ហ៊ុន សែន ប្រកាស​ក្ដែងៗ​ដោយ​កាត់​ក​ខ្លួនឯង រួម​ទាំង​បង្កើត​គណៈកម្មការ​បង្ក្រាប​បទល្មើស​ព្រៃឈើ​នៅ​ប្រទេស​កម្ពុជា​ឱ្យ​បាន​ដាច់ខាត​នោះ​ត្រូវ​បរាជ័យ ក្នុង​នោះ​ព្រៃឈើ​នៅ​ប្រទេស​កម្ពុជា​ស្ទើរតែ​ហិនហោច​ចាប់តាំង​ពី​លោក ហ៊ុន សែន អះអាង​ថា ការពារ​រហូត​មក​ដល់​ពេល​បច្ចុប្បន្ន​នេះ។ លើស​ពី​នេះ ប្រជា​សហគមន៍​អះអាង​ថា ព្រៃឡង់​នឹង​វិនាស​ក្នុង​ឆ្នាំ​២០២២ និង​ឆ្នាំ​២០២៣ បើសិនជា​រដ្ឋាភិបាល​មិន​អើពើ​ទប់ស្កាត់​នោះ ខណៈ​សកម្មភាព​កាប់​បំផ្លាញ និង​ដឹកជញ្ជូន​ឈើ​ចេញ​ពី​តំបន់​ព្រៃឡង់​បាន​កើន​ឡើង​ខ្លាំង​យ៉ាង​គគ្រឹកគគ្រេង​ជាង​ពេល​កន្លងមក។

ក្រោយ​ពី​បទល្មើស​នៅតែ​កើតមាន​ឡើង​កាន់តែ​ខ្លាំង​នោះ នៅ​ខែ​មិថុនា ឆ្នាំ​២០២១ នេះ សហរដ្ឋ​អាមេរិក​ក៏​បាន​ផ្តាច់​ជំនួយ​ពី​រដ្ឋាភិបាល​កម្ពុជា​លើ​គម្រោង «ព្រៃឡង់​បៃតង» ជា​ការ​ឆ្លើយតប​នឹង​វិធានការ​របស់​រដ្ឋាភិបាល​ដែល​បាន​បិទ​ខ្ទប់​សំឡេង និង​សកម្មភាព​របស់​សកម្មជន​ការពារ​ព្រៃឈើ​មិន​ឱ្យ​ចូល​ល្បាត​បទល្មើស​នៅ​តំបន់​ព្រៃឡង់ ខណៈ​បទល្មើស​ព្រៃឈើ​ក្នុង​តំបន់​ការពារ​មួយ​នេះ​នៅតែ​បន្ត​រង​ការ​កាប់​បំផ្លាញ​យ៉ាង​ដំណំ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស