ប្រធានាធិបតីអាមេរិក លោក ចូ បៃដិន និងប្រធានាធិបតីអ៊ុយក្រែន Volodymyr Zelensky បានជួបពិភាក្សាគ្នាតាមទូរស័ព្ទស្ដីពីស្ថានការណ៍តានតឹងនៅតាមតំបន់ព្រំដែនអ៊ុយក្រែន។ នៅក្នុងកិច្ចសន្ទនាគ្នានេះ លោក បៃដិន នៅតែបង្ហាញការសន្យារបស់លោកគាំទ្ររដ្ឋាភិបាលអ៊ុយក្រែន ក្នុងការពង្រឹងសមត្ថភាពកងទ័ពទប់ទល់នឹងការគំរាមកំហែងពីសំណាក់មហាអំណាចរុស្ស៊ី។
សេចក្ដីថ្លែងការណ៍របស់សេតវិមាន បានឲ្យដឹងថា លោក ចូ បៃដិន បានអះអាងឡើងវិញពីការគាំទ្ររបស់សហរដ្ឋអាមេរិកចំពោះអ៊ុយក្រែន ក្នុងនោះរួមមានទាំងការគាំទ្រដល់សេដ្ឋកិច្ចអ៊ុយក្រែន។ សេចក្ដីថ្លែងការណ៍របស់រដ្ឋាភិបាលក្រុងវ៉ាស៊ីនតោន ដែលបង្ហាញជំហរថានៅតែគាំទ្រចំពោះការដោះស្រាយជម្លោះនៅក្នុងតំបន់ភាគខាងកើតអ៊ុយក្រែន តាមកិច្ចចរចាថ្នាក់ការទូតហៅថា Normandy ដែលត្រូវបានបង្កើតឡើងកាលពីឆ្នាំ២០១៤ រវាងបារាំង អាល្លឺម៉ង់ រុស្ស៊ី និងអ៊ុយក្រែន។
តែនៅពេលជាមួយគ្នានេះ សហរដ្ឋអាមេរិកជឿថារុស្ស៊ីមានផែនការវាយអ៊ុយក្រែន នៅពាក់កណ្ដាលខែកុម្ភៈ។
មន្ត្រីការទូតជាន់ខ្ពស់ម្នាក់របស់សហរដ្ឋអាមេរិក បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន មានផែនការប្រើកម្លាំងយោធាវាយប្រហារលើអ៊ុយក្រែន នៅពាក់កណ្ដាលខែកុម្ភៈ ខាងមុខនេះ បើទោះជាទីក្រុងមូស្គូ បដិសេធការចោទប្រកាន់ដូចនេះក្ដី។ អនុរដ្ឋមន្ត្រីការបរទេសអាមេរិក អ្នកស្រី Wendy Sherman បានធ្វើការកត់សម្គាល់ដូចនេះនៅក្នុងវេទិកាមួយកាលពីថ្ងៃពុធ ទី២៥ មករា។
អ្នកស្រី Wendy Sherman បានអះអាងថា មានភស្តុតាងជាច្រើនដែលអាចបង្ហាញបានថាមេដឹកនាំរុស្ស៊ី អាចនឹងប្រើកម្លាំងយោធាចាប់ពីពេលនេះតទៅ ឬនៅពាក់កណ្ដាលខែកុម្ភៈ ខាងមុខ។ បើតាមអ្នកស្រី Wendy Sherman សហរដ្ឋអាមេរិកនឹងបន្តជំរុញការដោះស្រាយបញ្ហាតាមយន្តការការទូត តែអ្នកស្រីព្រមានថា សហរដ្ឋអាមេរិកក៏បានត្រៀមខ្លួនរួចរាល់ហើយដែរ បើស្ថានការណ៍សង្គ្រាមផ្ទុះមែននោះ។
យ៉ាងណា ប្រទេសរុស្ស៊ី និងអ៊ុយក្រែន ក៏បានស្វះស្វែងរកច្រកចេញពីភាពតានតឹងនេះដែរ។
កាលពីថ្ងៃពុធ អ្នកការទូតអ៊ុយក្រែន និងរុស្ស៊ី បានបើកកិច្ចប្រជុំដោយប្រើពេល ៨ម៉ោង ហើយជំនួបនេះប្រព្រឹត្តទៅនៅទីក្រុងប៉ារីស ប្រទេសបារាំង។ ភាគីទាំងពីរបានយល់ព្រមឲ្យគ្រប់ភាគីពាក់ព័ន្ធទាំងអស់ បន្តឃ្លាំមើលបទឈប់បាញ់មួយនៅភាគខាងកើតអ៊ុយក្រែន រហូតដល់កិច្ចប្រជុំជាថ្មីទៀតកើតឡើងនៅខែកុម្ភៈ ខាងមុខ។
បារាំងដែលជាម្ចាស់ផ្ទះ ចាត់ទុកជំនួបនេះគឺជាសញ្ញាវិជ្ជមានដំបូងមួយ ខណៈការបន្តបង្កើនចំនួនកងទ័ពដល់រាប់សែននាក់ និងសព្វាវុធធុនធ្ងន់ជាច្រើនទៀតនៅលើទឹកដីរុស្ស៊ី ក្បែរព្រំដែនអ៊ុយក្រែន។
ជំនួយការម្នាក់របស់ប្រធានាធិបតីបារាំង លោក អ៊ែមម៉ានុយអែល ម៉ាក្រុង (Emmanuel Macron) ដែលសុំមិនបញ្ចេញឈ្មោះ ឲ្យដឹងថា កិច្ចពិភាក្សានេះស្ថិតក្នុងគោលដៅដោះស្រាយបញ្ហានៃក្រុមឧទ្ទាមផ្តាច់ទឹកដីនៅភាគខាងកើតអ៊ុយក្រែន គឺដុនបាស់ ដែលបានអូសបន្លាយចាប់តាំងពីឆ្នាំ២០១៤ មក។ ប៉ុន្តែមន្ត្រីបារាំងរូបនេះបានបង្ហើបថា ដំណោះស្រាយគឺអាស្រ័យទៅលើរុស្ស៊ី ថាតើចង់ផ្តល់សញ្ញាវិជ្ជមាន ឬក៏អត់នោះ ហើយក្រោយកិច្ចពិភាក្សាដ៏លំបាក ទីបំផុតលទ្ធផលបានចេញមកជាលក្ខណៈវិជ្ជមាន គឺភាគីបន្តឃ្លាំមើលបទឈប់បាញ់មួយនៅភាគខាងកើតអ៊ុយក្រែន។
នេះជាលើកដំបូងហើយគិតចាប់តាំងពីឆ្នាំ២០១៩ ដែលប្រទេសរុស្ស៊ី និងអ៊ុយក្រែន យល់ព្រមចុះហត្ថលេខារួមគ្នា ដែលបារាំង និងអាល្លឺម៉ង់ ជាសាក្សីអំពីជម្លោះចង់ផ្តាច់ទឹកដីដោយក្រុមឧទ្ទាមនៅភាគខាងកើតអ៊ុយក្រែន ធ្វើសកម្មភាពយោធាតាំងពីឆ្នាំ២០១៤ ហើយសម្រាប់ទីក្រុងមូស្គូ ដែលចោទថានៅពីក្រោយពួកឧទ្ទាម គឺជាអ្នកធានាកិច្ចព្រមព្រៀងនេះ។ តែយ៉ាងណា ស្ថានការណ៍យោធានៅតែផុយស្រួយទៅរកសង្គ្រាមនៅឡើយ ខណៈកងទ័ពរុស្ស៊ី ជាង ១០ម៉ឺននាក់នៅតែបន្តឡោមព័ទ្ធអ៊ុយក្រែន៕