27 C
Phnom Penh

មន្ត្រី​ជាន់ខ្ពស់​គណបក្ស​សង្គ្រោះ​ជាតិ​មួយ​រូប​ទៀត​ស្នើសុំ​សិទ្ធិ​ធ្វើ​នយោបាយ​ឡើងវិញ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​គណបក្ស​សង្គ្រោះ​ជាតិ ដែល​ត្រូវ​ជា​ភរិយា​លោក ម៉ែន សុថាវរិន្ទ ជា​មន្ត្រី​បក្ស​ប្រឆាំង​ដែល​ស្និទ្ធ​នឹង​អតីត​មេដឹកនាំ​បក្ស​ប្រឆាំង លោក សម រង្ស៊ី ដាក់​ពាក្យ​ទៅ​ក្រសួង​មហាផ្ទៃ​ស្នើសុំ​សិទ្ធិ​ធ្វើ​នយោបាយ​ឡើងវិញ ដែល​ត្រូវ​បាន​ផ្សព្វផ្សាយ​នៅ​ថ្ងៃ​អង្គារ ដើម​សប្តាហ៍​នេះ។

អ្នកស្រី អ៊ុង សុវណ្ណា ដែល​ជា​មន្ត្រី​ជាន់ខ្ពស់​គណបក្ស​សង្គ្រោះ​ជាតិ បាន​ដាក់​លិខិត​មួយ​ច្បាប់​កាលពី​ថ្ងៃ​ទី​២៧ ខែ​មករា ឆ្នាំ​២០២២ ទៅ​រដ្ឋមន្ត្រី​ក្រសួង​មហាផ្ទៃ លោក ស ខេង ដើម្បី​សុំ​ឱ្យ​ក្រសួង​មហាផ្ទៃ​ផ្តល់​នីតិសម្បទា​នយោបាយ​ដល់​អ្នកស្រី​ឱ្យ​បាន​ពេញលេញ​ឡើងវិញ​មុន​កាលកំណត់។

ប្រភព​ដដែល​អះអាង​ក្នុង​លិខិត​ស្នើសុំ​នោះ​ថា ក្នុង​រយៈពេល​ជាង ៤​ឆ្នាំ​មកនេះ អ្នកស្រី​បាន​អនុវត្ត​យ៉ាង​ត្រឹមត្រូវតាម​អំណាច​សាលដីកា​របស់​តុលាការ​កំពូល ដែល​បាន​ព្យួរ​សិទ្ធិ​នយោបាយ​របស់​អ្នកស្រី​កាលពី​ឆ្នាំ​២០១៧ កន្លងទៅ។ ដូច្នេះ អ្នកស្រី​ចង់​ទទួល​បាន​នូវ​សិទ្ធិ​ធ្វើ​នយោបាយ​ឡើងវិញ​មុន​កាលកំណត់ ដើម្បី​បាន​ចូលរួម​បម្រើ​សង្គម និង​ប្រទេស​ជាតិ​ដូច​ពលរដ្ឋ​ទូទៅ​ដែរ ស្រប​តាម​ច្បាប់​រដ្ឋធម្មនុញ្ញ។

ការ​ដាក់​លិខិត​ស្នើសុំ​សិទ្ធិ​ធ្វើ​នយោបាយ​ឡើងវិញ​របស់​ក្រុម​ប្រឆាំង​ភាគី​លោក សម រង្ស៊ី នេះ ត្រូវ​គេ​មើល​ឃើញ​ថា ដោយសារ​ពួកគេ​បាន​រៀបចំ​សេណារីយ៉ូ​ធ្វើ​សកម្មភាព​នយោបាយ​ជាមួយ​គណបក្ស​ភ្លើង​ទៀន ដែល​មាន​លោក សម រង្ស៊ី ជា​អ្នក​បញ្ជា​នៅ​ពីក្រោយ។

សកម្មជន​គណបក្ស​សង្គ្រោះ​ជាតិ លោក ហ៊ុន កុសល បាន​សរសេរ​លើ​គណនី Facebook របស់​លោក​នៅ​ថ្ងៃ​ទី​៨ កុម្ភៈ នេះ​ថា ការ​ស្នើសុំ​សិទ្ធិ​ធ្វើ​នយោបាយ​ឡើងវិញ​របស់​អ្នកស្រី អ៊ុង សុវណ្ណា នៅ​ពេលនេះ គ្មាន​ជម្រើស​ណា​ក្រៅពី​ត្រឡប់​ទៅ​ចូលរួម​សកម្មភាព​នយោបាយ​ជាមួយ​គណបក្ស​ភ្លើង​ទៀន ដែល​ជា​គណបក្ស​ចាស់​របស់​ខ្លួន​វិញ​នោះ​ទេ។

លោក ហ៊ុន កុសល លើកឡើង​ថា ការ​សុំ​សិទ្ធិ​ធ្វើ​នយោបាយ​ឡើងវិញ​របស់​មន្ត្រី​បក្ស​ប្រឆាំង​ភាគី​លោក សម រង្ស៊ី ដើម្បី​ចូល​ធ្វើ​សកម្មភាព​នយោបាយ​ក្នុង​គណបក្ស​ភ្លើង​ទៀន ជា​ភស្តុតាង​មួយ​បន្ថែម​ទៀត​ដែល​បង្ហាញ​ថា លោក សម រង្ស៊ី បាន​លើក​ទឹកចិត្ត​ឲ្យ​មន្ត្រី​បក្ស​ប្រឆាំង​ភាគី​របស់​គាត់​បែក​ចេញពី​គណបក្ស​សង្គ្រោះ​ជាតិ ដែល​ជា​ទង្វើ​ក្បត់​ឆន្ទៈ​ពលរដ្ឋ​ដែល​បាន​គាំទ្រ​គណបក្ស​សង្គ្រោះ​ជាតិ​យ៉ាង​ធ្ងន់ធ្ងរ។

គិត​ត្រឹម​ដើម​ឆ្នាំ​២០២២ នេះ មន្ត្រី​ជាន់ខ្ពស់​គណបក្ស​សង្គ្រោះ​ជាតិ ចំនួន ២៩​នាក់​ហើយ​ដែល​បាន​ដាក់​ពាក្យ​ស្នើសុំ​សិទ្ធិ​ធ្វើ​នយោបាយ​ឡើងវិញ ខណៈ​មន្ត្រី​មួយ​ចំនួន​ទៀត​ក៏​បាន​នាំគ្នា​ចេញ​ទៅ​បង្កើត​គណបក្ស​ថ្មី​ដោយ​ខ្លួនឯង​ផង​ដែរ។

ដោយឡែក​អតីត​តំណាងរាស្ត្រ​គណបក្ស​សង្គ្រោះ​ជាតិ អ្នកស្រី លី ស្រីវីណា ដែល​ជា​ភរិយា​លោក យឹម សុវណ្ណ និង​អតីត​សមាជិក​ព្រឹទ្ធសភា​បក្ស​ប្រឆាំង អ្នកស្រី ថាក់ ឡានី បាន​ប្រកាស​សុំ​ចូលរួម​ជីវភាព​នយោបាយ​ជាមួយ​គណបក្ស​កាន់​អំណាច​របស់​លោក ហ៊ុន សែន កាលពី​ខែ​វិច្ឆិកា ឆ្នាំ​២០២០ ផង​ដែរ ក្នុង​នោះ​អ្នកស្រី ថាក់ ឡានី ត្រូវ​បាន​រដ្ឋាភិបាល​តែងតាំង​ជា​មន្ត្រី​ជាន់ខ្ពស់​ក្នុង​ជួរ​រដ្ឋាភិបាល​កម្ពុជា កាលពី​ខែ​មិថុនា ឆ្នាំ​២០២១ កន្លងទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស