31 C
Phnom Penh

សង្គ្រាម​រុស្ស៊ី​ឈ្លានពាន​អ៊ុយក្រែន​ចាប់ផ្ដើម​ផ្ទុះ​ពេញ​ទំហឹង ខណៈ​យន្តហោះ​ចម្បាំង​រុស្ស៊ី​៥​គ្រឿង​ត្រូវ​បាន​បាញ់​ទម្លាក់

ដោយ ឌឹ ខេមបូឌា ដេលី

បទវិភាគ

ជនស៊ីវិល​ស្លាប់​ជាច្រើន​រយ​នាក់​តែ​ប៉ុន្មាន​ម៉ោង​ប៉ុណ្ណោះ បន្ទាប់ពី​ប្រធានាធិបតី​រុស្ស៊ី លោក វ៉្លាឌីមៀរ ពូទីន (Vladimir Putin) បញ្ជា​ឱ្យ​មាន​ការ​បើក​ប្រតិបត្តិការ​សឹក​វាយលុក​លើ​ប្រទេស​អ៊ុយក្រែន​នៅ​ភាគ​ខាងកើត​ប្រទេស។ តែ​ទីបំផុត បាន​រុញ​ឱ្យ​សង្គ្រាម​ផ្ទុះ​ពាសពេញ​ប្រទេស​អ៊ុយក្រែន នៅ​ពេល​ដែល​កងទ័ព​អ៊ុយក្រែន បាញ់​ទម្លាក់​យន្តហោះ​ចម្បាំង ៥​គ្រឿង និង​ឧទ្ធម្ភាគចក្រ​មួយ​គ្រឿង​របស់​រុស្ស៊ី​នៅ​តំបន់ Donbass ជា​តំបន់​ដែល​រុស្ស៊ី​បើក​ទ្វារ​ធ្វើ​សង្គ្រាម​ឈ្លានពាន​អ៊ុយក្រែន។

សារព័ត៌មាន​នៃ​គេហទំព័រ UNILAD ដែល​បាន​ស្រង់​ព័ត៌មាន​បន្ត​ពី​បណ្ដាញ​ផ្សាយ​ព័ត៌មាន CNN បាន​ចុះផ្សាយ​ថា នៅ​ម៉ោង​ទៀប​ភ្លឺ គឺ​ម៉ោង​នៅ​ប្រទេស​អ៊ុយក្រែន គេ​សង្កេត​ឃើញ​កងទ័ព​រុស្ស៊ី​ទ្រង់ទ្រាយ​ធំ​ដែល​មាន​ទ័ព​ថ្មើរជើង​អម​ដោយ​រថក្រោះ​រាប់​សិប​គ្រឿង បាន​ធ្វើការ​បាញ់​ផ្លោង​ទៅលើ​ទីតាំង​របស់​កងទ័ព​អ៊ុយក្រែន​ស្ថិតនៅ​តំបន់​ដុនបាស។

ការ​វាយ​ប្រយុទ្ធ​គ្នា​រវាង​ទ័ព​រុស្ស៊ី និង​អ៊ុយក្រែន​មាន​សភាព​ខ្លាំងក្លា រហូត​រុស្ស៊ី ប្រើប្រាស់​ទ័ព​អាកាស ហើយ​ទ័ព​អាកាស​របស់​រុស្ស៊ី​ត្រូវ​បាន​រាយការណ៍​មក​ថា​បាន​បើក​អន្តរាគមន៍​ជួយ​គាំទ្រ​ទ័ព​រថក្រោះ​ដែល​កំពុង​វាយបក​ធ្ងន់ធ្ងរ​ពី​សំណាក់​កងទ័ព​អ៊ុយក្រែន ដែល​ទីបំផុត យន្តហោះ​ចម្បាំង ៥​គ្រឿង​រួម​នឹង​ឧទ្ធម្ភាគចក្រ​មួយ​គ្រឿង​របស់​រុស្ស៊ី ត្រូវ​បាន​បាញ់​ទម្លាក់​ដោយ​កងទ័ព​អ៊ុយក្រែន គឺ​នៅ​តំបន់​ដុនបាស។ នេះ​បើ​តាម​ការ​អះអាង​របស់​មេទ័ព​របស់​អ៊ុយក្រែន ដែល​ស្រង់​មក​ចុះផ្សាយ​ដោយ​សារព័ត៌មាន​នៃ​គេហទំព័រ UNILAD។

បើ​តាម​សារព័ត៌មាន The Week ឲ្យ​ដឹង​ថា យន្តហោះ​ចម្បាំង​របស់​រុស្ស៊ី​ដែល​ត្រូវ​កងទ័ព​អ៊ុយក្រែន​បាញ់​ទម្លាក់​មាន​រហូត​ដល់​ទៅ ៨​គ្រឿង ហើយ​កងទ័ព​រុស្ស៊ី​ស្លាប់ ៥០​នាក់។ ចំណែក​កងទ័ព​អ៊ុយក្រែន ស្លាប់ ៤០​នាក់។ តាម​ដំណឹង​មក​ថា នៅ​រដ្ឋធានី​គៀវ និង​ទីក្រុង​ធំ​របស់​អ៊ុយក្រែន ក៏​រង​ការ​បាញ់​ប្រហារ​ដោយ​គ្រាប់​មីស៊ីល​របស់​រុស្ស៊ី​ដែរ។

ប្រព័ន្ធ​ផ្សព្វផ្សាយ​នៃ​ប្រទេស​រុស្ស៊ី RT បាន​ធ្វើ​សេចក្ដី​រាយការណ៍​នៅ​ថ្ងៃ​ព្រហស្បតិ៍ ទី​២៤ ខែ​កុម្ភៈ ដោយ​បាន​ចេញ​ផ្សាយ​វីដេអូ​មួយ​បង្ហាញ​ពី​ហេតុការណ៍​ផ្ទុះ​ដ៏​សម្បើម ដែល​ទំនង​ជា​ការ​ផ្ទុះ​ឃ្លាំង​អាវុធ​មួយ​នៅ​ភាគ​កណ្ដាល​ប្រទេស​អ៊ុយក្រែន។

ក្រសួង​ការពារ​ជាតិ​រុស្ស៊ី អះអាង​ថា​កងទ័ព​របស់​រុស្ស៊ី​បាន​បំផ្លាញ​ហេដ្ឋារចនាសម្ព័ន្ធ​យោធា​មួយ​ចំនួន ក្នុង​នោះ​រួម​មាន​ទាំង​ប្រព័ន្ធ​ការពារ​ដែន​អាកាស​របស់​អ៊ុយក្រែន។ តែ​ចំពោះ​ដំណឹង​អំពី​ការ​ធ្លាក់​យន្តហោះ​របស់​រុស្ស៊ី​វិញ ក្រសួង​ការពារ​ជាតិ​ប្រទេស​មហាអំណាច​នេះ​បាន​ច្រានចោល​នូវ​ការ​ផ្សាយ​ដូចនេះ។

ក្រោយ​ទទួល​បាន​ការ​គាំទ្រ​ពី​សមាជិក​សភា ទីបំផុត​ប្រធានាធិបតី​រុស្ស៊ី លោក វ៉្លាឌីមៀរ ពូទីន បាន​ប្រកាស​ដាក់​ចេញ​នូវ​ប្រតិបត្តិការ​យោធា​ទៅកាន់​តំបន់ Donbass ភាគ​ខាងកើត​អ៊ុយក្រែន ដែល​មាន​តំបន់​ពីរ គឺ Donetsk និង Luhansk ដែល​រុស្ស៊ី​ទើប​ទទួលស្គាល់​ជា​រដ្ឋ​ឯករាជ្យ​ពី​អ៊ុយក្រែន។ ការ​ប្រកាស​របស់​លោក ពូទីន ត្រូវ​បាន​ធ្វើឡើង​តាមរយៈ​សេចក្តី​ថ្លែងការណ៍​តាម​កញ្ចក់​ទូរទស្សន៍។

នៅ​មុន​ការ​បញ្ជា​ឱ្យ​កងទ័ព​រុស្ស៊ី​ចូល​ទៅកាន់​តំបន់ Donbass គឺ​ប្រទេស​អ៊ុយក្រែន​ទាំងមូល​ក៏​បាន​ប្រកាស​ដាក់​ខ្លួន​ឯង​ទៅ​ក្នុង​គ្រាអាសន្ន​ផង​ដែរ។ ប្រធានាធិបតី​អ៊ុយក្រែន លោក Volodymyr Zelenskiy ព្រមាន​ថា ការឈ្លានពាន​របស់​រុស្ស៊ី អាច​ជា​ការ​ចាប់ផ្តើម​នៃ​សង្គ្រាម​ដ៏​ធំ​មួយ​នៅ​ទ្វីប​អឺរ៉ុប។

ចំណែក​លោក ពូទីន បែរជា​បញ្ជាក់​ពី​ជំហរ​របស់​ខ្លួន​ថា លោក​មិន​ចង់​ក្ដោប​យក​ប្រទេស​អតីត​សហភាព​សូវៀត ហើយ​បង្កើត​ជា​ចក្រភព​រុស្ស៊ី​ឡើងវិញ​នោះ​ឡើយ។ លោក​អះអាង​ថា ការ​ព្យាករ​ថា​ រុស្ស៊ី​មាន​គម្រោង​ស្ដារ​អាណាចក្រ​របស់​ខ្លួន​ឡើងវិញ​តាម​ព្រំដែន មិន​ស្រប​នឹង​ការពិត​នោះ​ឡើយ។ លោក​ពន្យល់​ថា លោក​ទទួលស្គាល់​ការពិត​នៃ​ភូមិសាស្ត្រ​នយោបាយ​ថ្មី​បន្ទាប់ពី​ការ​ដួល​រលំ​នៃ​សហភាព​សូវៀត តែ​យ៉ាងណា​លោក​ថា អ៊ុយក្រែន​ជា​ករណី​លើកលែង ដោយសារ​ប្រទេស​មួយ​នេះ​ត្រូវ​បាន​ប្រទេស​ដទៃ​ប្រើប្រាស់​ជា​ឧបករណ៍​របស់​ខ្លួន ដើម្បី​គំរាម​រុស្ស៊ី ដែល​លោក​ថា​លោក​មិន​អាច​អត់ឱន​បាន​ឡើយ។ ចំណែក​អង្គការ​យោធា​ណាតូ (NATO) បាន​ប្រកាស​បើក​កិច្ចប្រជុំ​បន្ទាន់​មួយ​ពាក់ព័ន្ធ​នឹង​ប្រតិបត្តិការ​របស់​កងទ័ព​រុស្ស៊ី​នៅ​អ៊ុយក្រែន។ អង្គការ NATO ត្រូវ​បាន​គេ​រាយការណ៍​ថា​នឹង​បើក​កិច្ចប្រជុំ​បន្ទាន់​មួយ​នៅ​ថ្ងៃ​ទី​២៤ កុម្ភៈ នេះ​ពាក់ព័ន្ធ​នឹង​ប្រតិបត្តិការ​កងទ័ព​របស់​រុស្ស៊ី នៅ​អ៊ុយក្រែន ដែល​កំពុង​ទទួលរង​ការ​ថ្កោលទោស​ពី​សំណាក់​បណ្ដា​ប្រទេស​លោក​ខាងលិច។

ប្រទេស​ឡេតូនី ដែល​ជា​សមាជិក​របស់​អង្គការ NATO គឺ​នាយករដ្ឋមន្ត្រី Krisjanis Karins បាន​អំពាវនាវ​ឱ្យ​ពិនិត្យ​ឡើងវិញ​មាត្រា​៤ នៃ​លក្ខន្តិកៈ​របស់ NATO ខណៈ​លោក​ថ្កោលទោស​ប្រតិបត្តិការ​របស់​កងទ័ព​រុស្ស៊ី។ លោក Karins បាន​ហៅ​សកម្មភាព​កងទ័ព​រុស្ស៊ី​ថា​ជា​ការឈ្លានពាន​ទៅលើ​អធិបតេយ្យភាព​របស់​អ៊ុយក្រែន។ លោក​ទទូច​ឱ្យ​លោក ពូទីន បញ្ឈប់​សង្គ្រាម​ជាបន្ទាន់។

តាម​មាត្រា​៥ នៃ​លក្ខន្តិកៈ​របស់ NATO គឺ​ការ​ការពារ​ពី​ការវាយប្រហារ​ណា​មួយ​លើ​សមាជិក NATO គឺជា​ការវាយប្រហារ​លើ NATO ទាំងមូល​ដែល​តម្រូវ​ឱ្យ​ចាត់​វិធានការ​ឆ្លើយតប ប៉ុន្តែ​អ៊ុយក្រែន​មិនមែន​ជា​សមាជិក NATO នោះ​ទេ។ ចំណែក​ឯ​មាត្រា​៤ គឺ​ស្នើសុំ​ការ​ពិគ្រោះ​យោបល់​នៅ​ពេល​រដ្ឋ​ជា​សមាជិក​ណា​មួយ​រង​ការ​គំរាមកំហែង​លើ​បូរណភាព​ទឹកដី​ពី​សំណាក់​ប្រទេស​ណា​មួយ។

នៅ​មុន​រុស្ស៊ី​លើក​ទ័ព​វាយប្រហារ​អ៊ុយក្រែន អគ្គលេខាធិការ​នៃ​អង្គការ​សហប្រជាជាតិ លោក Antonio Guterres បាន​បញ្ជូន​សំណើ​ទៅ​ឱ្យ​ប្រធានាធិបតី​រុស្ស៊ី លោក វ៉្លាឌីមៀរ ពូទីន ដោយ​ស្នើ​កុំ​បើក​ការ​វាយប្រហារ​លើ​អ៊ុយក្រែន។ សំណើ​របស់​លោក Guterres ធ្វើ​តាមរយៈ​កិច្ចប្រជុំ​ក្រុមប្រឹក្សា​សន្តិសុខ​អង្គការ​សហប្រជាជាតិ។

តាម​ដំណឹង​មក​ថា ប្រជាជន​អ៊ុយក្រែន នៅ​ក្នុង​រដ្ឋធានី​គៀវ បាន​នាំគ្នា​សម្រុក​ចេញពី​រដ្ឋធានី​មួយ​នេះ ដោយសារតែ​ការ​ភ័យខ្លាច​ពី​ការ​ផ្ទុះ​សង្គ្រាម​ទ្រង់ទ្រាយ​ធំ។ ប្រជាជន​រាប់​ម៉ឺន​នាក់​បាន​នាំគ្នា​ចាកចេញ​ពី​រដ្ឋធានី​គៀវ ដោយ​ខ្លះ​ជិះ​រថយន្ត​ផ្ទាល់ខ្លួន និង​ខ្លះ​ទៀត​ប្រញាប់ប្រញាល់​ធ្វើ​ដំណើរ​ទៅកាន់​ស្ថានីយ​រថភ្លើង​ក្រោម​ដី និង​រថយន្តក្រុង។

ចំណែក​ប្រធានាធិបតី​អ៊ុយក្រែន លោក Zelenskiy បាន​អំពាវនាវ​ឱ្យ​ប្រជាជន​ងើប​ឡើង​កាន់​អាវុធ​គ្រប់ៗ​គ្នា​ដើម្បី​ប្រឆាំង​អ្នក​ឈ្លានពាន។ លោក​ប្រាប់​ជន​រួម​ជាតិ​របស់​លោក​ថា ពេលវេលា​នៃ​ការ​រង់ចាំ​សន្តិភាព​ដែល​ទម្លាក់​មក​ឱ្យ​អ៊ុយក្រែន​ពី​ប្រទេស​រុស្ស៊ី គឺ​អស់​ហើយ​នៅ​ពេលនេះ។ លោក​ទទូច​ថា ជន​រួម​ជាតិ​ត្រូវ​មាន​ឧត្តមគតិ​ជាតិ គឺ​ត្រូវ​កាន់​អាវុធ​ការពារ​ទឹកដី​របស់​យើង។ លោក​ថា​យើង​កាន់​អាវុធ​មិនមែន​យើង​បង្ក​សង្គ្រាម​នោះ​ទេ តែ​យើង​កាន់​អាវុធ​ដើម្បី​ពន្លត់​សង្គ្រាម។

ដោយឡែក​ពី​ទីក្រុង​មូស្គូ​វិញ សមាជិក​សភា​មកពី​បក្ស​ប្រឆាំង បាន​រួម​កម្លាំង​គ្នា​ថ្កោលទោស​លោក ពូទីន។

លិខិត​ចំហ​មួយ​មាន​ចុះហត្ថលេខា​អ្នក​តំណាងរាស្ត្រ ១៥០​នាក់ បាន​ហៅ​លោក ពូទីន ជា​អ្នក​បង្ក​សង្គ្រាម និង​ជា​អ្នក​បង្ក​មហន្តរាយ​ដល់​ជាតិ​របស់​ខ្លួនឯង និង​បំផ្លាញ​សេចក្ដី​សុខ​ប្រទេស​ប្រជាធិបតេយ្យ​ជិតខាង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស