28 C
Phnom Penh

កងទ័ព​រុស្ស៊ី​ផ្លោង​គ្រាប់​បណ្ដាល​ឱ្យ​ឆេះ​តំបន់​រោងចក្រ​អគ្គិសនី​ដើរ​ដោយ​ថាមពល​នុយក្លេអ៊ែរ​នៅ​អ៊ុយក្រែន

ដោយ ឌឹ ខេមបូឌា ដេលី

បទវិភាគ

ដោយឡែក​ពី​ប្រទេស​អ៊ុយក្រែន ឯណោះ​វិញ ការ​ភ័យខ្លាច​មួយ​កំពុង​កើតមាន​អំពី​ការ​សាយភាយ​នៃ​វិទ្យុសកម្ម ព្រោះតែ​តំបន់​មួយ​នៃ​រោងចក្រ​អគ្គិសនី​ដើរ​ដោយ​ថាមពល​នុយក្លេអ៊ែរ កំពុង​ឆាបឆេះ​ដោយសារ​គ្រាប់​កាំភ្លើង​ផ្លោង​របស់​កងទ័ព​រុស្ស៊ី។

តាម​ការ​ចុះផ្សាយ​ដោយ​សារព័ត៌មាន The Guardian អណ្ដាតភ្លើង​កំពុង​ឆាបឆេះ​តំបន់​នោះ ដែល​នៅ​ទីនោះ​គឺ​មាន​រោងចក្រ​អគ្គិសនី Zaporizhzhia ដើរ​ដោយ​ថាមពល​នុយក្លេអ៊ែរ។ រោងចក្រ​នេះ​ស្ថិតនៅ​ភាគ​និរតី​នៃ​ប្រទេស​អ៊ុយក្រែន។ ទាំង​ប្រធានាធិបតី Volodymyr Zelenskiy និង​រដ្ឋមន្ត្រី​ការបរទេស​អ៊ុយក្រែន Dymtry Kuleba អះអាង​ថា ភ្លើង​កំពុងតែ​ឆេះ​គ្រប់​ជ្រុង​ទាំងអស់​នៃ​តំបន់​នោះ ដែល​វា​អាច​ប៉ះពាល់​ដល់​រោងចក្រ​អគ្គិសនី​ដើរ​ដោយ​ថាមពល​នុយក្លេអ៊ែរ​នៅ​តំបន់​នោះ។

បើ​តាម​លោក Zelenskiy រថក្រោះ​របស់​រុស្ស៊ី​កំពុង​បន្ត​បាញ់​ទៅលើ​តំបន់​នោះ ដែល​លោក​ប្រកាស​អាសន្ន​ថា បើ​រ៉េអាក់ទ័រ​របស់​រោងចក្រ​នោះ​ផ្ទុះ គឺ​វា​នឹង​សាយភាយ​វិទ្យុសកម្ម ហើយ​ប៉ះពាល់​ដល់​អាយុជីវិត​មនុស្ស​យ៉ាង​ធ្ងន់ធ្ងរ ហើយ​ក៏​អាច​សាយភាយ​ដល់​អឺរ៉ុប​ទាំងមូល​ផង​ដែរ។ រោងចក្រ​អគ្គិសនី Zaporizhzhia ដើរ​ដោយ​ថាមពល​នុយក្លេអ៊ែរ​មាន​រ៉េអាក់ទ័រ​ចំនួន​៦។

លោក Andriy Tuz អ្នក​នាំពាក្យ​ម្នាក់​ធ្វើការ​នៅ​ក្នុង​រោងចក្រ​នោះ និយាយ​ថា ក្រុម​ពន្លត់​អគ្គិភ័យ​កំពុង​សម្រុក​ពន្លត់​ភ្លើង​នៅ​ក្នុង​តំបន់​នោះ តែ​លោក​ព្រមាន​ថា បើ​ទ័ព​រុស្ស៊ី​បន្ត​បាញ់​ផ្លោង​មក​លើ​តំបន់​នេះ​ទៀត គឺ​រោងចក្រ​នេះ​អាច​នឹង​រង​ការ​ឆាបឆេះ។

ដោយ​ទទួល​បាន​ដំណឹង​នេះ​ភ្លាម នាយករដ្ឋមន្ត្រី​អង់គ្លេស Boris Johnson បាន​ស្នើ​ឱ្យ​ក្រុមប្រឹក្សា​សន្តិសុខ​អង្គការ​សហប្រជាជាតិ​ប្រជុំ​គ្នា​ជាបន្ទាន់​អំពី​ស្ថានភាព​នៃ​ការ​វាយប្រហារ​របស់​កងទ័ព​រុស្ស៊ី ទៅលើ​តំបន់​រោងចក្រ​ថាមពល​នុយក្លេអ៊ែរ។

តែ​បើ​តាម​ដំណឹង​ចុងក្រោយ​នេះ តំបន់​នៅ​រោងចក្រ​អគ្គិសនី Zaporizhzhia ត្រូវ​បាន​កងទ័ព​រុស្ស៊ី រឹប​អូស​បាន​ហើយ។

កាលពី​ឆ្នាំ​១៩៨៦ រោងចក្រ​អគ្គិសនី​ដើរ​ដោយ​ថាមពល​នុយក្លេអ៊ែរ​មួយ​នៅ​តំបន់ Chernobyl ក្នុង​ប្រទេស​អ៊ុយក្រែន ដែល​ឆាបឆេះ​ដោយ​ការ​ផ្ទុះ​មួយ​ក្នុង​រោងចក្រ​នេះ បាន​ប៉ះពាល់​ដល់​រ៉េអាក់ទ័រ​ថាមពល​នុយក្លេអ៊ែរ​ចំនួន​៤ របស់​រោងចក្រ​នេះ បណ្ដាល​ឱ្យ​សាយភាយ​វិទ្យុសកម្ម​ដោយ​សម្លាប់​មនុស្ស ៣០​នាក់​តែ​ប៉ុន្មាន​នាទី​ប៉ុណ្ណោះ។

តែ​នៅ​ពេល​នោះ អាជ្ញាធរ​ប្រទេស​អ៊ុយក្រែន​ដែល​នៅ​ក្រោម​សហភាព​សូវៀត បាន​សម្រេច​ជម្លៀស​ប្រជាជន​ជាង ៣៥​ម៉ឺន​នាក់​ឱ្យ​ចាកចេញ​ពី​តំបន់​នោះ​ភ្លាមៗ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស