កាលពីថ្ងៃព្រហស្បតិ៍ ទី៥ កុម្ភៈ រដ្ឋការសហរដ្ឋអាមេរិក បានចេញសេចក្តីណែនាំដល់ពលរដ្ឋអាមេរិក ដែលកំពុងរស់នៅក្នុងទឹកដីអ៊ីរ៉ង់ ឱ្យចាកចេញពីប្រទេសអ៊ីរ៉ង់ ដោយចាប់ពីថ្ងៃជូនដំណឹងថ្ងៃទី៥ ខែកុម្ភៈ ឆ្នាំ២០២៦ នេះតទៅ។
ក្នុងពេលជាមួយគ្នានេះ កងកម្លាំងអ៊ីរ៉ង់ បានឃាត់នាវាដឹកប្រេងកាតពីរគ្រឿង ដោយចោទថារត់ពន្ធប្រេង ប៉ុន្តែមិនបានបញ្ជាក់ថាដោតទង់ជាតិប្រទេសណានោះទេ។ នៅក្បែរទីនោះដែរ យន្តហោះចម្បាំងអាមេរិកាំង F-35 បានបាញ់ទម្លាក់គ្រឿងយន្តហោះហើរដ្រូន ពីព្រោះហោះខិតជិតនាវាផ្ទុកយន្តហោះចម្បាំង USS Abraham Lincoln ពេក។ អ៊ីរ៉ង់ និយាយថា គេបង្ហោះក្នុងដែនអាកាសអន្តរជាតិ។
សេចក្តីណែនាំបានបញ្ជាក់ថា វិធានការសន្តិសុខត្រូវបានរឹតបន្តឹង ការបិទផ្លូវ និងការរំខានដល់ការដឹកជញ្ជូនសាធារណៈកំពុងកើតមាន ខណៈការបិទប្រព័ន្ធអ៊ីនធឺណិតនៅទូទាំងប្រទេសអ៊ីរ៉ង់ នៅតែបន្ត ជាកត្តាដ៏ផុយស្រួយប៉ះពាល់ដល់សុវត្ថិភាពជាទូទៅ។
រដ្ឋាភិបាលអ៊ីរ៉ង់ ត្រូវបានគេរាយការណ៍ថា កំពុងរឹតត្បិតការចូលប្រើអ៊ីនធឺណិតចល័ត ទូរសព្ទលើតុ និងបណ្ដាញអ៊ីនធឺណិតក្នុងប្រទេស។ ក្រុមហ៊ុនអាកាសចរណ៍ជាច្រើន ត្រូវបានគេដឹងថាបានបន្តលុបចោលជើងហោះហើរទាំងទៅ និងទាំងចេញពីប្រទេសអ៊ីរ៉ង់។
សេចក្តីណែនាំនៃរដ្ឋការសហរដ្ឋអាមេរិក បានបន្ថែមថា ពលរដ្ឋអាមេរិកត្រូវតែបារម្ភថាខ្លួនអាចនឹងជួបការលំបាកដោយសារការដាច់អ៊ីនធឺណិតជាបន្តបន្ទាប់ និងត្រូវរៀបចំផែនការទំនាក់ទំនងជំនួស ហើយប្រសិនបើមានសុវត្ថិភាពក្នុងការធ្វើដូច្នេះ ត្រូវពិចារណាចាកចេញពីប្រទេសអ៊ីរ៉ង់ តាមផ្លូវគោកទៅកាន់ប្រទេសអាមេនី ឬតួកគី ដែលមានព្រំដែនជាប់នឹងអ៊ីរ៉ង់។
សេចក្តីណែនាំរបស់ប្រទេសមហាអំណាចមួយនេះ ក៏បានទទូចថា «សូមចាកចេញពីប្រទេសអ៊ីរ៉ង់ ឥឡូវនេះ ហើយត្រូវមានផែនការចាកចេញដោយមិនត្រូវរង់ចាំការពឹងផ្អែកលើជំនួយពីរដ្ឋាភិបាលសហរដ្ឋអាមេរិកនោះទេ។»
សេចក្តីណែនាំបានឱ្យដឹងទៀតថា «ពលរដ្ឋអាមេរិកត្រូវពិនិត្យព័ត៌មានថ្មីៗដោយផ្ទាល់ជាមួយក្រុមហ៊ុនអាកាសចរណ៍របស់សហរដ្ឋអាមេរិក ហើយប្រសិនបើមិនអាចចាកចេញពីអ៊ីរ៉ង់ បានទេ ពួកគេត្រូវស្វែងរកទីតាំងមានសុវត្ថិភាពនៅក្នុងលំនៅឋាន ឬអគារផ្សេងទៀតដែលមានសុវត្ថិភាព។»
សេចក្តីណែនាំបានណែនាំទៀតថា «ចូរត្រៀមផ្គត់ផ្គង់អាហារ ទឹក ថ្នាំពេទ្យ និងសម្ភារៈចាំបាច់ផ្សេងៗ» និង «សូមជៀសវាងការចូលធ្វើបាតុកម្ម ដោយរក្សាភាពស្ងប់ស្ងាត់ និងតាមដានព័ត៌មានជុំវិញខ្លួន។»
រដ្ឋការអាមេរិក ក៏បានទទូចឱ្យពលរដ្ឋខ្លួនត្រូវតាមដានប្រព័ន្ធផ្សព្វផ្សាយក្នុងស្រុកសម្រាប់ព័ត៌មានថ្មីៗ ហើយត្រៀមខ្លួនកែសម្រួលផែនការ។
សេចក្តីណែនាំក៏បានឱ្យដឹងថា «ពលរដ្ឋអាមេរិកគួររក្សាទូរសព្ទឱ្យមានថ្មពេញ និងរក្សាទំនាក់ទំនងជាមួយគ្រួសារ និងមិត្តភក្ដិ ដើម្បីជូនដំណឹងអំពីស្ថានភាពរបស់ខ្លួន។ ជាមួយគ្នានេះ ពលរដ្ឋអាមេរិកត្រូវចុះឈ្មោះក្នុងកម្មវិធី Smart Traveler Enrollment Program (STEP) ដើម្បីទទួលបានព័ត៌មានសន្តិសុខថ្មីៗអំពីប្រទេសអ៊ីរ៉ង់។»
សេចក្តីណែនាំបានបន្ថែមថា «ពលរដ្ឋអាមេរិក–អ៊ីរ៉ង់ ដែលមានសញ្ជាតិពីរ ត្រូវចាកចេញពីប្រទេសអ៊ីរ៉ង់ ដោយប្រើលិខិតឆ្លងដែនអ៊ីរ៉ង់ ព្រោះរដ្ឋាភិបាលអ៊ីរ៉ង់ មិនទទួលស្គាល់សញ្ជាតិពីរ ដោយចាត់ទុកពួកគេជាពលរដ្ឋអ៊ីរ៉ង់ តែប៉ុណ្ណោះ។»
តាមសេចក្ដីណែនាំនេះ ពលរដ្ឋអាមេរិកប្រឈមនឹងហានិភ័យខ្ពស់នៃការសួរចម្លើយ ការចាប់ខ្លួន និងការឃុំខ្លួន ហើយការបង្ហាញលិខិតឆ្លងដែនអាមេរិក ឬទំនាក់ទំនងជាមួយសហរដ្ឋអាមេរិក អាចជាហេតុផលគ្រប់គ្រាន់សម្រាប់អាជ្ញាធរអ៊ីរ៉ង់ ក្នុងការឃុំខ្លួននរណាម្នាក់។
ពលរដ្ឋអាមេរិកដែលកាន់លិខិតឆ្លងដែនអស់សុពលភាព ត្រូវដាក់ពាក្យស្នើសុំបន្ទាប់ពីចាកចេញពីប្រទេសអ៊ីរ៉ង់ នៅស្ថានទូត ឬស្ថានកុងស៊ុលអាមេរិកដែលនៅជិតបំផុត។
សេចក្តីណែនាំបានបញ្ជាក់ទៀតថា «រដ្ឋាភិបាលសហរដ្ឋអាមេរិកមិនអាចធានាសុវត្ថិភាពរបស់អ្នកបានទេ ប្រសិនបើអ្នកជ្រើសរើសចាកចេញដោយមិនធ្វើតាមការណែនាំទាំងនេះ។ ប៉ុន្តែអ្នកគួរតែចាកចេញ លុះត្រាតែអ្នកជឿថាវាមានសុវត្ថិភាព។»
គិតត្រឹមថ្ងៃព្រហស្បតិ៍ ទី៥ និងថ្ងៃសុក្រ ទី៦ ខែកុម្ភៈ នេះ ព្រំដែនគោកនៃប្រទេសអាមេនី នៅតំបន់ Agarak និង Norduz កំពុងត្រូវបានបើក ហើយពលរដ្ឋអាមេរិកដែលចូលប្រទេសអាមេនី ដោយចេញពីអ៊ីរ៉ង់ ត្រូវមានលិខិតឆ្លងដែនអាមេរិក ដែលមានសុពលភាព និងអាចស្នាក់នៅរហូតដល់ ១៨០ថ្ងៃដោយមិនចាំបាច់មានទិដ្ឋាការ។
ពលរដ្ឋអាមេរិកដែលមានសញ្ជាតិពីរ ហើយមានគម្រោងចូលក្នុងប្រទេសអាមេនី ដោយប្រើលិខិតឆ្លងដែនអាមេរិក ឬអ៊ីរ៉ង់ មិនត្រូវការការយល់ព្រមជាមុនឡើយ។
ជាមួយគ្នានេះដែរ ច្រកព្រំដែនគោករវាងតួកគី និងអ៊ីរ៉ង់ ក៏បើកដំណើរការផងដែរ។ ពលរដ្ឋអាមេរិកដែលធ្វើដំណើរចូលប្រទេសតួកគី ចេញពីអ៊ីរ៉ង់ ត្រូវមានលិខិតឆ្លងដែនអាមេរិកដែលមានសុពលភាព និងអាចស្នាក់នៅរហូតដល់ ៩០ថ្ងៃដោយមិនចាំបាច់មានទិដ្ឋាការ ហើយពលរដ្ឋអាមេរិកដែលមានសញ្ជាតិពីរដែលប្រើលិខិតឆ្លងដែនអាមេរិក អ៊ីរ៉ង់ ឬតួកគី ក៏មិនត្រូវការយល់ព្រមជាមុនផងដែរ។
ស្ថានទូតសហរដ្ឋអាមេរិក នៅទីក្រុង Ashgabat នឹងសម្របសម្រួលចំពោះការយល់ព្រមនេះ។ ពលរដ្ឋអាមេរិកដែលមានគម្រោងចូលប្រទេសតូមិននីស្ថាន ត្រូវផ្ញើឯកសារដូចខាងក្រោមទៅអង្គភាពសេវាកម្មពលរដ្ឋអាមេរិកនៅទីក្រុង Ashgabat តាមអ៊ីមែល [email protected] ហើយត្រូវមានឈ្មោះ ថ្ងៃខែឆ្នាំកំណើត ព័ត៌មានលិខិតឆ្លងដែន ដោយមានលេខ និងកាលបរិច្ឆេទចេញ និងផុតកំណត់។
ចំពោះព្រំដែនគោករបស់ប្រទេសអាស៊ែបៃហ្សង់ ត្រូវបានបិទសម្រាប់ចរាចរណ៍ធម្មតា។ ពលរដ្ឋអាមេរិកដែលមានតម្រូវការបន្ទាន់ក្នុងការចាកចេញពីប្រទេសអ៊ីរ៉ង់ គួរតែពិចារណាជម្រើសផ្សេងៗសម្រាប់ចេញដំណើរជាមុនសិន។ ប្រសិនបើផ្លូវជំនួសមិនអាចធ្វើទៅបាន អ្នកអាចស្នើសុំចូលប្រទេសអាស៊ែបៃហ្សង់ ដោយតម្រូវឱ្យមានការយល់ព្រមជាមុនពីរដ្ឋាភិបាលអាស៊ែបៃហ្សង់។ ស្ថានទូតអាមេរិក នៅទីក្រុង Baku នឹងសម្របសម្រួលដំណើរការអនុម័តនេះ។
ពលរដ្ឋអាមេរិកដែលមានគម្រោងចូលប្រទេសអាស៊ែបៃហ្សង់ ត្រូវផ្ញើឯកសារដូចខាងលើទៅអង្គភាពសេវាកម្មពលរដ្ឋអាមេរិកនៅទីក្រុង Baku តាមអ៊ីមែល [email protected]។
សេចក្តីព្រមានបន្ថែមថា ពលរដ្ឋអាមេរិកមិនគួរធ្វើដំណើរទៅប្រទេសអាហ្វហ្គានីស្ថាន អ៊ីរ៉ាក់ ឬតំបន់ព្រំដែនប៉ាគីស្ថាន-អ៊ីរ៉ង់។
ខណៈដែលរដ្ឋាភិបាលសហរដ្ឋអាមេរិក មិនមានទំនាក់ទំនងការទូត ឬកុងស៊ុលជាមួយសាធារណរដ្ឋអ៊ីស្លាមិកអ៊ីរ៉ង់ តែរដ្ឋាភិបាលនៃប្រទេសស្វីស តាមស្ថានទូតរបស់ប្រទេសនៅទីក្រុងតេហេរ៉ង់ អាចការពារផលប្រយោជន៍របស់សហរដ្ឋអាមេរិកនៅប្រទេសអ៊ីរ៉ង់ ដែលពលរដ្ឋអាមេរិកអាចទាក់ទងបាន។
យ៉ាងណា សេចក្តីណែនាំនៃរដ្ឋការសហរដ្ឋអាមេរិក ទៅកាន់ពលរដ្ឋរបស់ខ្លួន ក៏បានកើតឡើងក្នុងថ្ងៃតែមួយដែលទីក្រុងវ៉ាស៊ីនតោន និងទីក្រុងតេហេរ៉ង់ បើកកិច្ចចរចាដ៏សំខាន់មួយនៅប្រទេសអូម៉ង់ ស្ដីពីបញ្ហាកម្មវិធីនុយក្លេអ៊ែររបស់អ៊ីរ៉ង់។
រដ្ឋមន្ត្រីការបរទេសសហរដ្ឋអាមេរិក លោក Marco Rubio បាននិយាយថា ភាគីទាំងពីរបានបង្ហាញពីការត្រៀមខ្លួនរួចជាស្រេចក្នុងការទទួលភារកិច្ចការទូតចំពោះជម្លោះនុយក្លេអ៊ែររបស់ទីក្រុងតេហេរ៉ង់ ជាមួយប្រទេសលោកខាងលិច។
ទោះបីជាយ៉ាងណា ទីក្រុងវ៉ាស៊ីនតោន ចង់ឱ្យការពិភាក្សាគ្របដណ្ដប់លើកម្មវិធីនុយក្លេអ៊ែរអ៊ីរ៉ង់ កម្មវិធីមីស៊ីលផ្លោង និងការបញ្ឈប់គាំទ្រដល់ក្រុមប្រដាប់អាវុធនៅក្នុងតំបន់ ព្រមទាំងបញ្ឈប់ការបង្ក្រាបទៅលើប្រជាជនរបស់ខ្លួន។
ការចរចាធ្វើឡើងនៅទីក្រុង Muscat នៃប្រទេសអូម៉ង់ លោក Abbas Araqchi រដ្ឋមន្ត្រីការបរទេសអ៊ីរ៉ង់ និងលោក Steve Witkoff បេសកជនពិសេសលោក ត្រាំ ប្រចាំតំបន់មជ្ឈិមបូព៌ា បើកការពិភាក្សាដោយផ្ទាល់ជាមួយគ្នា។
ការចរចាប្រព្រឹត្តទៅខណៈកងនាវាចម្បាំងអាមេរិក ត្រូវបានរាយការណ៍ថាកំពុងឡោមប្រទេសអ៊ីរ៉ង់ តែមេដឹកនាំអ៊ីរ៉ង់ វិញ ព្រមានថា បើអាមេរិកវាយប្រហារលើអ៊ីរ៉ង់ សង្គ្រាមតំបន់មជ្ឈិមបូព៌ានឹងផ្ទុះយ៉ាងធ្ងន់ធ្ងរបំផុត៕
© 2026, ឌឹ ខេមបូឌា ដេលី. All rights reserved.