29 C
Phnom Penh

លោក ហ៊ុន សែន ថា​សមាជិក​អាស៊ាន​នឹង​ចេញ​សេចក្តី​ថ្លែងការណ៍​រួម​អំពាវនាវ​ឱ្យ​មាន​ការ​ឈប់​បាញ់​នៅ​អ៊ុយក្រែន

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា លោក ហ៊ុន សែន កំពុងតែ​ពិភាក្សា​ជាមួយ​សមាជិក​អាស៊ាន​ដទៃ​ទៀត ដើម្បី​ចេញ​សេចក្តី​ថ្លែងការណ៍​រួម​មួយ​អំពាវនាវ​ឱ្យ​មាន​ការ​ឈប់​បាញ់ ដោយសារ​តែ​សភាពការណ៍​នៅ​អ៊ុយក្រែន​កាន់តែ​ធ្ងន់ធ្ងរ​បណ្តាល​ឲ្យ​ជនស៊ីវិល​ស្លាប់​កាន់តែ​ច្រើន។

លោក ហ៊ុន សែន បាន​ផ្សព្វផ្សាយ​ជា​សារ​កាលពី​យប់​ថ្ងៃ​ទី​០២ ខែ​មីនា ឆ្នាំ​២០២២ ផ្ញើ​ជូន​ថ្នាក់​ដឹកនាំ​ក្នុង​គណៈ​អចិន្ត្រៃយ៍​គណបក្ស គណៈ​អចិន្ត្រៃយ៍​នៃ​រាជរដ្ឋាភិបាល ហើយ​ត្រូវ​បាន​អង្គភាព​អ្នក​នាំពាក្យ​រាជរដ្ឋាភិបាល បាន​ចេញ​ផ្សាយ​បន្ត​នៅ​យប់​ថ្ងៃ​ទី​០៣ ខែ​មីនា ឆ្នាំ​២០២២ ឲ្យ​ដឹង​ថា ពេលនេះ​ក្នុង​ក្របខ័ណ្ឌ​អាស៊ាន គឺ​លោក​កំពុងតែ​ពិភាក្សា​ជាមួយ​សមាជិក​អាស៊ាន​ដទៃ​ទៀត ដើម្បី​នឹង​ចេញ​សេចក្តី​ថ្លែងការណ៍​រួម​មួយ​អំពាវនាវ​ឱ្យ​មាន​ការ​ឈប់​បាញ់​នៅ​ក្នុង​ប្រទេស​អ៊ុយក្រែន។

លោក​ថា សភាពការណ៍​នៅ​អ៊ុយក្រែន​កាន់តែ​ធ្ងន់ធ្ងរ ការ​ស្លាប់​ជនស៊ីវិល​កាន់តែ​ច្រើន ហេដ្ឋារចនាសម្ព័ន្ធ លំនៅឋាន គ្រឹះស្ថាន សំណង់​ផ្សេងៗ​ត្រូវ​បាន​ខ្ទេចខ្ទាំ ដូច្នេះ​លោក​គិត​ថា​មាន​ការ​ចាំបាច់​ដើម្បី​បញ្ចេញ​នូវ​សកម្មភាព​ក្នុង​ក្របខ័ណ្ឌ​អាស៊ាន។

បុរស​ដែល​ក្រាញ​អំណាច​យូរ​ជាងគេ​នៅ​អាស៊ី​រូប​នេះ សង្ឃឹម​ថា​មិត្ត​រុស្ស៊ី នឹង​យល់ ព្រោះ​អ្វី​ដែល​កម្ពុជា​បាន​ធ្វើ​កាលពី​ពេល​កន្លងទៅ ផ្ទុយ​ទៅ​នឹង​គោល​នយោបាយ​ការបរទេស​របស់​ខ្លួន។ លោក​បន្ត​ថា កម្ពុជា​មិន​គាំទ្រ​ឱ្យ​មាន​ការ​បំបែក​រដ្ឋ មិន​គាំទ្រ​ទៅលើ​ការ​ប្រើប្រាស់​កម្លាំង និង​ការ​ត្រៀម​ដើម្បី​ប្រើប្រាស់​កម្លាំង ឬ​គំរាមកំហែង​នូវ​ការ​ប្រើប្រាស់​កម្លាំង​ណា​មួយ​នោះ​ឡើយ។

លោក​បន្ថែម​ទៀត​ថា ដូច្នេះ​ពិត​ណាស់​ថា​រុស្ស៊ី​នឹង​មាន​ការ​ខឹងសម្បា​ចំពោះ​កម្ពុជា ក៏ប៉ុន្តែ​កម្ពុជា​ជា​រដ្ឋ​អធិបតេយ្យ កម្ពុជា​មាន​សិទ្ធិ​នឹង​ធ្វើ​សកម្មភាព​ដើម្បី​ការពារ​សច្ចធម៌ ហើយ​កម្ពុជា​ក៏​ត្រូវ​មាន​ការ​ទទួល​ខុសត្រូវ​ក្នុង​ឋានៈ​ជា​សមាជិក​អង្គការ​សហប្រជាជាតិ​ផង​ដែរ។

បុរស​ខ្លាំង​កម្ពុជា​បាន​លើកឡើង​ទៀត​ថា ដោយ​មាន​ការ​ស្នើសុំ​ពី​ជប៉ុន បារាំង អាល្លឺម៉ង់ និង​សហរដ្ឋ​អាមេរិក ហើយ​ដោយ​យល់​ឃើញ​ថា​វា​មាន​ការ​ចាំបាច់ កម្ពុជា​ត្រូវតែ​សម្រេច​ចិត្ត​ធ្វើជា Co-Sponsor ជាមួយ​នឹង​ប្រទេស​ដទៃ​ទៀត​នៅ​ក្នុង​មហាសន្និបាត​អង្គការ​សហប្រជាជាតិ ដែល​នេះ​គឺជា​ជំហរ​ដោយឡែក​របស់​កម្ពុជា។

កាលពី​ថ្ងៃ​ទី​៣ ខែ​មីនា ក្រុម​រដ្ឋមន្ត្រី​ការបរទេស​អាស៊ាន (ASEAN) បាន​ចេញ​សេចក្ដី​ថ្លែងការណ៍​រួម​មួយ​អំពាវនាវ​ឱ្យ​មាន​បទ​ឈប់​បាញ់​នៅ​អ៊ុយក្រែន​ជាបន្ទាន់ ដោយសារ​ព្រួយបារម្ភ​យ៉ាង​ខ្លាំង​ចំពោះ​ស្ថានការណ៍​ដែល​កាន់តែ​ធ្ងន់ធ្ងរ និង​ស្ថានភាព​មនុស្សធម៌​ដែល​ធ្លាក់ចុះ​កាន់តែ​ដុនដាប​នៅ​អ៊ុយក្រែន​នា​ពេលនេះ។ ក្រុម​រដ្ឋមន្ត្រី​ការបរទេស​អាស៊ាន ចង់​ឃើញ​ការ​បន្ត​កិច្ច​សន្ទនា​នយោបាយ​ដែល​ពួកគេ​ថា នឹង​នាំ​ទៅ​រក​សន្តិភាព​ប្រកប​ដោយ​ចិរភាព​នៅ​អ៊ុយក្រែន។

អ្នកជំនាញ​កិច្ចការ​អន្តរជាតិ និង​ជា​ព្រឹទ្ធបុរស​រង​នៃ​សាកលវិទ្យាល័យ​រដ្ឋ​អារីហ្សូណា បណ្ឌិត អៀ សុផល បាន​ប្រាប់​សារព័ត៌មាន The Cambodia Daily ថា កម្ពុជា​ជំពាក់​អត្ថិភាព​នៃ​សម័យ​ទំនើប​របស់​ខ្លួន​ចំពោះ​ការ​ឈ្លានពាន​របស់​រុស្ស៊ី និង​វៀតណាម មក​លើ​កម្ពុជា ដែល​ភ្នំពេញ​មិន​ចាត់ទុក​ការ​ឈ្លានពាន​នោះ​ទេ គឺជា​ការ​រំដោះ។ លោក​ចោទ​ជា​សំណួរ​ថា តើ​ការឈ្លានពាន​របស់​រុស្ស៊ី​លើ​អ៊ុយក្រែន ជា​ការ​រំដោះ​ដែរ​ឬ​ទេ? យ៉ាងហោចណាស់ កម្ពុជា​បាន​បោះឆ្នោត​គាំទ្រ​ដំណោះស្រាយ​ថ្កោលទោស​រុស្ស៊ី​ដែរ។

លោក​គិត​ថា វា​ជា​ការ​រីកចម្រើន​ដែល​កម្ពុជា​ធ្វើ​ដំណើរ​ផ្ទុយពី​ចិន ១០០% ក្នុង​ករណី​នេះ ព្រោះ​ចិន​បាន​អនុប្បវាទ ហើយ​កម្ពុជា​បាន​បោះឆ្នោត​គាំទ្រ​សេចក្តី​សម្រេច​របស់​អង្គការ​សហប្រជាជាតិ។ លោក​បន្ត​ថា ឥឡូវ​នេះ​នរណា​ក៏​ដឹង​ដែរ​ថា ចិន​បាន​ស្នើ​ឱ្យ​រុស្ស៊ី​បញ្ឈប់​ការ​ឈ្លានពាន​អ៊ុយក្រែន​រហូត​ដល់​ក្រោយ​ព្រឹត្តិការណ៍​អូឡាំពិក។

ស្ថានទូត​បារាំង​ប្រចាំ​នៅ​ប្រទេស​កម្ពុជា បាន​បង្ហោះ​នៅ​លើ​ហ្វេសប៊ុក​របស់​ខ្លួន​កាលពី​ថ្ងៃ​ទី​៣ ខែ​មីនា ថា បារាំង​សូម​កោតសរសើរ​ការ​សម្រេច​ចិត្ត​របស់​កម្ពុជា​ក្នុង​ការ​ចូលរួម​ជាមួយ​សមាជិក​អង្គការ​សហប្រជាជាតិ​ចំនួន ១៤០​ប្រទេស​ផ្សេង​ទៀត ដើម្បី​សម្ដែង​សាមគ្គីភាព​ជាមួយ​ប្រទេស​អ៊ុយក្រែន​ដែល​រងគ្រោះ​ពី​ការ​ឈ្លានពាន​យោធា​របស់​រុស្ស៊ី។

កម្ពុជា និង​បារាំង រួម​ជាមួយ​ប្រទេស​សមាជិក​ចំនួន ៩៤​ផ្សេង​ទៀត​ប្រកាន់ខ្ជាប់​ដូចគ្នា​នូវ​ការគោរព​អធិបតេយ្យភាព និង​បូរណភាព​ដែនដី​នៃ​រដ្ឋ​នានា​ដែល​ជា​មូលដ្ឋាន​គ្រឹះ​នៃ​សណ្ដាប់ធ្នាប់​អន្តរជាតិ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស