ពលរដ្ឋនៅឃុំតាគ្រាម ស្រុកបាណន់ ខេត្តបាត់ដំបង រាប់រយនាក់ នាំគ្នាតវ៉ា ៣ថ្ងៃជាប់ៗគ្នាចាប់ពីថ្ងៃទី០២ ដល់ថ្ងៃទី០៤ ខែមីនា ដើម្បីទាមទារឲ្យខាងក្រុមហ៊ុនគោរពសន្យាកសាងផ្លូវចាក់បេតុង និងធ្វើយ៉ាងណាកុំឲ្យប៉ះពាល់សុខភាពរបស់ពលរដ្ឋនៅពេលដឹកជញ្ជូនថ្មភ្នំតាមរថយន្តធំៗ។
តំណាងពលរដ្ឋរស់នៅឃុំតាគ្រាម ស្រុកបាណន់ បានប្រាប់សារព័ត៌មាន The Cambodia Daily ថា ជារៀងរាល់ថ្ងៃមានរថយន្តធំៗរាប់រយគ្រឿងដឹកថ្មភ្នំជាច្រើនតោន ឆ្លងកាត់ភូមិរបស់ពួកគាត់ ធ្វើឱ្យហុយធូលីជ្រុះថ្មរាយប៉ាយពេញផ្លូវ និងសំឡេងរំខានដល់សិស្សកំពុងសិក្សា។ លោកថា រថយន្តដឹកថ្មភ្នំទាំងនោះបើកលឿនៗងាយនឹងបង្កគ្រោះថ្នាក់ ប៉ះពាល់សុខភាពពលរដ្ឋ ជាពិសេសកុមារដែលធ្វើដំណើរទៅរៀនតាមដងផ្លូវ។ អ្នកភូមិទាមទារឱ្យក្រុមហ៊ុនអាជីវកម្មរ៉ែទាំងនេះត្រូវកសាងផ្លូវចាក់បេតុងដូចការសន្យាកាលពីឆ្នាំមុន។
គិតត្រឹមល្ងាចថ្ងៃទី០៤ មីនា នេះ ពលរដ្ឋរាប់រយនាក់នៅតែបន្តបិទផ្លូវនៅចំណុចច្រកចូលក្រុមហ៊ុន ហេង ឆាត (Heng Chat Construction Co., Ltd) មិនអនុញ្ញាតឱ្យរថយន្តដឹកថ្មភ្នំឆ្លងកាត់ភូមិរបស់អ្នកស្រុក។ ក្រុមពលរដ្ឋថា ក្រុមហ៊ុនទាំងនេះធ្លាប់សន្យាឱ្យពលរដ្ឋកាត់ដីខាងមុខផ្ទះមួយម៉ែត្រ ដើម្បីពង្រីកផ្លូវ ហើយក្រុមហ៊ុននឹងស្ថាបនាផ្លូវជូនពលរដ្ឋប្រើប្រាស់ ប៉ុន្តែមកទល់ពេលនេះ ក្រុមហ៊ុនមិនអនុវត្តតាមការសន្យានោះទេ។
អ្នកភូមិអះអាងថា កន្លងទៅ ពួកគាត់ធ្លាប់លើកគ្នាតវ៉ាបិទផ្លូវជាច្រើនដងមកហើយ ដើម្បីរារាំងមិនឱ្យរថយន្តរបស់ក្រុមហ៊ុនឆ្លងកាត់ភូមិរបស់ពួកគេ។ រីឯអាជ្ញាធរមូលដ្ឋាន បានចុះដោះស្រាយជាមួយពលរដ្ឋដែរ ប៉ុន្តែពុំទទួលបានលទ្ធផលនោះទេ។
ក្រុមប្រជាពលរដ្ឋទាំងនោះបង្ហាញអារម្មណ៍សោកស្តាយ ដែលភ្នំធម្មជាតិជាង១០ កំពុងត្រូវកាយកម្ទេចដើម្បីយកថ្ម រ៉ែ និងដីធ្វើអាជីវកម្មអស់រយៈពេលជាច្រើនឆ្នាំមកហើយ។
លោក រឿន ម៉ៅ បន្ថែមថា អាជ្ញាធរខេត្តនេះមិនអើពើដោះស្រាយក្តីកង្វល់របស់ពួកគាត់នោះទេ តែផ្ទុយទៅវិញ តែងតែកាងក្រុមហ៊ុនចិន និងក្រុមហ៊ុនវៀតណាម បំផ្លិចបំផ្លាញធនធានធម្មជាតិ។
ពលរដ្ឋថា បច្ចុប្បន្នមានក្រុមហ៊ុនជាច្រើនកំពុងធ្វើអាជីវកម្មកាយភ្នំ រួមមានក្រុមហ៊ុន ហេង ឆាត (Heng Chat Construction Co., Ltd) ក្រុមហ៊ុន លឹម ម៉េង គ្រុប (LIM MENG GROUP Co.,Ltd) ក្រុមហ៊ុន តាំង ថៃឡុង (Tang Thailong Co.,Ltd) និងក្រុមហ៊ុន ធី ឡុង (Thy Long)។ ក្រុមហ៊ុនទាំងនេះ ភាគច្រើនជារបស់ចិន វៀតណាម និងឧកញ៉ាមួយចំនួនដែលឃុបឃិតជាមួយអាជ្ញាធរខេត្តបាត់ដំបង។
សារព័ត៌មាន The Cambodia Daily មិនទាន់អាចទាក់ទងសុំការអធិប្បាយជុំវិញរឿងនេះពីអ្នកនាំពាក្យក្រសួងបរិស្ថាន លោក នេត្រ ភក្ត្រា និងអ្នកនាំពាក្យក្រសួងរ៉ែ និងថាមពល លោក យស មុនីរ៉ាត់ បានទេនៅថ្ងៃទី០៤ ខែមីនា។ ប៉ុន្តែអាជ្ញាធរខេត្តបាត់ដំបង ធ្លាប់លើកឡើងថា ក្រុមហ៊ុនភាគច្រើនដែលមកធ្វើអាជីវកម្មរ៉ែ សុទ្ធតែមានអាជ្ញាប័ណ្ណពីថ្នាក់ជាតិ និងបានសិក្សាពីហេតុផលប៉ះពាល់បរិស្ថានច្បាស់លាស់។
ក្នុងពេលប្រកាសមុខតំណែងលោក សុខ លូ ជាអភិបាលថ្មីខេត្តបាត់ដំបង បានប្ដេជ្ញាចិត្តថានឹងប្រឹងប្រែងអភិវឌ្ឍមូលដ្ឋានប្រកបដោយសមធម៌ និងចិរភាព ដើម្បីចូលរួមកាត់បន្ថយភាពក្រីក្រ។ លោកថានឹងខិតខំដោះស្រាយជម្លោះដីធ្លីក្រៅប្រព័ន្ធតុលាការ ដើម្បីការពារប្រយោជន៍ស្របច្បាប់របស់ពលរដ្ឋ។
មន្ត្រីសម្របសម្រួលសមាគមអាដហុក ខេត្តបាត់ដំបង លោក យិន ម៉េងលី បានថ្លែងប្រាប់សារព័ត៌មានក្នុងស្រុកកន្លងមកថា លោកឆ្ងល់ថាតើអាជីវកម្មកាយភ្នំទាំងនេះមានតម្លាភាព និងគណនេយ្យភាពដែរឬទេ? ព្រោះអាជ្ញាធរមិនបានផ្សព្វផ្សាយឱ្យទូលំទូលាយនោះទេ។ លោកថា លោកមិនប្រឆាំងចំពោះការអភិវឌ្ឍនេះទេ ប៉ុន្តែចំណុចសំខាន់ អាជ្ញាធរត្រូវគ្រប់គ្រងធនធានធម្មជាតិដែលមានស្រាប់ស្របតាមគោលការណ៍អភិវឌ្ឍន៍ និងច្បាប់ជាមូលដ្ឋាន ធ្វើយ៉ាងណាបម្រើប្រយោជន៍ពលរដ្ឋ ព្រមទាំងកាត់បន្ថយផលប៉ះពាល់បរិស្ថាន និងសង្គម។
គួរបញ្ជាក់ផងដែរថា ក្រោយពីមានវត្តមានក្រុមហ៊ុនទាំងនេះវិនិយោគរ៉ែ កាយភ្នំ និងថ្ម ធ្វើឱ្យភ្នំនៅស្រុកបាណន់ យ៉ាងហោចណាស់ ១០ភ្នំ ត្រូវគេកាយកម្ទេចបាត់រូបរាង រួមមានភ្នំតាគ្រាម ភ្នំថ្មក្រហម ភ្នំអន្សែ ភ្នំប៉ើយស្វាយ ភ្នំពពូល ភ្នំតាត្រងោល ភ្នំទទឹង ភ្នំគូទឈ្នៀង និងភ្នំគល់ ជាដើម៕