ក្រុមអ្នកឃ្លាំមើលផែនការអភិវឌ្ឍន៍សង្គម និងពលរដ្ឋ រស់នៅស្រុកកំពង់សីលា ទាមទារឲ្យថ្នាក់ដឹកនាំរដ្ឋបាលខេត្តព្រះសីហនុ និងក្រសួងស្ថាប័នពាក់ព័ន្ធ ចុះទប់ស្កាត់បទល្មើសជីកកកាយដីភ្នំធ្វើអាជីវកម្មនៅស្រុកកំពង់សីលា កើតមានជាច្រើនកន្លែងឲ្យមានប្រសិទ្ធភាព។
ពលរដ្ឋបានចោទលោក សៅ បុរីឌ្ឍនៈ អភិបាលស្រុកកំពង់សីលា ថាជាអ្នកនៅពីក្រោយបទល្មើសទាំងនោះជាថ្នូរទទួលបានសំណូកពុករលួយពីឈ្មួញជីករណ្តៅដី ព្រោះថាអភិបាលស្រុករូបនេះក៏ជាឈ្មួញដី ឬជាឈ្មួញកណ្តាលទិញលក់ដីធ្លី ឬអចលនទ្រព្យនៅស្រុកកំពង់សីលា នេះតែម្តង។
ពលរដ្ឋស្នើដល់លោក ស ខេង រដ្ឋមន្ត្រីក្រសួងមហាផ្ទៃ និងលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បញ្ជូនមន្ត្រីជំនាញចុះអង្កេតការងាររបស់លោក សៅ បុរីវឌ្ឍនៈ ពាក់ព័ន្ធបទល្មើសជីកកកាយដីភ្នំ ដើម្បីធ្វើអាជីវកម្មខុសច្បាប់នេះ ដោយសារតែសកម្មភាពអាជីវកម្មខុសច្បាប់នេះមិនមានការទប់ស្កាត់ពីអាជ្ញាធរស្រុកទេ។
កាលពីចុងខែមិថុនា ឆ្នាំ២០២១ សមត្ថកិច្ចចម្រុះ និងសមត្ថកិច្ចជំនាញដែលពាក់ព័ន្ធនៃខេត្តព្រះសីហនុ បានឃាត់គ្រឿងចក្របាន ៦គ្រឿង ដែលជីកកកាយដីភ្នំគ្មានច្បាប់អនុញ្ញាត នៅភូមិចាំស្រី ស្រុកកំពង់សីលា ខេត្តព្រះសីហនុ។
ចំពោះបទល្មើសនេះ អ្នកសារព័ត៌មានក្នុងស្រុកមួយចំនួនកាលពីដើមខែកក្កដា ឆ្នាំ២០២១ នេះ ក៏បានព្យាយាមស្នើសុំការបំភ្លឺពីលោក សៅ បុរីវឌ្ឍនៈ ប៉ុន្តែលោកបដិសេធ ហើយហាមអ្នកសារព័ត៌មានថតគ្រឿងចក្រដែលសមត្ថកិច្ចចម្រុះខេត្តព្រះសីហនុ ចាប់នាំយកមករក្សាទុកនៅក្នុងបរិវេណសាលាស្រុកកំពង់សីលា ថែមទៀតផង។
ករណីនេះ ប្រជាពលរដ្ឋបានចោទលោក សៅ បុរីវឌ្ឍនៈ អភិបាលស្រុកកំពង់សីលា ថាជាអ្នករួមគំនិតបើកដៃឲ្យឈ្មួញជីកកកាយដីភ្នំធ្វើអាជីវកម្មខុសច្បាប់ ចែកផលប្រយោជន៍ឲ្យគ្នាទៅវិញទៅមក។
កាលពីប៉ុន្មានសប្ដាហ៍កន្លងមកនេះ មន្ត្រីជំនាញមន្ទីរពាក់ព័ន្ធនៃរដ្ឋបាលខេត្តព្រះសីហនុ រកឃើញបទល្មើសជីកដីខុសច្បាប់ពីរទីតាំងទៀតនៅក្នុងឃុំកំពង់សីលា ស្រុកកំពង់សីលា។
ទោះជាបែបនេះក្តី សារព័ត៌មាន The Cambodia Daily នៅមិនទាន់អាចទាក់ទងលោក សៅ បុរីវឌ្ឍនៈ អភិបាលស្រុកកំពង់សីលា និងលោក គួច ចំរើន អភិបាលខេត្តព្រះសីហនុ ដើម្បីបំភ្លឺជុំវិញបទល្មើសកាយដីភ្នំធ្វើអាជីវកម្មអត់ច្បាប់ កំពុងកើតមាននៅស្រុកកំពង់សីលា បាននៅឡើយទេ នៅល្ងាចថ្ងៃចន្ទ ទី៥ ខែកក្កដា ឆ្នាំ២០២១ នេះ។
ដោយឡែកលោក ប្រាក់ សមប្រាថ្នា ប្រធានមន្ទីររ៉ែ និងថាមពល ខេត្តព្រះសីហនុ បានឲ្យសារព័ត៌មានក្នុងស្រុកដឹងថា គ្រឿងចក្រចំនួន ៦គ្រឿងដែលសមត្ថកិច្ចចាប់យកមករក្សាទុកនៅសាលាស្រុកកំពង់សីលា ដើម្បីផាកពិន័យកាលពីពេលថ្មីៗនេះ សមត្ថកិច្ចក៏នឹងរៀបចំសំណុំរឿងបញ្ជូនទៅកាន់តុលាការ អនុវត្តនីតិវិធីតាមផ្លូវច្បាប់ជាបន្តទៀត៕