29 C
Phnom Penh

លោក ហ៊ុន សែន មិន​ឱ្យ​ពលរដ្ឋ​កម្ពុជា​ទៅ​ធ្វើ​សង្គ្រាម​នៅ​អ៊ុយក្រែន​ប្រឆាំង​រុស្ស៊ី​ឡើយ

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​បុរស​ខ្លាំង​កម្ពុជា លោក ហ៊ុន សែន អះអាង​ថា បើ​ទោះបី​មាន​អ្នក​ស្ម័គ្រចិត្ត​ទៅ​ធ្វើ​សង្គ្រាម​នៅ​ប្រទេស​អ៊ុយក្រែន ដែល​កំពុង​វាយលុក​ដោយ​ប្រទេស​រុស្ស៊ី​ក៏ដោយ លោក​នឹង​មិន​អនុញ្ញាត​ឡើយ ដើម្បី​ទប់ស្កាត់​កុំ​ឱ្យ​ភ្លើង​សង្គ្រាម​កាន់តែ​រីក​រាលដាល​ខ្លាំង​ថែមទៀត។

ថ្លែង​ក្នុង​ពិធី​សម្ពោធ​ដាក់​ឱ្យ​ប្រើប្រាស់​មន្ទីរពេទ្យ​មិត្តភាព​កម្ពុជា-ចិន នៅ​ខេត្ត​ត្បូងឃ្មុំ នា​ថ្ងៃ​ទី​០៧ ខែ​មីនា ឆ្នាំ​២០២២ មេដឹកនាំ​កម្ពុជា​ដែល​ក្រាញ​អំណាច​ត​ត្រកូល​យូរ​ជាងគេ​នៅ​អាស៊ី​រូប​នេះ អះអាង​ថា ប៉ុន្មាន​ថ្ងៃ​មកនេះ ពលរដ្ឋ​ខ្មែរ​មួយ​ចំនួន​ដោយ​មាន​ទាំង​កូនក្មេង​ផង ហាក់​ចាប់អារម្មណ៍​ទៅ​នឹង​សង្គ្រាម​ដែល​វាយលុក​ដោយ​ប្រទេស​រុស្ស៊ី​ទៅលើ​ប្រទេស​អ៊ុយក្រែន។

លោក​បន្ត​ថា ទោះបីជា​ពលរដ្ឋ​មួយ​ចំនួន​បាន​ចាប់អារម្មណ៍​ដោយ​បង្ហាញ​ការ​ស្ម័គ្រចិត្ត​ចូល​បម្រើ​ជា​កងទ័ព ដើម្បី​ទៅ​ជួយ​អ៊ុយក្រែន ប៉ុន្តែ​លោក​មិន​ផ្ដល់​ឱកាស​ឱ្យ​ទៅ​នោះ​ទេ ដោយ​លោក​ចាត់ទុក​ការ​ទៅ​ជួយ​អ៊ុយក្រែន​ប្រឆាំង​រុស្ស៊ី ថា​ជា​ការ​យក​សាំង​ចាក់​លើ​ភ្លើង​ដែល​កំពុង​ឆេះ​ដោយ​មិន​ងាយ​នឹង​ពន្លត់​នោះ​ទេ។

លោក​បន្ត​ថា រដ្ឋាភិបាល​អនុញ្ញាត​តែ​កងទ័ព​មួក​ខៀវ​ក្រោម​ឆត្រ​របស់​អង្គការ​សហប្រជាជាតិ​តែប៉ុណ្ណោះ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​លទ្ធិប្រជាធិបតេយ្យ (PMD) លោក គឹម សុខ បាន​សរសេរ​នៅ​លើ​គណនី​ហ្វេសប៊ុក​របស់​លោក​ថា ករណី​វិបត្តិ​សង្គ្រាម​រុស្ស៊ី-អ៊ុយក្រែន លោក ពូទីន ទាមទារ ៤​លក្ខខណ្ឌ​ដើម្បី​សន្តិសុខ​រុស្ស៊ី​ទៅ​អនាគត។ លក្ខខណ្ឌ​នោះ​អាច​អនុវត្ត​តាម​បាន​តែ​មួយ​ចំណុច​ប៉ុណ្ណោះ​អំពី​អ៊ុយក្រែន គឺ​ត្រូវ​អព្យាក្រឹត្យ ប៉ុន្តែ​បី​ចំណុច​ទៀត​អនុវត្ត​មិន​បាន​ទេ ព្រោះ​ជា​ផ្លូវ​ឆ្ពោះទៅ​រក​ការ​ប្រល័យ​ពូជសាសន៍ និង​ទឹកដី​សម្រាប់​អ៊ុយក្រែន។

លោក​បន្ត​ទៀត​ថា លក្ខខណ្ឌ​បី​ទៀត​នោះ គឺ​អ៊ុយក្រែន​ត្រូវ​ទទួលស្គាល់​ទឹកដី​គ្រីមៀរ ជា​របស់​រុស្ស៊ី រំសាយ​កងទ័ព​ទាំងមូល ដក​រដ្ឋាភិបាល​បច្ចុប្បន្ន​ចេញ បង្កើត​រដ្ឋាភិបាល​ថ្មី​ក្នុង​ជំហរ​នយោបាយ​លម្អៀង​ទៅ​រក​ក្រុង​មូស្គូ។

យ៉ាងណា ភាព​តានតឹង​រវាង​រុស្ស៊ី និង​អ៊ុយក្រែន ក្នុង​រយៈពេល​ចុងក្រោយ​នេះ បាន​ចាប់ផ្តើម​កើន​ឡើង​ខ្លាំង​បន្ទាប់ពី​រុស្ស៊ី​នៅតែ​បន្ត​ព្យាយាម​ដាក់​សម្ពាធ​លើ​អ៊ុយក្រែន តាមរយៈ​ការ​ចលនា​ទ័ព​របស់​ខ្លួន​ចូល​ឈ្លានពាន​ទឹកដី​ប្រទេស​អ៊ុយក្រែន។

សង្គ្រាម​នៅ​អ៊ុយក្រែន ដែល​កើតឡើង​ដោយសារ​ការ​វាយលុក​ពី​សំណាក់​កងទ័ព​រុស្ស៊ី បាន​អូស​អន្លាយ​រយៈពេល ១១​ថ្ងៃ​មក​ហើយ​គិត​រហូត​មកដល់​ពេលនេះ។

ការ​ឈ្លានពាន​របស់​រុស្ស៊ី​ទៅ​លើ​ទឹកដី ឬ​អធិបតេយ្យភាព​របស់​ប្រទេស​អ៊ុយក្រែន ត្រូវ​បាន​សហភាព​អឺរ៉ុប និង​បណ្ដា​ប្រទេស​មួយ​ចំនួន​ផ្សេង​ទៀត​សម្រេច​ដាក់​ទណ្ឌកម្ម​ជាបន្តបន្ទាប់​លើ​រុស្ស៊ី ដែល​ដឹកនាំ​ដោយ​ប្រធានាធិបតី លោក វ៉្លាឌីមៀរ ពូទីន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស