 ខណៈស្ថានទូតអាល្លឺម៉ង់ អំពាវនាវជាថ្មីឱ្យភាគីពាក់ព័ន្ធនៅក្នុងវិវាទការងារវិលចូលតុចរចា ដើម្បីស្វែងរកដំណោះស្រាយ។){kind=link}
រដ្ឋមន្ត្រីក្រសួងមហាផ្ទៃ លោក ស ខេង គ្រោងនឹងជួបប្រជុំជាមួយភាគីពាក់ព័ន្ធនៅថ្ងៃទី៩ មីនា នេះ ដើម្បីស្វែងរកដំណោះស្រាយវិវាទការងារនៅក្រុមហ៊ុនកាស៊ីណូណាហ្គាវើលដ៍ (NAGA World) ខណៈស្ថានទូតអាល្លឺម៉ង់ អំពាវនាវជាថ្មីឱ្យភាគីពាក់ព័ន្ធនៅក្នុងវិវាទការងារវិលចូលតុចរចា ដើម្បីស្វែងរកដំណោះស្រាយ។
យោងតាមលិខិតអញ្ជើញមួយច្បាប់ចេញផ្សាយកាលពីថ្ងៃទី៤ ខែមីនា ឆ្នាំ២០២២ ដែលទើបផ្សព្វផ្សាយនៅថ្ងៃអង្គារ ទី៨ មីនា នេះ បានឱ្យដឹងថា រដ្ឋមន្ត្រីក្រសួងមហាផ្ទៃ លោក ស ខេង នឹងចូលរួមដោយផ្ទាល់កិច្ចប្រជុំនៅថ្ងៃទី៩ ខែមីនា ឆ្នាំ២០២២ នៅសាលារាជធានីភ្នំពេញនៅវេលាម៉ោង ១រសៀល។
លិខិតដដែលអះអាងថា កិច្ចប្រជុំនេះនឹងមានការចូលរួមពីរដ្ឋមន្ត្រីក្រសួងការងារ លោក អ៊ិត សំហេង រដ្ឋមន្ត្រីក្រសួងយុត្តិធម៌ លោក កើត រិទ្ធ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង អគ្គស្នងការនគរបាលរាជធានីភ្នំពេញ លោក នេត សាវឿន អភិបាលរាជធានីភ្នំពេញ លោក ឃួង ស្រេង និងស្នងការនគរបាលរាជធានីភ្នំពេញ លោក ស ថេត រួមទាំងមេបញ្ជាការកងរាជអាវុធហត្ថរាជធានីភ្នំពេញ លោក រ័ត្ន ស្រ៊ាង។
ក្រៅពីក្រសួងសមត្ថកិច្ច ក៏មានប្រធានសាលាដំបូងរាជធានីភ្នំពេញ លោក តាំង ស៊ុនឡាយ ព្រះរាជអាជ្ញាអយ្យការអមសាលាដំបូងរាជធានីភ្នំពេញផងដែរ។
ចំណែកស្ថានទូតអាល្លឺម៉ង់ ប្រចាំនៅកម្ពុជា នៅក្នុងថ្ងៃទិវាសិទ្ធិនារីអន្តរជាតិ ក៏បានអំពាវនាវជាថ្មីទៀតដោយឱ្យភាគីពាក់ព័ន្ធនៅក្នុងវិវាទការងារណាហ្គាវើលដ៍ វិលចូលតុចរចា ដើម្បីស្វែងរកដំណោះស្រាយ។
តាមរយៈសេចក្ដីថ្លែងការណ៍មួយបានបង្ហោះលើបណ្ដាញសង្គមហ្វេសប៊ុក នៅថ្ងៃទី៨ មីនា នេះ ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា លោក Christian Berger បានជំរុញឱ្យភាគីពាក់ព័ន្ធវិលមករកតុចរចាឡើងវិញ ដោយថាការចរចាអាចជោគជ័យទៅបាន លុះត្រាមានការចូលរួមរបស់អ្នកតំណាងដែលត្រូវបានជ្រើសរើស។ លើសពីនេះ អ្នកដែលចរចាក៏មិនត្រូវភ្លេចដែរ ដើម្បីស្វែងរកការសម្រុះសម្រួលគ្នាដោយសុចរិត និងជាផលប្រយោជន៍ដល់ភាគីពាក់ព័ន្ធទាំងអស់។
ការជំរុញជាថ្មីនេះ ធ្វើឡើងស្របពេលដែលសមត្ថកិច្ចរាជធានីភ្នំពេញនៅតែបន្តធ្វើទុក្ខបុកម្នេញ ដោយរារាំង រុញច្រានទាំងបង្ខំ ដើម្បីឱ្យក្រុមកូដករណាហ្គាវើលដ៍ចូលក្នុងរថយន្តក្រុងរួចដឹកបញ្ជូនទៅទុកនៅមណ្ឌលចត្តាឡីស័កក្នុងខណ្ឌព្រែកព្នៅ។
ក្នុងឱកាសទិវានាទីអន្តរជាតិ ៨ មីនា ខួបទី១១១ នេះ ក្រុមសង្គមស៊ីវិលបាននាំគ្នាបង្ហោះប៉េងប៉ោង និងកាន់បដាភ្ជាប់ជាមួយរូបថត ដោយទាមទារឱ្យដោះលែងថ្នាក់ដឹកនាំ និងសកម្មជនសហជីពណាហ្គាវើលដ៏។
ក្រុមអង្គការសង្គមស៊ីវិល បានលើកឡើងថា សិទ្ធិស្ត្រីនឹងត្រូវបានធានា និងលើកកម្ពស់នៅពេលដែលស្ត្រីយល់ដឹងអំពីសិទ្ធិរបស់ពួកគាត់ និងហ៊ានប្រើប្រាស់សិទ្ធិរបស់គាត់ ហ៊ានក្រោកឈរដើម្បីការពារ ទប់ស្កាត់ លុបបំបាត់ នៅពេលដែលមានការរំលោភបំពានសិទ្ធិការងារ និងភាពអយុត្តិធម៌ក្នុងសង្គម។ ក្រុមអង្គការសង្គមស៊ីវិលពិតជាកោតសរសើរនូវការលះបង់ទាំងកម្លាំងកាយចិត្ត ប្រកបដោយវិន័យ និងសណ្ដាប់ធ្នាប់ ដោយអហិង្សា និងសន្តិវិធី ដើម្បីការពារសិទ្ធិការងារនៅក្រុមហ៊ុនណាហ្គាវើលដ៍។
គិតមកដល់ថ្ងៃនេះ វិវាទការងារក្រុមហ៊ុនណាហ្គាវើលដ៍ បានអូសបន្លាយជាង ២ខែមកហើយ។ ការអូសបន្លាយនេះ បានឈានទៅដល់សមត្ថកិច្ចចាប់ឃុំខ្លួនមេដឹកនាំ និងសកម្មជនសហជីពចំនួន ១១នាក់ដាក់ពន្ធនាគារផងដែរ៕