 ទាំង ៨រូប ក្រោមហេតុផលដើម្បីរក្សាជនត្រូវចោទទុកជូនតុលាការ និងបារម្ភខ្លាចបង្កចលាចលក្នុងសង្គម។){kind=link}
សង្គមស៊ីវិល និងកូដករបង្ហាញការខកចិត្តចំពោះសាលាឧទ្ធរណ៍រាជធានីភ្នំពេញ ដែលបដិសេធបណ្ដឹងសុំនៅក្រៅឃុំរបស់ថ្នាក់ដឹកនាំសហជីពណាហ្គាវើលដ៍ (NAGA World) ទាំង ៨រូប ក្រោមហេតុផលដើម្បីរក្សាជនត្រូវចោទទុកជូនតុលាការ និងបារម្ភខ្លាចបង្កចលាចលក្នុងសង្គម។
ការបដិសេធបណ្ដឹងសុំនៅក្រៅឃុំរបស់មេធាវីការពារក្ដីឱ្យថ្នាក់ដឹកនាំសហជីពទាំង ៨រូប ធ្វើឡើងបន្ទាប់ពីប្រធានក្រុមប្រឹក្សាសាលាឧទ្ធរណ៍បានបើកសវនាការអសាធារណៈ នាព្រឹកថ្ងៃព្រហស្បតិ៍ ទី១០ មីនា នេះ។
សហមេធាវីការពារក្ដីឱ្យថ្នាក់ដឹកនាំសហជីពទាំង ៨រូប បានប្រាប់អ្នកសារព័ត៌មានថា ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក ឃុន លាងម៉េង បានតម្កល់សេចក្ដីសម្រេចរបស់សាលាដំបូងរាជធានីភ្នំពេញដដែល ដោយនៅបន្តឃុំខ្លួនថ្នាក់ដឹកនាំសហជីពទាំង ៨រូបនៅពន្ធនាគារ ដើម្បីរង់ចាំសវនាការអង្គសេចក្ដី។ បើតាមសហមេធាវីដដែលឲ្យដឹងថា ការមិនអនុញ្ញាតឱ្យនៅក្រៅឃុំ ដោយលោក ឃុន លាងម៉េង ដែលជាប្រធានក្រុមប្រឹក្សាជំនុំជម្រះសំអាងថា ខ្លាចបង្កចលាចលក្នុងសង្គម។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព បង្ហាញការសោកស្ដាយដោយចាត់ទុកការសម្រេចមិនអនុញ្ញាតឱ្យនៅក្រៅឃុំបណ្ដោះអាសន្ន ដោយសំអាងខ្លាចបង្កចលាចលក្នុងសង្គម គ្រាន់តែជាលេសក្នុងការឃុំខ្លួន និងហាមឃាត់សិទ្ធិសេរីភាពរបស់ពួកគាត់តែប៉ុណ្ណោះ។
អ្នកស្រី ចក់ សុភាព បានប្រាប់ក្រុមអ្នកសារព័ត៌មាននៅមុខសាលាឧទ្ធរណ៍រាជធានីភ្នំពេញថា វិធានការរបស់តុលាការនាពេលនេះ ធ្វើឡើងតែចំពោះសកម្មជនសហជីព និងសកម្មជននយោបាយប៉ុណ្ណោះ ខណៈអ្នកមានអំណាច និងឧកញ៉ាធំៗមួយចំនួន តុលាការហាក់មិនបានអនុវត្តបែបនេះឡើយ។
អ្នកស្រីបន្តថា ចាប់តាំងពីមានវិវាទការងាររវាងបុគ្គលិក និងថៅកែកើតឡើងមកដល់ពេលនេះ អាជ្ញាធរមិនបានជួយដោះស្រាយឡើយ ផ្ទុយទៅវិញអាជ្ញាធរបែរជាចុះទៅរារាំងកូដករទៅវិញ។ អ្នកស្រីបញ្ជាក់ថា ករណីនេះបានឆ្លុះបញ្ចាំងឱ្យឃើញថា អាជ្ញាធរបានលម្អៀងទៅកាន់ក្រុមហ៊ុន ដោយមិនបានឈរនៅកណ្ដាលនោះទេ។
ខណៈតុលាការកំពុងបើកសវនាការនោះ ក៏មានក្រុមកូដករជិត ១០០នាក់បាននាំគ្នាទៅប្រមូលផ្ដុំមុខសាលាឧទ្ធរណ៍ ដើម្បីលើកទឹកចិត្តថ្នាក់ដឹកនាំសហជីពទាំង ៨នាក់ ប៉ុន្តែយ៉ាងណា ក្រុមកូដករមិនឃើញតំណាងពួកគេឡើយ ដោយសារមន្ត្រីពន្ធនាគារបានដឹកថ្នាក់ដឹកនាំសហជីពដែលជាស្ត្រីនោះចេញតាមផ្លូវក្រោយវិញ។
ក្រុមកូដករខកចិត្តចំពោះតុលាការ និងសមត្ថកិច្ច ដោយចាត់ទុកការដឹកថ្នាក់ដឹកនាំចេញតាមផ្លូវក្រោយមិនឱ្យឃើញពួកគាត់នេះ ថាស្ថាប័នទាំងនោះហាក់មានការភ័យខ្លាចពួកគាត់ និងជារឿងអយុត្តិធម៌សម្រាប់ថ្នាក់ដឹកនាំសហជីព រួមទាំងពួកគាត់។
ថ្នាក់ដឹកនាំសហជីពទាំង ៨នាក់ដែលតុលាការបើកសវនាការបណ្ដឹងសុំនៅក្រៅឃុំនាថ្ងៃព្រឹកទី១០ មីនា នេះមានកញ្ញា ឈឹម ស៊ីថរ អ្នកនាង សុន ស្រីពេជ្រ លោក សុខ ណារិទ្ធ អ្នកស្រី ទូច សិរីមាស អ្នកស្រី រី សុវណ្ណឌី អ្នកស្រី ឃ្លាំង សុបិន្ដ អ្នកស្រី ឈឹម សុខន និងអ្នកស្រី ហៃ សុភាព។
ថ្នាក់ដឹកនាំសហជីពក្រុមហ៊ុនណាហ្គាវើលដ៍ទាំង ៨រូប ត្រូវបានសមត្ថកិច្ចចាប់ខ្លួនកាលពីខែមករា ឆ្នាំ២០២២ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ខណៈសកម្មជនសហជីពចំនួន ៣នាក់ទៀតត្រូវបានសមត្ថកិច្ចចាប់ឃុំខ្លួន ពីបទ «ល្មើសបម្រាមសុខាភិបាល» បន្ទាប់ពីពួកគាត់ធ្វើកូដកម្មអហិង្សាទាមទារឲ្យដោះលែងតំណាង និងឱ្យក្រុមហ៊ុនដោះស្រាយវិវាទការងារ។
ការអូសបន្លាយមិនដោះស្រាយ និងការចាប់ខ្លួនថ្នាក់ដឹកនាំ និងសកម្មជនសហជីពសរុប ១១នាក់ ខណៈកូដករដែលបន្តចេញធ្វើកូដកម្មត្រូវបានសមត្ថកិច្ចរារាំងជាបន្តបន្ទាប់នេះ បានធ្វើឱ្យឯកអគ្គរដ្ឋទូតអាល្លឺម៉ង់ ប្រចាំនៅកម្ពុជា លោក Christian Berger កាលពីថ្ងៃទី៨ ខែមីនា បានចេញសារអំពាវនាវជាថ្មីទៀតទៅឱ្យភាគីពាក់ព័ន្ធវិលចូលតុចរចា ក្នុងការដោះស្រាយបញ្ចប់វិវាទការងារនៅក្រុមហ៊ុនមួយនេះផងដែរ។
ចំណែកឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា កាលពីថ្ងៃទី៧ ខែមីនា ឆ្នាំ២០២២ បានជំរុញទៅអាជ្ញាធរកម្ពុជាចូលរួមពិភាក្សាដោះស្រាយវិវាទការងារនៅក្រុមហ៊ុនណាហ្គាវើលដ៍។ លើសពីនេះ ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស អ្នកស្រី មីឆែល ប៉ាហ្សេលែត បានអំពាវនាវដល់អាជ្ញាធរគោរពសិទ្ធិសេរីភាពក្នុងការជួបប្រជុំដោយសន្តិវិធី ដោយសារមន្ត្រីនៃអង្គការសហប្រជាជាតិរូបនេះបានឃើញដោយផ្ទាល់នូវការបង្ក្រាប និងប្រើអំពើហិង្សាពីសំណាក់អាជ្ញាធរ ដោយចាប់បង្ខំឱ្យកូដករជាស្ត្រីឡើងលើឡានក្រុង និងដឹកចេញពីកន្លែងធ្វើកូដកម្ម។
អ្នកស្រីចាត់ទុកការបន្តបង្ក្រាបទៅលើកូដករណាហ្គាវើលដ៍ពីសំណាក់អាជ្ញាធរ ដោយយកហេតុផលកូវីដ-១៩ ថានឹងធ្វើឱ្យលំហប្រជាធិបតេយ្យ និងសង្គមស៊ីវិលកាន់តែធ្លាក់ចុះដុនដាប៕