កូដករជាង ១៥០នាក់ត្រូវបានសមត្ថកិច្ចរាជធានីភ្នំពេញចាប់ដាក់រថយន្តទាំងបង្ខំ និងដឹកទៅមណ្ឌលចត្តាឡីស័កខណ្ឌព្រែកព្នៅ បន្ទាប់ពីពួកគេចេញធ្វើកូដកម្មជាថ្មីទៀត ខណៈសមត្ថកិច្ចក៏បានរារាំងក្រុមអ្នកសារព័ត៌មាន និងសង្គមស៊ីវិលមិនឱ្យចូលទៅជិតទីតាំងដែលចាប់កូដករផងដែរនោះ។
កូដករក្រុមហ៊ុនណាហ្គាវើលដ៍ (NAGA World) ចំនួន ១៥៦នាក់ នៅរសៀលថ្ងៃសុក្រ ទី១១ មីនា បានចេញធ្វើកូដកម្មនៅជិតក្រុមហ៊ុនណាហ្គាវើលដ៍ជាថ្មីទៀត ក្រោយពីថ្នាក់ដឹកនាំ និងសកម្មជនសហជីព ១១នាក់មិនទាន់ត្រូវបានដោះលែង ខណៈវិវាទការងារក៏មិនទាន់ត្រូវបានដោះស្រាយនោះ។
កូដករម្នាក់ក្នុងចំណោម ១៥៦នាក់ដែលបានចេញធ្វើកូដកម្ម គឺកញ្ញា ស្រី ពៅ បានប្រើប្រាស់បណ្ដាញសង្គមហ្វេសប៊ុកឡាយរៀបរាប់ថា ពួកគាត់ជាកូដករចង់ឱ្យថៅកែក្រុមហ៊ុនចេញមកដោះស្រាយវិវាទការងារឱ្យកូដករតែប៉ុណ្ណោះ ប៉ុន្តែកញ្ញាបង្ហាញការសោកស្ដាយដែលក្រុមហ៊ុនមិនបានចេញមកដោះស្រាយ។
ក្រៅពីក្រុមហ៊ុនមិនចេញហើយ អាជ្ញាធរបែរជាមកធ្វើទុក្ខបុកម្នេញដោយចាប់រុញច្រានពួកគាត់ដាក់ចូលរថយន្តទាំងបង្ខំទៅវិញ។
កញ្ញា ស្រី ពៅ ចាត់ទុកសកម្មភាព និងទង្វើរបស់ក្រុមអាជ្ញាធរដែលរារាំង រុញច្រាន និងចាប់អូសទាំងបង្ខំបែបនេះថាជាអំពើមួយដែលមិនអាចទទួលយកបាន និងជារឿងអយុត្តិធម៌សម្រាប់កូដករដែលគ្រាន់ទាមទារឱ្យមានដំណោះស្រាយវិវាទការងារក្នុងក្រុមហ៊ុននោះ។
ជាមួយគ្នានេះ អ្នកសារព័ត៌មាន និងសង្គមស៊ីវិលដែលចុះតាមដាន និងឃ្លាំមើលព្រឹត្តិការណ៍តវ៉ារបស់កូដករ ត្រូវបានសមត្ថកិច្ចរារាំងដោយមិនឱ្យចូលទៅជិតទីតាំងនោះ អំឡុងពេលក្រុមសមត្ថកិច្ចចាប់កូដកររុញច្រាន និងអូសទាំងបង្ខំដាក់ចូលរថយន្ត។
សម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា បានសរសេរលើហ្វេសប៊ុកនៅល្ងាចថ្ងៃសុក្រ ទី១១ មីនា ថា អ្នកយកព័ត៌មានស្ត្រីម្នាក់របស់ វីអូឌី (VOD) ត្រូវកម្លាំងអាជ្ញាធរបានមកឃាត់ជាមួយសហការីរបស់ខ្លួនដែលជាជនជាតិបរទេស មិនឱ្យថតរូប និងបានបង្ខំឱ្យលុបរូបភាពចោល បើមិនដូច្នោះទេ កម្លាំងអាជ្ញាធរនឹងនាំយកពួកគាត់ទៅប៉ុស្តិ៍ប៉ូលិស។
អ្នកយកព័ត៌មានស្ត្រីរូបនេះអះអាងថា ដោយការភ័យខ្លាច និងមិនចង់មានរឿងរ៉ាវជាមួយអាជ្ញាធរ ពួកគាត់ក៏សម្រេចចិត្តលុបរូបភាព និងវីដេអូចោលទាំងអស់។ ជាមួយគ្នានេះ ក៏មានការចាប់ និងរុញច្រានអ្នកសារព័ត៌មានពលរដ្ឋម្នាក់ដែលជាសមាជិកខេមបូចា គឺអ្នកស្រី ច្រាយ នីម ប៉ុន្តែក្រោយមកបានដោះលែងវិញ បន្ទាប់ពីអ្នកស្រីប្រកែកថា រូបគាត់ពុំមែនជាបាតុករនោះទេ។
នាយកប្រតិបត្តិខេមបូចា លោក ណុប វី មានប្រសាសន៍ថា ការរុញច្រានអ្នកសារព័ត៌មាន ការបង្ខំឲ្យលុបរូបភាព ការតាមដានសកម្មភាពយកព័ត៌មានរបស់ពួកគេ គឺជាទម្រង់នៃការគំរាមកំហែងធ្ងន់ធ្ងរលើអ្នកសារព័ត៌មាន និងជាការរំលោភបំពានលើសិទ្ធិ និងសេរីភាពដែលបានធានាដោយរដ្ឋធម្មនុញ្ញ និងច្បាប់អន្តរជាតិ។
លោកទទូចឱ្យរដ្ឋាភិបាលពិនិត្យមើលឡើងវិញ និងបញ្ឈប់នូវរូបភាពទាំងអស់នេះ ដែលនឹងអាចធ្វើឱ្យប៉ះពាល់ដល់ការប្ដេជ្ញាចិត្តរបស់រដ្ឋាភិបាលក្នុងការយកអ្នកសារព័ត៌មានជាដៃគូមិនអាចខ្វះបាន។
កាលពីថ្ងៃទី៩ ខែមីនា ឆ្នាំ២០២២ រដ្ឋមន្ត្រីក្រសួងមហាផ្ទៃ លោក ស ខេង បានដឹកនាំកិច្ចប្រជុំមួយនៅសាលារាជធានីភ្នំពេញ ដោយមានក្រសួងការងារ ក្រសួងយុត្តិធម៌ សាលារាជធានីភ្នំពេញ ស្នងការ និងខាងតុលាការ ចូលរួមដើម្បីដោះស្រាយវិវាទការងារនៅក្រុមហ៊ុនណាហ្គាវើលដ៍ ប៉ុន្តែមកដល់ពេលនេះនៅមិនទាន់មានដំណោះស្រាយណាមួយនៅឡើយ។ ក្រៅពីមិនមានដំណោះស្រាយហើយ សមត្ថកិច្ចនៅតែបន្តរារាំងកូដករ រួមទាំងអង្គការសង្គមស៊ីវិលកាន់តែខ្លាំងជាងមុនទៅទៀត។
ការអូសបន្លាយមិនដោះស្រាយ និងការចាប់ខ្លួនថ្នាក់ដឹកនាំ និងសកម្មជនសហជីពសរុប ១១នាក់ ខណៈកូដករដែលបន្តចេញធ្វើកូដកម្ម ត្រូវបានសមត្ថកិច្ចរារាំងជាបន្តបន្ទាប់នេះ បានធ្វើឱ្យឯកអគ្គរដ្ឋទូតអាល្លឺម៉ង់ ប្រចាំនៅកម្ពុជា លោក Christian Berger កាលពីថ្ងៃទី៨ ខែមីនា ក៏បានចេញសារអំពាវនាវជាថ្មីឱ្យភាគីពាក់ព័ន្ធវិលចូលតុចរចា ក្នុងការដោះស្រាយបញ្ចប់វិវាទការងារនៅក្រុមហ៊ុនមួយនេះ៕