29 C
Phnom Penh

តុលាការ​ដោះលែង​សមាជិក​សហជីព​ណាហ្គា​វើលដ៍​៣​នាក់​ទៀត​ឱ្យ​នៅ​ក្រៅ​ឃុំ

ដោយ ឌឹ ខេមបូឌា ដេលី

បទវិភាគ

ចៅក្រម​ស៊ើបសួរ​នៃ​សាលាដំបូង​រាជធានី​ភ្នំពេញ សម្រេច​ដោះលែង​មេដឹកនាំ​សហជីព ៣​រូប​ទៀត​ឲ្យ​នៅ​ក្រៅ​ឃុំ​បណ្ដោះអាសន្ន​នៅ​រសៀល​ថ្ងៃ​ទី​១៧ មីនា។

ចៅក្រម​ស៊ើបសួរ​សាលាដំបូង​រាជធានី​ភ្នំពេញ បាន​សម្រេច​ឲ្យ​ដោះលែង​មេដឹកនាំ​សហជីព​ទាំង ៣​រូប​នេះ​ក្រោម​ការ​ជួយ​អន្តរាគមន៍​ពី​ក្រសួង​ការងារ និង​បណ្ដុះបណ្ដាល​វិជ្ជាជីវៈ។ ការ​ដោះលែង​នេះ វា​ក៏​ជា​ផ្នែក​មួយ​នៃ​ការ​បង្កើត​បរិយាកាស​ចរចា​រវាង​បុគ្គលិក និង​ក្រុមហ៊ុន​ណាហ្គា​វើលដ៍ (NAGA World) ដើម្បី​ឈាន​ទៅ​បញ្ចប់​វិវាទ​ដែល​អូស​បន្លាយ​ពេល​ជាច្រើន​ខែ​មក​ហើយ។

ក្រោយ​ពី​មាន​ការ​ដោះលែង​សហជីព​ទាំង ៣​នាក់ នៅ​ថ្ងៃ​ទី​១៨ មីនា ថ្នាក់​ដឹកនាំ​សហជីព​នឹង​ជួប​ពិភាក្សា​គ្នា​ជាមួយ​សមាជិក​សហជីព និង​ក្រុម​កូដករ មុន​ពេល​ចូល​ជួប​ជាមួយ​ក្រសួង​ការងារ ដើម្បី​ស្វែងរក​ដំណោះស្រាយ​វិវាទ​ការងារ។

នៅ​ថ្ងៃ​ទី​១៧ មីនា នេះ​ដែរ ក្រសួង​ការងារ​បាន​ចេញ​សេចក្ដី​ជូនដំណឹង​មួយ ដោយ​បាន​បន្ត​អំពាវនាវ​ជា​ថ្មី​ដល់​តំណាង​ភាគី​កម្មករ​និយោជិត​ឱ្យ​ចូលរួម​ប្រជុំ​ដោះស្រាយ នៅ​ថ្ងៃ​ទី​១៨ ខែ​មីនា ឆ្នាំ​២០២២ វេលា​ម៉ោង ២ និង ៣០​នាទី​រសៀល​បន្ត​ទៀត ហើយ​ទាមទារ​ឱ្យ​តំណាង​បុគ្គលិក​ទាំងនោះ​អនុវត្ត​តាម​កិច្ចសន្យា​របស់​ខ្លួន​ដែល​ស្នើសុំ​នៅ​ក្រៅ​ឃុំ។

កញ្ញា ឈឹម ស៊ីថរ បាន​ប្រាប់​សារព័ត៌មាន​ក្នុង​ស្រុក​ថា ក្រោយ​ចេញពី​ពន្ធនាគារ មាន​មេដឹកនាំ​សហជីព​ខ្លះ​បាន​ដក​ខ្លួន​ចេញ ព្រោះ​រង​សម្ពាធ​ច្រើន។ យ៉ាងណាក៏ដោយ មេ​សហជីព​រូប​នេះ​បញ្ជាក់​ថា ក្រុម​របស់​ខ្លួន​នឹង​ចូល​ចរចា​បន្ទាប់ពី​សមាជិក​ដែល​ជាប់​ឃុំ​ត្រូវ​បាន​ដោះលែង​ឲ្យ​នៅ​ក្រៅ​ឃុំ។

កញ្ញា​បាន​លើកឡើង​ថា ជំហរ​របស់​កម្មករ​តាមរយៈ​ការប្រជុំ លក្ខខណ្ឌ​មួយ​ដាច់ខាត​ដែល​ពួកគាត់​មិន​អាច​ទម្លាក់​ចោល​ការ​ទាមទារ​បាន គឺ​ត្រូវតែ​ទម្លាក់​បទ​ចោទ​លើ​អ្នក​ទាំង ១៥​នាក់។ ការ​ចរចា​អាច​បញ្ចប់​ទៅ​បាន លុះត្រាតែ​មាន​ការ​ទម្លាក់​បទ​ចោល​ប្រកាន់ ដើម្បី​ឲ្យ​មាន​សិទ្ធិ​ស្មើ​គ្នា​ក្នុង​តុ​ចរចា។

ជាមួយ​គ្នា​នេះ​ដែរ ពួកគេ​ថា​អាជ្ញាធរ​បាន​ធ្វើ​ទុក្ខបុកម្នេញ​លើ​អ្នក​តវ៉ា​តាម​អំពើ​ចិត្ត ហើយ​សង្ឃឹម​ថា​តទៅ​នេះ អាជ្ញាធរ និង​ក្រសួង​ពាក់ព័ន្ធ​នឹង​ដោះស្រាយ​វិវាទ​នេះ​ដោយ​ឥត​មាន​ការ​លម្អៀង។

គិត​ចាប់ពី​ថ្ងៃ​ទី​១៨ ខែ​ធ្នូ ឆ្នាំ​២០២១ ដល់​ថ្ងៃ​ទី​១៧ ខែ​មីនា ឆ្នាំ​២០២២ វិវាទ​ការងារ​នៅ​ក្រុមហ៊ុន​ណាហ្គា​វើលដ៍ បាន​អូស​បន្លាយ​រយៈពេល​ជិត ៣​ខែ។ ការ​អូស​បន្លាយ​នេះ បាន​ជំរុញ​ឱ្យ​ក្រុម​កូដករ​ណាហ្គា​វើលដ៍​ចេញ​ធ្វើ​កូដកម្ម​ស្ទើរ​ជា​រៀងរាល់​ថ្ងៃ ដើម្បី​ទាមទារ​ឱ្យ​ថៅកែ​ក្រុមហ៊ុន​ដោះស្រាយ​វិវាទ​ការងារ ក្រោយ​ពី​ក្រុមហ៊ុន​នេះ​បាន​បញ្ឈប់​បុគ្គលិក​ជាង ១៣០០​នាក់​កាលពី​ឆ្នាំ​២០២១៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស