ក្រសួងការបរទេស និងសហប្រតិបត្តិការអន្តរជាតិកម្ពុជា ថាប្រេសិតពិសេសរបស់ប្រធានអាស៊ាន លោក ប្រាក់ សុខុន នឹងទៅបំពេញទស្សនកិច្ចការងារនៅប្រទេសមីយ៉ាន់ម៉ា ចាប់ពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២២ ខាងមុខនេះ ដោយផ្អែកលើឯកសារមូលដ្ឋាននៃកិច្ចព្រមព្រៀងជាឯកច្ឆន្ទប្រាំចំណុចរបស់អាស៊ាន។
ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីប្រកាសព័ត៌មាននៅថ្ងៃទី១៨ ខែមីនា ឆ្នាំ២០២២ ថា ដំណើរទស្សនកិច្ចលើកដំបូងនៃប្រេសិតពិសេសរបស់ប្រធានអាស៊ានទៅកាន់ប្រទេសភូមា នៅពេលនេះ គឺមានការចូលរួមពីអគ្គលេខាធិការអាស៊ាន លោក លឹម ចុកហ៊ុយ និងលោក លី យ៉ាមមីង នាយកប្រតិបត្តិនៃមជ្ឈមណ្ឌលសម្របសម្រួលអាស៊ានផងដែរ។
ប្រភពដដែលអះអាងថា ទស្សនកិច្ចការងារនេះធ្វើឡើងក្នុងបំណងដើម្បីការចែកចាយជំនួយមនុស្សធម៌ដល់ពលរដ្ឋភូមា ដោយមានការគាំទ្រ និងសម្របសម្រួលពីលេខាធិការដ្ឋានអាស៊ាន និងមជ្ឈមណ្ឌលសម្របសម្រួលអាស៊ាន ដើម្បីឈានទៅដល់ការបញ្ចប់អំពើហិង្សានៅប្រទេសភូមា។
កាលពីពាក់កណ្តាលខែកុម្ភៈ ឆ្នាំ២០២២ រដ្ឋមន្ត្រីការបរទេសកម្ពុជា លោក ប្រាក់ សុខុន និងជាប្រេសិតរបស់អាស៊ាន បានអះអាងថា ខ្លួននឹងទៅទស្សនកិច្ចនៅប្រទេសភូមា នៅសប្តាហ៍ទី២ នៃខែមីនា ឆ្នាំ២០២២ ស្ដីពីបញ្ហានៅមីយ៉ាន់ម៉ា ដើម្បីជួបពិភាក្សាពីការអនុវត្តកិច្ចព្រមព្រៀង ៥ចំណុចរបស់អាស៊ានជាមួយនឹងមេដឹកនាំរបបសឹកភូមា។
នាយកប្រតិបត្តិអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៨ មីនា ថា ដំណើរទស្សនកិច្ចនេះបញ្ជាក់ពីការអនុវត្តតាមផែនការ និងការសន្យារបស់ប្រធានអាស៊ានលើការសម្របសម្រួលបញ្ហាភូមា និងសហគមន៍អាស៊ាន ដើម្បីឲ្យភូមាគោរពតាមគោលការណ៍កុងសង់ស៊ីស ៥ចំណុច។ ប៉ុន្តែលោកយល់ថា បើមើលតាមគោលជំហររបស់លោក មីន អ៊ុងឡាំង ប្រហែលជាមិនគោរពតាមគោលការណ៍ទាំង ៥ចំណុចរបស់អាស៊ាននេះទេ។
បណ្ឌិត សេក សុជាតិ អះអាងថា អ្វីដែលមេដឹកនាំរបបសឹកភូមាចង់បាននៅពេលនេះ គឺការរក្សាអំណាច ជាជាងការគិតគូរពីសុខទុក្ខរបស់ពលរដ្ឋ ហើយរបបសឹកភូមាក៏មិនខ្វល់ពីការដាក់ទណ្ឌកម្មរបស់អន្តរជាតិលើប្រទេសរបស់ខ្លួនដែរ ដូច្នេះកាលៈទេសៈនេះ អាស៊ានអាចធ្វើត្រឹមតែជាអ្នកសម្របសម្រួលប៉ុណ្ណោះ មិនអាចធ្វើជាអ្នកដោះស្រាយបញ្ហាភូមាបានទេ។
នាយកប្រតិបត្តិអង្គការអភិវឌ្ឍន៍ផ្នត់គំនិតរូបនេះផ្តល់យោបល់ថា កម្ពុជាក្នុងនាមជាប្រធានអាស៊ាន និងប្រេសិតអាស៊ានរបស់អាស៊ាន គួរតែបន្តស្មារតីអាស៊ាន និងបង្កើនការសន្ទនាជាមួយភាគីពាក់ព័ន្ធនានា ដោយជំរុញឱ្យមេរដ្ឋប្រហារភូមាទទួលយកគោលការណ៍កុងសង់ស៊ីសទាំង ៥ចំណុចរបស់អាស៊ានឲ្យខាងតែបាន។
យ៉ាងណាក៏ដោយ លោក ហ៊ុន សែន ធ្លាប់បានអះអាងកាលពីថ្ងៃទី១៦ ខែកុម្ភៈ ឆ្នាំ២០២២ ថា លោកទទួលស្គាល់ថា បញ្ហានៅមីយ៉ាន់ម៉ា មិនទាន់មានភាពប្រែប្រួលនោះឡើយក្រោយពីដំណើរទស្សនកិច្ចរបស់លោកកាលពីពាក់កណ្តាលខែមករា កន្លងទៅ។ ប៉ុន្តែ បើបន្តទុកឲ្យស្ថានភាពនៅតែបែបនេះដោយគ្មានការនិយាយគ្នា បញ្ហានៅមីយ៉ាន់ម៉ា នៅតែមិនអាចបញ្ចប់ ទោះត្រូវប្រើពេលវេលាពី ៥ឆ្នាំទៅ ១០ឆ្នាំទៀតក៏ដោយ។
ក្រុមអ្នកឃ្លាំមើលស្ថានការណ៍នយោបាយនៅកម្ពុជា បានអបអរសាទរប្រមុខការទូតកម្ពុជាដែលសម្រេចងាកទៅរកការអនុវត្តតាមគោលការណ៍កុងសង់ស៊ីស ៥ចំណុចរបស់អាស៊ាន ដែលបានកំណត់កន្លងមក ព្រោះថាវិបត្តិនៅប្រទេសភូមា គ្មានជម្រើសណាល្អជាងការជំរុញឱ្យមេដឹកនាំរបបសឹកភូមា អនុវត្តគោលការណ៍ទាំង ៥ចំណុចរបស់អាស៊ាននោះឡើយ៕