28 C
Phnom Penh

លោក ហ៊ុន សែន អួត​ប្រាប់​នាយករដ្ឋមន្ត្រី​ជប៉ុន​ថា​កម្ពុជា​គោរព​សិទ្ធិមនុស្ស​និង​លទ្ធិប្រជាធិបតេយ្យ​បាន​ល្អ​ប្រសើរ

ដោយ ឌឹ ខេមបូឌា ដេលី

បទវិភាគ

មេដឹកនាំ​ខ្មែរ​ដែល​គេ​ចោទ​ពី​ការ​រំលោភ​សិទ្ធិមនុស្ស និង​សម្លាប់​ប្រជាធិបតេយ្យ​នៅ​កម្ពុជា លោក ហ៊ុន សែន លើកឡើង​ថា កម្ពុជា​បាន​សម្រេច​នូវ​ការ​អភិវឌ្ឍ ការ​គោរព​សិទ្ធិមនុស្ស និង​ការ​គោរព​លទ្ធិប្រជាធិបតេយ្យ​បាន​ល្អ​ប្រសើរ​ដូច​សព្វថ្ងៃ​នេះ គឺ​ដោយសារ​ការ​ខិតខំ​ប្រឹងប្រែង​របស់​រដ្ឋាភិបាល​កម្ពុជា​បច្ចុប្បន្ន។

បុរស​ខ្លាំង​នៅ​កម្ពុជា លោក ហ៊ុន សែន បាន​ចេញ​សេចក្តី​ថ្លែងការណ៍​រួម​មួយ​ក្រោយពី​ជំនួប​ពិភាក្សា​របស់​ខ្លួន​ជាមួយ​នាយករដ្ឋមន្ត្រី​ជប៉ុន លោក គីស៊ីដា ហ្វូមីអូ (Kishida Fumio) នៅ​វិមាន​សន្តិភាព ក្នុង​ទីក្រុង​ភ្នំពេញ កាលពី​ថ្ងៃ​ទី​២០ ខែ​មីនា ឆ្នាំ​២០២២ នេះ ដោយ​ផ្ដោត​លើ​បញ្ហា​នានា​ជាច្រើន ក្នុង​នោះ​ក៏​បាន​លើកឡើង​ពី​ការ​គោរព​សិទ្ធិមនុស្ស និង​លទ្ធិប្រជាធិបតេយ្យ​ផង​ដែរ។

លោក ហ៊ុន សែន អះអាង​ថា កម្ពុជា​បាន​គោរព​សិទ្ធិមនុស្ស ស្ដារ​លទ្ធិប្រជាធិបតេយ្យ និង​ការ​អនុវត្ត​នូវ​នីតិរដ្ឋ​បាន​ល្អ​ប្រសើរ បន្ទាប់ពី​មាន​កិច្ចព្រមព្រៀង​សន្តិភាព​ទីក្រុង​ប៉ារីស ឆ្នាំ​១៩៩១ ដែល​មាន​ការ​សហការ​ជាមួយ​សហគមន៍​អន្តរជាតិ រួម​ទាំង​ប្រទេស​ជប៉ុន ផង​ដែរ។

កាលពី​ថ្ងៃ​ទី​២០ ខែ​មីនា ឆ្នាំ​២០២២ លោក គីស៊ីដា ហ្វូមីអូ នាយករដ្ឋមន្ត្រី​ជប៉ុន បាន​ទៅ​ដល់​ព្រលាន​យន្តហោះ​អន្តរជាតិ​ភ្នំពេញ ដើម្បី​បំពេញ​ទស្សនកិច្ច​ជា​ផ្លូវការ​ចំនួន ២​ថ្ងៃ​នៅ​កម្ពុជា និង​បាន​ជួប​ពិភាក្សា​ជាមួយ​មេដឹកនាំ​បក្ស​កាន់​អំណាច​លោក ហ៊ុន សែន។

នាយករដ្ឋមន្ត្រី​ជប៉ុន លោក គីស៊ីដា ហ្វូមីអូ បាន​លើកឡើង​ក្នុង​ជំនួប​របស់​ខ្លួន​ជាមួយ​ប្រមុខ​រដ្ឋាភិបាល​កម្ពុជា លោក ហ៊ុន សែន ថា​លោក​គាំទ្រ​ដល់​ការ​លើក​កម្ពស់​លទ្ធិប្រជាធិបតេយ្យ និង​នីតិរដ្ឋ ក្នុង​នោះ​លោក​ជំរុញ​ឱ្យ​មាន​ការ​បោះឆ្នោត​មួយ​ដែល​ប្រកប​ទៅ​ដោយ​ភាព​សេរី ត្រឹមត្រូវ និង​យុត្តិធម៌។

នាយករដ្ឋមន្ត្រី​ជប៉ុន​រូប​នេះ​បញ្ជាក់​ថា កម្ពុជា​គួរតែ​រៀបចំ​ឱ្យ​មាន​ការ​បោះឆ្នោត​មួយ​ដែល​ឆ្លុះបញ្ចាំង​ពី​សំឡេង​ចម្រុះ​របស់​ពល​ខ្មែរ​តាមរយៈ​នៃ​ការ​លើក​កម្ពស់​កិច្ចសន្ទនា​រវាង​សង្គម​ស៊ីវិល និង​រដ្ឋាភិបាល រហូត​ឈាន​ដល់​ការ​ពង្រឹង​អភិបាលកិច្ច​តាមរយៈ​នៃ​ការ​ចូលរួម​របស់​ប្រជាពលរដ្ឋ​ថែមទៀត។

យ៉ាងណាក៏ដោយ ជុំវិញ​ការ​គោរព​សិទ្ធិមនុស្ស ស្ដារ​លទ្ធិប្រជាធិបតេយ្យ និង​ការ​គោរព​នីតិរដ្ឋ កម្ពុជា​ត្រូវ​បាន​គេ​មើល​ឃើញ​ថា កំពុង​ស្ថិត​ក្នុង​ចំណោម​ប្រទេស​ដែល​មាន​ការ​រំលោភ​សិទ្ធិមនុស្ស ជាន់ឈ្លី​លទ្ធិប្រជាធិបតេយ្យ​ធ្ងន់ធ្ងរ និង​ជា​ប្រទេស​ដែល​មាន​នីតិរដ្ឋ​ទាប​បំផុត។

អង្គការ​គម្រោង​យុត្តិធម៌​ពិភពលោក បាន​រក​ឃើញ​ថា កម្ពុជា​ជា​ប្រទេស​ដែល​បាន​ជាប់​ចំណាត់ថ្នាក់​លេខ​១៣៨ ក្នុង​ចំណោម​ប្រទេស​ដែល​មាន​នីតិរដ្ឋ​អាក្រក់​ទាំង​១៣៩ នៅ​លើ​ពិភពលោក កាលពី​ឆ្នាំ​២០២១ កន្លងទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស