28 C
Phnom Penh

លោក ហ៊ុន សែន ទាត់ចោល​ការ​អត្ថាធិប្បាយ​របស់​បណ្ឌិត សុខ ទូច រឿង​នយោបាយ​ការបរទេស

ដោយ ឌឹ ខេមបូឌា ដេលី

បទវិភាគ

លោក ហ៊ុន សែន ប្រកាស​ទាត់ចោល​ចំពោះ​ការ​អត្ថាធិប្បាយ​របស់​ប្រធាន​រាជបណ្ឌិត្យសភា​កម្ពុជា បណ្ឌិត សុខ ទូច ដោយ​លោក​អះអាង​ថា​ជា​ការ​អត្ថាធិប្បាយ​មិន​តំណាង​ឱ្យ​នយោបាយ​ការបរទេស​កម្ពុជា​នោះ​ទេ។ លោក ហ៊ុន សែន អះអាង​ថា កម្ពុជា​អនុវត្ត​នយោបាយ​ការបរទេស​ផ្អែក​លើ​ធម្មនុញ្ញ​អង្គការ​សហប្រជាជាតិ ដោយ​មិន​អនុវត្ត​នយោបាយ​ការបរទេស​ផ្អែក​លើ​កម្លាំង​នោះ​ឡើយ។

ថ្លែង​ក្នុង​ពិធី​សម្ពោធ​ដាក់​ឱ្យ​ប្រើប្រាស់​អគារ​ព្យាបាល​ជំងឺ​ត្រចៀក ច្រមុះ បំពង់ក​នៃ​មន្ទីរពេទ្យ​ព្រះអង្គ ឌួង នា​ព្រឹក​ថ្ងៃ​ចន្ទ ទី​២៨ មីនា បុរស​ខ្លាំង​កម្ពុជា លោក ហ៊ុន សែន ថ្លែង​ថា អ្នក​ដែល​មាន​សិទ្ធិ​និយាយ​ជា​ផ្លូវការ​បាន​សម្រាប់​នយោបាយ​ការបរទេស​ដែល​តំណាង​ឱ្យ​កម្ពុជា គឺ​មាន​តែ​អង្គ​ព្រះមហាក្សត្រ នាយករដ្ឋមន្ត្រី និង​ក្រសួង​ការបរទេស​កម្ពុជា​ប៉ុណ្ណោះ។

លោក​បន្ត​ថា ការ​លើក​ហេតុផល ៤​យ៉ាង​របស់​អ្នកវិភាគ អាច​ធ្វើ​ឱ្យ​មាន​ការ​យល់​ច្រឡំ​ពី​ជំហរ​របស់​កម្ពុជា។ បើ​មាន​ការ​ឈ្លានពាន​ណា​មួយ​កើតឡើង​មែន កម្ពុជា​អនុវត្ត​នយោបាយ​ការបរទេស​ផ្អែក​លើ​ធម្មនុញ្ញ​អង្គការ​សហប្រជាជាតិ ដោយ​មិន​អនុវត្ត​នយោបាយ​ការបរទេស​ផ្អែក​លើ​កម្លាំង​នោះ​ទេ។

លោក ហ៊ុន សែន ប្រកាស​ថា កម្ពុជា​មិន​គាំទ្រ​រាល់​សកម្មភាព​ឈ្លានពាន​ណា​មួយ​នោះ​ឡើយ ព្រោះ​កម្ពុជា​ធ្លាប់​រងគ្រោះ​ដោយសារ​ការ​ឈ្លានពាន​ពី​បរទេស​ជាច្រើន​ទសវត្ស​មក​ហើយ។ លោក​ថា​សម្រាប់​កម្ពុជា​មិន​អាច​ប្រកាន់​នយោបាយ​ការបរទេស​អព្យាក្រឹត​ចំពោះ​សកម្មភាព​រុស្ស៊ី ឈ្លានពាន​លើ​អ៊ុយក្រែន​បាន​ឡើយ។

ប្រតិកម្ម​របស់​លោក ហ៊ុន សែន នេះ​បាន​កើតឡើង​ក្រោយពី​ប្រធាន​រាជបណ្ឌិត្យសភា​កម្ពុជា បណ្ឌិត សុខ ទូច ថ្លែង​ក្នុង​បទ​បង្ហាញ​មួយ​នៅ​រាជបណ្ឌិត្យសភា​ក្នុង​រាជធានី​ភ្នំពេញ កាលពី​ថ្ងៃ​អាទិត្យ ក្រោម​ប្រធានបទ «នយោបាយ​ការបរទេស​កម្ពុជា​នា​ពេល​បច្ចុប្បន្ន»។ ក្នុង​បទ​បង្ហាញ​នោះ លោក សុខ ទូច បាន​លើកឡើង​ថា បើ​កម្ពុជា​គាំទ្រ​ការ​ឈ្លានពាន​របស់​រុស្ស៊ី​ទៅ​លើ​ប្រទេស​អ៊ុយក្រែន​នោះ ថា​តើ​នឹង​មាន​ប្រទេស​ណា​ជួយ​កម្ពុជា បើ​សិន​មាន​អ្នក​ញុះញង់​វៀតណាម​ឱ្យ​វាយលុក​ចូល​កម្ពុជា។

លោក សុខ ទូច គូស​បញ្ជាក់​ថា បើ​សិន​មាន​ការ​លុកលុយ​ពី​ប្រទេស​ដទៃ គឺ​កម្ពុជា​ខ្វះ​លទ្ធភាព​ទប់ទល់​ចំនួន ៤​ចំណុច បើ​ធៀប​ទៅ​នឹង​ប្រទេស​ជិតខាង គឺ​កម្ពុជា​គ្មាន​នាវាមុជទឹក គ្មាន​យន្តហោះ​ចម្បាំង គ្មាន​កាតព្វកិច្ច​ចូល​បម្រើ​កងទ័ព ហើយ​រីឯ​កងទ័ព​ដែល​កម្ពុជា​មាន​វិញ គឺ​សម្បូរ​ដោយ​ឧត្តមសេនីយ៍​ក្បាលពោះ​ធំ។

ទោះជាយ៉ាងណា​ក៏ដោយ លោក ហ៊ុន សែន អះអាង​ថា ការ​អត្ថាធិប្បាយ​ថា​កម្ពុជា​មិនទាន់​បាន​ត្រៀម​ខ្លួន​ដោយសារតែ​ខ្លួន​ខ្វះ​នាវាមុជទឹក ខ្វះ​យន្តហោះ​មិច ខ្វះ​កាតព្វកិច្ច​យោធា កងទ័ព​សម្បូរ​ដោយ​ឧត្តមសេនីយ៍​ក្បាលពោះ​ធំ ដូច្នេះ​មាន​ន័យ​ថា ជំហរ​បែប​នេះ​គឺ​ត្រៀម​ខ្លួន​ផ្លាស់ប្ដូរ​នូវ​គំនិត​ពី​ការ​បោះឆ្នោត​ប្រឆាំង ទៅ​ជា​ការ​បោះឆ្នោត​គាំទ្រ ឬ​យ៉ាង​ណា​ករណី​រុស្ស៊ី និង​អ៊ុយក្រែន? លោក ហ៊ុន សែន ព្រមាន​ថា អ្នក​ធ្វើ​អត្ថាធិប្បាយ​ទាំងឡាយ​ត្រូវ​ប្រយ័ត្ន​ជាមួយ​នឹង​ការ​ធ្វើ​អត្ថាធិប្បាយ​បែប​នេះ។

កាលពី​ថ្ងៃ​ទី​២ ខែ​មីនា កម្ពុជា​បាន​បោះឆ្នោត​នៅ​ឯ​កិច្ចប្រជុំ​មហាសន្និបាត​អង្គការ​សហប្រជាជាតិ​ប្រឆាំង​ការ​ឈ្លានពាន​របស់​រុស្ស៊ី​លើ​ប្រទេស​អ៊ុយក្រែន​ចំនួន​ពីរ​លើក។

នាយក​ប្រតិបត្តិ​អង្គការ​អភិវឌ្ឍន៍​ផ្នត់គំនិត បណ្ឌិត សេក សុជាតិ បាន​ថ្លែង​ប្រាប់​សារព័ត៌មាន​ក្នុង​ស្រុក​ថា លោក​គាំទ្រ​ប្រសាសន៍​លោក​នាយករដ្ឋមន្ត្រី ប៉ុន្តែ​លោក​ថា​ក្រៅពី​ពង្រឹង​យន្តការ​ប្រជាធិបតេយ្យ​ហើយ រដ្ឋាភិបាល​ត្រូវ​ពង្រឹង​សមត្ថភាព​វិស័យ​កងទ័ព​ក្នុង​កម្រិត​ដែល​អាច​ការពារ​បូរណភាព​ទឹកដី​របស់​ខ្លួន​ផង​ដែរ។

យោង​ទៅតាម​សេចក្ដី​ថ្លែងការណ៍​របស់​ក្រសួង​ការបរទេស​កម្ពុជា កាលពី​ថ្ងៃ​ទី​៣ ខែ​មីនា បាន​គូស​បញ្ជាក់​ថា កម្ពុជា​មិន​ត្រឹមតែ​ជា​ប្រទេស​ដែល​បោះឆ្នោត​គាំទ្រ​ការ​ថ្កោលទោស​នេះ​ទេ ប៉ុន្តែ​កម្ពុជា​ក៏​បាន​សម្រេច​ចិត្ត​ចូលរួម​ជាមួយ​ប្រទេស​សហ​ស្ថាបនិក​នៃ​សេចក្ដី​សម្រេច​ចិត្ត នៃ​កិច្ចប្រជុំ​ពិសេស​បន្ទាន់​របស់​មហាសន្និបាត​អង្គការ​សហប្រជាជាតិ ស្ដីពី​ស្ថានការណ៍​នៅ​ក្នុង​ប្រទេស​អ៊ុយក្រែន​នេះ​ថែម​ទៀត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស