29 C
Phnom Penh

លោក ហ៊ុន សែន ថា​អង្គរវត្ត​អាច​ត្រូវ​ដក​ពី​បញ្ជី​បេតិកភណ្ឌ​ពិភពលោក បើ​បំពាន​លក្ខខណ្ឌ​យូណេស្កូ

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា លោក ហ៊ុន សែន អះអាង​ថា ការ​អភិវឌ្ឍ​អចលនទ្រព្យ​ត្រូវ​គោរព​តាម​លក្ខខណ្ឌ​បច្ចេកទេស​របស់​អង្គការ​យូណេស្កូ (UNESCO) ដោយ​មិន​ចេះ​តែ​ធ្វើ​ទាំង​បំពាន​នោះ​ទេ ព្រោះ​អង្គរវត្ត​កម្ពុជា​អាច​នឹង​ត្រូវ​ដក​ចេញពី​បញ្ជី​បេតិកភណ្ឌ​ពិភពលោក​ដែល​អាច​ធ្វើ​ឱ្យ​កម្ពុជា​ខាតបង់​កាន់តែ​ធំ។

ក្នុង​ពិធី​សម្ពោធ​ដាក់​ឱ្យ​ប្រើប្រាស់​ផ្លូវ​ចំនួន ៣៨​ខ្សែ​នៅ​ខេត្ត​សៀមរាប នា​ថ្ងៃ​ទី​៤ ខែ​មេសា ឆ្នាំ​២០២២ នេះ លោក ហ៊ុន សែន ថ្លែង​ថា ការ​អភិវឌ្ឍ​អចលនទ្រព្យ​ត្រូវ​គោរព​តាម​លក្ខខណ្ឌ​បច្ចេកទេស​របស់​អង្គការ​យូណេស្កូ ដោយ​មិន​ចេះ​តែ​ធ្វើ​ទាំង​បំពាន​នោះ​ទេ។ លោក​បន្ត​ថា បើ​កម្ពុជា​ធ្វើការ​សាងសង់​សំណង់​បំពាន​លក្ខខណ្ឌ​បច្ចេកទេស​របស់​អង្គការ​យូណេស្កូ នោះ​អង្គរវត្ត​របស់​កម្ពុជា​នឹង​ត្រូវ​ដក​ចេញពី​បញ្ជី​បេតិកភណ្ឌ​ពិភពលោក ដែល​អាច​ធ្វើ​ឱ្យ​កម្ពុជា​ខាតបង់​កាន់តែ​ធំ​បន្ថែម​ទៀត។

លោក ហ៊ុន សែន បន្ត​ថា មូលហេតុ​ដែល​លោក​លើកឡើង​ដូច្នោះ ក្រោយពី​លោក​បាន​ឃើញ​ប្រទេស​ជឿនលឿន​មួយ​ចំនួន​នៅ​លើ​ពិភពលោក សាងសង់​បំពាន​លក្ខខណ្ឌ​បច្ចេកទេស​របស់​អង្គការ​យូណេស្កូ ហើយ​ត្រូវ​បាន​ដក​ចេញពី​បញ្ជី​បេតិកភណ្ឌ​ពិភពលោក​រួច​ទៅ​ហើយ។ ករណី​នេះ លោក​ស្នើ​ទៅ​អ្នក​អភិវឌ្ឍន៍​អចលនទ្រព្យ​ត្រូវ​បញ្ឈប់​ការ​រិះគន់​លើ​អាជ្ញាធរ​បន្ត​ទៀត​ចំពោះ​ការ​រឹតត្បិត​មិន​ឱ្យ​សាងសង់​សំណង់​ខ្ពស់ៗ​នៅ​ខេត្ត​សៀមរាប។

ការ​ប្រតិកម្ម​របស់​លោក ហ៊ុន សែន នា​ថ្ងៃ​ទី​៤ មេសា នេះ ធ្វើឡើង​បន្ទាប់ពី​អ្នក​រកស៊ី​ក្នុង​វិស័យ​អចលនទ្រព្យ ឧកញ៉ា គីម ហ៊ាង ធ្លាប់​លើកឡើង​ថា បច្ចុប្បន្ន​មិន​មាន​ពលរដ្ឋ​កម្ពុជា​ណា​ម្នាក់​បរ​រទេះគោ​ទៅ​មើល​អង្គរវត្ត ខណៈ​នៅ​ថ្ងៃ​សីល​ក៏​មិន​មាន​ពលរដ្ឋ​ណា​ម្នាក់​ស្លៀក​ក្បិន​ទៅ​វត្ត​ដែរ។ លោក​បន្ត​ថា អ្នក​ណា​ក៏​ចេះ​និយាយ​ដែរ «ស្រឡាញ់​វប្បធម៌ និង​ស្រឡាញ់​អង្គរវត្ត» ប៉ុន្តែ​ស្រឡាញ់​ត្រូវ​មាន​ការ​អភិវឌ្ឍ ដោយ​ធ្វើ​យ៉ាង​ម៉េច​ត្រូវ​ឱ្យ​សេដ្ឋកិច្ច​ដំណើរការ​ទើប​ជា​ការ​ប្រសើរ។

លោក គីម ហ៊ាង បន្ត​ថា ចំណុច​របស់​ខេត្ត​សៀមរាប គឺ​ការ​កំណត់​កម្ពស់​ក្នុង​ការ​សាងសង់​អគារ និង​មាន​វប្បធម៌​អភិរក្ស​ច្រើន​ពេក ដែល​ករណី​នេះ​បាន​ធ្វើ​ឱ្យ​ការ​វិនិយោគ​លើ​វិស័យ​មួយ​នេះ​មាន​ការ​លំបាក​ខ្លាំង។

ក្រោយពី​មាន​លើកឡើង​នេះ កូនប្រុស​របស់​លោក ហ៊ុន សែន គឺ​លោក ហ៊ុន ម៉ានី ចេញ​មុខ​ប្រតិកម្ម​យ៉ាង​ខ្លាំង​នៅ​លើ​បណ្ដាញ​សង្គម Facebook ខណៈ​ក្រសួង​វប្បធម៌ ក៏​បាន​ចេញ​លិខិត​ថ្កោលទោស​ផង​ដែរ។

ភ្លាមៗ​នោះ ឧកញ៉ា គីម ហ៊ាង ក៏​បាន​សរសេរ​លិខិត​សុំទោស​ដោយ​ទទួលស្គាល់​ថា ខ្លួន​បាន​និយាយ​ប៉ះពាល់​ដល់​វប្បធម៌​ជាតិ។

អ្នក​រកស៊ី​ក្នុង​វិស័យ​អចលនទ្រព្យ ឧកញ៉ា​បណ្ឌិត គីម ហ៊ាង។

កាលពី​ខែ​កក្កដា ឆ្នាំ​២០២១ អង្គការ​យូណេស្កូ ធ្លាប់​បាន​ដក​ទីក្រុង Liverpool របស់​អង់គ្លេស ចេញពី​បញ្ជី​បេតិកភណ្ឌ ដោយសារ​ទីក្រុង​នេះ​មាន​ការ​អភិវឌ្ឍ​គម្រោង​សំណង់​អគារ​ខ្ពស់ៗ និង​ប្រណិត​ខុសពី​ទ្រង់ទ្រាយ​ដើម​នៃ​ការ​ចុះបញ្ជី​របស់​យូណេស្កូ។ ទីក្រុង Liverpool គឺជា​ទីក្រុង​ទី​៣ ដែល​ត្រូវ​បាន​យូណេស្កូ​ដក​ចេញពី​បញ្ជី​បេតិកភណ្ឌ ក្រោយពី​ទទួល​បាន​នាម​អស់​រយៈពេល ៤៣​ឆ្នាំ។

អង្គការ​អន្តរជាតិ​មួយ​ចំនួន រួម​ទាំង​យូណេស្កូ និង​ប្រទេស​ជា​ដៃគូ​នៃ​សហប្រធាន​គណៈកម្មការ​អន្តរជាតិ​សម្របសម្រួល​កិច្ច​គាំពារ និង​អភិវឌ្ឍន៍​តំបន់​ប្រវត្តិសាស្ត្រ​អង្គរ (ICC) ដោយ​មាន​ប្រទេស​ជប៉ុន និង​ប្រទេស​បារាំង គ្រោង​នឹង​ចុះហត្ថលេខា​ជាមួយ​កម្ពុជា​រយៈពេល ១០​ឆ្នាំ​បន្ត​ទៀត ដើម្បី​ធានា​អំពី​សម្បត្តិ​ដូនតា​ដែល​បាន​រក្សា​ទុក​ពី​មុន​មក។

ប្រាសាទ​អង្គរវត្ត ក្លាយជា​និមិត្តរូប​នៃ​ប្រទេស​កម្ពុជា​តែ​មួយ​គត់ ដោយ​រំលេច​លើ​ទង់ជាតិ​របស់​ប្រទេស​ជា​រូបភាព​តំណាង​ប្រទេស​ជាតិ​ខ្មែរ ហើយ​ក៏​បាន​ដាក់​បញ្ចូល​ជា​សម្បត្តិ​បេតិកភណ្ឌ​ពិភពលោក​កាលពី​ថ្ងៃ​ទី​១៤ ខែ​ធ្នូ ឆ្នាំ​១៩៩២ និង​ត្រូវ​ចាត់ទុក​ថា​ជា​កន្លែង​បុរាណ​ដ៏​សំខាន់​មួយ​នៅ​អាស៊ី។

ប្រាសាទ​អង្គរវត្ត ស្ថិត​នៅ​ក្នុង​ទឹកដី​នៃ​ខេត្ត​សៀមរាប នៃ​ប្រទេស​កម្ពុជា ដែល​មាន​កម្ពស់ ៦៥​ម៉ែត្រ មាន​ក្រឡា​ផ្ទៃ ២០០​ហិកតារ រាង​ចតុកោណ ដោយ​មាន​កំពែង​ព័ទ្ធ​ជុំវិញ។ ប្រាសាទ​អង្គរវត្ត​ត្រូវ​បាន​កសាង​ឡើង​ដោយ​ព្រះបាទ​សូរ្យវរ្ម័នទី២ នៅ​ដើម​សតវត្ស​ទី​១២ ហើយ​ក៏​ជា​ទីតាំង​មួយ​ដែល​កងទ័ព​ខ្មែរ​ទទួល​បាន​ជ័យជម្នះ​លើ​កងទ័ព​សៀម ក្នុង​សម័យ​រាជាណាចក្រ​អយុធ្យា​សតវត្ស​ទី​១៧ ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស