នៅលើលោកនេះពុំមានអ្វីដែលអាចរារាំងមិនឲ្យយកឈ្នះបានទៅលើអំពើអាក្រក់នោះទេ ឲ្យតែយើងរួមសាមគ្គីគ្នាជាធ្លុងមួយ។ ចាប់តាំងពីរុស្ស៊ីលើកទ័ពឈ្លានពានអ៊ុយក្រែន កាលពីថ្ងៃទី២៤ ខែកុម្ភៈ មក គឺប្រទេសទាំងឡាយខិតខំខ្លាំងណាស់ដើម្បីជួយទប់ស្កាត់សង្គ្រាមកុំឲ្យរីករាលដាល និងទប់ស្កាត់កុំឲ្យប្រែក្លាយជាមហាសោកនាដកម្ម តែទីបំផុត វិបត្តិនេះនៅតែកើតមានដែលបណ្ដាលឲ្យជនស៊ីវិលស្លាប់យ៉ាងរង្គាល និងខ្លោចផ្សា។
ដោយសារតែសោកនាដកម្មនេះ បញ្ហាចាំបាច់បំផុតដែលពិភពលោកត្រូវតែរួមគ្នាប្រាប់ទៅរុស្ស៊ីឲ្យដឹងថា ពិភពលោកមិនអនុញ្ញាតឲ្យរុស្ស៊ីធ្វើអំពើព្រៃផ្សៃ ដោយគ្មានទទួលទោសកំហុស ហើយចេះតែអះអាងថាខ្លួនកំពុងគោរពសិទ្ធិមនុស្សនោះទេ។
នេះជាប្រសាសន៍របស់អ្នកស្រី Linda Thomas-Greenfield ឯកអគ្គរដ្ឋទូតអាមេរិក ប្រចាំនៅអង្គការសហប្រជាជាតិ ដែលបានថ្លែងក្រោយការបិទសម័យប្រជុំនៃមហាសន្និបាតអង្គការសហប្រជាជាតិ ដែលឈានដល់ការព្យួរសមាជិកភាពប្រទេសរុស្ស៊ីពីក្រុមប្រឹក្សាសិទ្ធិមនុស្សអង្គការសហប្រជាជាតិ ធ្វើឡើងកាលពីថ្ងៃទី៧ ខែមេសា នៅក្រុងញីវយ៉ក។
មហាសន្និបាតអង្គការសហប្រជាជាតិ បានបោះឆ្នោតព្យួរសមាជិកភាពរបស់រុស្ស៊ីពីក្រុមប្រឹក្សាសិទ្ធិមនុស្ស ដោយសារមានភស្តុតាងបង្ហាញអំពីការរំលោភសិទ្ធិមនុស្សដ៏ធ្ងន់ធ្ងរដោយកងទ័ពរុស្ស៊ី នៅក្នុងប្រទេសអ៊ុយក្រែន ហើយទាំងសហគមន៍អន្តរជាតិ និងអ៊ុយក្រែន ចាត់ទុកជាអំពើឧក្រិដ្ឋកម្មសង្គ្រាម។
លទ្ធផលនៃការបោះឆ្នោតនេះ គឺ ៩៣សំឡេងគាំទ្រ ទល់នឹង ២៤សំឡេងជំទាស់ និង ៥៨សំឡេងអនុប្បវាទ។ តែបើយោងតាមកាសែត New York Times សំឡេងអនុប្បវាទមិនត្រូវបានរាប់នោះទេ គឺដូចសំឡេងអ្នកមិនបានបោះឆ្នោតនោះដែរ។ New York Times ពន្យល់ថា គេធ្វើការផ្ទៀងផ្ទាត់តែរវាងសំឡេងឆ្នោតគាំទ្រ និងសំឡេងជំទាស់ ដែលនាំឱ្យមហាសន្និបាតរកឃើញសំឡេងលើស ២/៣ ដោយសម្រេចថាសមាជិកភាពរបស់រុស្ស៊ីនៅក្រុមប្រឹក្សាសិទ្ធិមនុស្សអង្គការសហប្រជាជាតិ ត្រូវបានព្យួរជាផ្លូវការហើយ។
អ្នកស្រី Linda Thomas-Greenfield ជាអ្នកផ្ដួចផ្ដើមយុទ្ធនាការបោះឆ្នោតព្យួរសមាជិកភាពរុស្ស៊ី នៅក្រុមប្រឹក្សាសិទ្ធិមនុស្ស។ អ្នកស្រីបានប្រាប់បណ្ដាញផ្សាយព័ត៌មាន CNN ថា កាលពីលើកទី១ មហាសន្និបាតរកបានសំឡេង ១៤១ ដោយសម្រេចថ្កោលទោសរុស្ស៊ីលើកទ័ពឈ្លានពានអ៊ុយក្រែន និងទាមទារឱ្យដកទ័ពរុស្ស៊ីចេញពីអ៊ុយក្រែន។ ចំណែកលើកទី២ មហាសន្និបាតរកបានសំឡេង ១៤០ ដោយរំឭកឲ្យរុស្ស៊ីបញ្ចប់សង្គ្រាមនៅលើទឹកដីអ៊ុយក្រែន។ តែលើកនេះ អ្នកស្រីថា កម្លាំងសាមគ្គីភាពនៃអ្នកប្រឆាំងឈ្លានពាននៅតែរឹងមាំ ហើយមិនមែនជាការភ្ញាក់ផ្អើលនោះទេ ព្រោះយើងបានឈ្នះលើសមរភូមិការទូតមួយដ៏អស្ចារ្យ និងជាប្រវត្តិសាស្ត្រ។
តាមអ្នកស្រីឯកអគ្គរដ្ឋទូតអាមេរិករូបនេះអះអាងថា លទ្ធផលដែលនាំឱ្យព្យួរសមាជិកភាពរុស្ស៊ីពីក្រុមប្រឹក្សាសិទ្ធិមនុស្ស គឺជាសារដ៏ខ្លាំងមួយនៃកម្លាំងរួមគ្នារបស់សហគមន៍អន្តរជាតិ ដែលប្រាប់ទៅជនរងគ្រោះអ៊ុយក្រែនថា ពិភពលោកមិនបានបិទភ្នែកមើលអ្នកត្រូវរងការឈឺចាប់នោះទេ។ អ្នកស្រីបន្តថា ពិភពលោកកំពុងឈរជាមួយនឹងប្រជាជនអ៊ុយក្រែនជានិច្ច។
អ្នកស្រីអះអាងថា ស្មារតីដែលនាំឱ្យមហាសន្និបាតសម្រេចដូចនេះ គឺអនុលោមតាមធម្មនុញ្ញរបស់អង្គការសហប្រជាជាតិ។ តែអ្នកស្រីព្រមានថានឹងមិនទាន់ចប់ទេនូវការដាក់ទណ្ឌកម្មទៅលើរបបលោក វ៉្លាឌីមៀរ ពូទីន បើរុស្ស៊ីនៅតែបញ្ឆេះសង្គ្រាមនៅលើទឹកដីអ៊ុយក្រែន។
ចំណែកប្រទេសចិន ត្រូវបានរាយការណ៍មកថា បានបោះឆ្នោតជំទាស់។ នៅមុនការធ្វើសេចក្ដីសម្រេចបោះឆ្នោត គឺតំណាងចិនប្រកាសថា ក្រុងប៉េកាំងមិនយល់ព្រមឲ្យមានការព្យួរសមាជិកភាពប្រទេសរុស្ស៊ីនោះទេ។ តំណាងប្រទេសមហាអំណាចមួយនេះថា គេត្រូវធ្វើការស៊ើបអង្កេតឱ្យបានម៉ត់ចត់ និងឯករាជ្យនូវការចោទថាកងទ័ពរុស្ស៊ី ប្រព្រឹត្តអំពើឃោរឃៅទៅលើជនស៊ីវិល។
ដោយឡែករុស្ស៊ី វិញ បានចេញសារគំរាមប្រទេសសមាជិកអង្គការសហប្រជាជាតិទាំងអស់ថា រាល់ការបោះឆ្នោតយល់ព្រម និងអនុប្បវាទ នឹងត្រូវភាគីរុស្ស៊ីចាត់ទុកថាជាអំពើអមិត្ត ដែលមានន័យថានឹងមានផលវិបាកទៅលើទំនាក់ទំនងទ្វេភាគីរវាងប្រទេសនោះជាមួយនឹងរុស្ស៊ី។
ឯកអគ្គរដ្ឋទូតរងរុស្ស៊ី ប្រចាំអង្គការសហប្រជាជាតិ លោក Gennady Kuzmin បានហៅចំណាត់ការព្យួរសមាជិកភាពរបស់រុស្ស៊ីពីក្រុមប្រឹក្សាសិទ្ធិមនុស្ស ថាជាទង្វើខុសច្បាប់ និងមានចេតនានយោបាយអាណានិគមរបស់សហរដ្ឋអាមេរិក។
បើយោងតាមដំណឹងមួយពីប្រទេសស្វីស អ្នកការទូតរបស់រុស្ស៊ីនៅក្រុមប្រឹក្សាសិទ្ធិមនុស្សអង្គការសហប្រជាជាតិ នៅក្រុងហ្សឺណែវ បានសម្រេចចាកចេញទៅកាន់ក្រុងមូស្គូ ហើយនៅថ្ងៃនេះ។
លោក Louis Charbonneau គឺជានាយកអង្គការ Human Rights Watch នៅអង្គការសហប្រជាជាតិ។ លោកបាននិយាយនៅក្នុងសេចក្ដីថ្លែងការណ៍ថា ការព្យួរសមាជិកភាពរបស់រុស្ស៊ី គឺជាសារមួយដ៏ធ្ងន់ប្រាប់ទៅមេដឹកនាំរុស្ស៊ី និងមេដឹកនាំផ្ដាច់ការផ្សេងៗទៀតថា ក្រុមប្រឹក្សាសិទ្ធិមនុស្សពុំមែនជាកន្លែងតថ្លៃជំនួញនោះទេ។
លោកបានហៅសោកនាដកម្មនៅតំបន់ Bucha និងនៅទីក្រុង Mariupol ដែលកងទ័ពរុស្ស៊ីសម្លាប់ជនស៊ីវិលយ៉ាងសហាវ គឺជាឧក្រិដ្ឋកម្មសង្គ្រាម ហើយរបបក្រុងមូស្គូ ត្រូវតែទទួលខុសត្រូវរឿងនេះនៅចំពោះមុខតុលាការព្រហ្មទណ្ឌអន្តរជាតិ ICC។
តាមសេចក្ដីរាយការណ៍ចុងក្រោយពីទីភ្នាក់ងារសារព័ត៌មាន Reuters គឺនៅថ្ងៃសុក្រ ទី៨ ខែមេសា នេះ មនុស្សយ៉ាងតិចណាស់ ៣០នាក់ត្រូវបានសម្លាប់ និងច្រើនជាង ១០០នាក់រងរបួសនៅក្នុងការវាយប្រហារដោយគ្រាប់រ៉ុក្កែតពីសំណាក់កងទ័ពរុស្ស៊ី ដែលបាញ់ទៅលើស្ថានីយរថភ្លើងមួយកន្លែងនៅក្នុងតំបន់ភាគខាងកើតនៃប្រទេសអ៊ុយក្រែន។
ក្រុមហ៊ុនផ្លូវដែករដ្ឋអ៊ុយក្រែន នៅក្នុងតំបន់នោះ បានឲ្យដឹងថា ការវាយប្រហារដោយគ្រាប់រ៉ុក្កែតកើតមានឡើងចំពេលជនស៊ីវិលកំពុងព្យាយាមជម្លៀសខ្លួនទៅកន្លែងមានសុវត្ថិភាព ក្រោយទទួលបានការព្រមានឱ្យជម្លៀសខ្លួនដោយអាជ្ញាធរតំបន់នោះ ព្រោះទ័ពរុស្ស៊ីនឹងបើកការវាយលុកទ្រង់ទ្រាយធំនៅលើតំបន់ Donbas នៅប៉ុន្មានថ្ងៃទៀតនេះ។
ភ្នាក់ងារស៊ើបការណ៍សម្ងាត់របស់កងទ័ពអង់គ្លេស បានឱ្យដឹងថា កងទ័ពរុស្ស៊ី បានដកខ្លួនចេញទាំងស្រុងពីភាគខាងជើងអ៊ុយក្រែន ដោយឱ្យទៅកាន់ប្រទេសបេឡារូស និងខ្លះទៀតវិលចូលទឹកដីរុស្ស៊ី វិញ។ ចំណែកមួយចំនួនធំត្រូវបញ្ជូនទៅភាគខាងកើតអ៊ុយក្រែន ដើម្បីត្រៀមប្រយុទ្ធដណ្ដើមកាន់កាប់តំបន់ Donbas៕