អ្នកតាមដានស្ថានការណ៍នយោបាយកម្ពុជា រិះគន់ថា សន្តិភាពរបស់លោក ហ៊ុន សែន ជាសន្តិភាពដែលពោរពេញទៅដោយការបន្លប់ការពិតនៅក្នុងសង្គមប៉ុណ្ណោះ។
អ្នកតាមដានស្ថានការណ៍នយោបាយកម្ពុជា លោក សុខ សុគន្ធ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១១ មេសា ថា កម្ពុជាសព្វថ្ងៃនេះមិនមែនជាប្រទេសដែលមានសន្តិភាព ឯករាជ្យ និងមានអធិបតេយ្យភាពជាតិនោះទេ។ លោកបន្តថា ការអះអាងរបស់លោក ហ៊ុន សែន ដែលថាកម្ពុជាមានសន្តិភាពកន្លងមក គ្រាន់តែជាការឃោសនាបន្លប់ការពិតទៅកាន់សាធារណជនប៉ុណ្ណោះ។
លោក សុខ សុគន្ធ អះអាងថា លោក ហ៊ុន សែន គឺជាមេដឹកនាំខ្មែរដែលប្រកាសយកពលរដ្ឋខ្លួនឯងជាសត្រូវ។ ជាក់ស្តែង ការប្រកាសសន្តិភាពរបស់លោក ហ៊ុន សែន គឺសន្តិភាពដោយប្រើកាំភ្លើងបង្ក្រាបលើពលរដ្ឋខ្មែរដែលហ៊ានរិះគន់ខ្លួន។ ចំណែកបូរណភាពដែនដី គឺមានតែដីរបស់ពួកអ្នកមានអំណាចប៉ុណ្ណោះដែលនៅគង់វង្ស ខណៈដីធ្លីរបស់ពលរដ្ឋត្រូវអ្នកមានអំណាចទាំងនោះប្លន់យករាល់ថ្ងៃ។
អ្នកតាមដានស្ថានការណ៍នយោបាយកម្ពុជារូបនេះបញ្ជាក់ថា រដ្ឋាភិបាលលោក ហ៊ុន សែន ជារដ្ឋាភិបាលដែលទទួលស្គាល់បច្ចាមិត្តជាអ្នកមានគុណរបស់ខ្លួន និងបម្រើមហិច្ឆតាបច្ចាមិត្តគ្រប់បែបយ៉ាង ប៉ុន្តែដើម្បីបំភ័ន្តការពិត ពួកគេតែងចោទពលរដ្ឋខ្មែរណាដែលហ៊ានរិះគន់ពួកគេពីបញ្ហានេះថាជាក្រុមដែលកំពុងបម្រើមហិច្ឆតាបរទេសទៅវិញ។
លោក សុខ សុគន្ធ អះអាងថា កម្ពុជាមិនអាចរកសន្តិភាពសម្រាប់ខ្លួនឯងតាមរយៈមេដឹកនាំដែលបរទេសជិតខាងលើកបន្តុបបានទេ។ ជាក់ស្តែង លោក ហ៊ុន សែន ជាមេដឹកនាំដែលវៀតណាមលើកបន្តុបឱ្យដឹកនាំអស់រយៈពេលជាង ៤០ឆ្នាំមកនេះ។ ដូច្នេះ ពលរដ្ឋខ្មែរនឹងត្រូវរស់នៅដោយភ័យខ្លាច និងការចាប់ចងពីរដ្ឋាភិបាលនេះគ្មានថ្ងៃមានសេចក្តីសុខជាដាច់ខាត។
ការអះអាងនេះ ធ្វើឡើងស្របពេលមេដឹកនាំបក្សកាន់អំណាច លោក ហ៊ុន សែន តែងប្រកាសពីសន្តិភាពក្រោមការដឹកនាំនៃរដ្ឋាភិបាលឯកបក្សរបស់លោកសព្វថ្ងៃនេះ។
កាលពីថ្ងៃទី១១ ខែមេសា ឆ្នាំ២០២២ បុរសខ្លាំងកម្ពុជា លោក ហ៊ុន សែន អះអាងថា លោកប្ដេជ្ញាការពារឱ្យបាននូវឯករាជភាពជាតិ សន្តិភាព អធិបតេយ្យជាតិ និងបូរណភាពទឹកដីឱ្យបានដាច់ខាត ទោះត្រូវលះបង់ក្នុងតម្លៃណាក៏ដោយ។ ប៉ុន្តែរាល់ការប្រកាសសន្តិភាពរបស់លោក ហ៊ុន សែន ត្រូវគេមើលឃើញថា លោកតែងចាត់ទុកពលរដ្ឋខ្មែរណាដែលរិះគន់ការដឹកនាំរបស់លោក ថាជាសត្រូវនៃរដ្ឋាភិបាលរបស់លោកជានិច្ច ខណៈបរទេសឈ្លានពាននៅក្បែរខាងដែលរំលោភដែនអធិបតេយ្យជាតិកម្ពុជាសព្វថ្ងៃនេះ លោកចាត់ទុកថាជាមិត្តម៉ឺនឆ្នាំទៅវិញ។
ទាក់ទិននឹងបញ្ហានេះ កាលពីថ្ងៃទី១៩ ខែវិច្ឆិកា ឆ្នាំ២០១៧ លោក ហ៊ុន សែន ដែលត្រូវគេចាត់ទុកថាជាមេដឹកនាំដែលស្រេកឃ្លានជីវិតមនុស្ស បានអះអាងក្នុងពិធីមួយនៅមជ្ឈមណ្ឌលកោះពេជ្រក្នុងទីក្រុងភ្នំពេញថា លោកពិតជាមានការសោកស្តាយខ្លាំងណាស់ដែលលោកមិនបានសម្លាប់ក្រុមអ្នកប្រឆាំង ដែលមានផែនការផ្តួលរំលំរដ្ឋាភិបាលរបស់លោកតាមរយៈនៃការបង្កើតចលនាបដិវត្តន៍ពណ៌៕