មេដឹកនាំបក្សប្រឆាំងដែលកំពុងរងការរឹតត្បិតសេរីភាព លោក កឹម សុខា បួងសួងសុំឲ្យពលរដ្ឋខ្មែរក្នុងឱកាសបុណ្យចូលឆ្នាំថ្មីប្រពៃណីជាតិនេះ ចៀសផុតពីគ្រោះថ្នាក់នៃជម្លោះគ្រប់បែបយ៉ាង ជាពិសេសស្មារតីពង្រឹង និងពង្រីកសាមគ្គីភាពជាតិខ្មែរ និងខ្មែរ ដែលជាកត្តាជួយទប់ស្កាត់នូវគ្រោះវិបត្តិនានាដល់ប្រទេសជាតិ។
ប្រធានគណបក្សសង្គ្រោះជាតិ លោក កឹម សុខា បានសរសេរលើទំព័រហ្វេសប៊ុករបស់លោកនៅថ្ងៃទី១៣ ខែមេសា ឆ្នាំ២០២២ ថា ពលរដ្ឋខ្មែរគ្រប់រូបគឺជាម្ចាស់លើជោគវាសនាអនាគតនៃប្រទេសជាតិរបស់ខ្លួន និងមានឱកាសក្នុងការរស់នៅដោយសុខដុមរមនា មានសិទ្ធិសេរីភាព និងទទួលបាននូវផលប្រយោជន៍ សេដ្ឋកិច្ច សង្គមកិច្ច វប្បធម៌ និងនយោបាយប្រកបដោយសមធម៌ និងយុត្តិធម៌ ដែលជាគ្រឹះនៃសន្តិភាពដ៏រឹងមាំសម្រាប់ប្រទេសកម្ពុជា។
លោក កឹម សុខា បន់ស្រន់សុំពរជ័យទេវតាឆ្នាំថ្មីជួយអភិបាលរក្សាប្រទេសកម្ពុជា និងពលរដ្ឋខ្មែររួចផុតពីគ្រោះធម្មជាតិ ជំងឺរាតត្បាតទាំងឡាយ ជាពិសេសសូមឲ្យចៀសផុតពីគ្រោះថ្នាក់នៃជម្លោះក្នុងពិភពលោក និងក្នុងតំបន់ ក៏ដូចជាក្នុងប្រទេសកម្ពុជាផងដែរ និងសូមឲ្យមាតុភូមិកម្ពុជាអមតៈ ដែលជារបស់ខ្មែរគ្រប់គ្នាទទួលបាននូវឯករាជភាព អធិបតេយ្យភាព វឌ្ឍនភាព និងកិត្យានុភាពជាតិពិតប្រាកដ។
ការបន់ស្រន់នេះ ធ្វើឡើងស្របពេលដែលពលរដ្ឋខ្មែរកំពុងត្រៀមខ្លួនប្រារព្ធពិធីបុណ្យចូលឆ្នាំថ្មីប្រពៃណីជាតិរបស់ខ្លួននៅថ្ងៃព្រហស្បតិ៍ នេះ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីដើមខែកញ្ញា ឆ្នាំ២០១៧ ពីបទក្បត់ជាតិតាមប្រសាសន៍លោកនាយករដ្ឋមន្ត្រី ហ៊ុន សែន ដែលបានឃុំខ្លួននៅមន្ទីរឃុំឃាំងត្រពាំងផ្លុង អស់រយៈពេល ១ឆ្នាំ។ បន្ទាប់មក នៅដើមខែកញ្ញា ឆ្នាំ២០១៨ លោក កឹម សុខា ត្រូវបានអាជ្ញាធរកម្ពុជាដោះលែងឲ្យនៅក្រៅឃុំជាបណ្ដោះអាសន្ន ប៉ុន្តែមិនត្រូវបានអនុញ្ញាតឲ្យជួបអ្នកដទៃ ឬចាកចេញពីគេហដ្ឋានរបស់ខ្លួនឡើយ។
រហូតដល់ថ្ងៃទី១០ ខែវិច្ឆិកា ឆ្នាំ២០១៩ ទើបលោក កឹម សុខា ត្រូវបានផ្តល់សិទ្ធិសេរីភាពមួយកម្រិតទៀត គឺអាចធ្វើដំណើរក្នុងប្រទេសបាន ប៉ុន្តែត្រូវហាមប្រាមការនិយាយពាក់ព័ន្ធនឹងរឿងនយោបាយ និងចេញពីប្រទេសកម្ពុជាដាច់ខាត។
ទោះជាយ៉ាងណាក៏ដោយ រហូតមកទល់នឹងពេលនេះ តុលាការកម្ពុជាបានអូសបន្លាយសវនាការរបស់លោកជិត ៤០លើកហើយ ប៉ុន្តែលោកនៅតែមានភាពស្អាតស្អំ ព្រោះលោកមិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ ខណៈលោក ហ៊ុន សែន អះអាងថាករណីរបស់លោក កឹម សុខា អាចនឹងត្រូវពន្យារពេលរហូតដល់ឆ្នាំ២០២៤ បន្ទាប់ពីបោះឆ្នោតជ្រើសតាំងតំណាងរាស្ត្រឆ្នាំ២០២៣ រួច។
ចំណែកឯអតីតមេកម្មាភិបាលខ្មែរក្រហមដែលសល់ពីរបបវាលពិឃាត លោក ហ៊ុន សែន បានលើកឡើងក្នុងសារលិខិតរបស់ខ្លួនក្នុងឱកាសពិធីបុណ្យចូលឆ្នាំខ្មែរថា លោកប្ដេជ្ញាការពារឱ្យបាននូវឯករាជ្យជាតិ សន្តិភាព អធិបតេយ្យជាតិ និងបូរណភាពទឹកដីឱ្យបាន់ដាច់ខាត ទោះត្រូវលះបង់ក្នុងតម្លៃណាក៏ដោយ។
លោក ហ៊ុន សែន ព្រមានថា រដ្ឋាភិបាលកម្ពុជាប្រឆាំងដាច់ខាតរាល់សកម្មភាពទាំងឡាយដែលពាក់ព័ន្ធនឹងបដិវត្តន៍ពណ៌ ឬការញុះញង់ណាមួយដែលផ្ទុយនឹងរដ្ឋធម្មនុញ្ញ និងគោលការណ៍នៃលទ្ធិប្រជាធិបតេយ្យ ដែលបង្កឱ្យមានអស្ថិរភាពនយោបាយ ឬចលនាខុសច្បាប់ក្នុងសង្គម៕