សហមេធាវីការពារក្តីឱ្យប្រធានគណបក្សសង្គ្រោះជាតិ លោក កឹម សុខា គ្រោងស្នើឲ្យតុលាការក្រុងភ្នំពេញធ្វើលិខិតកោះហៅរដ្ឋបរទេសមួយចំនួនដែលរដ្ឋាភិបាលបានចោទប្រកាន់ថា ជាប់ពាក់ព័ន្ធក្នុងសំណុំរឿងរួមគំនិតក្បត់ជាមួយលោក កឹម សុខា ក្នុងការប៉ុនប៉ងផ្ដួលរំលំរដ្ឋាភិបាលមកបំភ្លឺនៅតុលាការ ដើម្បីស្វែងរកការពិត។
សហមេធាវីការពារក្តីមេដឹកនាំបក្សប្រឆាំង លោក អាង ឧត្តម បានប្រាប់ក្រុមអ្នកសារព័ត៌មាននៅមុខសាលាដំបូងក្រុងភ្នំពេញនៅថ្ងៃទី២០ ខែមេសា ឆ្នាំ២០២២ នេះថា ការកោះហៅរដ្ឋបរទេសដែលជាប់ពាក់ព័ន្ធនឹងសំណុំរឿងរបស់ប្រធានគណបក្សសង្គ្រោះជាតិនេះ គឺជានីតិវិធីដ៏មានប្រសិទ្ធភាពមួយក្នុងការជួយឲ្យតុលាការស្វែងរកការពិតឲ្យបានកាន់តែឆាប់ និងជាភស្តុតាងបញ្ជាក់ថា ពួកគេពិតជាបានឃុបឃិតជាមួយលោក កឹម សុខា ដើម្បីផ្តួលរំលំរដ្ឋាភិបាលកម្ពុជាមែនឬយ៉ាងណានោះ។
មេធាវីរូបនេះបញ្ជាក់ថា រដ្ឋបរទេសដែលក្រុមមេធាវីការពារជនរងគ្រោះចង់ឲ្យមកបំភ្លឺនៅតុលាការនោះ មានដូចជា សហរដ្ឋអាមេរិក សហភាពអឺរ៉ុប និងរដ្ឋបរទេសជាច្រើនទៀត ជាដើម ព្រោះថាប្រទេសទាំងនោះហើយដែលមានជាប់ពាក់ព័ន្ធនឹងសំណុំរឿងរបស់លោក កឹម សុខា តាមការចោទប្រកាន់របស់រដ្ឋាភិបាលលោក ហ៊ុន សែន កាលពីឆ្នាំ២០១៧ កន្លងទៅ។
លោក អាង ឧត្តម ត្អូញត្អែរថា សវនាការនៅថ្ងៃពុធ ទី២០ មេសា នេះគ្មានអ្វីរីកចម្រើននោះទេ ព្រោះថាតុលាការបានអូសបន្លាយពេលវេលាក្នុងការចោទសួរជុំវិញតែពីការបោះឆ្នោតកាលពីឆ្នាំ២០១២ ព្រមទាំងធ្វើអត្ថាធិប្បាយនូវចម្លើយរបស់មេធាវីការពារសិទ្ធិជនរងគ្រោះដែលតុលាការមិនពេញចិត្តប៉ុណ្ណោះ។
ការអះអាងនេះ ធ្វើឡើងបន្ទាប់ពីសាលាដំបូងរាជធានីភ្នំពេញបានបើកសវនាការពេញមួយព្រឹកលើសំណុំរឿងប្រធានគណបក្សសង្គ្រោះជាតិ នៅថ្ងៃពុធសប្តាហ៍នេះ។
នៅថ្ងៃទី២០ ខែមេសា ឆ្នាំ២០២២ នេះ គឺជាសវនាការលើកទី៣៧ហើយដែលតុលាការជំនុំជម្រះលើសំណុំរឿងប្រធានគណបក្សសង្គ្រោះជាតិ លោក កឹម សុខា ប៉ុន្តែសវនាការនៅថ្ងៃនេះហាក់មានភាពតានតឹងជាងសវនាការមុនៗ ដោយការខ្វែងគំនិតគ្នាលើការសាកសួររវាងមេធាវីការពារសិទ្ធិជនរងគ្រោះ និងតំណាងអយ្យការ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីដើមខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេស និងត្រូវបានឃុំខ្លួននៅមន្ទីរឃុំឃាំងត្រពាំងផ្លុងអស់រយៈពេល ១ឆ្នាំ។ រហូតមកទល់នឹងពេលនេះមានរយៈពេលជិត ៥ឆ្នាំហើយ តុលាការមិនទាន់រកឃើញថាលោកមានទោសណាមួយនៅឡើយទេ ហើយតុលាការក៏មិនទាន់កោះហៅរដ្ឋបរទេសណាមួយមកឆ្លើយបំភ្លឺក្នុងសំណុំដែលខ្លួនចោទថា ពួកគេបានឃុបឃិតនឹងមេដឹកនាំបក្សប្រឆាំងនេះដែរ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ ធ្លាប់លើកឡើងថា ប្រសិនបើសំណុំរឿងលោក កឹម សុខា ជាសំណុំរឿងស្ថិតក្នុងការចាត់ចែងរបស់តុលាការដោយត្រឹមត្រូវ នោះករណីនេះនឹងត្រូវបានជំនុំជម្រះកាត់សេចក្តីរួចស្រេចទៅហើយ ព្រោះថាតុលាការអាចឃុំខ្លួនជនសង្ស័យយ៉ាងយូរបានត្រឹមតែ ១៨ខែប៉ុណ្ណោះ។ ប៉ុន្តែករណីរបស់លោក កឹម សុខា ដែលបានអូសបន្លាយពេលជំនុំជម្រះក្តីជាបន្តបន្ទាប់នោះ គឺមានន័យថាសំណុំរឿងនេះជារឿងនយោបាយសុទ្ធសាធ។
ទាក់ទិននឹងបញ្ហានេះ កាលពីអំឡុងខែកញ្ញា ឆ្នាំ២០២០ ក្នុងកិច្ចប្រជុំគណៈរដ្ឋមន្ត្រីនៅវិមានសន្តិភាព លោក ហ៊ុន សែន បានអះអាងថា ករណីលោក កឹម សុខា អាចនឹងត្រូវពន្យារពេល ៤ឆ្នាំទៀត គឺត្រូវពន្យារពេលរហូតដល់ក្រោយការបោះឆ្នោតឃុំ-សង្កាត់ឆ្នាំ២០២២ និងក្រោយការបោះឆ្នោតជាតិក្នុងឆ្នាំ២០២៣ ឯណោះ៕