កូនប្រុសរបស់លោក ហ៊ុន សែន គឺលោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺ និងជាអនុប្រធានទី១ នៃក្រុមការងារគណបក្សប្រជាជនកម្ពុជា បានប្រាប់ទៅសមាជិកគណបក្សប្រជាជនកម្ពុជា ដែលឪពុករបស់លោកកំពុងដឹកនាំសព្វថ្ងៃនេះថា ត្រូវធ្វើការជាមួយគ្នាឱ្យស្រុះដៃ ហត់នឿយជាមួយគ្នា ដើម្បីដោះស្រាយបញ្ហាជូនពលរដ្ឋ ស្របពេលការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ជិតមកដល់។
ការអះអាងរបស់លោក ហ៊ុន ម៉ានី ធ្វើឡើងនៅពេលសំណេះសំណាលជាមួយភ្នាក់ងារគណបក្សប្រជាជនកម្ពុជានៅស្រុកឧដុង្គ ខេត្តកំពង់ស្ពឺ កាលពីថ្ងៃទី២៣ ខែមេសា ឆ្នាំ២០២២។
យ៉ាងណា ការចុះជួបពលរដ្ឋមិនមែនមានតែកូនប្រុសលោក ហ៊ុន សែន ទេ ប៉ុន្តែមន្ត្រីគ្រាក់ៗដែលល្បីល្បាញខាងការកាប់បំផ្លាញព្រៃឈើ និងរំលោភដីធ្លីកន្លងមកដែលសុទ្ធសឹងតែចេញពីគណបក្សកាន់អំណាច ក៏បាននាំគ្នាចុះយកចិត្តពលរដ្ឋ ដោយមានទាំងចែកលុយ និងសម្ភារៈផ្សេងៗ ទោះបីជាពួកគេធ្លាប់គំរាមកំហែង និងធ្វើទុក្ខបុកម្នេញលើពលរដ្ឋក៏ដោយ។
អ្នកឃ្លាំមើលលើកឡើងថា គណបក្សប្រជាជនកម្ពុជាធ្វើការស្រុះដៃគ្នា គឺមិនមែនរួមគ្នាផ្សះផ្សាជាតិខ្មែរនោះទេ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ (PMD) លោក គឹម សុខ យល់ថា លោក ហ៊ុន ម៉ានី ល្មមឈប់បោកប្រាស់ពលរដ្ឋដូចជាឪពុករបស់លោកទៀតនោះទៅ ដោយសារជិត ៤០ឆ្នាំហើយ គណបក្សប្រជាជនកម្ពុជាធ្វើការស្រុះដៃគ្នាមែន តែមិនមែនស្រុះដៃគ្នាជាមួយខ្មែររួមផ្សះផ្សាជាតិ ដើម្បីជាតិខ្មែរនោះទេ។
លោកបន្តថា គណបក្សប្រជាជនកម្ពុជាហត់នឿយមែន តែមិនមែនហត់នឿយដើម្បីបម្រើផលប្រយោជន៍ពលរដ្ឋខ្មែរឡើយ គឺហត់នឿយរឿងប្លន់អំណាច ធ្វើទុក្ខបុកម្នេញលើពលរដ្ឋខ្មែរ បង្កើតភាពអយុត្តិធម៌ពេញប្រទេស កម្ទេចធនធានរបស់ជាតិខ្មែរ។ ករណីនេះ លោកថាលោក ហ៊ុន ម៉ានី គួរចេះខ្មាសអៀនពលរដ្ឋខ្លះ។
លោក គឹម សុខ បន្តថា ការបោះឆ្នោតឃុំ-សង្កាត់នៅខែមិថុនា ឆ្នាំ២០២២ ខាងមុខនេះទៀត ក៏ជាការរៀបចំបោះឆ្នោតដោយគណបក្សប្រជាជនកម្ពុជាទាំងស្រុង ដើម្បីប្លន់យកអំណាចមូលដ្ឋានដែរ ដែលវាជាការបោះឆ្នោតប្រហារស្មារតីរដ្ឋធម្មនុញ្ញជាតិ ដែលសហគមន៍អន្តរជាតិមិនអើពើ។
អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែល លោក កន សាវាង្ស បានសរសេរលើ facebook កាលពីថ្ងៃទី២៤ ខែមេសា ឆ្នាំ២០២២ ថា រដូវកាលដែលពលរដ្ឋមានតម្លៃ គឺក្នុងអំឡុងពេលដែលការបោះឆ្នោតជិតមកដល់។ ជាក់ស្ដែង ដូចបច្ចុប្បន្នជាដើម លោកសម្គាល់ឃើញថា ក្រុមគ្រួសារខ្លះត្រូវបានអ្នកល្បីល្បាញដើរលើកដៃសំពះ សុំស្គាល់ សួរសុខទុក្ខ សំណេះសំណាល សន្យាជួយដោះស្រាយអ្វីមួយ ហើយគ្រួសារខ្លះត្រូវបានគេរៀបចំជាសមាជិកបក្សជូនថែមទៀត។ ចំណែកសមាជិកគ្រួសារខ្លះទទួលបានម្នាក់ ២ម៉ឺនរៀល ហើយគ្រួសារខ្លះទៀតបានថវិកាហើយ ថែមទាំងទទួលបានសម្ភារៈផ្សេងៗទៀតអាស្រ័យលើក្រុមការងារកន្លែងនោះធូរធារ ឬក៏មានសមល្មម។
លោកស្នើឲ្យពលរដ្ឋដែលជាម្ចាស់ឆ្នោតពិចារណា ហើយថាការទទួលបានអ្វីគ្រប់បែបយ៉ាងដោយមិនមានការបង្ខិតបង្ខំនោះ មិនមែនជាកំហុសនោះទេ ប៉ុន្តែប្រជាពលរដ្ឋដែលជាម្ចាស់ឆ្នោតត្រូវធ្វើការវិនិច្ឆ័យ និងតាមដានអ្នកតំណាងដែលត្រូវជ្រើសរើសពេលបោះឆ្នោតនោះផងដែរ។ បន្ថែមពីនេះ កុំឱ្យចិត្តជាប់ជំពាក់ជាមួយលាភសក្ការៈ ឬសម្ដីពីរោះនៃការនិយាយ ឬកាយវិការនៃការគោរពមួយពេល ធ្វើឱ្យកំហុសកើតមានរយៈពេល ៥ឆ្នាំឱ្យសោះ។
របាយការណ៍របស់អង្គការអាដហុក បង្ហាញថា ក្នុងឆ្នាំ២០២១ វិវាទដីធ្លីធំៗបានកើនឡើងខ្ពស់ និងមានលក្ខណៈធ្ងន់ធ្ងរ ដោយមានការប្រើអំពើហិង្សា វាយបង្ក្រាប ចាប់ខ្លួន ឃុំខ្លួន និងបាញ់ប្រហារទៅលើពលរដ្ឋ ខណៈពលរដ្ឋដែលត្រូវបានចាប់ខ្លួនបានធ្លាក់ខ្លួនឈឺធ្ងន់ក្នុងពន្ធនាគារ។
យ៉ាងណាក៏ដោយ បញ្ហាទាំងអស់នេះមិនទាន់ត្រូវបានដោះស្រាយនៅឡើយ ហើយកត្តាដែលនាំឱ្យដោះស្រាយមិនបាន ដោយសារអ្នកដែលរំលោភដីធ្លី និងគំរាមកំហែងលើពលរដ្ឋជាមន្ត្រីចេញពីគណបក្សប្រជាជនកម្ពុជា ដែលដឹកនាំដោយលោក ហ៊ុន សែន៕