31 C
Phnom Penh

រដ្ឋសភា​កម្ពុជា​ខកចិត្ត​ចំពោះ​សភា​អឺរ៉ុប​ដែល​ព្រមាន​ដក EBA ទាំងស្រុង​ចេញពី​កម្ពុជា

ដោយ ឌឹ ខេមបូឌា ដេលី

បទវិភាគ

រដ្ឋសភា​កម្ពុជា​សម្ដែង​ការ​ខកចិត្ត​ជា​ខ្លាំង​ចំពោះ​សភា​អឺរ៉ុប ដែល​ព្រមាន​ដក​ប្រព័ន្ធ​អនុគ្រោះ​ពន្ធ EBA ចេញពី​កម្ពុជា​ទាំងស្រុង ពាក់ព័ន្ធ​នឹង​ការ​បង្ក្រាប​ជា​បន្តបន្ទាប់​លើ​ក្រុម​អ្នក​នយោបាយ​ប្រឆាំង​នៅ​កម្ពុជា។

រដ្ឋសភា​កម្ពុជា​បាន​ចេញ​សេចក្ដី​ថ្លែងការណ៍​នា​ថ្ងៃ​ទី​១០ ខែ​ឧសភា ឆ្នាំ​២០២២ បាន​ច្រានចោល​ញត្តិ​របស់​សភា​អឺរ៉ុប​ទាំងស្រុង ដោយ​បាន​ផ្អែក​លើក ៩​ចំណុច ដើម្បី​ឆ្លើយតប​នឹង​សេចក្ដី​សម្រេច​ញត្តិ​សភា​អឺរ៉ុប​ដែល​ចេញ​កាលពី​ថ្ងៃ​ទី​៥ ខែ​ឧសភា ឆ្នាំ​២០២២។

សភា​កម្ពុជា​ចាត់ទុក​សេចក្ដី​សម្រេច​របស់​សភា​អឺរ៉ុប ថា​ជា​ការ​បំភ្លៃ​ក្នុង​ន័យ​លម្អៀង មាន​ចរិត​នយោបាយ​ប្រកាន់​យក​ភាគី​តែ​ម្ខាង និង​ខ្វះ​ការ​គោរព​ដល់​រដ្ឋ​អធិបតេយ្យ។ មួយ​វិញ​ទៀត ការ​សម្រេច​នេះ និង​សេចក្ដី​សម្រេច​មុនៗ​ដែល​ពាក់ព័ន្ធ​នឹង​កម្ពុជា មាន​ចេតនា​មើល​រំលង​វឌ្ឍនភាព​នៃ​កំណែ​ទម្រង់​សិទ្ធិមនុស្ស និង​លទ្ធិប្រជាធិបតេយ្យ​ក្នុង​ប្រទេស​កម្ពុជា​ទាំងស្រុង។

បន្ថែម​ពី​នេះ សភា​អឺរ៉ុប​ផ្អែក​លើ​ប្រភព​ព័ត៌មាន​មិន​ច្បាស់លាស់ ដែល​ផ្ដល់​ដោយ​អ្នក​នយោបាយ​ឆ្វេង​និយម ពួក​ប្រជា​កល​និយម និង​សកម្មជន​នយោបាយ​ជ្រុល​និយម រួម​ទាំង​អង្គការ​សង្គម​ស៊ីវិល​ប្រឆាំង​នឹង​រដ្ឋាភិបាល ទោះបី​អ្នក​ទាំងនោះ​មិន​មែន​មក​ដល់​កម្ពុជា​ដោយ​ផ្ទាស់​ក៏ដោយ ហើយ​ក៏​គ្មាន​ការ​ប្រាស្រ័យ​ទាក់ទង​ជាមួយ​រដ្ឋាភិបាល​នោះ​ដែរ។

រដ្ឋសភា​កម្ពុជា​ដដែល​ថា គណៈកម្មាធិការ​ជាតិ​រៀបចំ​ការ​បោះឆ្នោត ដោយ​មាន​ការ​គាំទ្រ​បច្ចេកទេស​ពី​ដៃគូ​អភិវឌ្ឍន៍ និង​អង្គការ​សង្គម​ស៊ីវិល​ដែល​បាន​ខិតខំ​ប្រឹងប្រែង និង​បាន​ដាក់​ចេញ​នូវ​វិធានការ​ជាច្រើន ដើម្បី​ធានា​ការ​បោះឆ្នោត​ក្រុមប្រឹក្សា​ឃុំ-សង្កាត់​ឱ្យ​ប្រព្រឹត្ត​ទៅ​ដោយ​សេរី ត្រឹមត្រូវ និង​យុត្តិធម៌​ក្នុង​សន្តិភាព និង​មាន​តម្លាភាព ដើម្បី​បរិយាកាស​អំណោយ​ផល​ល្អ និង​មាន​កា​ប្រកួតប្រជែង​ដោយ​ស្មើ​ភាព សម្រាប់​គណបក្ស​នយោបាយ​ដែល​បាន​ចុះឈ្មោះ​ទាំងអស់​តាម​គោលការណ៍​បោះឆ្នោត​បែប​ប្រជាធិបតេយ្យ និង​គោលការណ៍​ពហុ​បក្ស។

ពាក់ព័ន្ធ​នឹង​សំណុំរឿង​លោក កឹម សុខា វិញ រដ្ឋសភា​កម្ពុជា​អះអាង​ថា​ចង់​ផ្ដួល​រំលំ​រដ្ឋាភិបាល​ស្រប​ច្បាប់​ដែល​មិន​អាច​អត់ឱន​ឱ្យ​ដោយ​ច្បាប់​នៃ​ប្រទេស​ណា​មួយ​បាន​ឡើយ រួម​ទាំង​អឺរ៉ុប​ផង​ដែរ។

លោក កឹម សុខា ត្រូវ​បាន​តុលាការ​ចោទប្រកាន់​ពី​បទ «សន្ទិដ្ឋភាព ត្រូវរ៉ូវ​ជាមួយ​រដ្ឋ​បរទេស​ចង់​ផ្ដួល​រំលំ​រដ្ឋាភិបាល» ប៉ុន្តែ​មកដល់​ពេលនេះ តុលាការ​កម្ពុជា​មិន​ទាន់​កោះហៅ​ប្រទេស​ណា​មួយ​ដែល​ជាប់​ពាក់ព័ន្ធ​រឿងក្ដី​នេះ​មក​ចូលរួម​សវនាការ​នៅឡើយ។ ករណី​នេះ តាមរយៈ​លិខិត​ស្នើសុំ​ចាត់​វិធានការ​មួយ​ច្បាប់​ដែល​ចេញ​កាលពី​ខែ​កញ្ញា ឆ្នាំ​២០១៧ គឺ​មាន​ភ្ជាប់​មក​ជាមួយ​ឈ្មោះ​ប្រទេស​ចំនួន​៩ អង្គការ​អន្តរជាតិ​ចំនួន​៨ និង​បុគ្គល​ដែល​ជាប់​ពាក់ព័ន្ធ​ក្នុង​បទ​ចោទ​ចំនួន ៥​នាក់។

តំណាង​ជាន់ខ្ពស់ និង​ជា​អនុប្រធាន​សហភាព​អឺរ៉ុប (EU Parliament) លោក ចូសឹប បូរ៉ែល (Josep Borrell) នៅតែ​ចាត់ទុក​វត្តមាន​របស់​លោក កឹម សុខា ក្នុង​ការ​ចូលរួម​ការ​បោះឆ្នោត​នា​ពេល​ខាងមុខ​នេះ​ជា​រឿង​សំខាន់។ ករណី​នេះ លោក​ថា​ការ​បោះឆ្នោត​នៅ​កម្ពុជា​នា​ពេល​ខាងមុខ​នេះ គួរ​តែ​មាន​ការ​អនុញ្ញាត​ឲ្យ​អតីត​គណបក្ស​ប្រឆាំង​ចូលរួម និង​ដោះស្រាយ​ចំពោះ​ករណី​តុលាការ​ដែល​ប្រឆាំង​នឹង​លោក កឹម សុខា។

ជាមួយ​គ្នា​នេះ ទិដ្ឋភាព​នៃ​ការ​បោះឆ្នោត​ខាងមុខ កម្ពុជា​គួរ​ចាត់​វិធានការ​ជាបន្ទាន់​ដើម្បី​បើក​ឡើងវិញ​នូវ​លំហ​នយោបាយ​នៅ​ក្នុង​ប្រទេស និង​អនុញ្ញាត​ឱ្យ​មាន​ការ​ចូលរួម​របស់​គណបក្ស​ប្រឆាំង​ដែល​គួរ​ឱ្យ​ទុកចិត្ត​មួយ ជាពិសេស​កម្ពុជា​គួរ​អនុញ្ញាត​ឱ្យ​មាន​ដំណោះស្រាយ​ចំពោះ​ករណី​តុលាការ​ប្រឆាំង​នឹង​លោក កឹម សុខា ដែល​បន្ត​ត្រូវ​បាន​បដិសេធ​នូវ​យុត្តិធម៌ និង​សិទ្ធិ​នយោបាយ។

លោក មុត ចន្ថា បាន​សរសេរ​លើ​ទំព័រ​ហ្វេសប៊ុក​នា​ថ្ងៃ​ទី​១១ ឧសភា នេះ ដោយ​ចាត់ទុក​បក្ស​ភ្លើង​ទៀន​ដែល​បាន​រត់​ចេញពី​សម្ព័ន្ធភាព​នយោបាយ​អតីត​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ មិន​ត្រូវ​បាន​ចាត់ទុក​ជា​បក្ស​ប្រឆាំង​គួរ​ទុកចិត្ត​បាន​ឡើយ។ លោក​បន្ត​ថា ប្រសិនបើ​បក្ស​ភ្លើង​ទៀន​ជា​បក្ស​ប្រឆាំង​ដ៏​ធំ ឬ​គួរ​ឲ្យ​ទុកចិត្ត​មែន ម្ល៉េះ​សហភាព​អឺរ៉ុប​ប្រាកដជា​និយាយ​ចំ​ឈ្មោះ ឬ​គាំទ្រ​គណបក្ស​នេះ​បាត់​ទៅ​ហើយ។

លោក​បន្ត​ថា លោក កឹម សុខា នៅតែ​ត្រូវ​បាន​ចាត់ទុក​ជា​មេដឹកនាំ​គណបក្ស​ប្រឆាំង​គួរ​ទុកចិត្ត​ម្នាក់​គត់​ដែល​សហភាព​អឺរ៉ុប នៅតែ​បន្ត​ទាមទារ​ឲ្យ​មាន​ការ​ផ្តល់​នូវ​សិទ្ធិ​នយោបាយ​ជូន​លោក​វិញ តាមរយៈ​ការ​ដោះស្រាយ​ចំពោះ​ករណី​តុលាការ​ប្រឆាំង​នឹង​រូបលោក។

កាលពី​ថ្ងៃ​ទី​៥ ខែ​ឧសភា ឆ្នាំ​២០២២ សមាជិក​សភា​អឺរ៉ុប បាន​ស្នើ​ទៅកាន់​ប្រទេស​សមាជិក​អឺរ៉ុប​ទាំង ២៧​ប្រទេស​ឱ្យ​ដាក់​ទណ្ឌកម្ម​លើ​ប្រទេស​កម្ពុជា ដោយ​ដក​ប្រព័ន្ធ​អនុគ្រោះ​ពន្ធ​ទាំងស្រុង ប្រសិនបើ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​នៅ​ថ្ងៃ​ទី​៥ ខែ​មិថុនា ឆ្នាំ​២០២២ និង​ការ​បោះឆ្នោត​ជ្រើស​តាំង​តំណាងរាស្ត្រ​នៅ​ឆ្នាំ​២០២៣ ត្រូវ​បាន​គេ​រក​ឃើញ​ថា​គ្មាន​ភាព​សេរី ត្រឹមត្រូវ និង​យុត្តិធម៌៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស